Ipapasal nen Jehova Iray Managpastol Parad Pulok To

“Si Jehova mangiter na kakabatan; ompaway ed sangi to so pikakabat tan pakatalos.”​—ULIRAN 2:6.

1, 2. Akin a dadampoten na saray bautismadon lalaki so mas malaknab a responsabilidad ed kongregasyon?

 “MALIKELIKET ak sanen aturo ak bilang matatken,” so inkuan nen Nick, a pitoy taon to lan manlilingkor bilang manangasikaso. “Impasen ko iyan pribilehyo bilang pankanawnawan napalaknab so serbisyok ed si Jehova. Aliknak so utang na linawak ed sikato lapud amin a ginawa to parad siak. Labay ko met a tulongan iray membro na kongregasyon ed anggaay nayarian ko, unong ed paraan na impanulong met ed siak na arum a mamatatken.” Balet, anggaman alikna to so liket et wala met iray pampapagaan to. “Lapud siak so man-30 años ni labat sanen aturo ak,” so intuloy nen Nick, “mapaga ak ompano andian ak na nakaukolan iran dunong​—say pakatebek tan kakabatan​—pian epektibon manpastol ed kongregasyon.”

² Saramay tinuro nen Jehova a mangasikaso ed pulok to so walaan na dakel a rason pian manliket. Diad impangaon to ed imbaga nen Jesus, pinanonotan nen apostol Pablo iray mamatatken ed Efeso nipaakar ed sakey a rason: “Lalo a mapalar so mangiter nen say mangawat.” (Gawa 20:35) Say panlingkor bilang ministeryal a lingkor odino matatken so kaaruman iran paraan pian saray bautismadon lalaki so makapangiter ed si Jehova tan ed kongregasyon. Alimbawa, saray ministeryal a lingkor so ontutulong ed saray mamatatken. Sarayan lingkor so mangaasikaso met ed dakerakel niran importantin kimey a mankaukolan na malaem a panaon. Saratan ya agagi so pakikiwasen na panangaro ed Dios tan ed kapara ran too pian mangisaklang na mabmablin serbisyo.​—Marcos 12:30, 31.

3. Akin a masuyat so arum a mandampot ed saray pribilehyo ed kongregasyon?

³ Komusta met so nipaakar ed Kristianon laki a masuyat a mandampot ed pribilehyon magmaliw a lingkor tan diad saginonor et bilang matatken lapud liknaen ton agkualipikado? Singa si Nick, nayarin pampapagaan to a sikatoy andian na saray dunong a nakaukolan pian magmaliw ya epektibon managpastol. Bilang bautismadon agin laki, kasin sakey ka met ed saramay makakalikna na ontan? Natalosan so ontan a liknaan. Mikuentaan si Jehova ed saray aturon managpastol nipaakar ed paraan na pidedeneng da ed pulok. Oniay inkuan nen Jesus: “Anggan siopa a naikdan na dakel, dakel met so nasingil ed sikato; et say angimatalkan da na dakel, kerewen da ed sikato so dadakel.”​—Lucas 12:48.

4. Panon a tutulongan nen Jehova iramay tuturoen ton mangasikaso ed karnero to?

⁴ Iilaloan kasi nen Jehova ed saramay turoen ton lingkor tan mamatatken a manakbat na kaaruman nin responsabilidad? Diad pidumaan, itatarya to so praktikal a tulong ed sikara pian aglambengat ontalona noagta pian onaligwas. Unong a siningbat la ed inmunan artikulo, sikara so papagamoran nen Jehova na masanton espiritu to, a say bunga na satan et ontutulong ed sikara pian matamoy dan naasikaso iray karnero. (Gawa 20:28; Galacia 5:22, 23) Niarum ni, iiter nen Jehova ed sikara so karunongan, kakabatan, tan pakatebek. (Uliran 2:6) Panon ton gagawaen itan? Singbaten tayo so taloran paraan na pangipapasal nen Jehova ed saray indibidual a tuturoen ton mangasikaso ed karnero to.

 Impasal na Saray Eksperiensyadon Managpastol

5. Akin a si Pedro tan Juan et epektibon managpastol?

⁵ Sanen akatalindeg si apostol Pedro tan Juan diad arap na Sanhedrin, sikara so impasen na saray makabat-ed-mundo a huis na satan a korte bilang “andi-aral tan kabanyakan.” On, makabasa tan makapansulat ira, balet anggapo so antokaman a rabinikon panangipasal da sanen inaral da so Kasulatan. Anggaman ontan, si Pedro tan Juan a kaiba niray arum a babangatan so apaneknekan ya epektibon managbangat, ya apakiwas so dakel ed saramay tinmalineng ed sikara a magmaliw a mananisia. Panon a nagmaliw ya epektibon managbangat irayan ordinaryo labat a lalaki? Kayari ran dinengel si Pedro tan Juan, say korte so ‘akabidbir ed sikara bilang kaulop nen Jesus.’ (Gawa 4:1-4, 13) Tua, inawat da so masanton espiritu. (Gawa 1:8) Balet mapatpatnag met​—anggan diad saramay ukom ya abulag ed espiritual​—a si Jesus so angipasal ed saratan a lalaki. Sanen kaulop to ni iray apostol diad dalin, imbangat ira nen Jesus ya aglambengat mantipon ed saray kinmarnero noagta no panon met iran pastolan no kabiangan la ra ed kasimpukokan.​—Mateo 11:29; 20:24-28; 1 Pedro 5:4.

6. Anton alimbawa na panangipasal ed arum so ginawa nen Jesus tan si Pablo?

⁶ Kayari na inkioli nen Jesus, intultuloy ton impasal iramay tinuro to bilang managpastol. (Apocalipsis 1:1; 2:1–​3:22) Alimbawa, personal ton pinili tan indirehi so impangipasal ed apostol Pablo. (Gawa 22:6-10) Inapresya nen Pablo so impangipasal ed sikato tan imbangat to met ed arum a mamatatken so naaralan to. (Gawa 20:17-35) Singa bilang, dakel a panaon tan biskeg so inusar to pian ipasal si Timoteo a magmaliw a ‘komikimey’ diad panaglingkor ed Dios, ‘ya anggapo so ibaing to.’ (2 Timoteo 2:15) Maapit so impankaaro na sarayan lalaki. Diad asasakbay ni et oniay insulat nen Pablo nipaakar ed si Timoteo: “Singa sakey ya ugaw a manlingkor ed ama, ontan so impiulop to ed siak a nanlingkor ed kikayat na ebanghelyo.” (Filipos 2:22) Agginetma nen Pablo a gawaen si Timoteo odino arum nin totoo a magmaliw a babangatan ton mismo. Imbes, pinaseseg to iray kapananisiaan to a ‘mangalig ed sikato, a singa sikato met ed Kristo.’​—1 Corinto 11:1.

7, 8. (a) Anton eksperiensya so mangipabitar a maabig iray resulta sano aligen na saray mamatatken si Jesus tan si Pablo? (b) Kapigan ya igapo na mamatatken so pangipasal ed saray prospektibon ministeryal a lingkor tan mamatatken?

⁷ Diad pangaalig da ed si Jesus tan si Pablo, saray eksperiensyadon managpastol so mabulos a mangipapasal ed saray bautismadon agagin lalaki, tan maabig met iray resulta. Konsideraen pa so eksperiensya nen Chad. Sikato so binmaleg ed pamilya a naapag ed relihyon balet ta sikato so agano nin aturo bilang matatken. Oniay imbaga to: “Diad inlabas na saray taon, siak so tinulongan na pigaran eksperiensyadon mamatatken pian onaligwas ed espiritual. Lapud agmananisia so amak, saratan a mamatatken so angipatnag ed siak na nikaduman interes tan sikara so nagmaliw a kaamaan ko ed espiritual. Impanaon da so pangipasal ed siak diad ministeryo, tan diad saginonor et sakey a matatken so nagkalautlan angipasal ed siak diad pangasikaso ed saray naawat kon asainmin ed kongregasyon.”

⁸ Unong ed ipapatnag na eksperiensya nen Chad, impasal na saray makatebek a managpastol iray prospektibon ministeryal a lingkor tan mamatatken sakbay ira ya onaligwas tan onkualipika ed saratan a pribilehyo. Akin ya ontan? Lapud igaganggan na Biblia a nepeg a kapeten na saray ministeryal a lingkor tan mamatatken so atagey ya estandarte ed moral tan espiritual sakbay ira a naturon manlingkor. Sikara so nepeg a “nasali ni ya unona.”​—1 Timoteo 3:1-10.

9. Anto so responsabilidad na saray matatken-ed-espiritual a managpastol, tan akin?

⁹ Pian nasali iray bautismadon agagin lalaki, makatunongan labat ya ipasal niran unona. Bilang ilustrasyon: No walay mairap ya ipa-eksamin ed sakey ya estudyante ed eskuelaan balet ta anggapo so espisipikon panangipasal ed sikato na saray managbangat, kasin makapasa itan ya estudyante? Seguradon andi. Kanian nakaukolan so panangipasal. Balet, saray manonot a managbangat so mangipasal ni ed saray estudyante ra pian aglambengat makapasa ed eksamin noagta pian nausar da so kakabatan a nagamoran da. Ontan met, tutulongan na saray maseet a  mamatatken iray bautismadon agagin lalaki pian nabayuboan da iray kalidad a nakaukolan parad aturon laki diad pangitarya ed sikato na espisipikon panangipasal. Agda lambengat tulongan irayan agagin lalaki pian naturo iran manlingkor noagta tulongan met ira a mangasikason maong ed pulok. (2 Timoteo 2:2) Siempre, nepeg a gawaen na saray bautismadon agagin lalaki so betang da tan panseetan dan kapeten iray kualipikasyon a nakaukolan parad sakey a ministeryal a lingkor odino matatken. (Tito 1:5-9) Anggaman kuan, diad mabulos a pangipasal ed saramay manadampot ed responsabilidad diad loob na kongregasyon, saray eksperiensyadon managpastol so ontulong ed sikara a mas maples ya onaligwas.

10, 11. Panon ya ipasal na saray managpastol so arum parad kaaruman iran pribilehyo?

¹⁰ Diad espisipikon paraan, panon a nipasal na saray eksperiensyadon managpastol so arum a mangasikaso ed saray pribilehyo ed kongregasyon? Unona ed amin, diad pangipatnag da na interes ed saray agagin lalaki diad loob na kongregasyon​—a maparanay a mikimey ed sikara diad lawak na kimeyan tan tulongan ira ya onaligwas ed abilidad dan mangagamil ‘a matunong ed salita a matua.’ (2 Timoteo 2:15) Itotongtong na saray matatken-ed-espiritual a managpastol ed saratan ya agagin lalaki so liket a nalilikna ra ed panlilingkor ed arum tan ed inkapnek a nagagamoran da lapud pangileletneg tan panadampot da ed saray maespiritual a kalat. Sikara so mapangasin mangiyoopresi met na saray espisipikon suhestion no panon a magmaliw a ‘napanuliranan na pulok’ so sakey ya agin laki.​—1 Pedro 5:3, 5.

¹¹ Sano naturo so sakey ya agin laki bilang ministeryal a lingkor, saray makabat a managpastol so mantultuloy a mangipasal ed sikato. Si Bruce, a manlilingkor bilang sakey a matatken diad loob la na pigaran dekada, so angikuan: “Labay koy onyurong a kaiba so sakey a balon aturon lingkor tan irepaso ed sikato iray instruksion ya impalapag na matoor tan makabat ya aripen. Babasaen mi met so antokaman iran totontonen nipaakar ed espisipikon asainmin, insan labay ko so mikimey ed sikato anggad nakabisado to laray obligasyon to.” Legan a makakagamor na eksperiensya so sakey a lingkor, nayari met a sikatoy ipasal ed panagpastol a kimey. “Sano mangitagar ak na sakey a ministeryal a lingkor diad panagpastol ya ibibisita,” so intuloy nen Bruce, “sikato so tutulongan kon manpili na espisipiko iran teksto a mamaseseg tan mamakiwas ed indibidual odino pamilya a bisitaen mi. Importantin naaralan so pangusar ed Kasulatan diad paraan a manabi ed puso ta pian say sakey a lingkor et magmaliw ya epektibon managpastol.”​—Hebreos 4:12; 5:14.

12. Panon ya ipasal na saray eksperiensyadon managpastol so balo niran aturon mamatatken?

¹² Nagunggonaan met a maong iray balo nin aturon managpastol diad kaaruman a panangipasal. Oniay inkuan nen Nick, ya asalambit diad gapo: “Say impangipasal ed siak na duaran matatken lan manangasikaso so akatulong a maong. Amta na sarayan agagi no panon ya asikasoen so pigaran pamaakaran. Sikara so maanos lawas ya ondedengel ed siak tan ikokonsidera ran maong so punto de bistak​—anggano ag-ira mipakna ed satan. Dakel so naaralan ko ed impan-obserbak ed mapaabeba tan marespeton impideneng da ed agagi diad loob na kongregasyon. Impurek ed siak na sarayan mamatatken a nakaukolan so makabat a pangusar ed Biblia sano reresolbien iray problema odino mamapaseseg.”

Impasal ed Salitay Dios

13. (a) Anto so nakaukolan na sakey ya agin laki pian sikatoy magmaliw ya epektibon managpastol? (b) Akin ya imbaga nen Jesus a: “Say bangat ko agko kien”?

¹³ On, lugan na Salitay Dios, say Biblia, iray ganggan, prinsipyo, tan alimbawa a nakaukolan na sakey a managpastol pian “anggapo komon so pankulangan to, a nabangatan a maong ed amin a  gawa a maabig.” (2 Timoteo 3:16, 17) Say sakey ya agin laki so nayarin walaan na maong ya edukasyon, balet ta makatulong so pikakabat to ed Kasulatan tan say pangiyaplika to ed satan pian magmaliw ya epektibon managpastol. Konsideraen pa so alimbawa nen Jesus. Sikato so sankatudioan, makatebek a tuloy, tan sankarunongan a maespiritual a managpastol diad dalin; ingen ta agto nanmatalek ed dilin kakabatan to sanen imbangat to iray karnero nen Jehova. Oniay imbaga to: “Say bangat ko agko kien, balet kien na angibaki ed siak.” Akin a say papagalangan nen Jesus et say mangatatawen ya Ama to? Oniay insalaysay to: “Say mansalita a manlapu ed inkasikato anapen to so dayew ton dili.”​—Juan 7:16, 18.

14. Panon a napaliisan na saray managpastol so mananap na dilin kirayewan da?

¹⁴ Papaliisan na saray matoor a managpastol so pananap na dilin kirayewan da. Ibabase ra so simbawa tan panamaseseg da ed Salitay Dios, aliwan diad dilin kakabatan da. Natatalosan da a say responsabilidad na sakey a managpastol et say panulong ed karnero a makagamor na “kanonotan nen Kristo,” aliwan say kanonotan na saray mamatatken. (1 Corinto 2:14-16) Alimbawa, panon to no say sakey a matatken ya ontutulong ed sakey a sanasawan walaay problema ed panamaley et ibase to so simbawa to ed dilin eksperiensya to imbes a diad saray prinsipyo na Biblia tan ed impormasyon ya impalapag na “matoor tan makabat ya aripen”? (Mateo 24:25) Say simbawa to so nayarin naimpluensyaan a maong na lokal iran kustombre tan niyapasakey labat ed limitadon pikakabat to. Tua, aliwa met a mauges so arum a kustombre, tan nayarin say matatken et eksperiensyado ed bilay. Balet nagunggonaan a maong so karnero sano pasesegen ira na saray managpastol ya ontalineng ed boses nen Jesus tan ed saray salita nen Jehova imbes a dia ed kanonotan na totoo odino ed totontonen na lokal a kustombre. ​—Salmo 12:6; Uliran 3:5, 6.

Impasal na “Matoor tan Makabat ya Aripen”

15. Anto so ingganggan nen Jesus ed say “matoor tan makabat ya aripen,” tan anto so sakey a rason no akin a matalona so aripen a klase?

¹⁵ Saray managpastol a singa di apostol Pedro, Juan, tan Pablo so membro na grupo a deneskribe nen Jesus bilang “matoor tan makabat ya aripen.” Sayan aripen a klase so tugyopen na saray alanaan na espiritun agagi nen Jesus diad dalin, a say ilalo ra et miuley ed si Kristo diad tawen. (Apocalipsis 5:9, 10) Legan na sarayan kaunoran ya agew na sayan sistema, ondaraiset so bilang na saray agagi nen Kristo ya atilak diad dalin. Balet, say kimey a pagagawa nen Jesus ed sikara​—say pangipulong ed maong a balita na Panarian sakbay ya onsabi so anggaan​—so malaknab la natan a nipapasabi. Anggaman ontan, say aripen a klase so ontatalonan tuloy! Akin? Say sakey a rason et ipapasal da iray membro na “arum a karnero” ya ontulong ed sikara diad panagpulong tan panagbangat a kimey. (Juan 10:16; Mateo 24:14; 25:40) Natan say  baleg a kabiangan na kimey so susumpalen na sayan matoor a grupo.

16. Panon ya ipapasal na aripen a klase iray aturon lalaki?

¹⁶ Panon so pangipapasal na aripen a klase? Nen inmunan siglo, saray manangilaman na aripen a klase so autorisadon mangipasal tan manuro na saray manangasikaso ed saray kongregasyon, tan saratan met so mangipasal ed saray karnero. (1 Corinto 4:17) Ontan met natan. Say Mananguley ya Ulop​—say melag a grupo na saray alanaan a mamatatken a mangirerepresenta ed aripen a klase​—so angiter na autoridad ed saray manangilaman to pian mangipasal tan manuro na saray lingkor tan mamatatken diad samplon nilibon kongregasyon ed sankamundoan. Niarum ni, oorganisaen na Mananguley ya Ulop iray eskuelaan pian ipasal iray membro na Komite na Sanga, saray ombiabiahen manangasikaso, mamatatken, tan ministeryal a lingkor no panon so sankaabigan a pangasikaso ed saray karnero. Nitatarya iray kaaruman a direksion diad panamegley na saray sulat, diad saray artikulon impalapag ed Panag-Bantayan, tan diad panamegley na arum niran publikasyon, a singa say Organisadon Manggawa na Linawa nen Jehova. *

17. (a) Panon ya impatnag nen Jesus so panagmatalek to ed aripen a klase? (b) Panon a nipatnag na saray maespiritual a managpastol so panagmatalek da ed aripen a klase?

¹⁷ Nanmatalek a maong si Jesus ed aripen a klase kanian sikara so tinuro ton mangasikaso ed “amin a wala ed sikato,” salanti, amin ya espiritual ya intereses to diad dalin. (Mateo 24:47) Papaneknekan na saray aturon managpastol a panmamatalekan da met so aripen a klase diad pangiyaaplika ra ed panangidirehi na Mananguley ya Ulop na satan. On, iyaalibansa na saray managpastol so pankakasakey ed limog na pulok sano ipapasal da so arum, sano aabuloyan da so Salitay Dios a mangipasal met ed sikara, tan sano iyaaplika ra so panangipasal na aripen a klase. Agaylay pisalsalamat tayo ta ipapasal la nen Jehova iray lalakin mangaasikason maong ed kada membro na Kristianon kongregasyon!

[Paimano ed leksab]

Panon Yon Ebatan?

• Panon ya ipapasal na saray matatken-ed-espiritual a managpastol so arum ya agagin lalaki?

• Akin ya agmanbabangat iray managpastol unong ed opinyon dan dili?

• Panon tan akin ya ipapatnag na saray managpastol so panagmatalek da ed aripen a klase?

[Tepetepet Parad Panagaral]

[Saray litrato ed pahina 24, 25]

Ipapasal na saray Kristianon mamatatken iray malangwer nin lalaki ed loob na kongregasyon

[Saray litrato ed pahina 26]

Itatarya na “matoor tan makabat ya aripen” so daakan a panangipasal ed saray mamatatken