Matoor a Panlingkoran so Kristo ya Ari

“Sikato so naikdan na panuley, tan gayaga, tan sakey a panarian, ya amin so saray baley, saray nasyon, tan pansasalita manlingkor ira komon ed sikato.”​—DANIEL 7:14.

1, 2. Panon tayon naseguro ya agni sigpot ya inawat nen Kristo so pakayari ed Panarian nen 33 K.P.?

 WALA kasi so manuley a niiter to so bilay to parad saray uuleyan to insan nabilay lamet pian manuley bilang ari? Wala kasi so ari a makapambilay diad dalin ta pian napakiwas to iray uuleyan ton manmatalek tan manmatoor ed sikato, insan onla ed tawen pian manuley? Saksakey a persona so makapanggawa labat ed satan, tan anggapo lay arum noagta si Jesu-Kristo. (Lucas 1:32, 33) Nen Pentecostes 33 K.P., kayari na impatey, inkioli, tan intokotok nen Kristo diad tawen, sikato so “inyan [na Dios] ya ulo ed saray lapag a bengatla a nipaakar ed iglesia.” (Efeso 1:20-22; Gawa 2:32-36) Diad ontan a paraan, si Kristo so ginmapon nanuley balet ta diad limitadon paraan. Saray inmunan sakop to et saray Kristianon alanaan na espiritu, a manugyop ed espiritual ya Israel, say “Israel na Dios.”​—Galacia 6:16; Colosas 1:13.

² Ngalngali 30 a taon kayari na satan a Pentecostes nen 33 K.P., pinekderan nen apostol Pablo ya agni sigpot ya inawat nen Kristo so pakayari ed Panarian, noagta sikato so ‘akayurong ed nikawanan na Dios, manlapud saman angga ed arapen a manaalagar angga ed saray kabusol to so niiyan ed gagatinan na salisali to.’ (Hebreos 10:12, 13) Insan, diad pansampot la na inmunan siglo K.P., anengneng nen masiken lan apostol Juan diad pasingawey a say Soberano ed Uniberso, si Jehova, so angitrono ed si Kristo Jesus bilang Ari ed kapkapangiletneg a Panarian ed tawen. (Apocalipsis 11:15; 12:1-5) Unong ed punto de bista tayo diad sayan panaon na awaran, narepaso tayo so makatantandan ebidensya a mamapaneknek ed inggapo la nen Kristo a manuley bilang Mesianikon Ari ed tawen nen 1914. *

3. (a) Say maong a balita na Panarian so awalaan na anton balon aspekto manlapu la’d 1914? (b) Antoran tepet so itepet tayo ed inkasikatayo?

³ On, manlapu la’d 1914 et say maong a balita na Panarian so angilaktip ed makapaliket a balon aspekto. Si Kristo so aktibo lan manuuley bilang Ari ed mangatatawen a Panarian na Dios, balet ta dia “ed pegley na saray kakabusol [to].” (Salmo 110:1, 2; Mateo 24:14; Apocalipsis 12:7-12) Niarum ni, diad interon dalin, saray matoor ya uuleyan to so maligsan ontutulok ed autoridad to diad pibibiang da ed programa na panangibangat na Biblia diad interon mundo, ya agnaparaan ed awaran na katooan. (Daniel 7:13, 14; Mateo 28:18) Saray Kristianon alanaan na espiritu, saray “anak na panarian,” so manlilingkor bilang embahadores odino “ibabaki [a mangilalaman ed si] Kristo.” Sikara so matoor a susuportaan na ondarakel ya ulop na “arum a karnero” nen Kristo, a manlilingkor bilang mensahero na Panarian na Dios. (Mateo 13:38; 2 Corinto 5:20; Juan 10:16) Anggaman ontan, nakaukolan tayon surien no akin a sikatayo bilang indibidual et talagan mamibidbir ed autoridad nen Kristo. Kasin mapekder itayon manmamatoor ed sikato? Panon tayon nipatnag so katooran tayo ed sakey ya Ari a manuuley la ed tawen? Balet, singbaten tayo nin unona no antoray rason tayo ed pagmamaliw tayon matoor ed si Kristo.

 Sakey ya Ari a Makapasagyat a Panmatooran

4. Anto so agawaan nen Jesus bilang Aturon-Ari legan na ministeryo to diad dalin?

⁴ Say katooran tayo ed si Kristo so nibase ed panamabli tayo ed ginawa to ontan met ed saray alay abig iran kalidad to. (1 Pedro 1:8) Sanen wadiad dalin si Jesus, sikato bilang Aturon-Ari so angipatnag ed limitadon paraan no anto so gawaen to sano manuley la ya Ari ed sankamundoan diad panaon ya inggeter na Dios. Pinakan to iray narasan. Pinaabig to iray mansasakit, bulag, lupoy, telek, tan emel. Pinaoli to ni ingen iray pigaran inaatey lan indibidual. (Mateo 15:30, 31; Lucas 7:11-16; Juan 6:5-13) Niarum ni, no naamtaan tayo so nipaakar ed impanbilay nen Jesus diad dalin, naamtaan tayo met iray kalidades to bilang Manuley ed dalin diad arapen​—a nagkalautlan makatantanda so masakripisyon panangaro to. (Marcos 1:40-45) Nipaakar ed saya, oniay imbaga nen Napoléon Bonaparte, unong ed sakey a report: “Si Alejandro, Cesar, Carlomagno, tan siak a mismo so angiletneg na saray empiryo, balet anto so angibasiyan mi ed saray agawaan min angkakabaleg a bengatla? Nibase iratan ed puersa. Si Jesu-Kristo lambengat so angiletneg ed panarian to unong ed aro, tan anggad sayan panaon tayo et minilyon a totoo so mabulos ya ompatey nisesengeg ed sikato.”

5. Akin a makapasagyat so personalidad nen Jesus?

⁵ Lapud mauyamo tan mapaabeban-impanpuso si Jesus, saramay nagogonigon ed saray pananesdes tan pakabebelatan so nainawaan ed makapabiskeg iran bangat to tan ed maong a personalidad to. (Mateo 11:28-30) Maasingger iray ugugaw ed sikato. Saray mapaabeba tan makatebek a lalaki so magunaet a nagmaliw a babangatan to. (Mateo 4:18-22; Marcos 10:13-16) Lapud makonsidera tan marespeton ugali to, nanmatoor ed sikato so dakel a bibiin matakot ed Dios, a pigara ed sikara so angitarya na panaon, sagpot, tan materyal iran kayarian da pian sikato so naasikaso legan ton susumpalen so ministeryo to.​—Lucas 8:1-3.

6. Antoran matamoy a liknaan so impatnag nen Jesus sanen inatey si Lazaro?

⁶ Imparungtal nen Kristo so pigara ed saray matamoy a tuloy a liknaan to sanen inatey so pinabli ton kaaro a si Lazaro. Sikato so atenyeg a maong ed impanermen di Maria tan Marta ya agto apokpokan so paningel to lapud ermen, kanian sikato so “nannangis.” Sikato so “agonigon”​—nanermen ed pirmin sakit na linawa tan kaermenan​—anggaman amta to a bilayen to met lanlamang ed saman si Lazaro. Insan, lapud aro tan panangabagey, inusar nen Jesus so autoridad ya inter na Dios ed sikato pian pabilayen si Lazaro manlapud inaatey.​—Juan 11:11-15, 33-35, 38-44.

7. Akin a si Jesus et makanepegan na katooran tayo? (Nengnengen met so kahon ed pahina 31.)

⁷ Mandinayew itayon maong ed mabiskeg a panangaro nen Jesus ed kaptekan tan ed panggula to ed pansimpisimpitan tan karelmengan. Sikato so amiduan kinmiwas a makmakpel pian linisan so templo manlapud saray maagum a komersyante. (Mateo 21:12, 13; Juan 2:14-17) Niarum ni, bilang sakey a too diad dalin, naeksperiensya to so amin a klase na kairapan, a personal ton asagmak iray pananesdes tan probleman aarapen tayo. (Hebreos 5:7-9) Amta met nen Jesus no anto so liknaan na sakey a biktima na panamusol tan ag-inkahustisya. (Juan 5:15-18; 11:53, 54; 18:38–​19:16) Diad kaunoran, sikato so makpel a nampasakop ed maruksan ipapatey pian nasumpal so linawa na Ama to tan naikdan na bilay ya andi-anggaan iray sakop to. (Juan 3:16) Agta saratan a kalidad nen Kristo so managyat ed sikayo pian mantultuloy ed matoor a panlingkor ed sikato? (Hebreos 13:8; Apocalipsis 5:6-10) Balet anto so nakaukolan pian magmaliw a sakop na Kristo ya Ari?

Saray Kualipikasyon ed Pagmaliw a Sakop

8. Anto so kakaukolanen ed saray sakop nen Kristo?

⁸ Isipen pa iyan panangiyaliling: Kaslakan et nakaukolan a kapeten so pigaran manunan kualipikasyon ta pian magmaliw a mibabaley ed sananey a bansa. Saray prospektibon mibabaley so nayarin kaukolanen a nawalaan na maong a reputasyon tan tumboken to iray pigaran estandarte ed bunigas. Mipadpara, saray sakop nen Kristo so nakaukolan a mamasiansia ed atagey ya estandarte na moralidad tan maong a bunigas ed espiritual.​—1 Corinto 6:9-11; Galacia 5:19-23.

9. Panon tayon nipatnag a matoor itayo ed si Kristo?

⁹ Kanepegan met nen Jesu-Kristo a kaukolanen ed saray sakop to so panmatoor da ed sikato tan ed Panarian to. Nipatnag da so ontan a katooran diad pambilay da unong ed imbangat to sanen sikato so wadiad dalin bilang Aturon-Ari. Singa bilang, iyuuna  ra so intereses na Panarian tan linawa na Dios nen say materyal iran gegemtan. (Mateo 6:31-34) Magunaet da met ya ipapatnag so singa-Kriston personalidad, anggan diad makapasubok a tuloy iran kipapasen. (1 Pedro 2:21-23) Niarum ni, saray sakop nen Kristo so ontutumbok ed alimbawa to diad panggagawa day kaabigan ed arum.​—Mateo 7:12; Juan 13:3-17.

10. Panon tayon nipatnag so katooran tayo ed si Kristo diad loob na (a) pamilya tan (b) kongregasyon?

¹⁰ Nipatnag met na saray patumbok nen Jesus so katooran da ed sikato diad pangipatnag day kalidades to ed loob na pamilya. Singa bilang, ipapatnag na saray kaasawaan a lalaki so katooran da ed mangatatawen ya Ari ra diad panamegley na singa-Kriston pidedeneng da ed kaasawaan tan ananak da. (Efeso 5:25, 28-30; 6:4; 1 Pedro 3:7) Nipatnag na saray kaasawaan a bibii so katooran da ed si Kristo diad panamegley na masimpit a kondukta tan “mauyamo tan mareen ya espiritu.” (1 Pedro 3:1-4; Efeso 5:22-24) Saray ananak so matoor ed si Kristo sano tumboken da so alimbawa to nipaakar ed katutulok. Bilang tobonbalo, si Jesus so nantultuloy a nampasakop ed saray atateng to, anggaman ag-ira ayadyari. (Lucas 2:51, 52; Efeso 6:1) Saray sakop nen Kristo so matoor a mangaalig ed sikato diad pangipapatnag da na ‘panangabagey, panaaroan bilang sanaagi,’ tan diad pagmamaliw dan “masibeg” odino mapangasi. Panggugunaetan dan aligen si Kristo, a ‘mapaabeba ed kanonotan, ya agda ibabales so mauges ed mauges, nisay ayew ed ayew.’​—1 Pedro 3:8, 9; 1 Corinto 11:1.

Saray Sakop a Matulok ed Ganggan

11. Antoran ganggan so pampasakopan na saray sakop nen Kristo?

¹¹ No panon a saray prospektibon mibabaley ed sakey a bansa et ontutulok ed saray ganggan na balon bansa ra, saray sakop nen Kristo so manpapasakop met ed “ganggan nen Kristo” diad pangitutunos da ed bilay da ed amin ya imbangat tan ingganggan nen Jesus. (Galacia 6:2) Nagkalautla, sikara so matoor a manbibilay ed “peteg a katunongan” odino ganggan na ari nipaakar ed aro. (Santiago 2:8) Anto so lalanoren na sarayan ganggan?

12, 13. Panon itayon matoor a manpasakop ed “ganggan nen Kristo”?

¹² Saray sakop nen Kristo so walaan met na ag-inkayadyari tan kakulangan. (Roma 3:23) Kanian, nakaukolan dan itultuloy ya ipatnag so agmansimpisimpitan odino “agnaumas ya aroan na sanaagi” ta pian ‘manaaroan ira a malet diad utel na puso ra.’ (1 Pedro 1:22) “No say siopaman a too wala so pangidalman to ed siopaman,” saray Kristiano so matoor a mangiyaaplika ed ganggan nen Kristo a “mantetepelan so sakey tan sakey, tan manpeperdonaan so balang sakey.” Say itulok ed sayan ganggan so ontulong ed sikara ya ibaliwala so ag-inkayadyari tan mananap na saray rason pian manaaroan ed balang sakey. Agta apresyaen yo so pakapiiba ed saray sinansakey a lapud matoor a pampapasakop da ed maaron Ari tayo et kakawesan day inkasikara na aro, say ‘singer ed inkayadyari’?​—Colosas 3:13, 14.

¹³ Niarum ni, insalaysay nen Jesus a mas malaknab ni so aron ipapatnag to nen say kaslakan ya ipapatnag na katooan ed balang sakey. (Juan 13:34, 35) No say aaroen tayo labat et saramay mangaaro ed sikatayo, anggapo so antokaman a bengatlan “nagkalalo” a gagawaen tayo. Diad ontan a kipapasen et aliwan nagnap so panangaro tayo. Pinaseseg itayo nen Jesus ya aligen so panangaro nen Ama to diad pakawalaan tayo na aprinsipyoan ya aro ed anggan saray kakabusol a manggugula tan mamapasegsegang ed sikatayo. (Mateo 5:46-48) Sayan aro so mamapakiwas met ed saray sakop na Panarian pian matoor a manseet ed manunan kimey da. Anto itan a kimey?

Nasusubok so Katooran

14. Akin ya importante so panagpulong a kimey?

¹⁴ Saray sakop na Panarian na Dios natan so walaan na importantin kimey a sigpot a panagtasi odino ‘panangipatua ed panarian na Dios.’ (Gawa 28:23) Importante so panggawa ed satan lapud say Mesianikon Panarian so mangiyalangon ed sankatalbaan ya inkasoberano nen Jehova. (1 Corinto 15:24-28) Sano ipupulong tayo so maong a balita, saray dumerengel so walaan na pankanawnawan magmaliw a sakop na Panarian na Dios. Niarum ni, say reaksion na totoo ed satan a mensahe so magmaliw a pinagkabasiyan, odino estandarte, a pangukoman nen Kristo ya Ari ed katooan. (Mateo 24:14; 2 Tesalonica 1:6-10) Kanian, say manunan paraan a nipatnag tayo so katooran tayo ed si Kristo et say pangunor ed ganggan ton ipulong ed arum so nipaakar ed Panarian.​—Mateo 28:18-20.

15. Akin a nasusubok so katooran na saray Kristiano?

¹⁵ Siempre, aamperen nen Satanas so panagpulong a kimey ed antokaman a paraan a nayarian to, tan agbibidbiren na saray totoon manuley so autoridad nen Kristo ya inter na Dios. (Salmo 2:1-3, 6-8) Kanian, oniay impasakbay nen Jesus ed saray babangatan to: “Say aripen aliwan babaleg nen say katawan to. No pinasegsegang da ak, pasegsegangen da kayo met.” (Juan 15:20) Sirin, saray patumbok nen Kristo so nalalanor ed espiritual a pibabakal a manusubok ed katooran da.​—2 Corinto 10:3-5; Efeso 6:10-12.

16. Panon ya iter na saray sakop na Panarian ‘iray bengatlan kien na Dios’?

¹⁶ Anggaman kuan, saray sakop na Panarian na Dios so mansiasiansian matoor ed agnanengneng ya Ari ra, bangta rerespetoen da met iray autoridad na totoo. (Tito 3:1, 2) Oniay imbalikas nen Jesus: “Bayaran yo ed Cesar so bengabengatlan kien nen Cesar, tan ed Dios so saray kien na Dios.” (Marcos 12:13-17) Saray sakop nen Kristo sirin so manguunor ed saray ley na gobierno ya agmisumlangan ed saray ganggan na Dios. (Roma 13:1-7) Balet, sanen imbaliwala na atagey a korte na saray Judio iray ganggan na Dios, a papatundaen da iray babangatan nen Jesus ed panagpulong, sikara so mapekder ingen ta marespeton angibaga a kinaukolan dan ‘unoren so Dios bilang manuley nen say totoo.’​—Gawa 1:8; 5:27-32.

17. Akin a sarag tayon arapen iray subok ed katooran tayo tekep na inkakpel?

¹⁷ Siempre, nakaukolan so pampakpel na saray sakop nen Kristo pian makapanmatoor ira ed Ari ra anggaman ed panamasegsegang. Anggaman kuan, oniay imbaga nen Jesus: ‘Mapalar kayo sano balawen kayoy totoo, tan pasegsegangen da kayo, tan salitaen day amin a nengneng na mauges a sumpad sikayo, nisengeg ed siak, a mantila ira. Manggayaga kayo tan manliket kayon mapalalo, ta balbaleg so tumang yo ed tawen.’ (Mateo 5:11, 12) Naeksperiensya na saray akadkaunan patumbok nen Kristo so katuaan na saratan a salita. Anggan sanen sikara so nilelewet lapud intutuloy da so panangipulong ed Panarian, sikara so nanliket “lapud kinmana ra a nantepel na baing ed ngaran nen Jesus. Et inagew-agew ed templo tan ed saray kaabungan, ag-ira tinmunda a nambabangat tan nampupulong a si Jesus et Kristo.” (Gawa 5:41, 42) Sikayo so nakomendaan, legan yon ipapatnag so miparan espiritu na katooran sano susungdoan yo iray kairapan, sakit, paneermen, odino isusumpa.​—Roma 5:3-5; Hebreos 13:6.

18. Anto so ipapabitar na saray salita nen Jesus ed si Poncio Pilato?

¹⁸ Sanen sikato so Aturon-Ari ni labat, oniay impaliwawa nen Jesus ed Romanon Gobernador a si Poncio Pilato: “Say panarian ko aliwan taga dia ed mundo. No say panarian ko taga dia ed mundo, saray ariripen ko mibakal ira komon sirin, pian agak niyawat ed saray Judios. Balet bang say panarian ko agmanlapu dia.” (Juan 18:36) Sirin, saray sakop na mangatatawen a Panarian so agmanguusar na armas sumpad siopaman nisay ondadapag ira ed antokaman a panlalaban na too. Bilang katooran da ed “Prinsipe na Kareenan,” sigpot iran neutral ed naapag-apag iran pakurang na mundo.​—Isaias 2:2-4; 9:6, 7.

Saray Andi-anggaan a Tumang Parad Saray Matoor a Sakop

19. Akin a maniilalo iray sakop nen Kristo tekep na kompiyansa?

¹⁹ Saray matoor a sakop nen Kristo, say ‘Ari na saray ari,’ so mantatalaran ed arapen tekep na kompiyansa. Sikara so magunaet a maniilalo ed asingger lan pangipatnag to na madibinon pakayari to bilang ari. (Apocalipsis 19:11–​20:3; Mateo 24:30) Say nakdaan na matoor ya alanaan na espiritun ‘ananak na panarian’ so mantatalaran ed mabmablin tawir da bilang arari a kaiba nen Kristo diad tawen. (Mateo 13:38; Lucas 12:32) Magunaet a tatalaranan na matoor ya “arum a karnero” nen Kristo so pangiyabawag na Ari ra ed panangabobon to ed sikara: “Gali dia, sikayo bendito nen Amak, tawiren yoy panarian ya imparaan ed sikayo a nanlapu ed inletneg na mundo.” (Juan 10:16; Mateo 25:34) Lapud satan, amin komon a sakop na Panarian so determinadon mantultuloy a manmatoor ed panlingkor ed si Kristo ya Ari.

[Paimano ed leksab]

 Kasin Nipaliwawa Yo?

• Akin a makanepegan si Kristo na katooran tayo?

• Panon a nipatnag na saray sakop nen Kristo so katooran da ed sikato?

• Akin a labay tayo so manmatoor ed si Kristo ya Ari?

 [Tepetepet Parad Panagaral]

[Kahon ed pahina 31]

ARUM ED SARAY ALAY ABIG A KALIDADES NEN KRISTO

Agmanangilabi​—Juan 4:7-30.

Panangabagey​—Mateo 9:35-38; 12:18-21; Marcos 6:30-34.

Aro ya atekepan na dilin-panagsakripisyo​—Juan 13:1; 15:12-15.

Katooran​—Mateo 4:1-11; 28:20; Marcos 11:15-18.

Empatya​—Marcos 7:32-35; Lucas 7:11-15; Hebreos 4:15, 16.

Inkamakatunongan​—Mateo 15:21-28.

[Litrato ed pahina 29]

No ipapatnag tayo so aro ed balang sinansakey, matoor itayon manpapasakop ed “ganggan nen Kristo”

[Saray litrato ed pahina 31]

Kasin saray kalidad nen Kristo so manasagyat ed sikayo pian matoor a manlingkor ed sikato?