Saray Managpastol a ‘Panuliranan na Pulok’

“Pastolan yo so saray pulok na Dios a wala ed sikayo, . . . a mabulos . . . lapu ed ataryan kalakal. . . . a pinagkauliran a tumboken na saray pulok.”​—1 PEDRO 5:2, 3.

1, 2. (a) Anton pribilehyo so inmatalek nen Jesus ed si apostol Pedro, tan akin ya aliwan lingo so impanmatalek nen Jesus ed sikato? (b) Anto so liknaan nen Jehova ed saray aturon managpastol?

 WALAY panaon sakbay na Pentecostes 33 K.P. a nandurungoan di Pedro tan say anemira nin babangatan so almusal ya imparaan nen Jesus diad gilig na Dayat na Galilea. Aliwan saya so primeron impakanengneng nen Pedro ed apaolin Jesus, tan seguradon panliketan ton naamtaan a mabilay si Jesus. Balet nayarin napapagaan met si Pedro lapud pigaran agew ed asasakbay et imburi to ed arap na totoo a kabat to si Jesus. (Lucas 22:55-60; 24:34; Juan 18:25-27; 21:1-14) Kasin binaat nen Jesus so magbabawin si Pedro lapud kakulangan na pananisia to? Andi. Imbes, inmatalek to ed si Pedro so pribilehyon mamakan tan manpastol ed ‘saray karnero’ nen Jesus. (Juan 21:15-17) Unong ed ipapabitar na salaysay na Biblia nipaakar ed awaran na inmunan-siglon Kristianon kongregasyon, walay malet a rason no akin a nanmatalek si Jesus ed si Pedro. Kaiba so arum niran apostol tan mamasiken diad Jerusalem, intultuloy nen Pedro a pinastolan so Kristianon kongregasyon kaleganan na pirmin subsubok tan maples ya ilalaknab.​—Gawa 1:15-26; 2:14; 15:6-9.

² Diad panamegley nen Jesu-Kristo et tuturoen nen Jehova iray kualipikadon lalaki a manlingkor bilang maespiritual a managpastol pian mangiwanwan ed saray karnero To legan na sankapeligroan a panaon ed awaran na too. (Efeso 4:11, 12; 2 Timoteo 3:1) Kasin lingo so ontan ya impangimatalek? Say mareen a Kristianon impanaagi a wala ed sankamundoan so mamaneknek ya aliwa itan a lingo. Tua, sarayan managpastol so nalilingo met, a singa si Pedro. (Galacia 2:11-14; Santiago 3:2) Anggaman ontan, imamatalek nen Jehova ed sikara so panangasikaso ed saray karnero a “sinaliw to diad panamegley na dala na Anak ton dili.” (Gawa 20:28, NW) Papablien a maong nen Jehova irayan lalaki, ya ipapasen to ira a “makanepegan na doblin panamagalang.”​—1 Timoteo 5:17.

3. Panon a napansiansia na saray maespiritual a managpastol so mabulos tan magunaet ya espiritu?

³ Panon a napansiansia na saray maespiritual a managpastol so mabulos tan magunaet ya espiritu, ta pian onkana ira ya ehemplo ed pulok? Singa si Pedro tan arum niran managpastol nen inmunan siglo, manmamatalek ira ed masanton espiritu na Dios, a mangiiter ed sikara na nakaukolan dan biskeg ta pian nagawaan da so responsabilidad da. (2 Corinto 4:7) Say masanton espiritu met so mamapawala ed sikara na bunga na espiritu​—aro, liket, deen, inkaanos, inkamapangasi, kamaongan, pananisia, kaumildian, tan dangka. (Galacia 5:22, 23) Konsideraen tayo so pigaran espisipikon paraan a nipatnag na saray managpastol so ehemplo diad panangipatnag ed sayan bunga legan dan papastolan so pulok na Dios a walad panangasikaso ra.

Aroen so Pulok tan say Sinansakey a Karnero

4, 5. (a) Panon so pangipapatnag nen Jehova tan si Jesus ed panangaro ra ed pulok? (b) Anto so pigaran paraan a nipatnag na saray maespiritual a managpastol so panangaro ra ed pulok?

⁴ Say manunan kalidad a papawalaen na espiritu na Dios et say aro. Ipapatnag nen Jehova so  aro to ed pulok bilang grupo sano tataryaan to ira na daakan ya espiritual a tagano. (Isaias 65:13, 14; Mateo 24:45-47) Ingen, agto lambengat tataganoen so pulok. Walay maaron panangiyansakit to ed balang sakey a karnero. (1 Pedro 5:6, 7) Papablien met nen Jesus so pulok. Inter to so bilay to nisesengeg ed sikara, tan kabat to so kada sakey a karnero “ed dilin ngaran da.”​—Juan 10:3, 14-16.

⁵ Si Jehova tan si Jesus so aaligen na saray maespiritual a managpastol. Ipapatnag da so aro ed pulok na Dios bilang grupo diad ‘panseseet da a mangibangat’ ed kongregasyon. Saray paliwawa ra a nibase ed Biblia so manatagano tan manasalimbeng ed pulok, tan sankanengneng na amin so panseseet da ed satan. (1 Timoteo 4:13, 16) Say agtanto naiimano et say panaon ya uusaren da ed pangasikaso ed saray rekord, panggawa na sulat, panaggawa na eskedyul, tan pangasikaso ed dakel niran bengatla ta pian naseguro a saray pantitipon ed kongregasyon tan arum niran aktibidades et nagawa ed ‘kasimpitan tan inkauksoy.’ (1 Corinto 14:40) Karaklan ed sayan kimey so agnanenengneng na arum kanian nayarin agtanton naaapresya. Satan so talagan gawa na panangaro.​—Galacia 5:13.

6, 7. (a) Anto so sakey a paraan a nakabisadon maong na saray managpastol iray karnero? (b) Akin a no maminsan et makagunggonan ibaga ed sakey a matatken so nipaakar ed nalilikna tayo?

⁶ Saray maaron Kristianon managpastol so manggugunaet a mangipatnag na personal ya interes ed kada karnero diad kongregasyon. (Filipos 2:4) Sakey lan paraan a nakabkabat a maong na saray managpastol so kada sakey a karnero et say pikimey ed sikara diad mapublikon panagpulong. Mabetbet a kaiba nen Jesus iray patumbok to diad panagpulong a kimey tan inusar to iratan a pankanawnawa pian pasesegen ira. (Lucas 8:1) Oniay inkuan na sakey ya eksperiensyadon Kristianon managpastol: “Naamtaan ko a sakey ed saray sankaabigan a paraan a nakabat tan napaseseg so sakey ya agin laki odino bii et say pikimey ed sikato diad lawak na ministeryo.” No agyo ni apiulopan so sakey ed saray mamatatken diad lawak na ministeryo, akin ta no tampol yon iyuksoy so piulop ed sikara?

 ⁷ Say aro so amakiwas ed si Jesus a miliket tan miermen ed saray patumbok to. Alimbawa, sanen maliket a pinmawil so 70 ed saray babangatan to manlapud impanpulong da, si Jesus so “linmiket.” (Lucas 10:17-21) Balet, sanen anengneng to so epekto na impatey nen Lazaro diad si Maria tan saray kapamilyaan tan kakaaro to, “Si Jesus [so] nannangis.” (Juan 11:33-35) Ontan met, saray maasikason manangasikaso natan so walaan na pililikna ed saray karnero. Say aro so mamapakiwas ed sikara a ‘miliket ed saray manliliket’ tan ‘minangis ed saray mannanangis.’ (Roma 12:15) No naeksperiensya yo so liket odino ermen ed bilay yo, mabulos kayon mangibesngaw na liknaan yo ed saray Kristianon managpastol. Napaseseg ira no narengel da so panggagayaga yo. (Roma 1:11, 12) No naamtaan da iray pakasusubokan yo, natulongan ira pian napabiskeg tan naligliwa da kayo.​—1 Tesalonica 1:6; 3:1-3.

8, 9. (a) Panon ya impatnag na sakey a matatken so panangaro to ed asawa to? (b) Kaunongan kaimportante ed sakey a managpastol so pangipatnag na panangaro ed pamilya to?

⁸ Nagkalautlan mapatnag so panangaro na sakey a managpastol ed pulok diad paraan na pidedeneng to ed mismon pamilya to. (1 Timoteo 3:1, 4) No sikato so walaay asawa, say panangaro tan panamagalang to ed asawa to so mangipatnag na alimbawa ya aligen na arum a kaasawaan a lalaki. (Efeso 5:25; 1 Pedro 3:7) Konsideraen pa so komento na sakey a Kristianon bii a manngaran na Linda. Say asawa to so nanlingkor bilang manangasikaso diad masulok a 20 taon sakbay na impatey to. Inkuan to: “Say masiken ko so naynay ya okupadon mangaasikaso ed kongregasyon. Balet impalikna to ed siak a kabiangan ak ed kimey to. Mabetbet ton ibabalikas so apresasyon to lapud suportak, tan inusar to so libren panaon to parad siak. Bilang resulta, aliknak a papablien to ak tan agko paniimonan so panaon ya uusaren ton manlingkor ed kongregasyon.”

⁹ No say sakey a Kristianon managpastol et walaan na ananak, say maaron panagdisiplina to tan say regular a pankokomenda to ed sarayan angkekelag ni so mangitarya na pangaligan na arum ya atateng. (Efeso 6:4) Diad tua, say aro ya ipapatnag to ed pamilya to so mantultuloy a mamapaneknek a sikatoy makanepegan na panagmatalek sanen sikato so aturo na masanton espiritu.​—1 Timoteo 3:4, 5.

Iyalibansa so Liket tan Kareenan Panamegley na Pitatalosan

10. (a) Anto so nayarin makaapekton maong ed liket tan kareenan na kongregasyon? (b) Anton isyu so nansesga ed kareenan na kongregasyon nen inmunan siglo, tan panon ya aresolbe itan ya isyu?

¹⁰ Say masanton espiritu so makapawala na liket tan kareenan diad puso na sakey a Kristiano, diad limog na ulop na mamatatken, tan diad kongregasyon bilang interamenti. Balet, satan a liket tan kareenan so naapektoan a maong no aliwan lukas so pitatalosan. Oniay naimano nen Solomon nensaman: “[Dia] ed kaandian na simbawa, saray kanonotan nabagbag.” (Uliran 15:22) Diad biek a dapag, say marespeto tan prangkan pitatalosan so mamawala na liket tan kareenan. Alimbawa, sanen nasesesga so kareenan na kongregasyon nen inmunan siglo lapud isyu na panaggalsim, nanggunaetan na mananguley ya ulop ed Jerusalem so pananap na panangidirehi na masanton espiritu. Imbalikas da met so nanduruman panmoria nipaakar ed satan a tema. Kayari na mabilabilay ya impantotongtong da, sikara so akagawa na desisyon. Sanen impasabi ra ed saray kongregasyon so apampaknaan dan desisyon, saray agagi so ‘manliket ed saray impanligliwa.’ (Gawa 15:6-23, 25, 31; 16:4, 5) Niyalibansa so liket tan kareenan.

11. Panon a niyalibansa na saray mamatatken so liket tan kareenan ed loob na kongregasyon?

¹¹ Ontan met natan, iyaalibansa na saray managpastol so liket tan kareenan ed kongregasyon diad pagmamaliw dan maong a mitatalosan. Sano walaray probleman manesesga ed kareenan na kongregasyon, mantitipon ira tan maparungtal dan ibalikas iray liknaan da. Marespeto ran dengelen iray komento na kapara ran managpastol. (Uliran 13:10; 18:13) Kayari ran manpikasi parad tulong na masanton espiritu, ibase da iray desisyon da unong ed prinsipyo na Biblia tan ed saray panangigiyan impalapag na “matoor tan makabat ya aripen.” (Mateo 24:45-47; 1 Corinto 4:6) No say ulop na mamatatken et akagawa lay desisyon a nibase’d Kasulatan, balang sakey a matatken so manpasakop ed panangidirehi na masanton  espiritu diad pansuporta to ed satan a desisyon anggaman say personal ya opinyon to et agpipaknaan na karaklan ed sikara. Say ontan a kapaabebaan so mangiyaalibansa na liket tan kareenan tan mangipapatnag na maabig ya alimbawa parad saray karnero no panon so pankurang a kaiba so Dios. (Miqueas 6:8) Kasin mapaabeba kayon mikokoopera ed saray desisyon a nibase ed Biblia a ginawa na saray managpastol diad kongregasyon?

Magmaliw a Maanos tan Mapangasi

12. Akin a kinaukolan ya ipatnag nen Jesus so inkaanos tan inkamapangasi diad pidedeneng to ed saray apostol?

¹² Si Jesus so maanos tan mapangasi diad impideneng to ed saray apostol, anggaman aminpiga iran alingo. Alimbawa, aminpigan impurek nen Jesus ed sikara a nakaukolan so magmaliw a mapaabeba. (Mateo 18:1-4; 20:25-27) Ingen, diad unor a labi na mangaraldalin a bilay nen Jesus, sanen kasumsumpal ni labat na impangiter to ed sikara na leksion nipaakar ed panagpaabeba diad impanguras to ed kasalian da, “agawa met ed sikara so sakey a siblangan no siopa ed sikara so nibilang a kabalbalgan.” (Lucas 22:24; Juan 13:1-5) Kasin nantamian nen Jesus iray apostol? Andi, sikato so mapangasin akikatunongan ed sikara, a kuanto: “Siopa so babaleg, say ondungo ed dulang ono say manserbi? Aliwa kasi a say ondungo ed dulang? Ingen wala ak ed pegle’yo a singa sakey a manserbi.” (Lucas 22:27) Say inkaanos tan inkamapangasi nen Jesus​—ya atekepan na maong ya alimbawa​—so amakiwas ed kapusoan na saray apostol diad kaunoran.

13, 14. Kapigan a nagkalalon nipatnag na saray managpastol so inkamapangasi?

¹³ Mipadpara, nayarin maminpigan simbawaen na sakey a maespiritual a managpastol so sakey a too nipaakar ed sakey a klase na kaleteyan. Nayarin magmaliw a maingongot so sakey a managpastol ed sakey ya indibidual. Balet, no nodnonoten to iray dilin kakulangan to legan ton ‘sisimbawaen iray agnauksoy,’ nipatnag to so inkaanos tan inkamapangasi ed agi to. Diad ontan a paraan et aaligen to si Jesus tan si Jehova, a mangipapatnag ed saratan a kalidad diad amin a Kristiano​—pati saray managpastol.​—1 Tesalonica 5:14; Santiago 2:13.

¹⁴ No maminsan, nayarin nakaukolan na saray managpastol so ambelat a panimbawa ed sakey ya akagawa na seryoson kasalanan. No agmagbabawi so sakey a nankasalanan, nepeg a sikatoy ekalen na saray managpastol manlapud kongregasyon. (1 Corinto 5:11-13) Anggaman ontan, say paraan na pideneng da ed satan a too so mangipapabitar a kagula ra so kasalanan, aliwan say nankasalanan. (Judas 23) Lapud mapangasin awawey na saray managpastol, nayarin nainomayan so sakey a nababalang a karnero ya ompawil lanlamang diad kasimpukokan.

Saray Maabig a Gawa Lapud Pananisia

15. Anto so sakey a paraan a naalig na saray managpastol so kamaongan nen Jehova, tan anto so mamapakiwas ed sikara a manggawa ed satan?

¹⁵ “Si Jehova [so] maong ed amin,” anggan ed saramay agmangaapresya ed gagawaen to ed sikara. (Salmo 145:9; Mateo 5:45) Say kamaongan nen Jehova so nagkalalo lan mapatnag ed impangibaki to ed totoo ton mangipulong ed “ebanghelyo na panarian.” (Mateo 24:14) Ipapatnag na saray managpastol so kamaongan na Dios diad pangidadaulo ra ed sayan panagpulong a kimey. Anto so mamapakiwas ed sikara diad makulin pansasagpot da? Say mabiskeg a pananisia ed si Jehova tan ed saray sipan to.​—Roma 10:10, 13, 14.

16. Panon a ‘makapanggawa na maabig’ iray managpastol ed saray karnero?

 ¹⁶ Niarum ni ed panggawa na “maabig ed saray amin” diad pampulong, saray managpastol so walaan na responsabilidad a mankimey ed no anto so maabig “nagkalalo la ed saray kaamong [da ed] pananisia.” (Galacia 6:10) Sakey lan paraan a nagawaan da itan et diad makapaseseg ya ibibisita ra bilang managpastol. “Panliketan ko so panagpastol ya ibibisita,” so inkuan na sakey a matatken. “Siak so naiikdan na pankanawnawan mangomenda ed saray agagin lalaki tan bibii lapud saray sagpot da tan pian nipamoria ed sikara a papablien so inkaseet da.” No maminsan, nayarin isuheri na saray managpastol iray paraan a nayarin onaligwas so indibidual diad panlilingkor to ed si Jehova. Diad panggawa ed satan, aaligen na saray makabat a mamatatken si apostol Pablo. Konsideraen so paraan na impanagyat to ed saray agagi ed Tesalonica: “Wala so ilalo mi ed Katawan a nipaakar ed sikayo, a gagawaen yo tan gawaen yo met naani so saray bengatla ya iganggan mi ed sikayo.” (2 Tesalonica 3:4) Say ontan iran balikas na panagmatalek so mamakiwas ed saray karnero ya ipatnag da so kamaongan tan mamainomay ed sikaran ‘ontulok ed saray manuuley’ odino mangidadaulo. (Hebreos 13:17) Sano walay panagpastol ya ibibisita ed sikayo, akin ta no ibalikas yo so apresasyon yo ed satan?

Say Kaumildian so Mankaukolan na Panagdangka

17. Anton leksion so naaralan nen Pedro ed si Jesus?

¹⁷ Si Jesus so mauyamo, anggano sikato so nasasagyat ya onsanok. (Mateo 11:29) Sanen sikato so intapat tan inaresto, impatnag nen Jesus so kaumildian tan pirmin panagdangka. Si Pedro so bengatbengat ya anguyos na kampilan tan binmales. Balet sikato so pinanonotan nen Jesus: “Isipen mo ya agko nayarian a kerewen ed Amak, et sikatoy ibaki to ya anggan natan ed siak so masulok a labinduan lehyon na angheles?” (Mateo 26:51-53; Juan 18:10) Akaaral a maong si Pedro tan pinanonotan to ed saginonor iray Kristiano: “Si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to. . . . Sanen ayew-ayewen da agto binmales ya angayew; sanen apadpairap agnan-ingongot.”​—1 Pedro 2:21-23.

18, 19. (a) Kapigan a nagkalautlan ipatnag na saray managpastol so kaumildian tan panagdangka? (b) Antoran tepet so konsideraen ed ontumbok?

¹⁸ Ontan met, saray epektibon managpastol so mauyamo anggaman sikara so agmakatunongan a tratratoen. Singa bilang, arum ed saramay tutulongan da so nayarin onkiwas a negatibo. No say sakey ya indibidual a mankaukolan na tulong et maletey odino mansasakit ed espiritual, nayarin say reaksion to ed simbawa et “mansalita a botaktak a singa saray kisaksak na kampilan.” (Uliran 12:18) Balet, singa si Jesus, ag-ombabales iray managpastol ed ansakit odino maingongot a panagsalita. Imbes, aagamilen da so panagtepel tan siansia nin ipapatnag da so pililikna, a nayarin onkanan bendisyon ed sakey a mankakaukolan na tulong. (1 Pedro 3:8, 9) Wala kasi so naaralan yo ed alimbawa na saray mamatatken tan ipatnag yo met kasi so kaumildian tan dangka sano nasimbawa kayo?

¹⁹ Anggapo so duaruwa a papablien a maong nen Jehova tan si Jesus so pansasagpot na nilibo iran managpastol a mabulos a mangasikaso ed saray kasimpukokan ed sankamundoan. Si Jehova tan say Anak to so walaan met na aralem a panamabli ed nilibo iran ministeryal a lingkor a manusuporta ed mamatatken diad ‘panutulong ed saray sasanto.’ (Hebreos 6:10) Akin sirin a nayarin masuyat so arum a bautismadon agagin lalaki a mandampot ed sayan “maong a gawa”? (1 Timoteo 3:1) Tan panon ya ipapasal nen Jehova iramay tuturoen ton managpastol? Konsideraen tayo iratan a tepet ed ontumbok ya artikulo?

Kasin Nanonotan Yo?

• Anto so pigaran paraan a nipatnag na saray managpastol so panangaro ra ed pulok?

• Panon a niyalibansa na amin a membro na kongregasyon so liket tan deen?

• Akin a saray managpastol et maanos tan mapangasi sano manisimbawa?

• Panon ya ipapatnag na mamatatken so kamaongan tan pananisia?

[Tepetepet Parad Panagaral]

[Litrato ed pahina 18]

Saray mamatatken so papakiwasen na aro a manlingkor ed kongregasyon

[Saray litrato ed pahina 18]

Manguusar met ira na panaon a kaibay pamilya ra diad panligliwaan . . .

. . . tan diad ministeryo

[Litrato ed pahina 20]

Say maong a pantatalosan ed limog na saray mamatatken so mangiyalibansa na liket tan kareenan ed loob na kongregasyon