Akaparaan Kayo la Kasi ed Panangiliktar?
Akaparaan Kayo la Kasi ed Panangiliktar?
‘Loob ka ed biong a pati amin a sankaabungan mo, ta sika so akanengnengan ko na inkatunong ed arap ko dia ed saya a kapolian.’—GENESIS 7:1.
1. Anton probisyon parad kililiktar so intarya nen Jehova diad panaon nen Noe?
ANGGAMAN ‘intarok nen Jehova so delap ed mundo na saray momoan’ odino agmaridios a totoo diad panaon nen Noe, intarya To met so probisyon parad kililiktar. (2 Pedro 2:5) Inter na tuan Dios ed si matunong a Noe so detalyado iran instruksion nipaakar ed panggawa na biong a kiliktaran na bilay diad nagawan delap ed saman diad interon mundo. (Genesis 6:14-16) Singa iilaloan tayo la ed maunor a lingkor nen Jehova, ‘ginawa nen Noe so unong ed amin ya ingganggan na Dios ed sikato.’ On, “ontan so ginawa to.” Diad sakey a laknab et mabilay itayo natan lapud intulok nen Noe.—Genesis 6:22.
2, 3. (a) Anto so reaksion na saray kapanaonan nen Noe nipaakar ed kimey to? (b) Linmoob si Noe ed biong tekep na anton klase na panagmatalek?
2 Aliwan mainomay a trabaho so panggawa na biong. Seguradon mankelaw so dakel a totoo ed gagawaen nen Noe tan say pamilya to. Ingen ta aliwa itan a magenap pian nakombinse ira a say kilalaban so akadepende ed iloob da ed biong. Diad saginonor, angangga so panaanos na Dios ed satan a marelmeng a mundo.—Genesis 6:3; 1 Pedro 3:20.
3 Kayari na pigaran dekada na mairap ya impankimey nen Noe tan say pamilya to, oniay imbaga nen Jehova ed si Noe: “Loob ka ed biong a pati amin [a sankaabungan] mo; ta sika so akanengnengan ko na inkatunong ed arap ko dia ed saya a kapolian.” Tekep na pananisia tan panagmatalek ed salita nen Jehova, “si Noe linmoob, tan saray lalaki ya anak to, tan si asawa to, tan saray kaasawaan na saray ananak to ya ib-iba to.” Inkapot nen Jehova so puerta ta pian nasalimbengan iray mandadayew ed sikato. Sanen sinmabi so Delubio ed dalin, say biong so apaneknekan a napanmatalkan a probisyon na Dios parad kililiktar.—Genesis 7:1, 7, 10, 16.
Saray Modernon Pipadparaan na Panaon nen Noe
4, 5. (a) Anto so angikomparaan nen Jesus ed kiwawala to? (b) Antoray pipadparaan na panaon nen Noe ed panaon tayo?
4 “Unong ed saray agew nen Noe, ontan naani so isabi na Anak na too.” (Mateo 24:37) Diad saratan a salita, impabitar nen Jesus a say panaon na agnanengneng a kiwawala to so mipadpara ed panaon nen Noe, tan satan so peteg a nagagawa. Manlapu la nen 1919, walay manamasakbay a mensahe a mipadpara ed samay impasabi nen Noe ed totoo na amin a nasyones. Diad inkalapagan, say reaksion na totoo et mipadpara ed saramay totoo ed panaon nen Noe.
5 Diad panamegley na Delap, kinmiwas si Jehova sumpad sakey a mundon “napno na karawalan.” (Genesis 6:13) Mapatpatnag ed amin ya akanengneng ed si Noe tan say pamilya to so agda impibiang ed ontan a karawalan, balet ta mareen dan sinumpal so kimey dan mangipaalagey ed biong. Nanenengneng tayo met ed ontan a paraan so sakey a pipadparaan ed panaon tayo. Saray masimoon a totoo so ‘makapangibiig ed matunong tan marelmeng, say manlilingkor ed Dios tan say agmanlilingkor ed sikato.’ (Malaquias 3:18) Say inkamatua, kaabigan, deen, tan inkaseet na saray Tasi nen Jehova so pandinayewan na saray agmanangidumaduman manoobserba kanian nibibiig da so totoo na Dios manlapud mundo ed inkalapagan lapud saratan a kalidad. Ipupulisay na saray Tasi so amin a nengneng na karawalan tan paigigiya ira ed espiritu nen Jehova. Satan so rason no akin a panggagayagaan da so kareenan tan no akin a gegegemtanen da so matunong a kurang.—Isaias 60:17.
6, 7. (a) Anto so ag-amoria na totoo ed panaon nen Noe, tan panon itan a mipadpara natan? (b) Antoran alimbawa so mangipabitar a saray Tasi nen Jehova et bibidbiren na karaklan a totoo bilang nikadkaduma?
6 Ag-amoria na saray kapanaonan nen Noe a sikato so susuportaan na Dios tan ontutumbok ed panangidirehi To. Kanian agda sinisia so ipupulong nen Noe tan ag-ira kinmiwas ed panamasakbay to. Komusta met natan? Anggaman dakel so mandinayew ed kimey tan kondukta na saray Tasi nen Jehova, maslak et agmangiimano ed maong a balita tan ed saray pasakbay na Biblia. Saray kakaabay, amo, odino kakanayon so nayarin mandinayew ed maabig iran kalidad na saray tuan Kristiano balet ta oniay paneermenan da, “No aliwa ra labat komon a Tasi nen Jehova!” Say agnaimano na saratan a maniimaton et ipapatnag na saray Tasi iray kalidad a singa say aro, deen, kaabigan, kamaongan, kaumildian, tan dangka lapud iwawanwan ira na masanton espiritu na Dios. (Galacia 5:22-25) Satan so lalon mangiiter na puersa ed mensahe ra.
7 Singa bilang, saray Tasi nen Jehova diad Russia so manpapaalagey na sakey a Kingdom Hall. Oniay imbaga na sakey a too a tinmunda pian mitongtong ed sakey ed saray mantratrabaho: “Nikadkaduma iyan pasen a pampapaalageyan—anggapoy mansisigarilyo, anggapoy manaayew, tan anggapoy akainum! Kasin sakey ka met ed saray Tasi nen Jehova?” Oniay intepet ed sikato na samay mantratrabaho ditan, “No ibagak ya andi, manisia kayo kasi?” Inmebat a tampol so laki, “Agak manisia.” Diad sananey a syudad ed Russia, say mayor so mandinayew a maong sanen anengneng to iray Tasi a manpapaalagey na balon Kingdom Hall da. Imbaga to a parpareho so pakanengneng to nensaman ed amin a relihyon, balet ta anguman so panmoria to sanen naimatonan to so agmasiblet a kakikiwas na saray Tasi nen Jehova. Saratan so duara labat ya alimbawa a mangipapatnag ed pidumaan na saray totoo nen Jehova ed saramay ag-ontutumbok ed saray estandarte na Biblia.
8. Anto so akadependian na kiliktar tayo ed anggaan na marelmeng a mundo?
8 Diad unor lan panaon na “daan a mundo” ya aderal ed Delap, si Noe so matoor a “managpulong na katunongan.” (2 Pedro 2:5) Diad sarayan kaunoran ya agew na kaplesan a sistema na bengabengatla, ipapakabat na saray totoo nen Jehova so matunong iran estandarte na Dios tan iyaabawag da so maong a balita nipaakar ed posiblin pakaliktar pian makaloob ed balon mundo. (2 Pedro 3:9-13) Singa say inkiliktar da di Noe tan say matakot ed Dios a pamilya to diad loob na biong, say kiliktar na saray indibidual natan so akadepende ed pananisia ra tan ed matoor a pililimog da ed mangaraldalin a kabiangan na sankatalbaan ya organisasyon nen Jehova.
Say Pananisia a Nakaukolan Parad Kililiktar
9, 10. Akin ya importante so pananisia no labay tayoy makaliktar ed anggaan na sistema na bengabengatla nen Satanas?
9 Anto so nepeg a gawaen na sakey a too ta pian niliktar ed manasingger lan kadederal na sayan mundo a walad pakayari nen Satanas? (1 Juan 5:19) Nepeg a bidbiren to nin unona a nakaukolan so proteksion. Insan nepeg ton anamoten itan a proteksion. Saray totoo ed panaon nen Noe so nantultuloy labat ed inagew-agew a kabibilay da tan agda ninonot a nakaukolan da so proteksion manlapud manasingger lan desyang. Wala ni so kulang ed sikara—say pananisia ed Dios.
10 Diad biek a dapag, binidbir nen Noe tan say pamilya to a nakaukolan da so proteksion tan kililiktar. Inagamil da met so pananisia ed Sankatalbaan a Soberano, si Jehova a Dios. “No anggapo so pananisia agnayarin paliketen [si Jehova],” so insulat nen apostol Pablo, “ta say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.” Inyarum ni nen Pablo: “Lapu ed pananisia si Noe, sanen binilin na Dios nipaakar ed saray bengatla ya agni anengneng, nen saman aragdag ed mapagalang a takot, angiparaan na sakey a biong a kilabanan na abung to; ed panamegley na pananisia to dinusa to so sayan mundo, tan nagmaliw a tomatawir ed katunongan unong ed pananisia.”—Hebreos 11:6, 7.
11. Anto so naaralan tayo ed impanalimbeng nen Jehova nensaman?
11 Pian makaliktar itayo ed anggaan na kaplesan a marelmeng a sistema na bengabengatla, nepeg ya agtayo labat panisiaan a naderal itan. Nepeg ya agamilen tayo so pananisia, a sigpot ya anamoten iray probisyon na Dios parad kililiktar. Siempre, nakaukolan tayon agamilen so pananisia ed dondon bagat na Anak na Dios, si Jesu-Kristo. (Juan 3:16, 36) Balet, nepeg tayon nodnonoten a saraman lambengat so walad loob na biong nen Noe so akaliktar ed Delap. Mipadpara, saray syudad a salimbengan ed Israel nensaman so kinmanan proteksion parad agginagalan akapatey no sikato so ombatik a tampol ed satan a syudad tan mansiansia ditan anggad ipatey na atagey a saserdote. (Numeros 35:11-32) Diad koma-samplon bakbak ed Ehipto diad panaon nen Moises, say panguloan na saray Ehipsio so pinatey, balet akaliktar iramay panguloan na saray Israelita. Akin? Binilin nen Jehova si Moises: “Mangala [iray Israelita] naani na dala [na kordero parad Paskua], tan inan da naani nantupag a pasindeg, tan say panuksolan na saray pinto na kaabungan a panganan. . . . Tan anggapo a balot naani ed sikayo so ompapaway ed pinto na abung to ya angga ed kabuasan.” (Exodo 12:7, 22) Wala kasi so panguloan ya anak na saray Israelita ya angibaliwala ed inter na Dios iran instruksion diad ipaway da ed abung a pinuranisan na dala ed duaran pasindeg tan panuksolan na puerta na satan?
12. Anto so nepeg ya itepet tayo ed inkasikatayo, tan akin?
12 Walaan itayo sirin na rason pian maalwar a nonoten so nipaakar ed personal a kipapasen tayo. Talaga kasin wala itayo la’d loob na uksoyan nen Jehova a pakasalimbengan ed espiritual? Sano nagawa so baleg a kairapan, onagus so lua na liket tan pisasalamat ed kalupaan na saramay nananap na ontan a salimbeng. Balet parad arum et say lua na ermen tan pagbabawi.
Saray Progresibon Pananguman so Mangipaparaan ed Sikatayo
13. (a) Anto so gagala na saray pananguman ed organisasyon? (b) Ipaliwawa so pigara ed saray progresibon pananguman?
13 Si Jehova so nanggawa na saray progresibon pananguman ed mangaraldalin a kabiangan na organisasyon to. Saratan a pananguman so mamaparakep, mamapabiskeg, tan mamapaelet ed uksoyan to a pakasalimbengan tayo ed espiritual. Manlapud dekada na 1870 anggad 1932, saray matatken tan diakono so ibobotos na saray membro na kongregasyon. Nen 1932, saray imbotos a mamatatken so sinalatan la na sakey a komite parad serbisyo a tinuro panamegley na kongregasyon pian ontulong ed aturon service director. Legan na 1938, walaray uksoyan a ginawa parad teokratikon pananuro ed amin a lingkor ed loob na kongregasyon. Diad panangidirehi na Mananguley ya Ulop na saray Tasi nen Jehova, manlapu la’d 1972, gagawaen iray rekomendasyon tan makaawat iray kongregasyon na saray sulat na teokratikon inkaturo na saray manangasikaso tan ministeryal a lingkor. Diad ilalabas na panaon, dinmaak so betang na Mananguley ya Ulop tan walaray pananguman a ginawa pian napainomay so kimey da.
14. Anton programa na panangipasal so ginmapo nen 1959?
14 Nen 1950, say maalwar ya impangikonsidera ed Salmo 45:16 so angitonton ed tuloytuloy a programa na panangipasal. Oniay nabasa ed satan a teksto: “Lugar a saray atateng mo so ompasen ya anak mo, a sikara so ipasen mo a prinsipes ed amin a dalin.” Saray mamatatken natan a mangidadaulo ed kongregasyon so nipapasal la natan ed saray teokratikon obligasyon da parad kaplesan tan kayari na Armagedon. (Apocalipsis 16:14, 16) Say Kingdom Ministry School so ginmapo nen 1959. Diad saman a panaon, walay sakey-bulan a kurso na panangibangat a manunan niyuksoy parad saray congregation servant, a pananawag nensaman ed saray mangidadaulon manangasikaso. Sayan eskuelaan so ninanatnat natan pian mangitarya na instruksion parad amin a manangasikaso tan ministeryal a lingkor. Insan, saratan ya agagi so mangidaulo diad panangipasal ed indibidual iran Tasi nen Jehova diad kada kongregasyon da. Sirin, amin so natulongan ed espiritual a paraan tan magmaliw a lalon epektibo ed ministeryo ra bilang manangiyabawag na maong a balita na Panarian.—Marcos 13:10.
15. Anto so duaran paraan a napansiansia so kalinisan ed Kristianon kongregasyon?
15 Saray indibidual a malabay a magmaliw a kabiangan na Kristianon kongregasyon so nepeg a manumpal ed pigaran kakaukolanen. Makatunongan labat a saray managludlurey natan so agnaabuloyan a magmaliw a kabiangan na kongregasyon, a singa met ed saramay managludlurey nensaman ya ag-akaloob ed biong nen Noe. (2 Pedro 3:3-7) Nagkalautla manlapu la nen 1952, lalon sinuportaan na saray Tasi nen Jehova so sakey ya uksoyan a manalimbeng ed kongregasyon, salanti, say pandispelosip ed agmagbabawi iran managkasalanan. Siempre, saramay peteg a magbabawin managgaway-kasalanan so maaron tutulongan a ‘manggawa na kakukurang a maptek ed saray sali ra.’—Hebreos 12:12, 13; Uliran 28:13; Galacia 6:1.
16. Anto so espiritual a kipapasen na totoo nen Jehova?
16 Say maaligwas a kipapasen na totoo nen Jehova diad espiritual et aliwan bigbiglan agawa odino nibanbana labat. Diad panamegley nen propeta Isaias, oniay inkuan nen Jehova: “Nia, saray aripen ko mangan ira naani, balet sikayo naerasan kayo; nia, saray aripen ko oninum ira naani, balet sikayo napegaan kayo naani; nia, saray aripen ko manliket ira naani, balet sikayo nabaingan kayo naani. Nia, saray aripen ko mankanta ra naani a nisengeg ed liket na puso, balet sikayo manakis kayo naani a nisengeg ed ermen na puso, tan managogol kayo naani a nisengeg ed irap na espiritu.” (Isaias 65:13, 14) Itutultuloy nen Jehova ya itarya ed sikatayo so daakan a suplay na nipanpanaon tan makapabunigas ya espiritual a tagano a mamapabiskeg ed sikatayo diad espiritual.—Mateo 24:45.
Manparaan Parad Kililiktar
17. Anto so makatulong ed sikatayon manparaan parad kililiktar?
17 Mas ni nen say kapiganman, natan la so panaon pian “manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo.” (Hebreos 10:23-25) Say maapit a pilimog tan pansiansian aktibo diad loob na sakey ed masulok a 98,000 a kongregasyon na saray Tasi nen Jehova so ontulong ed sikatayo pian makapanparaan parad kililiktar. Susuportaan itayo na saray kapananisiaan legan tayon pambabanikelan ya ipatnag so “balon inkatoo” odino personalidad tan sigpot-puso tayon tulongan so arum a makaaral ed probisyon nen Jehova parad kililiktar.—Efeso 4:22-24; Colosas 3:9, 10; 1 Timoteo 4:16.
18. Akin a determinado kayon mansiansian maapit ed Kristianon kongregasyon?
18 Si Satanas tan say mauges a mundo to so manasagyat ed sikatayo pian onarawi ed Kristianon kongregasyon. Balet, makapansiansia itayon kabiangan na satan tan makaliktar itayo ed anggaan na peles a marelmeng a sistema na bengabengatla. Komon ta say panangaro ed si Jehova tan say liket parad saray maaron probisyon to so mamakiwas ed sikatayon magmaliw a lalon determinado nen say kapiganman a manresisti ed saray sagpot nen Satanas. Ombiskeg so determinasyon tayo sano dalepdepen tayo so peles iran bendisyon. Arum ed saratan a bendisyon so singbaten ed ontumbok ya artikulo.
Iray Ebat Yo?
• Panon a mipadpara so panaon tayo ed panaon nen Noe?
• Anton kalidad so makana parad kililiktar?
• Antoran progresibon pananguman so amabiskeg ed uksoyan nen Jehova parad kililiktar?
• Panon tayon makapanparaan a mismo parad kililiktar?
[Tepetepet Parad Panagaral]
[Litrato ed pahina 22]
Si Noe so agsinisia na saray kapanaonan to
[Litrato ed pahina 23]
Makagunggona so seryoson pangikonsidera ed saray manamasakbay a mensahe na Dios
[Litrato ed pahina 24]
Anto so gagala na Kingdom Ministry School?
[Litrato ed pahina 25]
Natan la so panaon pian mansiansian maapit ed Kristianon kongregasyon