Anto so Gagala na Dios Parad Dalin?

AKIN a panliketan mo so panakar-akar diad parki odino pampaspasyar diad uma na ambabalingit a rosas? Akin et onligsa ka sano nanengneng mo so marakdakep a linok odino atataragey a palandey ya asakbongan na lurem iray toktok na saratan? Akin a labalabay mon dengelen iray makapaliket ya uni na kamanokan a walad kakiewan? Tan akin et makapaliket a tuloy so pambantay ed manluk-lukson ulsa odino ed pulok na karnero a mankakabkab diad uma?

Saksakey so ebat ed sarayan amin a tepet. Pinalsa itayo pian manayam ed Paraiso! Diad gapo et ditan so nanayaman na saray inmunan ateng tayo, si Adan tan Eva. Atawir tayo ed sikara so pilalek a manayam ed Paraiso, a satan so insipor ed sikara na Manamalsa ra, si Jehova a Dios. Amta to a sikatayo so manliket ed Paraiso lapud pinalsa to itayo a walaan na saray kalidad a nakaukolan pian manggayaga ed ontan lan karakep ya ayaman diad dalin.

Akin a pinalsa nen Jehova so dalin? ‘Tinibukel to itan pian panayaman’ na katooan. (Isaias 45:18) Say ‘Nanggawa ed dalin’ et angiter ed si Adan tan Eva na marakep ya ayaman a paraiso, say hardin na Eden. (Jeremias 10:12; Genesis 2:7-9, 15, 21, 22) Seguradon nanliketan dan maong iray ilog, saray rosas, tan saray kakiewan ditan! Walaray makapasagyat a kamanokan diad tawen, tan manliliberliber diad dalin so nanduruman klase na ayayep​—ya anggapo ed saratan so pakatatakotan na totoo. Walaray sira tan arum nin pinalsa diad kaliberliber na malinlinew tan malinlinis a danum na dalin. Tan say makapaliket ed amin, si Adan tan Eva so mankaiba. Nayarian day mananak tan manginatnat ed Paraison ayaman da tekep na maliket a pililimog ed ondarakel a pamilya ra.

Anggaman aliwan paraiso natan so dalin, nikompara itan ed marakep ya ayaman na sakey a maliket a pamilya. Say panaayaman tayon dalin ya inter na Dios et walaan na saray bengatlan nakaukolan tayo​—liwawa, petang, danum, tan tagano. Agaylan pisalamatan tayo so liwawa tan petang na agew tan say balibalin liwawa na bulan diad labi! (Genesis 1:14-18) Diad dalem na dalin et walaray materyal a napamparlang, a singa say karbon tan asiete. Lapu ed sikulo na danum tan sistema na saray ilog,  linok, tan dayat, wala so nainum tayo. Tan say birdin karikaan so pinagka-alpumbra na dalin.

No panon a nayarin tiponen so abaston tagano diad ayaman, daakan met so suplay na tagano diad dalin. Diad panamegley na saray bunga na kaumaan tan saray tanamanan, ‘sikatayoy iikdan nen Jehova na mabunga a panaon tan papanoen to so kapusoan tayo na gayaga.’ (Gawa 14:16, 17) Lapud marakdakep lan ayaman so dalin natan, isipen pa so itsura na satan sano si Jehova, a “bendito a Dios,” et pagmaliwen to itan a paraiso!​—1 Timoteo 1:11.

 [Picture Credit Lines ed pahina 2]

APIS: Earth: NASA photo; Stars: NASA, ESA and AURA/​Caltech