Kasin Walaan Ka na ‘Kawayangan a Mansalita’?
Kasin Walaan Ka na ‘Kawayangan a Mansalita’?
MASULOK ya anemiran milyon a totoo ed 235 a daldalin so walaan na say tatawagen na Biblia a “kawayangan a mansalita.” Satan a balikas so 16 a danay a nabasa diad Kristianon Griegon Kasulatan na New World Translation of the Holy Scriptures. (Filipos 1:20; 1 Timoteo 3:13; Hebreos 3:6; 1 Juan 3:21) Anto so kabaliksan na walaan na “kawayangan a mansalita”? Anto so ontulong ed sikatayo pian nagamoran itan? Diad antoran aspekto na komunikasyon a bulos itayon makapansalita lapud satan a kawayangan?
Unong ed Vine’s Expository Dictionary of Old and New Testament Words, say Griegon termino parad balikas a “kawayangan a mansalita” et manutukoy ed “kawayangan ed panagsalita, a bulubulos linawan makapanbalikas, . . . agnatatakot a mansalitan makmakpel; kanian, walaan itan na ideyan inkakompiyansa, biskeg na linawa ya atekepay ligsa, inkakpel, ya aliwan naynay a nipaakar ed panagsalita.” Balet, say ontan ya inkakpel a mansalita et midumaan ed pansalitan bengatbengat odino masagapsap. “Say salita yo komon natekepan lawas na liga,” so inkuan na Biblia. (Colosas 4:6) Nalalanor ed kawayangan a mansalita so pansiansian mataktika bangta ag-aabuloyan iray makapagonigon a kipapasen odino takot ed too a mamuger ed sikatayon mansalita.
Kasin say kawayangan a mansalita et sakey a kanepegan a nisipor la ed sikatayo? Imanoen pa so insulat nen apostol Pablo ed saray Kristiano ed Efeso. Inkuan to: “Dia ed siak, a kamelagan ak nen say kamelmelagan ed saray amin a sasantos, niiter so saya a grasya, pian ipulong ko ed saray Gentiles so saray agnatukor a kayamanan nen Kristo.” Inyarum ni nen Pablo a lapud si Jesu-Kristo, ‘walaan itayo na kabayanian [“kawayangan a mansalita,” NW] tan ibulaslas na panilalo lapu ed pananisia tayo ed sikato.’ (Efeso 3:8-12) Kanian say kawayangan a mansalita et aliwan sakey a pribilehyo a sipor lan kanepegan tayo, noagta resulta itan na pisisiglaotan tayo ed si Jehova a Dios base ed pananisia tayo ed si Jesu-Kristo. Imanoen tayo no anto so makatulong pian nagamoran tayo iyan kawayangan tan no panon tayon nipatnag itan sano manpupulong, manbabangat, tan manpipikasi itayo.
Anto so Ontulong ed Sikatayo Pian Makapanpulong a Makmakpel?
Si Jesu-Kristo so manunan alimbawa na sakey a walaan na kawayangan a mansalita. Say inkaseseg to so amakiwas ed sikato pian anamoten iray pankanawnawan manpulong. Balanglan manpapainawa, mamangan diad abung na arum, odino manaakar ed dalan, inanamot to so kada pankanawnawa pian itongtong so nipaakar ed Panarian na Dios. Say panagludlurey odino Mateo 23:13-36) Anggan sanen inerel tan inusay, si Jesus so nansalita ya andi-takot.—Juan 18:6, 19, 20, 37.
pirmin isusumpa so ag-amatalaw ed si Jesus a mansalita. Imbes, sikatoy makpel ya angiwalwal ed saray palson relihyoson lider diad panaon to. (Awalaan met na ontan ya inkakpel ed panagsalita iray apostol nen Jesus. Nen Pentecostes 33 K.P., si Pedro so nampaliwawa a walaan na kawayangan a mansalita diad arap na grupo na masulok a 3,000 a totoo. Makatantanda ta diad agano ni sakbay na satan, sikatoy tinmakot sanen abidbir na sakey ya aripen a bii. (Marcos 14:66-71; Gawa 2:14, 29, 41) Sanen inyarap si Pedro tan Juan ed saray relihyoson lider, ag-ira tinmakot. Sikaray agmasuyat tan makmakpel a nantasi nipaakar ed apaolin si Jesu-Kristo. Diad tua et abidbiran na saray relihyoson lider a sarayan lalaki, si Pedro tan Juan, so akaiba nen Jesus lapud inkakpel dan mansalita. (Gawa 4:5-13) Anto so tinmulong ed sikara pian makapansalita a makmakpel?
Oniay insipan nen Jesus ed saray apostol to: “Sano idungo da kayo, agkayo mapaga no panon ono antoy salitaen yo; ta niiter naani ed sikayo so salitaen yo ed satan ya oras. Ta aliwan sikayo so mansalita, noag say espiritu nen Ama yo so mansalita ed sikayo.” (Mateo 10:19, 20) Say masanton espiritu so tinmulong ed si Pedro tan arum nira pian natalonaan da so inkamabaing odino takot a nayarin mangamper ed bulos a pansalita ra. Say impluensya na satan a mabiskeg a puersa so makatulong met ed sikatayo.
Niarum ni, inikdan nen Jesus iray babangatan to na kimey a manggawa na babangatan. Matukotukoy iya, lapud Sikato imay angiteran na “amin a pakauley . . . ed tawen tan dia ed dalin.” Tan ‘sikatoy wala ed sikara.’ (Mateo 28:18-20) Say pikakabat na saray inmunan babangatan ed ontan a pananuporta nen Jesus so angiter ed sikara na kompiyansa sanen inmarap ira ed saray walad pakauley a determinadon mamatunda ed panagpulong da. (Gawa 4:18-20; 5:28, 29) Say ontan a pikakabat so makapangiter met ed sikatayo na kompiyansa.
Diad impangipaimano nen Pablo ed sananey nin rason ed pagmaliw a makpel a mansalita, insiglaot to so ilalo dia ed “baleg a kawayangan a mansalita.” (2 Corinto 3:12, NW; Filipos 1:20) Lapud say mensahe na ilalo et mablin tuloy parad saray Kristiano, kaukolan ya itongtong da itan ed arum a totoo. On, say ilalo tayo so managdag ed sikatayon mansalita a makmakpel.—Hebreos 3:6.
Manpulong a Makmakpel
Panon itayon makapanpulong a makmakpel anggan sano nidudunget itayo ed makapatalaw iran sirkumstansya? Imanoen pa so alimbawa nen apostol Pablo. Legan a nipriso diad Roma, kinerew to ed saray kapananisiaan to ya ipikasi ran ‘niiter komon ed sikato so pansalita ed pangilukas to na sangi to, pian makapansalita a sitetepel, a singa kanepegan ton pansalita.’ (Efeso 6:19, 20) Kasin naebatan iratan a pikakasi? On! Legan a walad prisoan si Pablo, ‘makmakpel so linawa to tan ag-asebelan ed impanpupulong toy nipaakar ed panarian na Dios.’—Gawa 28:30, 31, Maung a Balita.
Nasubok so inkakpel tayon mansalita no anamoten tayo iray pankanawnawan manpulong diad pasen na trabaho, eskuelaan, odino legan a manbiabiahe. Say inkamabaing, pakatatakot ed reaksion na arum, odino kakulangan na kompiyansa ed abilidad tayo so nayarin mamuger ed sikatayon mansalita. Diad saya lamet a pamaakaran et angipatnag si apostol Pablo na maabig ya alimbawa. Oniay insulat to: “Anggaman dakel so makasbel, pinabiskeg na Dios so linawa mi a mangipulong na maong a balita a nanlapud sikato.” (1 Tesalonica 2:2, MB) Agawaan lambengat nen Pablo so bengatlan agto nagawaan a bukor lapud sikatoy nanmatalek ed si Jehova.
Say pikakasi so akatulong ed sakey a biin manngaran na Sherry pian makapansalita a makmakpel sanen awalaan na pankanawnawan manpulong ya impormal. Sakey ya agew legan ton aalagaren so ipawil na masiken to manlapud appointment, walay naimano ton bii a manaalagar met. “Lapud mannerbiyos ak a maong,” so inkuan nen Sherry, “nampikasi ak ed si Jehova a makapanpakpel ak.” Sanen aasinggeran la nen Sherry so bii, walay sinmabi a ministro na Baptist. Ag-inilaloan nen Sherry a nakaarap to so sakey a membro na klero. Balet, sikatoy nampikasi lamet kanian ayarian toy mantasi. Apalimaan to
na literatura so bii tan akipaknaan a sikatoy ompawil lamet. Sano anamoten tayo iray pankanawnawan manpulong, makapanilalo itayo a no manmatalek itayo ed si Jehova, natulongan itayon mansalita a makpel.Sano Manbabangat
Say kawayangan a mansalita et maapit a misiglaotan ed panagbangat. Nipaakar ed saray lalakin manlilingkor ed kongregasyon diad maabig a paraan, oniay ibabaga na Biblia: “Akagamor ira na sakey a maabig a kipapasen a nipaakar ed sikara, tan baleg a kakpelan ed pananisia ed Kristo Jesus.” (1 Timoteo 3:13) Nagagamoran da iyan kawayangan a mansalita lapud personal dan iyaaplika so ibabangat da ed arum. Diad panggagawa ra ed satan et naproprotektaan tan napapabiskeg da so kongregasyon.
Sano walaan itayo na kawayangan a mansalita diad onian paraan, magmaliw a mas epektibo so simbawa tayo tan nayarin mas mainomay itan a tumboken. Imbes a nisuawi iray dumerengel ed makapuy ya ehemplo na sakey, napaseseg ira sano naiimano ra so praktikal a pangiyaaplika ed walan nibabangat ed sikara. Sayan kawayangan so ontulong ed saraman so walaan na espiritual a kualipikasyon pian nipetek odino ‘nipawil so agi ra’ sakbay itan ya onloor. (Galacia 6:1) Diad pisunian, say sakey a toon walaan na makapuy ya alimbawa et nayarin masuyat a mansalita, lapud liknaen to ya anggapo so kanepegan ton mansalita. No agniiter a tampol so nakaukolan a simbawa, nayarin makapadesyang iray pansumpalan.
Agto kabaliksan a no makpel itayon mansalita et magmaliw itayo lan mahusga, dogmatiko, odino ipilit tayoy opinyon tayo. Si Filemon so sinimbawa nen Pablo “lapud aro.” (Filemon 8, 9) Tan mapatnag a paborablin inawat iray insimbawa na apostol. On, nepeg a say aro so magmaliw a basiyan na antokaman a simbawan iiter na sakey a matatken!
Importantin tuloy so kawayangan a mansalita sano kaukolan a mangiter na simbawa. Importante met itan diad arum a kipapasen. Sinulat nen Pablo so kongregasyon diad Corinto, a kuan to: “Baleg so kakpelan ko a mansalita ed sikayo, baleg so gloriak lapu ed sikayo.” (2 Corinto 7:4) Si Pablo so agmasuyat ya angomenda ed saray agagi ton lalaki tan bibii sano kanepegan da itan. Say aro so amakiwas ed sikato ya iteen so imano to ed maabig iran kalidad na saray kapananisiaan to anggaman kabat to a walaray kalilingoan da. Say Kristianon kongregasyon natan so napabiskeg met sano saray mamatatken et lawas a mangokomenda tan mamapaseseg ed saray agagi ra.
Pian magmaliw iran epektibo ed panagbangat da, amin a Kristiano so kaukolan a nawalaan na kawayangan a mansalita. Si Sherry ya asalambit niman et labay ton pasesegen so ananak to a manpulong diad eskuelaan. “Anggaman siak so pinabaleg ed katuaan,” so inaksobi to, “mataltalag ak a nampulong diad eskuelaan. Tan agak tanto
manpupulong ya impormal. Tinepetan koy inkasiak, ‘Anton alimbawa so ipapatnag ko ed ananak ko?’” Satan so amakiwas ed si Sherry pian lalon pansagpotan to so manpulong ya impormal.On, naiimatonan na arum so gagawaen tayo tan naiimano ra no agtayo niyaaplika so ibabangat tayo. Sirin, panseetan tayon itunos iray kiwas tayo ed ibabaga tayo pian nawalaan itayo na kawayangan a mansalita.
Diad Panagpikasi
Nagkalalo lan importante so kawayangan a mansalita sano manpipikasi itayo ed si Jehova. Ag-itayo napupugeran ya ibalikas ed si Jehova so amin a nalilikna tayo, a matalek itayo a dengelen to iray pikakasi tayo tan ebatan to iratan. Kanian apresyaen tayo so maaro tan maapit a pisisiglaotan ed mangatatawen ya Ama tayo. Nepeg ya ag-itayon balot masuyat ya onasingger ed si Jehova, ya iisipen ya anggapo so kakanaan tayo. Panon to no say pakakakonsiensia tayo ed agawaan tayon lingo odino kasalanan so mamupuger ed sikatayon ibalikas so walad puso tayo? Kasin bulos itayo nin siansia a makaasingger ed Soberano na uniberso?
Say nitandoron posisyon nen Jesus bilang Atagey a Saserdote so mangiiter na kaaruman a basiyan pian walay kompiyansa tayo a manpikasi. Diad Hebreos 4:15, 16, oniay nabasa tayo: “Anggapo so sakey ya atagey a saserdote tayo ya agmakayarin mangasi ed saray kakapuyan tayo; noag say sakey a tinukso ed amin a singa sikatayo, ingen anggapo so kasalanan to. Onsingger itayo sirin a mailalo ed trono na grasya pian makagamor itayo na panangasi, tan makalmo itayo na grasya, pian natulongan to itayo sano panaon a kinepeg to.” Ontan so kablian na impatey nen Jesus tan say betang to bilang Atagey a Saserdote.
No panggunaetan tayon tuloken si Jehova, sikatayoy lawas makapanilalo a dengelen to itayo. Oniay insulat nen Juan: “Inararok ira, no say kapusoan tayo et agto itayo pooten, wala so katalkan tayo ed Dios; et bengatlan kerewen tayo nagamoran tayo ed sikato, ta sumpalen tayo so saray ganggan to, tan gawaen tayo so bengatla a makapaliket ed imaton to.”—1 Juan 3:21, 22.
Say ag-apegetan a panagpikasi ed si Jehova et mankabaliksan a nibaga tayo so antokaman a bengatla. Antokaman iray katatakotan, kapapagaan, pakakagonigonan, odino pakatatalawan tayo, nayarian tayon ibalikas iratan ed si Jehova, a matalek a lawas ton dengelen iray masimoon a pikakasi tayo. Anggano akagawa itayo na ambelat a kasalanan, say pakakakonsiensia et agnepeg a mangamper ed pambalikas tayo diad pikakasi no masimoon itayon magbabawi.
Talagan mabmabli so agkanepegan a langkap a kawayangan a mansalita. Diad panamegley na satan et nigloria tayo so Dios diad panagpulong tan panagbangat a kimey tayo tan lalon napaapit itayo ed sikato diad panagpikasi. Agtayo komon ‘italirak so kawayangan a mansalita, a baleg so tumang a naawat ed satan’—say tumang a bilay ya andi-anggaan.—Hebreos 10:35, NW.
[Litrato ed pahina 13]
Nansalita si apostol Pablo a makmakpel
[Saray litrato ed pahina 15]
Say epektibon panagbangat et mankaukolan na kawayangan a mansalita
[Litrato ed pahina 16]
Importante so kawayangan a mansalita diad panagpikasi