Say Gagala na Dios Parad Dalin​—Magano Lan Nasumpal

SANEN wala ni ed Paraiso si Adan tan Eva, oniay naawat dan ganggan manlapud Dios: “Manbunga kayo, tan ondakel kayo, tan makmakan yo so dalin, tan sikato so patuloken yo: tan niiter ed sikayo so pakauley ed saray sirasira na dayat, tan pakauley ed saray manok ya atap ed saray tawen, tan amin a bengatla a mabilay ya onggalaw dia ed dalin.”​—Genesis 1:28.

Say pamatulok ed dalin et aliwa labat a diad pantanem tan pangasikaso ed melmelag a kabiangan na satan. Kaukolan a palaknaben nen Adan tan Eva tan saray ilalak da so Paraiso anggad nasaknapan na satan so interon globo. Balet nankasalanan so inmunan sanasawa kanian pinapaway ira ed hardin na Eden. (Genesis 3:23, 24) Ingen, ag-itan mankabaliksan ya aglan balot napatulok so dalin.

Nayarian na matulok a katooan a patuloken so dalin lapud say Dios so mamendisyon ed sikara. Sanen benendisyonan na Dios iray totoo ed kadaanan ya Israel, amawala na maabig iran ani so kaumaan da tan nambunga na alay abig iray tanamanan da. Ontan met iray kipapasen sano magmamaliw lan paraiso so globo tayo. Unong a nisipan ed impuyan a Salita na Dios, say Biblia, ‘say dalin so mangiter na bunga to; say Dios, a Dios tayo a dili, bendisyonan to itayo naani.’ (Salmo 67:6) Bilang resulta, saray kaalogan tan kapalandeyan, saray kakiewan tan karosasan, saray ilog tan dayat ed dalin so manggayaga naani. (Salmo 96:11-13; 98:7-9) Say globo tayo so napanopano na mabunan tantanaman, makolor a kamanokan, mararakep ya ayayep, tan maliligsan totoo.

 Magano lan Niwala so Balon Mundo!

Asingsingger tayo lan naeksperiensya so balon mundo ya insipan nen Jehova a Dios. “Unong ed sipan to alagden tayo so saray tawen a balo tan dalin a balo,” so insulat nen apostol Pedro, “a sikara so panayaman na katunongan.” (2 Pedro 3:13) Sano nabasa na arum iray salita nen Pedro, nayarin ibaga ra ya agbalot magmaliw a paraiso iyan planeta. Nayarin say iisipen da a nasalatan et say literal a katawenan tan dalin. Talaga kasin ontan?

Anto so “saray tawen a balo”? Aliwa iratan a literal a katawenan a pinalsa na Dios. (Salmo 19:1, 2) Diad akauna iran bersikulo, tinukoy la nen Pedro so masimbolikon ‘katawenan’​—saray gobierno na too a nipaatagey odino nitandoro ed saray uuleyan da. (2 Pedro 3:10-12) Sayan ‘katawenan’ so onsasaew a manguley ed katooan tan mangangga iratan. (Jeremias 10:23; Daniel 2:44) Saray “tawen a balo” ya onsalat ed saratan et say Panarian na Dios a tugyopen na Arin si Jesu-Kristo tan saray kaiba ton tomatawir a 144,000 a napaoli ed mangatatawen a bilay.​—Roma 8:16, 17; Apocalipsis 5:9, 10; 14:1, 3.

Say “dalin a balo” a sinalambit nen Pedro et aliwan sakey a balon planeta. Ginawa nen Jehova so dalin a matukotukoy a panayaman na too ed andi-anggaan. (Salmo 104:5) No maminsan et uusaren na Biblia so salitan “dalin” pian tukoyen so totoo. (Genesis 11:1) Say dalin a magano lan naderal et saray totoon kabiangan na sayan marelmeng a mundo. Mipadpara ed satan, say mundo na agmaridios a totoo so aderal diad Delap ed panaon nen Noe. (2 Pedro 3:5-7) Anto sirin so kabaliksan na “dalin a balo”? Sakey itan a balon sosyedad na totoo​—saray tuan mandadayew ed Dios, a ‘maptek so kapusoan da.’ (Salmo 125:4; 1 Juan 2:17) Amin a ley parad “dalin a balo” et manlapu ed “saray tawen a balo.” Seguroen na saray matoor a lalaki diad dalin a nasumpal irayan ganggan.

Balo tan Makapakelaw Iran Pananguman!

Talagan marakdakep ya ayaman so inter nen Jehova ed sikatayo sanen imparaan to so dalin a pambilayan na too. Sikaton mismo so angikuan a saray kimey to diad dalin et “maong iran tuloy.” (Genesis 1:31) Nilagyat nen Satanas si Adan tan Eva a manrebelde. (Genesis 3:1-5; Apocalipsis 12:9) Balet, agla manbayag et seguroen na Dios a nawalaan na “bilay a peteg” iray maptek a totoo. Satan so “bilay ya andi-angga” diad silong na ayadyari iran kipapasen ed Paraiso. (1 Timoteo 6:12, 19) Konsideraen tayo natan so pigara ed saray bendisyon a napanggayagaan diad satan a panaon.

Legan na Sanlibon Taon ya Uley nen Kristo, si Satanas so napegetan tan agmakapangitarok na segsegang ed katooan. Oniay inkuan nen apostol Juan: “Akanengneng ak na sakey ya anghel ya inmepas a nanlapu ed tawen, a wala ed sikato so tombok na kaaralman, tan sakey a golonggolong dia ed lima to. Tan inerel to so dragon, saman so uleg a daan, a sikato so Diablo tan Satanas, tan sikato so binalor to ed sanlibon taon, tan sikato so imbantak to ed kaaralman, tan sikato so impukok to, tan tinatakan to ed tapew to, pian agto la tilaan so saray nasyones, angga ed kasumpal na sanlibon taon.” (Apocalipsis 20:1-3; 12:12) Say katooan so aglabat nibulos manlapud impluensya nen Satanas legan a sikatoy walad kaaralman, noagta manggayaga met ira ed dakel niran bendisyon diad silong na uley na Panarian.

Anggapo lan balot so nagawan karelmengan, karawalan, tan pambabakal. Oniay isisipan na Biblia: “Wala ni so daiset, et say bagel onandi: on, imanom so pasen to, et onandi.  Ingen ta saray mauyamo tawiren da naani dalin: tan manliket ira a dili ed inkadaakan na kareenan. Say matunong tawiren to so dalin tan manayam diman lawas.” (Salmo 37:10, 11, 29) Si Jehova a Dios so ‘mamatunda ed bakabakal angga ed sampot na dalin.’ (Salmo 46:9) Agaylan abig iran panamaseguro parad kaligenan tan kareenan!

Wala la so daakan a makapabunigas tan masasamit a tagano. Oniay inkanta na salmista: “Wala so daakan ya ilik ed tapew na dalin ed tapew na toktok na saray palandey.” (Salmo 72:16) Diad satan a panaon et anggapo lan balot so manlikna na irap lapud eras.

Anggapo la so toon nawalaan na beblay tan sakit. On, “say manaayam agto naani ikuan, Mabeblay ak.” (Isaias 33:24; 35:5, 6) Sanen wadia ed dalin si Jesu-Kristo, pinaabig to iray akating, piley, tan bulag. (Mateo 9:35; Marcos 1:40-42; Juan 5:5-9) Isipen pa so gawaen to ed balon mundo! Nonoten pa so liket a niwala sano apaabig la iray bulag, telek, piley, tan emel.

Legan a magmamaliw ya ayadyari so matulok a katooan, naaandi met la iray makaderal ya epekto na itatakken. Agla nakaukolan iray antipara, baston, saklay, wheelchair, ospital, tan tambal. Agaylan baleg a pananguman sano ompawil itayo la ed kaksilan! (Job 33:25) Kada kabuasan et ombangon itayo manlapud masamit ya ugip ed labi, a walaan na maksil a laman tan akaparaan ya onggapo ed sananey lamet a makapaliket a kimey ed sanagew.

Say kioli ed bilay na saray inad-aro tayo so mamagayaga ed kapusoan tayo. (Juan 5:28, 29; Gawa 24:15) Agaylan makapaliket so pangabrasa ed si Abel, Noe, Abraham, Sara, Job, Moises, Rut, David, Elias, Ester, tan dakel nira! Napaoli met so minilyon nin totoo. Maslak ed sikara so agbalot akaaral nipaakar ed si Jehova, balet sikara so abrasaen na saray totoon magunaet a mangibangat ed sikara nipaakar ed Dios, ed saray gagala to, tan ed Anak ton si Jesu-Kristo. Legan a nakakabatan na saray apaoli so nipaakar ed Manamalsa ra, say dalin so sigpot lan nasakbongan na pikakabat ed si Jehova.

Sankaabigan ed amin, sikatayo so magnayon lan makapandayew ed saksakey a tuan Dios. Nawalaan itayo na pribilehyon ‘manlingkor ed si Jehova tekep na panliket,’ tan sikatayoy mankakasakey a mankimey diad panagpaalagey na mararakep a kaabungan, panagtanem ed dalin tan diad kaunoran et napatulok so interon dalin. (Salmo 100:1-3; Isaias 65:21-24) Agaylan makapaliket so pambilay ya andi-angga diad sakey a mabunga, mareen, tan marakep a paraiso a satan so kigalangan na masanton ngaran nen Jehova!​—Salmo 145:21; Juan 17:3.

Say Kaunoran a Subok ed Katooan

Legan na Sanlibon Taon ya Uley nen Jesus, iyaplika to iray gunggona na dondon bagat to ed kada matulok ya indibidual. Nasabi panaon et napunas lan amin so kasalanan, tan magmaliw lan ayadyari so katooan. (1 Juan 2:2; Apocalipsis 21:1-4) Sano sigpot lan naandi iray epekto na kasalanan nen Adan, saray ayadyarin totoo so makakapet la ed saray estandarte na Dios ed pisikal, mental, moral, tan espiritual. Diad ontan et sikara lay ‘manbilay’ diad naspot a pantalos sano adampot da lay inkayadyari ya agla mankasalanan. (Apocalipsis 20:5) Saya tan say Paraison dalin so talagan mangigloria ed si Jehova!

Diad maganon panaon sano anampot la so Sanlibon Taon ya Uley nen Kristo, si Satanas  a Diablo tan saray demonyo to, odino saray marelmeng ya anghel, so ibulos manlapud kaaralman ya inkibasilengan da ed apalabas a samploran siglo. (Apocalipsis 20:1-3) Naabuloyan ira a manggawa na kaunoran lan pansagpot pian pabenegen iray totoo manlapud Dios. Anggaman walaray totoon nadaeg na mauges a pilpilalek, sayan panagrebelde et ag-ontalona. Saramay masiblet a totoo so kaiba ed si Satanas tan amin a demonyo to a pagiten nen Jehova. Aglan balot niwala so karelmengan. Sigpot lan naandi so amin a managgaway-mauges, tan saray matunong so makagamor na bilay ya andi-anggaan.​—Apocalipsis 20:7-10.

Kasin Wadman Ka?

Manatalaran so magnayon a liket ed saramay mangaaro ed si Jehova a Dios. Anggapo la so bengatlan makapasawa nipaakar ed andi-anggaan a bilay diad Paraiso. Diad tua et magmaliw a lalon makapainteres so bilay diad ilalabas na panaon, lapud andi-getar so pikakabat ed si Jehova a Dios. (Roma 11:33) Naynay a wala so balon bengatla a naaralan mo, tan magenagenap so panaon mon onggamor na pikakabat. Akin? Lapud aliwa labat a 70 odino 80 a taon so pambilay mo, noagta andi-angga.​—Salmo 22:26; 90:10; Eclesiastes 3:11.

No inarom so Dios, sika so lawas naliketan a maong a manggawa na linawa to. Oniay insulat nen apostol Juan: “Saya so aro na Dios, a sumpalen tayo so saray ganggan to: tan saray ganggan to aliwa ran ambelat.” (1 Juan 5:3) Kanian agmo aabuloyan a wala so mamatunda ed sika a mamaliket ed si Jehova a Dios diad panggawa na matunong. Nodnonoten so makapakelaw ya ilalo ya isisipan ed sika na Salita na Dios, say Biblia. Iteen mo so pusom ed panggawa na linawa nen Jehova, tan agkan balot onsusuawi ed satan a kurang. Diad ontan et natumangan ka sano nasumpal la so gagala na Dios ed dalin tan sano say sankagloboan ya ayaman tayo so magmaliw lan permanentin paraiso.

[Litrato ed pahina 4]

Lapud panamendisyon na Dios, say kaumaan ed Israel so nambunga na daakan

[Litrato ed pahina 7]

Antoran bendisyon so iilaloan mon panggayagaan diad Paraiso?