Say Kablian na “Mayumis a Baso”

“SIKAYO lalaki ya asawa, miamong kayo ed asawa yo unong na igaganggan na kakabatan; igalang yo so bii, alwaran yo a singa mayumis a baso,” so insulat nen apostol Pedro. (1 Pedro 3:7) Kasin sayan impanukoy na Kasulatan ed bii bilang “mayumis a baso” so manleglemew ed bibii? Imanoen tayo pa so orihinal a kabaliksan a labay ya ipasabi na pinuyanan a managsulat.

Say Griego a noun a nipatalos a “galang” et mankabaliksay “bili, balor, . . . respeto.” Kanian, kaukolan a pidenengan na Kristianon asawan laki so asawa to tekep na inkatamoy, a panengnengan to na manepeg a konsiderasyon a singa ed sakey a mipipisit tan mabli a baso. Aliwa itan a panangiyabeba. Bilang alimbawa, imanoen pa so Tiffany lotus lamp. Sayan marakdakep a lamp shade so talagan mipipisit. Kasin onabeba so balor na satan lapud mipipisit? Andin balot! Nen 1997, say orihinal a Tiffany lotus lamp so impasubasta ed kantidad a 2.8 milyon a dolyar! Lapud mipipisit a materyales na satan, lalon inmatagey so balor na satan, imbes ya onabeba.

Mipadpara, say pangigalang ed bii a singa ed mayumis a baso so agmanmelmelag odino manleglemew ed sikato. Say piamong ed asawan bii unong ed “igaganggan na kakabatan” et mankabaliksan ya ikonsidera na asawan laki iray maabig a kalidad tan kakapuyan, labay tan aglabay, panmoria tan liknaan na asawa to. Bibidbiren tan rerespetoen na maasikason asawan laki iray pandumaan dan dua ed personalidad. Ipapanengneng to so konsiderasyon a kanepegan na asawa to ‘pian saray pikakasi to so agnasebelan.’ (1 Pedro 3:7) Say asawan laki ya agmanrerespeto ed inkabii na asawa to so mamepeligro ed mismon relasyon to ed Dios. Malinew ya agleleglemewen na Salita na Dios so bibii. Imbes, satan so mangiiter na dignidad tan galang ed sikara.

[Picture Credit Line ed pahina 32]

© Christie’s Images Limited 1997