Say Liket ed Pankurang ed Katooran

“Say bendisyon nen Jehova makapayaman; tan agmangarum na ermen.”​—ULIRAN 10:22.

1, 2. Akin a nepeg tayon paliisan so alablabas a panagnonot ed arapen?

 “SAY alablabas a panagnonot ed arapen . . . so mangaamper ed sikatayo a manliket ed saray bengatlan walad sikatayo natan,” so inkuan na sakey ya Amerikanon pilosopo. Tua itan ed saray ananak ya alablabas a mannononot ed saray pribilehyon parad saray wala la’d edad, a nibabaliwala da la iray gunggona ed kaugawan da.

² No maminsan et nayarin ontan so panagnonot na saray mandadayew ed si Jehova. Nodnonoten pa so nayarin nagawa. Pirawrawat tayo so pakasumpal na insipan na Dios a pagmaliwen ton paraiso so dalin. Magunaet tayon tatalaranan so bilay ya anggapo lay sakit, itatakken, ot-ot, tan kairapan. Anggaman maabig so panilalo ed saratan a bengatla, panon to no say pinonot tayon lanang et saray materyal a bendisyon ed arapen ya agtayo la natetebek iray espiritual a bendisyon ed kaplesan a panaon tayo? Agaylan makapaermen itan! Sikatayoy magmainomay a nadismaya tan ‘ombeblay ed puso lapud nitantan so iilaloan’ tayo. (Uliran 13:12) Lapud saray problema tan kairapan ed bilay, nayarin makalikna itayo na ermen odino kaskasian tayo lay inkasikatayon dili. Imbes a nasungdoan iray agmaabig a kipapasen, nayarin magmaliw itayo la ingen a mareklamo. Napaliisan itan ya amin no maapresya tayon dalepdepen iray bendisyon ed sikatayo natan.

3. Anto so pangiyapasakeyan tayo na imano tayo ed sayan artikulo?

³ “Say bendisyon nen Jehova makapayaman; tan agmangarum na ermen,” so inkuan na Uliran 10:22. Agta makapaliket a bendisyon so maaligwas a kipapasen ed espiritual na saray modernon-agew a lingkor nen Jehova? Konsideraen tayo so pigaran aspekto na espiritual ya inkaaligwas tayo tan imanoen tayo no anto so kabaliksan na saratan ed sikatayon mismo. No ipanaon tayo so pandalepdep ed  saray bendisyon ya ipapalabo nen Jehova ed ‘saray maptek a totoo a manaakar ed inkaskey’ odino katooran, talagan ombiskeg so determinasyon tayon mantultuloy ed maliket a panaglingkor ed mangatatawen ya Ama tayo.​—Uliran 20:7.

‘Saray Bendisyon a Makapayaman ed Sikatayo’

4, 5. Dinan a bangat na Biblia so papablien yon mismo, tan akin?

⁴ Say suston pikakabat ed saray bangat na Biblia. Kaslakan ya ibabaga na saray relihyon na Kakristianoan a manisia ira ed Biblia. Balet, ag-ira mitutunosan ed ibabangat na satan. Anggan saray mankakarelihyonan so walaan na nandurumaan a panmoria no anto so peteg ya ibabangat na Biblia. Agaylay pidumaan na kipapasen da ed saray lingkor nen Jehova! Antokaman so nanlapuan tayon nasyon, kultura, odino etniko, mandadayew itayo ed Dios a kabkabat tayo ed ngaran. Sikato et aliwan sakey a misteryoson trinidad a dios. (Deuteronomio 6:4; Salmo 83:18; Marcos 12:29) Amta tayo met a say manunan isyu na sankatalbaan ya inkasoberano na Dios so magano lan naresolbe tan diad pamasiansia tayo ed katooran tayo ed sikato, kada sakey ed sikatayo so personal a nalalanor ed satan ya isyu. Amta tayo so katuaan nipaakar ed inaatey tan bulos itayo la ed agmanepeg a takot ed Dios ya ibabagan mamapairap ed saray totoo diad impiernon-apoy odino iiyan to ira ed purgatoryo.​—Eclesiastes 9:5, 10.

⁵ Niarum ni, agaylan makapaliket a naamtaan ya aliwa itayon nibanbanan resulta na agnakontrol ya ebolusyon! Imbes, sikatayo so pinalsa na Dios, a ginawa unong ed indengan to. (Genesis 1:26; Malaquias 2:10) ‘Pisalamatan taka ta makapataktakot tan makapakelkelaw so inkagawak,’ so inkanta na salmista ed Dios to. ‘Pankelkelawan so gawagawam, tan kabat a maong na kamarerwak.’​—Salmo 139:14.

6, 7. Antoran pananguman ed bilay yo odino ed bilay na arum a kabat yo a nanresulta ed sakey a bendisyon?

⁶ Paliisan iray makaderal ya ugali tan kagagawa. Dakdakel iray pasakbay diad media nipaakar ed kapeligroan na panagsigarilyo, alabas a kakainum, tan sebel a sekso. Kaslakan et ibabaliwala labat iratan a pasakbay. Balet, anto so nagawa sano naaralan na sakey a masimoon a too a kokondenaen na tuan Dios iratan a bengatla tan naeermenan ed saramay manggagawa ed saratan? Agayla, satan a too so napakiwas a mangitunda ed saratan! (Isaias 63:10; 1 Corinto 6:9, 10; 2 Corinto 7:1; Efeso 4:30) Anggaman say manunan rason ed panggagawa to ed satan et pian paliketen si Jehova a Dios, wala niray kaaruman a nagunggona to​—magmaong a bunigas tan kareenan na nonot.

⁷ Parad dakel et mairap so pangitunda ed saray mauges a bisyo. Balet, diad kada taon et nilibolibo so makapanggagawa ed satan. Idededika ra so inkasikara ed si Jehova tan manpapabautismo ira ed danum, ya ipapaamta ra ed publiko ya inekal da la ed bilay da iray agamil ya agmakapaliket ed Dios. Agaylan makapaseseg itan parad sikatayon amin! Ombiskeg so determinasyon tayon mansiansian bulos manlapud panangaripen na makasalanan tan makapasakit a kondukta.

8. Anton simbawa a nibase ed Biblia so mamawala na liket ed pamilya?

⁸ Maliket a bilay na pamilya. Diad dakel a bansa et ombebetel so relasyon ed loob na pamilya. Dakel a panamaley so manreresulta ed diborsyo, a mabetbet a mangaapekta ed emosyon na ananak. Diad arum a bansa ed Europa, saray pamilya a walaan na saksakey ya ateng so manugyop ed ngalngalin 20 porsiento na amin a sankaabungan. Panon ya ontutulong si Jehova ed sikatayon mankurang ed katooran diad sayan pamaakaran? Ipangasin basaen so Efeso  5:22–6:4, tan imanoen so maabig a simbawa na Salitay Dios ed saray kaasawaan a lalaki, bibii, tan ananak. Say pangiyaplika ed amin a nidatak ditan tan ed arum nin parte na Kasulatan so maseguron mamaelet ed bedber na panamaley, makatulong ed atateng ed suston panamabaleg ed ananak, tan mamawala na maliket a bilay na pamilya. Agta makapaliket itan a bendisyon?

9, 10. Panon a midumaan so panmoria tayo ed arapen manlapud panmoria na mundo?

⁹ Sikatayo so apaseguroan a magano lan naresolbe iray problema ed mundo. Anggaman ed inkadunong ed siensia tan teknolohiya tan saray masimoon a sagpot na pigaran lider, siansia nin agnaresolbe iray seryoson problema ed bilay natan. Si Klaus Schwab, say angiletneg ed World Economic Forum, so agano nin angikuan a “lalon ondarakel iray problema ya aarapen na mundo balet ta ondaraiset lay panaon a panresolbe ed saratan.” Sinaglawi to “iray kapeligroan a mangaapekta ed amin a bansa a singa say terorismo, say pakadederal na kaliberliber tan say agmaligen a kipapasen na pinansyal.” Oniay unor ya inkuan nen Schwab: “Mas ni nen say kapiganman, nipapaarap la natan so mundo ed saray peteg a kipapasen a mankaukolan na pantutulongan na totoo tan porsigidon ikiwas.” Legan ya onaabanti so koma-21 a siglo, say interamentin kipapasen na arapen na katooan so siansia nin mauddiem.

¹⁰ Agaylan makapaliket a naamtaan ya inletneg la nen Jehova so sakey ya uksoyan a makaresolbe ed amin a problema na katooan​—say Mesianikon Panarian na Dios! Diad panamegley na satan, say tuan Dios so ‘mamatunda ed bakabakal’ tan mangitarok na ‘daakan a kareenan.’ (Salmo 46:9; 72:7) Say alanaan ya Ari, si Jesu-Kristo, so ‘mangiliktar ed say naukolan, say makabos, ya iyarawi to ra ed panamalingo tan panamasoot.’ (Salmo 72:12-14) Diad silong na uley na Panarian, daakan la so tagano. (Salmo 72:16) Si Jehova et “punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” (Apocalipsis 21:4) Say Panarian so niletneg la ed tawen tan magano lan manresolbe ed amin a problema ed dalin.​—Daniel 2:44; Apocalipsis 11:15.

11, 12. (a) Kasin say pangegemtan ed panliliket so mangitarok na magnayon a liket? Ipaliwawa. (b) Anto so mangitarok na tuan liket?

¹¹ Amta tayo no anto so mangitarok na tuan liket. Anto so peteg a mangitarok na tuan liket? Imbaga na sakey a sikolohista a say liket et walaan na taloran aspekto​—panliliket, pibibiang (ed saray aktibidades a singa say trabaho tan pamilya), tan gagala (pankimey parad babaleg a gagala odino kalat a pakagunggonaan na arum). Diad satan a talo, indatak to so panliliket bilang agtanton importante balet oniay inkuan to: “Makapasurprisa ta isesentro na dakerakel a totoo ed bilay da so panggegemtan na panliliket.” Anto so panmoria na Biblia ed satan?

¹² Oniay imbaga nen Arin Solomon na kadaanan ya Israel: “Inkuan ko dia ed pusok, Gala natan, salien ta ka a malikeliket; kanian manliket ka a magayaga: et, nia, saya met sikato so kaapaan. Inkuan ko ed elek, Atiwel; tan ed liket, anto so gawaen na saya?” (Eclesiastes 2:1, 2) Diad Makasulatan a paraan, temporaryo labat so gayaga a nagamoran ed panliliket. Komusta met so pibibiang ed trabaho odino kimey? Walaan itayo na makabkabaliksan a kimey a pibiangan, salanti, say panangipulong ed Panarian tan panaggaway-babangatan. (Mateo 24:14; 28:19, 20) No inanabang tayo ed arum so mensahe na kilalaban a nidatak diad Biblia, mibibiang itayo ed sakey a kimey a manresulta ed kilalaban tayo tan ed saramay ondengel ed sikatayo. (1 Timoteo 4:16) Bilang “kakimeyan na Dios,” naeksperiensya tayo  a “lalo a mapalar so mangiter nen say mangawat.” (1 Corinto 3:9; Gawa 20:35) Sayan kimey so mangarum na kabaliksan ed bilay tayo tan mangitarya ed Manamalsa na sakey ya ebat ed mamabalaw ed sikato, si Satanas a Diablo. (Uliran 27:11) On, impatnag nen Jehova ed sikatayo a say maridios a debosyon so mangitarok na puro tan magnayon a liket.​—1 Timoteo 4:8.

13. (a) Diad anton paraan a sakey a makapaliket a bendisyon ed sikatayo so Teokratikon Eskuelaan Parad Ministeryo? (b) Panon kayon nagugunggonaan ed Teokratikon Eskuelaan Parad Ministeryo?

¹³ Walaan itayo na importante tan epektibon programa na panangipasal. Si Gerhard so manlilingkor bilang matatken ed sakey a kongregasyon na saray Tasi nen Jehova. Oniay nanonotan to sanen sikatoy tobonbalo ni: “Bilang kalangweran, walay problemak ed panagsalita. Sano nadedesdes ak, agko nibalikas a maong so ibabagak tan ata-ata ak la. Abebbeba so nengneng ko’d inkasiak tan nanermenan kon tuloy itan. Impanaral ak na atateng ko ed sakey a kurso nipaakar ed panagsalita balet anggapo so kakanaan na impansagpot da. Say problemak et nipaakar ed panagnonot, aliwan pisikal. Balet, wala so alay abig a probisyon nen Jehova​—say Teokratikon Eskuelaan Parad Ministeryo. Say impanpalistak ed sayan eskuelaan so angiter ed siak na apasimbalon biskeg. Ginawak so anggaay nayarian ko pian ipasal so naaralan ko. Tan epektibo itan! Marmarlas lay panagsalitak, agak la naeermenan, tan mas makpel ak la diad ministeryo. Natan et manpapaliwawa ak la ed publiko. Misalsalamat ak ed si Jehova, ya amaaligwas ed kalidad na bilay ko panamegley na sayan eskuelaan.” Agta say pangipapasal nen Jehova ed sikatayo a manumpal ed kimey to so sakey a rason pian manliket?

14, 15. Diad panaon na gonigon, anton tulong so akaparaan? Iyilustra.

¹⁴ Walaan itayo na personal a relasyon ed si Jehova tan suporta na nankakasakey ya internasyonal ya impanaagi. Si Katrin, a manaayam diad Alemanya, so adismayan maong sanen nadngelan to iray report nipaakar ed maksil a yegyeg tan say agawan tsunami diad abalaten-bukig ya Asia. Say anak ton bii so ompapasyar ed Thailand sanen agawa so desyang. Diad loob na 32 ya oras et ag-amta na sayan ina no kasin mabilay ni so anak to odino kaiba kasi ed saramay inatey a mandakel lan mandakel. Akankainawa si Katrin sanen naawat to so tawag ed telepono a say anak ton bii et wala la’d maligen a kipapasen!

¹⁵ Anto so akatulong ed si Katrin sanen sikatoy pirmin naaaburido? Oniay insulat to: “Diad amin lawarin panaon et nampikasi ak si Jehova. Aminpigan naeksperiensyak so biskeg tan kareenan na nonot lapud satan. Niarum ni, saray maaron kaagian ed espiritual so binmisita ed siak tan pinaseseg da ak.” (Filipos 4:6, 7) Agaylan makapasinagem komon so kipapasen to sano linmabas labat iratan a makapagonigon ya oras ya agnampikasi ed si Jehova tan anggapo so panagligliwa na maaron agagi ed espiritual! Say maapit a relasyon tayo ed si Jehova tan ed Anak to kalaktip lay maapit a pisisiglaotan tayo ed Makristianon impanaagi et sakey a nikadkaduman bendisyon, a mabmablin tuloy tan agnayarin ibaliwala.

16. Mangiter na sakey ya eksperiensya a mangiyilustra ed kablian na ilalon kioli.

 ¹⁶ Walay ilalo tayo a napinengnengan tayo lamet iray inaatey ya inad-aro ed bilay. (Juan 5:28, 29) Sakey a malangwer nin laki a manngaray Matthias so pinabaleg bilang sakey ed saray Tasi nen Jehova. Balet, lapud agto namomoria iray bendisyon to, sikato so kinmasipa ed Kristianon kongregasyon sanen sikatoy tin-edyer ni. Natan et oniay insulat to: “Anggapon balot so seryoson impitongtong ko ed si tatay ko. Diad loob na pigaran taon et naynay so sangsangan mi. Balet, say lawas a kaliktan nen tatay ko et say pankaabigan ko. Inad-aro to ak, ya agkon balot itan amoria nensaman. Nen 1996, legan ya akayurong ak ed abay na dukolan to, a mannangnangis ak a sankabembenan ko so lima to, imbagak ed sikato a panermenan ko so amin a ginawak tan sikato so inad-arok. Balet agto ak la narengel. Kayari na aganon panaon na impansakit to, sikato so inatey. No mannengnengan kami nen tatay ko diad kikioli, gawaen mi iray bengatlan agmi agawaan nensaman. Tan seguradon panliketan ton naamtaan a say anak to et manlilingkor la natan bilang matatken tan sikamin sanasawa et apribilehyoan a manlingkor bilang payunir.” Agaylan bendisyon ed sikatayo so ilalon kioli!

‘Agto Mangarum na Ermen’

17. Anto so nitulong ed sikatayo na pandalepdep ed saray bendisyon nen Jehova?

¹⁷ Nipaakar ed mangatatawen ya Ama to, oniay imbaga nen Jesu-Kristo: “Sikato pabutayen to so banwa to ed saray mauges tan maong, tan papelagen toy uran ed saray matunong tan aliwan matunong.” (Mateo 5:45) No ipapalabo nen Jehova a Dios iray bendisyon anggan ed saray agmatunong tan marelmeng, mas nagkalalo la ed saramay mankukurang ed dalan na katooran! “Anggapo so maong a bengatla ya isiblet [nen Jehova] ed saraman so manakar a mapmaptek,” so imbaga na Salmo 84:11. Sano umamengen tayo so nikadkaduman panangasikaso tan panangiyansakit to ed saramay mangaaro ed sikato, say kapusoan tayo so napano na pisasalamat tan liket!

18. (a) Panon a nibaga a si Jehova et agmangarum na ot-ot ed panamendisyon to? (b) Akin a maniirap so dakel ed saray matoor ed Dios?

¹⁸ “Say bendisyon nen Jehova”​—satan so lapuan na inkaaligwas ed espiritual na totoo to. Tan apaseguroan itayo a sikato et “agmangarum na ermen.” (Uliran 10:22) Balet, akin a nasusubok tan nasasali so dakel ed saray matoor ed Dios, a pansesengegan na pirmin ot-ot tan paniirap da? Saray kairapan tan gonigon so nagagawa ed sikatayo lapud taloran manunan rason. (1) Say dilin makasalanan a tendensia tayo. (Genesis 6:5; 8:21; Santiago 1:14, 15) (2) Si Satanas tan saray demonyo to. (Efeso 6:11, 12) (3) Say marelmeng a mundo. (Juan 15:19) Anggaman aabuloyan nen Jehova iray mauges a bengatla a nagawa ed sikatayo, aliwan sikato so panlalapuan na saratan. Diad tua, “amin a maong a palangkap tan amin ya ayadyarin palangkap manlapu ed tagey tan onleksab a manlapu ed Ama na saray liwawa.” (Santiago 1:17) Saray bendisyon nen Jehova so agpansengegan na ot-ot.

19. Anto so mantatalaran ed saramay mantutultuloy a mankurang ed katooran?

¹⁹ Say pakaeksperiensya na inkaaligwas ed espiritual so mangilalanor ed pakawalaan na maapit a relasyon ed Dios. Sano nabayuboan tayo so maapit a relasyon ed sikato, sikatayo so ‘makatipon na sakey a maabig a pangiletnegan a niparaan ed panaon ya onsabi, pian nabembenan tayo so bilay, a satan so bilay a peteg,’ salanti, say andi-anggaan a bilay. (1 Timoteo 6:12, 17-19) Diad balon mundo a gawaen na Dios ed arapen, saray kayamanan tayo ed espiritual so mangilaktip met ed saray pisikal a bendisyon. Say peteg a bilay so nagamoran na amin na saramay ‘ontatalineng ed boses nen Jehova.’ (Deuteronomio 28:2) Tekep na apabiskeg a determinasyon, komon ta maliket tayon mantultuloy a mankurang ed katooran.

Anto so Naaralan Yo?

• Akin ya agmakabat so alabas a pannonot ed arapen?

• Antoran bendisyon so panggagayagaan tayo natan?

• Akin a maniirap iray matoor a lingkor na Dios?

[Tepetepet Parad Panagaral]