Tepetepet Manlapud Saray Manbabasa

Anto so sengegan na idadagsa na “saray mabli a bengatla na saray amin a nasyon” dia ed “abung” na tuan panagdayew?​—Aggeo 2:7.

Diad panamegley nen propeta Aggeo, oniay impasakbay nen Jehova: “Panmayegmegen ko naani so saray amin a nasyon; et saray mabli a bengatla na saray amin a nasyon onsabi ra naani; et panoen ko naani so sayan abung ed gayaga.” (Aggeo 2:7) Kasin say kamamayegmeg na “amin a nasyon” so sengegan na ikakamang na “saray mabli a bengatla” na saray nasyon​—saray matuan-impanpuson totoo​—ed tuan panagdayew? Say ebat et andi.

Konsideraen pa no anto so manpapamayegmeg, odino manyayakayak, ed saray nasyon tan no anto so resulta na satan. Ibabaga na Biblia a “manggugulo so saray nasyon, tan saray totoo et manuumameng ira na sakey a maapa a pamaakaran.” (Salmo 2:1) Say “maapa a pamaakaran” ya “uumamengen,” odino dadalepdepen da et say pantultuloy na dilin inkasoberano ra. Anggapo lay makapanmayegmeg ed sikara noagta say pakasesga ed uley da.

Say sankamundoan a panangipulong ed niletneg lan Panarian na Dios a gagawaen na saray Tasi nen Jehova so nagmaliw a sesga ed saray nasyon. Diad tua, say Mesianikon Panarian na Dios ya uuleyan nen Jesu-Kristo so ‘mamuyak tan mangupot ed amin na saray panarian’ a ginawa na too. (Daniel 2:44) Say mensahe na panangukom a kabiangan ed ipupulong tayo so manmamayegmeg ed saray nasyon. (Isaias 61:2) Tan onkakasil so panyayakayak legan ya onlalaknab tan papasyaen so panangipulong a kimey. Anto sirin so mapropetikon ipapasakbay na Aggeo 2:7?

Oniay nabasa tayo ed Aggeo 2:6: “Onia so kuan nen Jehova na saray ehersito: Maminsan ni, ed maganggano, et panmayegmegen ko naani so saray tawen, tan say dalin, tan say dayat, tan say amagaan a dalin.” Diad impangaon ed sayan bersikulo, oniay insulat nen apostol Pablo: “Insipan to, a kuan to, Maminsan ni agko labat yegyegen so dalin, noag pati say tawen met. Et sayan salita: Maminsa’nin ipaliwawa to’y kaekal na saray bengatla ran ayegyeg, a singa saray bengatla ran agawa pian magnayon so saray bengatla ran ag-ayegyeg [say Panarian].” (Hebreos 12:26, 27) On, naderal so interon peles a sistema na bengabengatla pian niletneg so balon mundo a ginawa na Dios.

Nasasagyat iray matuan-impanpuson totoo diad tuan panagdayew aliwan lapud kamamayegmeg, odino kayayakayak na saray nasyon. Say kiwas a manasagyat ed sikara ya onasingger ed si Jehova tan diad panagdayew ed sikato et mipara ed samay kiwas a sengegan na kamamayegmeg na saray nasyon, salanti, say sankamundoan a panangipulong ed niletneg lan Panarian na Dios. Say panangiyabawag ed “andi angga a maabig a balita” so mangiyaasingger ed saray suston-nikiling ya indibidual dia ed panagdayew ed tuan Dios.​—Apocalipsis 14:6, 7.

Say mensahe na Panarian et nipaakar ed panangukom tan kilalaban. (Isaias 61:1, 2) Nankadua so resulta na panangipulong ed satan diad sankamundoan: say pakayakayak na saray nasyon tan say idagsa na makaparoyroyon bengatla na saray nasyon diad kigloriaan nen Jehova.