Ipapaamta nen Jehova so “Panganggaan a Manlapu ed Gapo”
Ipapaamta nen Jehova so “Panganggaan a Manlapu ed Gapo”
“Ipaliwawak so panganggaan a manlapu ed gapo, tan nanlapu nen inmuna a panaon ipaliwawak so saray bengatla ya agni agawa.”—ISAIAS 46:10.
1, 2. Anto so makatantanda ed saray ebento a misiglaotan ed inkagba na Babilonia, tan anto so ipapabitar na satan a katuaan nipaakar ed si Jehova?
DIAD bilunget na labi, ag-aliklikas ya inmabanti iray kalaban a sundalo diad Ilog Eufrates pian lusoben da so mabiskeg a syudad na Babilonia. Sanen akaasingger la ra ed wangalan na syudad, walay makapasurprisan anengneng da. Akalukas so duaran abalbaleg a puerta na padir na Babilonia! Sikara so kinmalab manlapud ilog insan nilooban da so syudad. Maples ya akobkob so syudad. Si Ciro, a pangulo ra, so tampol ya angontrol ed akonkestan bansa tan diad saginonor et angipaakseb na ganggan ya ibulos iray akautibon Israelita. Nilibon akautibo so sinmempet pian ipawil so panagdayew ed si Jehova diad Jerusalem.—2 Awaran 36:22, 23; Esdras 1:1-4.
2 Saratan ya ebento nen taon 539-537 K.K.P. so pepekderan la natan na saray historyador. Say makatantanda et nipaamta la iratan ya ebento 200 a taon ni ed asasakbay. Pinuyanan nen Jehova so propeta ton Isaias pian deskribien so inkagba na Babilonia ya asakbay lan nipaamta. (Isaias 44:24–45:7) Aliwa labat a saray sirkumstansya nipaakar ed inkagba na Babilonia so imparungtal na Dios noagta say ngaran met na mismon managkonkestan lider. * Oniay inkuan nen Jehova ed saray Israelita, a tastasi to nensaman: “Nonoten yo so saray inmuna a bengatla nen abayag la: ta siak so Dios, et anggapo la so sananey; Dios ak, et anggapo so mipara ed siak; ya ipaliwawak so panganggaan a manlapu ed gapo, tan nanlapu nen inmuna a panaon ipaliwawak so saray bengatla ya agni agawa.” (Isaias 46:9, 10a) On, si Jehova so sakey a Dios a makaamta la no anto so nagawa.
3. Konsideraen tayo iray ebat ed antoran tepet?
3 Kaunongan kalaknab so amta na Dios nipaakar ed arapen? Amta la kasi nen Jehova no anto so gawaen na kada sakey ed sikatayo? Kasin nigeter la so arapen tayo? Saray ebat na Biblia ed saratan tan ed arum niran misiglaotan a tepet so konsideraen ed sayan artikulo tan ed ontumbok ya artikulo.
Jehova—Dios na Propesiya
4. Siopa so Lapuan na saray propesiyan nikurit ed Biblia?
4 Lapud nayarian ton amtaen so nagawa ed arapen, pinuyanan nen Jehova iray lingkor to ed panaon na Biblia a mangikurit ed dakel iran propesiya pian naamtaan tayo la no anto so gagala nen Jehova. “Nia, saray unona a bengatla nagawa la, tan balobalo a bengabengatla so ipaliwawak,” so inyabawag nen Jehova. “Dia ed arapen na ipaway da ibagak ed sikayo so nipaakar ed sikara.” (Isaias 42:9) Agaylan pribilehyo itan parad saray totoo na Dios!
5. Anto so responsabilidad ed masakbay lan pakaamta ed no anto so gawaen nen Jehova?
5 Oniay ipapaseguro ed sikatayo nen propeta Amos: “Petepeteg [ya] anggapo naani gawaen nen Katawan a Jehova, ya agnaani nipuyan so inamot to ed saray aripen to a propeta.” Say masakbay lan pakaamta ed satan so atekepan na responsabilidad. Imanoen pa so mapuersan ilustrasyon ya inusar nen Amos: “Inmengak so leon; siopa so ag-antakot?” No panon a say iyaglem na leon et manibwak ed too tan ayep a walad kaliberliber to, ontan met na saray propeta a singa si Amos ya angiyabawag a tampol ed saray mensahe nen Jehova. “Si Katawan a Jehova nansalita; siopa naani so agmanpropeta.”—Amos 3:7, 8.
‘Inmaligwas’ so ‘Salita’ nen Jehova
6. Diad anton paraan a tinmalona so “simbawa” nen Jehova nipaakar ed inkagba na Babilonia?
6 Diad panamegley nen propeta ton Isaias, oniay imbaga nen Jehova: “Say simbawak mansiansia naani, tan gawaen ko naani so amin a labay ko.” (Isaias 46:10b) Say “simbawa” na Dios, salanti, say linawa odino gagala to a nipaakar ed Babilonia, so anaglawi ed inkatawag nen Ciro manlapud Persia pian mangonkesta tan mangigeba ed Babilonia. Satan a gagala so abayag lan impaiyabawag nen Jehova. Unong a naimano tayo la, satan so sigpot ya asumpal nen taon 539 K.K.P.
7. Akin a makapanmatalek itayo a lawas ontalona so ‘salita’ nen Jehova?
7 Ngalngalin apatiran siglo antis a konkestaen nen Ciro so Babilonia, inarap nen Arin Josafat na Juda so nanmuyong ya armada na Ammon tan Moab. Onia so impikasi to tekep na panagmatalek: “O Jehova, a Dios na saray atateng mi, aliwa ka ta a Dios ed tawen? Tan agka ta manuley ed saray amin a nanarian na saray nasyon? Tan dia ed limam wala so pakayari tan pakapanyari, dia ed ontan ya anggapo so masarag ya ontalindeg ed sika.” (2 Awaran 20:6) Ontan met a kompiyansa so imbalikas nen Isaias sanen oniay inkuan to: “Si Jehova na saray ehersito ninonot to, tan siopa so mamaandi kabaliksan to? Et say lima to niyunat, tan siopa so mangipikos ed sikato?” (Isaias 14:27) Diad saginonor, sanen nagmaliw lan limpio so aderal a kanonotan nen Arin Nabucodonosor, oniay mapaabeban binidbir to: “Anggapo so makabaat ed lima [na Dios], odino mankuan ed sikato, Anto so gawaen mo?” (Daniel 4:35) On, oniay ipapaseguro nen Jehova ed totoo to: “[Say] salitak . . . ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangiyakaran ko ed sikato.” (Isaias 55:11) Nawalaan itayo na nagnap a kompiyansa a lawas nasusumpal so ‘salita’ nen Jehova. Agbalot onsaew so gagala na Dios.
Say “Andi-anggaan a Gagala” na Dios
8. Anto so “andi-anggaan a gagala” na Dios?
8 Diad sulat to ed saray Kristiano ed Efeso, tinukoy nen apostol Pablo so Dios bilang walaan na “andi-anggaan a gagala.” (Efeso 3:11, NW) Aliwa lambengat itan a panagplano ed gawaen, a singano nononoten ni labat na Dios so paraan na panumpal to. Imbes, satan so misiglaotan ed determinasyon nen Jehova a manumpal ed orihinal a gagala to ed katooan tan ed dalin. (Genesis 1:28) Pian natulongan itayon mangapresya ed inkasegurado na gagala to, konsideraen so primeron propesiya a nikurit ed Biblia.
9. Panon a misiglaotan so Genesis 3:15 ed gagala na Dios?
9 Say sipan ed Genesis 3:15 so mangipapabitar a kayarin tuloy na impankasalanan nen Adan tan Eva, denetermina la nen Jehova a say simbolikon asawa ton bii so mamawala na sakey a bini, odino ilalak. Amta met la nen Jehova so resulta na gulaan na bii tan si Satanas tan ed baetan na mansumlangan iran bini ra. Anggaman abuloyan nen Jehova so Bini na asawan bii na Dios a nasugat ed mukor, diad manepeg a panaon na Dios et sugaten na Bini so ulo na uleg, si Satanas a Diablo. Kaleganan ni, say gagala nen Jehova so progresibon nasumpal diad apilin linya na kapolian anggad kipatnag nen Jesus bilang insipan a Mesias.—Lucas 3:15, 23-38; Galacia 4:4.
No Anto so Dedesidien la nen Jehova a Nagawa
10. Kasin denesidi la nen Jehova ed gapo so pankasalanan nen Adan tan Eva? Ipaliwawa.
10 Nipaakar ed betang nen Jesus diad gagala na Dios, oniay insulat nen apostol Pedro: “[Si Jesus] atarya la a tua nen agni apalsa so mundo, [sikato so] nipatnag balet ed saraya ya unor ya agew lapu ed sikayo.” (1 Pedro 1:20) Kasin denesidi la nen Jehova ed gapo so pankasalanan nen Adan tan Eva pati say pangitarya to ed dondon bagat diad panamegley nen Jesu-Kristo? Andi. Say salitan “apalsa” odino inkiletneg so nipatalos manlapud Griegon termino a literal a mankabaliksan na “pangitanem na bini.” Wala la kasi so ‘impangitanem na bini,’ odino impangilukon ed ilalak a too, sakbay a nankasalanan si Adan tan Eva? Anggapo. Nanilalak si Adan tan Eva kayari na intunganga ra. (Genesis 4:1) Kanian say impandeside nen Jehova a kipatnag na “bini” et kayari na impanrebelde nen Adan tan Eva sakbay na impan-ilalak da. Say impatey tan inkioli nen Jesus so angitarya na maaron uksoyan na dondon, a pakaandian lay atawir a kasalanan tan ed ami-amin a sagpot nen Satanas.—Mateo 20:28; Hebreos 2:14; 1 Juan 3:8.
11. Anton inkagawa so denesidi la nen Jehova a nagawa diad pakasumpal na gagala to?
11 Denesidi la na Dios so kagawa na sananey nin bengatla diad pakasumpal na gagala to. Nipabitar itan ed insulat nen Pablo ed saray taga-Efeso, salanti, “panagtipon ed saray amin a bengatla ed Kristo, na saray bengatlan wala ed tawen, a singa met saray wala ed tapew na dalin.” Insan, diad impanukoy ed “saray bengatlan wala ed tawen,” salanti, saramay apilin tomatawir a kaiba nen Kristo, oniay insalaysay nen Pablo: “Atandaan itayo nen una unong na kanonotan na saman a manggawa ed saray amin a bengatla unong ed kuan na linawa ton dili.” (Efeso 1:10, 11) On, denesidi la nen Jehova ed gapo so limitadon bilang na saray totoon manugyop ed komaduan kabiangan na bini na asawan bii na Dios, a nakaiba nen Kristo diad pananginabang ed saray gunggona na dondon. (Roma 8:28-30) Tinukoy nen apostol Pedro iratan bilang “masantos a nasyon.” (1 Pedro 2:9) Si apostol Juan so awalaan na pribilehyon makanengneng ed pasingawey nipaakar ed bilang na saramay magmaliw a kaiban manuley nen Kristo, salanti, 144,000. (Apocalipsis 7:4-8; 14:1, 3) Lapud akikasakey ira ed si Kristo bilang Ari, sikara so manlilingkor ya “onkanan dayew na gloria [na Dios].”—Efeso 1:12-14.
12. Panon tayon naseguro a saray indibidual a kabiangan na 144,000 so agnigeter a napili?
12 Say nigeter lan pakapili na 144,000 so agmankabaliksan a walaray indibidual a nigeter lan manmatoor ed panaglingkor da ed Dios diad ontan a paraan. On, say simbawa na Kristianon Griegon Kasulatan so manunan nisulat pian mangigiya tan mamabiskeg ed saray alanaan a mamasiansia ed katooran da tan ed inkakanepegan da ed mangatatawen a tawag. (Filipos 2:12; 2 Tesalonica 1:5, 11; 2 Pedro 1:10, 11) Amta la nen Jehova ed gapo a 144,000 ya indibidual so onkualipikan manlingkor parad gagala to. Say ikualipika ra so akadepende ed no panon a pilien na saramay naimbitaan ya indibidual so paraan na pambilay da, sakey a desisyon a nepeg a gawaen a mismo na kada sakey ed sikara.—Mateo 24:13.
No Anto so Aamtaen nen Jehova a Nagawa ed Arapen
13, 14. Diad anto so pitunosan na pangaagamil nen Jehova ed pakayari ton mangamta ed nagawa ed arapen, tan akin?
13 Lapud si Jehova et Dios na propesiya tan gagala, panon ton uusaren so pakayari ton amtaen so nagawa ed arapen? Unona, napaseguroan itayo ya amin a paraan na Dios et matua, matunong, tan maaro. Sanen sinulat nen apostol Pablo iray Hebreon Kristiano nen inmunan siglo K.P., pinekderan to a say samba tan sipan na Dios et say panggawa na “duaran bengatla ya agnauman, a sikara so agnayarin pantilaan na Dios.” (Hebreos 6:17, 18) Diad sulat to ed babangatan a si Tito, imbalikas met nen Pablo so kanonotan to sanen insulat to a say Dios et ‘agnayarin manburi’ odino mantila.—Tito 1:2.
14 Niarum ni, anggaman say pakapanyari nen Jehova et andiay-limitasyon, sikato so lawas onkikiwas a walaan na inkahustisya. Si Jehova so deneskribe nen Moises bilang “sakey a Dios a napanmatalkan tan anggapo so kaugsan, sikato so matunong tan maptek.” (Deuteronomio 32:4) Antokaman so gawaen nen Jehova et mitunosan ed alay abig a personalidad to. Napatnagan ed saray kiwas to so sigpot a pantutunosan na saray manunan kalidades to, salanti, say aro, kakabatan, inkahustisya, tan pakayari.
15, 16. Antoran napampilian so insalaysay nen Jehova ed si Adan diad hardin na Eden?
15 Konsideraen met no panon so pisiglaotan na satan ya amin diad saray agawa ed hardin na Eden. Bilang maaron Ama, si Jehova so angitarya ed amin a pankaukolan na saray pinalsan totoo. Inikdan to si Adan na abilidad a manisip, mankatunongan ed sakey a pamaakaran, tan makapandesisyon. Aliwan singa saray pinalsan ayayep ya igigiya na nisipor ed sikaran kapasidad, si Adan so walaan na abilidad a manpili. Kayari na inkapalsa nen Adan et inmusdong so Dios manlapud trono to ed tawen tan anengneng to so “amin a bengatla a ginawa to, et nia maong iran tuloy.”—Genesis 1:26-31; 2 Pedro 2:12.
16 Sanen denesidi nen Jehova ya iter so sakey a ganggan ed si Adan ya agto kakanen so ‘kiew a pakaamtaan na maong tan mauges,’ intarya To so magenap a bilin ta pian makapandesidi si Adan no anto so gawaen to. Inabuloyan to si Adan a mangan ed “amin a kiew na tanamanan” nilikud ed sakey a kiew tan sikatoy apasakbayan ed makapatey a resulta na pangan ed insebel a bunga na kiew. (Genesis 2:16, 17) Insalaysay To ed si Adan iray pansumpalan na saray kiwas to. Anto so gawaen nen Adan?
17. Akin a nibaga tayon pipilien nen Jehova so pangusaran to ed pakayari ton amtaen so nagawa ed arapen?
17 Mapatnag ya ag-inamta nen Jehova so gawaen nen Adan tan Eva, anggaman Sikato so walaan na pakayarin mangamta ed amin a bengatla sakbay a nagawa itan. Sirin, say punto et aliwan no kasin nayarian nen Jehova ya amtaen so nagawa ed arapen, noagta no kasin dedesidien ton gawaen itan. Niarum ni, nayarian tayon ikatunongan ya ag-inamta nen Jehova, bilang Dios na aro, so nepeg a nagawa insan maruksa ton inggeter so panrebelde, pati ed amin na saray mauges a pansumpalan na satan. (Mateo 7:11; 1 Juan 4:8) Sirin, sano aagamilen nen Jehova so pakayari ton amtaen so nagawa ed arapen, pipilien to so pangusaran to ed satan.
18. Akin a say pamipili nen Jehova ed pangusaran to’d pakayari ton mangamta ed nagawa ed arapen et agpakapatnagan na kakulangan ed biang to?
18 Kasin say pamipili nen Jehova ed pangusaran to’d pakayari ton mangamta ed nagawa ed arapen et mankabaliksan a sikatoy kulang na pakayari odino pakauley? Andi. Deneskribe nen Moises si Jehova bilang “say Dampay,” ya inyarum to: “Ayadyari so gawa to.” Sikato so agnatetel ed saray epekto na kasalanan na too. Say makaderal iran epekto na satan a naeeksperiensya tayon amin so makasengeg ed agmatunong a kiwas na itutunganga. Malinew ya inkatunongan nen apostol Pablo a “lapu ed kasalanan; et say patey ed satan linma ed amin a too, ta amin nankasalanan.”—Deuteronomio 32:4, 5; Roma 5:12; Jeremias 10:23.
19. Antoran tepet so konsideraen ed ontumbok ya artikulo?
19 Unong ed asingbat tayo la, naimano tayo ya anggapo so ag-inkahustisya ed biang nen Jehova. (Salmo 33:5) Imbes, saray abilidad, moral a kalidad, tan estandarte nen Jehova so mitunosan ed gagala to. (Roma 8:28) Bilang Dios na propesiya, ipapaamta nen Jehova so “panganggaan a manlapu ed gapo, tan nanlapu nen inmuna a panaon ipaliwawak so saray bengatla ya agni agawa.” (Isaias 46:9, 10) Amoria tayo met a pipilien to labat so panguusaran to na pakayari ton amtaen so nagawa ed arapen. Panon tayo sirin a naapektoan ed satan? Panon tayon naseguro a saray desisyon tayo et mitunosan ed maaron gagala na Dios? Tan antoray bendisyon no gawaen tayo itan? Konsideraen iratan a tepet ed ontumbok ya artikulo.
[Paimano ed leksab]
^ par. 2 Nengnengen so brosyur a Libron Parad Amin a Totoo, pahina 28, ya impalapag na saray Tasi nen Jehova.
Kasin Nipaliwawa Yo?
• Antoran alimbawa nensaman so mamaneknek a say ‘salita’ na Dios et lawas ‘inmaligwas’?
• Anto so inggeter la nen Jehova nipaakar ed “andi-anggaan a gagala” to?
• Diad anton paraan ya uusaren nen Jehova so pakayari ton amtaen so nagawa ed arapen?
[Tepetepet Parad Panagaral]
[Litrato ed pahina 22]
Si Josafat so walaan na panagmatalek ed si Jehova
[Litrato ed pahina 23]
Impasakbay la na Dios so nipaakar ed ipatey tan kioli nen Jesus
[Litrato ed pahina 24]
Kasin inggeter la nen Jehova so gawaen nen Adan tan Eva?