Istorya na Bilay

Maliket Ak a Manlilingkor Anggaman ed Sakit Ko

UNONG ED SALAYSAY NEN VARNAVAS SPETSIOTIS

Nen 1990, diad edad kon 68 et paralisado ak la. Ingen ta diad loob na manga 15 taon la, siak so maliket a manlilingkor diad isla na Cyprus bilang sigpot-panaon a ministro. Anto so amabiskeg ed siak pian mansiansian aktibo ed panaglingkor ed si Jehova anggaman ed sakit ko?

SIAK so nianak nen Oktubre 11, 1922 diad sakey a pamilya a walaan na siameran ananak—apatiran lalaki tan limaran bibii. Nanayam kami ed baryo na Xylophagou, diad Cyprus. Anggaman maasenso iray atateng ko, say pangasikaso ed ontan kabaleg a pamilya so mangilalanor ed impasyan pankimey diad kaumaan.

Say amak, si Antonis, so talagan maaral tan mausisa. Kayarin tuloy na inkianak ko, naimano nen Tatay ko so sakey a tract ya apauloan na Peoples Pulpit, ya impalapag na Saray Estudyante na Biblia (tawag ed saray Tasi nen Jehova nensaman), sanen binisita to so maestro ed baryo mi. Binasa to itan, tan agnambayag et piumameng to so lugan na satan. Bilang resulta, si Tatay tan sakey ed saray kaaro to, si Andreas Christou, so sankaunaan diad isla mi ya akilimog ed saray Tasi nen Jehova.

Imbulaslas Anggaman ed Isusumpa

Sinmabi panaon et sikaran dua so akala na dakel nin publikasyon a nibase ed Biblia manlapud saray Tasi nen Jehova. Agnambayag et apakiwas ira di Tatay tan Andreas ya inabang ed saray kabaryoan mi iray katuaan ed Biblia a naaaralan  da. Lapud pampupulong da, sinmumpan maong so klero na Griegon Ortodokso tan arum nira a nanisip a saray Tasi nen Jehova et mauges ya impluensya.

Balet, dakel ed saray kabandaan mi so nanrespeto ed sarayan duaran managbangat na Biblia. Kabkabat so amak lapud kamaongan tan inkamabunlok to. Naynay ton tutulongan iray pobrin pamilya. No maminsan et sikatoy agnaliklikas ya ompaway ed abung mi diad aralem lan labi pian mangitilak na trigo tan tinapay diad puerta na saray mankaukolan a pamilya. Lapud agmasiblet a kondukta ra bilang Kristiano, nagmaliw a lalon makapasagyat so mensahe na sarayan duaran ministro.—Mateo 5:16.

Say resulta et manga labinduan totoo so nagmaliw ya interesado ed mensahe na Biblia. Sanen binmulaslas so pakatalos da ed katuaan, amoria ra so pankaukolan a mantitipon diad nanduruman ayaman pian aralen so Biblia bilang sakey a grupo. Nen 1934, si Nikos Matheakis, sakey a sigpot-panaon a ministro a nanlapu ed Gresya, so sinmabi ed Cyprus pian pituyawan to so grupo diad Xylophagou. Tekep na anos tan determinasyon, si Brother Matheakis so tinmulong a mangorganisa ed grupo tan tinulongan to iran nawalaan na malinew a pakatalos ed Kasulatan. Sayan grupo so anugyop ed inmuna-unan kongregasyon na saray Tasi nen Jehova diad Cyprus.

Legan ya ombubulaslas so Makristianon kimey tan ondarakel ni so totoon mangaawat na katuaan ed Biblia, inisip na saray agagi a nakaukolan da so permanentin pasen a pantitiponan. Say sankapanguloan a kuyak, si George, tan say akulaw ton si Eleni, so angiyopresi ed kamarin da. Sayan pasen, ya asingger ed abung da, so inapiger tan pinagmaliw a marakep a pasen a pantitiponan. Kanian saray agagi so awalaan na primeron Kingdom Hall diad isla. Agaylay liket da ed satan! Tan agaylan makapabiskeg itan parad lalon ibubulaslas!

Sinayakup Ko so Katuaan

Nen 1938, diad edad a 16 et denesidik so magmaliw a karpentero. Kanian, siak so imbaki nen Tatay diad kabisera na Cyprus, Nicosia. Lapud nononoten toy pansumpalan ko, inyareglo to so panayam ko ed abung nen Nikos Matheakis. Sayan matoor ya agi so siansia nin  nanonotan na dakel a taga-isla lapud inkaseseg tan inkamaparawes to. Say mapatnag ya inkaligsa tan agnagiing ya inkakpel to so nakaukolan iran kalidad parad siopaman a Kristiano diad Cyprus legan na saraman ya asasakbay ya agew.

Siak so tinulongan a maong nen Brother Matheakis a nawalaan na aralem a pikakabat ed Biblia kanian inmaligwas ak ed espiritual. Legan a wala ak ed sikara, inatendian ko so amin a pantitipon a ginawa diad ayaman da. Diad primeron pankanawnawa, aliknak ya inmaralem so panangarok ed si Jehova. Nagmaliw ak a determinadon mamabiskeg ed importantin relasyon ko ed Dios. Diad loob na pigaran bulan, tinepetan ko si Brother Matheakis no nayari ak lan miulop ed sikato diad lawak na kimeyan. Satan so agawa nen 1939.

Kayari na pigaran panaon, sinmempet ak pian bisitaen so pamilyak. Say impakapiulop ko ed amak so lalon amabiskeg ed kombiksion ko ya aromog ko la so katuaan tan say kabaliksan na bilay. Nen Setyembre 1939, ginmapo so Guerra Mundial II. Dakel a malangwer a lalaki a kaedad ko so namboluntaryon mi-guerra, balet lapud tinumbok ko so direksion na Biblia, denesidik so mansiansian neutral. (Isaias 2:4; Juan 15:19) Diad saman a taon et indedikak so bilay ko ed si Jehova tan abautismoan ak nen 1940. Diad primeron pankanawnawa, aliknak a naandi lay takot ko ed too!

Nen 1948, nankasal kami nen Efprepia. Apalaboan kami na apatiran ananak. Agnambayag et amoria mi a kinaukolan mi so mankimey a maong ta pian napabaleg ira unong ed pananisiplina tan panamilin nen Jehova. (Efeso 6:4) Nisentro iray pikakasi tan sagpot mi diad panangipurek ed ananak mi na aralem a panangaro ed si Jehova tan panagrespeto ed saray ganggan tan prinsipyo to.

Linmesa so Sakey ya Angat Lapud Problema ed Bunigas

Nen 1964, diad edad a 42, agmakalikna so nikawanan a limak tan ulpok. Kalkalnan kinmayat itan ed nikawigin parti na laman ko. Siak so asuri a walaan na muscle atrophy (kalkalna odino biglan ikapuy na masel), sakey ya agnatambal a sakit a mansumpal ed sigpot a pakaparalisa. Siak so agonigon a maong ed satan. Maples tan ag-inilaloan ya agawa iray bengatla! Lapud atalonaan ak na ingongot tan sanok, inisip kon: ‘Akin ya agawa iya ed siak? Akin a nadudusa ak na onia?’ Atalonaan kon siansia so primeron impakabiglak ed walan asuri ed siak. Balet ta  akalikna ak na pirmin kapagaan tan panduaruwa. Walaray tepet a sebangsebang ed nonot ko. Naparalisado ak la kasi tan mandependi ak la ed arum? Panon kon natalonaan itan? Nalegpet ko ni kasi so pamilyak—say asawak tan say apatiran ananak mi? Talagan ansakit so pagew ko sano nononoten ko iratan.

Diad sayan baleg a pananguman ed bilay ko, aliknak so pankaukolan na iyasingger ed si Jehova diad pikakasi tan masimsimoon kon imbesngaw ed sikato so amin a kapagaan tan pakakaaburidoan ko. Labi-agew ak a manpipikasi legan ya onaagus iray luak. Agnambayag et atambayo ak. Say makapaligliwa iran salita na Filipos 4:6, 7 so apaneknekan a tua ed biang ko: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.”

Impanalonak ed Inkaparalisadok

Linmoor so kipapasen ko. Amoriak a kinaukolan ko so onadaptan tampol ed balo iran kipapasen ko. Lapud agak la makapantrabaho bilang karpentero, denesidik so mananap na mainomay a trabaho ya ontukoy ed kipapasen ko ed pisikal balet ta nasarag ko nin legpeten so pamilyak. Diad gapo et nanlako ak na sorbetes ya inusar ko so melag a luganan. Satan so trabahok ed loob na anem taon anggad kapilitan ak lan man-wheelchair lapud sakit ko. Insan nananap ak na mas anlemew a trabaho a nayarian ko.

Manlapu la’d 1990 say bunigas ko so linmoor anggad punton agak lan balot makapantrabaho. Natan et akadepende ak la ed arum, pati ed saray kimey a gendat lan gagawaen na sakey a mabunigas a too. Nakaukolan ko so tulong no siak so ondukol, manuras, tan manpales. Pian makaatendi ak ed saray pantitipon na Kristiano, kinaukolan ya iyasingger so wheelchair ko ed luganan insan alsaen itan. Kasabik ed Kingdom Hall, kinaukolan ya ileksab ak manlapud luganan tan ilugan ed wheelchair insan itulak itan anggad loob. Legan na pantitipon, walay de-koryentin heater ed abay ko pian mansiansian ampetang so salisalik.

Balet, anggaman ed inkaparalisak, regular kon aatendian so amin a pantitipon. Amtak a ditan so pangibabangatan nen Jehova ed sikatayo, tan say pakapilimog ed saray kaagian ed espiritual so peteg a salimbengan tan lapuan na tulong tan panamaseseg. (Hebreos 10:24, 25) Naynay a makakatulong ed siak so regular ya ibibisita na kapananisiaan a matatken ed espiritual. Talagan aliknak so liknaan nen David: “Say kopak manlepwas.”—Salmo 23:5.

Say pinablik ya asawa et alay abig a katulongan ko ed amin na saratan a taon. Say ananak ko et mabulbulos met a sinmuporta ed siak. Diad loob na pigaran taon la natan, tinulongan da ak ed inagew-agew iran pankaukolan ko. Aliwan mainomay so gagawaen da, tan diad ilalabas na saray taon et lalon inmirap so pangasikaso ed siak. Sikara so talagan napanuliranan ed panag-anos da tan ed pangisesekar day inkasikara, kanian ipipikasik ed si Jehova ya itultuloy to iran bendisyonan.

Say sakey nin alay abig a probisyon nen Jehova pian napabiskeg iray lingkor to et say pikakasi. (Salmo 65:2) Bilang ebat ed impapuso iran pikakasik, siak so inikdan nen Jehova na biskeg pian mantultuloy ak ed pananisia diad amin na sarayan taon. Nagkalalo la no nadidismaya ak, say pikakasi so mangiiter ed siak na inawa tan makakatulong pian mansiansia so liket ko. Say naynay a pitotongtong ko ed si Jehova so makapaligliwa ed siak tan mamapasimbalo ed determinasyon kon mantultuloy. Siak so sigpot a kombinsido a dengelen nen Jehova iray pikakasi na saray lingkor to tan sikara so iikdan to na kareenan na nonot a nakaukolan da.—Salmo 51:17; 1 Pedro 5:7.

Manuna ed amin, siak so napapabiskeg no nanonotan ko so pamaabig na Dios ed amin a natumangan na bilay ed Paraiso diad silong na uley na Panarian na Anak to, si Jesu-Kristo. Saray lua na gayaga so aminpigan inmagus ed lupak legan kon uumamengen itan ya alay abig  ya ilalo.—Salmo 37:11, 29; Lucas 23:43; Apocalipsis 21:3, 4.

Impanlingkor Ko Bilang Sigpot-Panaon a Ministro

Sanen sinurik so kipapasen ko nen 1991, amoriak a say sankaabigan a paraan pian napaliisan so panliknan pakaskasi et say pagmaliw ya okupado ed panginabang na mablin maong a balita na Panarian ed arum a totoo. Diad satan a taon, ginmapo ak a nanlingkor bilang sigpot-panaon a ministro.

Lapud baldado ak la, manpupulong ak diad panamegley na pansulat. Balet, parad siak et aliwan mainomay so pansulat; nakaukolan so peteg a panagsagpot. Nairapan ak a manbemben na bolpen, ta kinmapuy lan maong so limak lapud muscle atrophy. Ingen, tekep na inkaseet tan pikakasi, siak so manpupulong panamegley na sulat diad loob la na masulok a 15 taon. Uusaren ko met so telepono pian pulongan so totoo. Agkon balot asaew so pankanawnawa ya itongtong so ilalok nipaakar ed balon mundo tan say Paraison dalin dia ed saray kakanayon, kakaarok, tan kakaabay ko ya ombibisita ed ayaman ko.

Bilang resulta, nanggayagaan ko so dakel iran makapaseseg ya eksperiensya. Maliket kon naimatonan so sakey ed saray apok, ya inyaralan ko na Biblia manga 12 taon lay apalabas, ya onaaligwas ed espiritual tan papablien to so katuaan na Biblia. Lapud apakiwas na nipasal ed Biblia a konsiensia to, sikato so nansiansian matoor tan agnagiing nipaakar ed isyu na neutralidad bilang Kristiano.

Panliketan kon tuloy sano ombales met iray totoon sinulat ko parad kaaruman ya impormasyon nipaakar ed Biblia. Sagpaminsan a walaray onkekerew na kaaruman nin literatura na Biblia. Singa bilang, walay biin tinmawag ed siak pian pisalamatan to so makapaseseg a sulat ko ed masiken to. Makapainteres ed sikato so lugan na sulat. Satan so nanresulta ed aminpigan impakapitongtong ko ed sikaran sanasawa nipaakar ed Biblia diad mismon ayaman ko.

Masnag ya Ilalo

Diad inlabas na saray taon, anengneng ko so indakel na manangiyabawag na Panarian ed sayan parte na mundo. Say melag a Kingdom Hall a walad abay na abung nen kuyak George so inmawang tan aminpigan pinasimbalo. Satan so alay dakep a pasen a panagdayewan, ya uusaren na duaran kongregasyon na saray Tasi nen Jehova.

Say amak so inatey nen 1943, diad edad a 52. Balet agaylan abig so impatawir to ed espiritual! Walora ed ananak to so angawat na katuaan tan siansia nin manlilingkor ed si Jehova. Diad baryo na Xylophagou, a diman so inkianakan nen Tatay, tan ed kabangibang iran baryo, wala la natan so taloran kongregasyon, a walaan na dagup a 230 a manangipalapag na Panarian!

Saratan a positibon resulta so lapuan na baleg a liket parad siak. Natan, diad edad a 83, naliliknak tekep na kompiyansa iray salita na salmista: “Saray kilaw a leon naukolan ira tan manlikna ra na eras, balet saray mananap ed Jehova ag-ira naukolan naani na anto a maong a bengatla.” (Salmo 34:10) Siak so magunaet a mantatalaran ed panaon sano say propesiya ed Isaias 35:6 so nagawa la: “Satan la manlukso so piley a singa sakey ya ulsa.” Anggad pakasumpal na saray insipan to, determinado ak a mantultuloy a manlingkor ed si Jehova anggaman ed sakit ko.

[Mapa ed pahina 17]

(Parad aktual a format, nengnengen so publikasyon)

TURKEY

SIRYA

LEBANON

CYPRUS

Nicosia

Xylophagou

Dayat na Mediteraneo

[Litrato ed pahina 17]

Say primeron Kingdom Hall ed Xylophagou, ya uusaren ni anggad natan

[Saray litrato ed pahina 18]

Kaibak si Efprepia nen 1946 tan natan

[Litrato ed pahina 20]

Panliliketan ko so panagpulong panamegley na telepono tan sulat