‘Pilien so Bilay ta Pian Mantultuloy a Manbilay’

‘Inyan ko ed arap yo so bilay tan say patey, say bendisyon tan say ayew, sikato so makasengeg a pilien yo so bilay tan pian manbilay kayo.’—DEUTERONOMIO 30:19.

1, 2. Diad antoran paraan ya apalsa so too ed indengan na Dios?

 “MANGGAWA itayo na too a kaulibay na inalageyan tayo.” Satan a balikas na Dios so nikurit ed unonan kapitulo na Biblia. Unong ed satan, “say Dios pinalsa to so too ed indengan ton dili, dia ed indengan na Dios sikato so pinalsa to,” so inkuan na Genesis 1:26, 27. Kanian, say inmunan too so midumaan ed amin niran pinalsa ed dalin. Lapud kaulibay to so Manamalsa to, nayarian ton aligen so awawey na Dios nipaakar ed panagkatunongan, panangipatnag na aro, inkahustisya, kakabatan, tan pakayari. Sikato so walaan na konsiensia ya ontulong ed sikaton manggawa na saray desisyon a pakagunggonaan to tan mamaliket ed mangatatawen ya Ama to. (Roma 2:15) Diad antikey, si Adan so walaan na bulos a linawa odino panagdesisyon. Diad impakaimaton nen Jehova ed inkadesinyo na mangaraldalin ya anak to, oniay inkuan to nipaakar ed ginawa to: “Nia maong iran tuloy.”—Genesis 1:31; Salmo 95:6.

² Bilang ilalak nen Adan, sikatayo so apalsa met unong ed indengan tan ulibay na Dios. Balet, kasin walaan itayo na pampilian no anto so gawaen tayo? Anggaman walaan na pakayari si Jehova a mangamta ed nagawa diad arapen, agto dedesidien iray gawaen tayo tan pansumpalan na saratan. Agton balot abuloyan a saray ananak to ed dalin et kontrolen na predestinasyon. Pian natalosan tayo so kaimportantian na pangusar ed bulos a linawa diad panggawa na duga iran desisyon,  aralen tayo nin unona so sakey a leksion ed nasyon na Israel.—Roma 15:4.

Say Israel so Walaan na Kawayangan a Manpili

3. Anto so primero ed Samploran Ganggan, tan panon a pinili na matoor ya Israelita so pangunor ed satan?

³ “Siak si Jehova a Dios mo, ya angipaway ed sika a nanlapu ed dalin ya Ehipto, ya impaway ed abung na inkaaripen,” so inkuan nen Jehova ed saray Israelita. (Deuteronomio 5:6) Nen 1513 K.K.P., naeksperiensya na nasyon na Israel so mamilagron inkiliktar manlapud panangaripen na Ehipto kanian andian ira na rason pian panduaruwaan iratan a salita. Dia ed primero ed Samploran Ganggan, oniay inyabawag nen Jehova panamegley na pinagkasangiyan ton Moises: “Anggapo so sananey a dirios mo ed arap ko.” (Exodo 20:1, 3) Diad satan ya inkagawa, pinili na nasyon na Israel so ontulok. Mabulos dan inter ed si Jehova so nikabkabiig a debosyon da.—Exodo 20:5; Numeros 25:11.

4. (a) Anton napampilian so impaamta nen Moises ed Israel? (b) Anton desisyon so nagawaan tayo natan?

⁴ Kayari na manga 40 taon, si Moises so apaskar a mangipanonot ed sakey nin kailalakan na saray Israelita nipaakar ed pilien da. “Tawagen ko so tawen tan say dalin a manasi sumpa ed sika ed saya ya agew, ya inyan ko ed arap mo so bilay tan say patey, say bendisyon tan say ayew, sikato so makasengeg a pilien mo so bilay tan pian manbilay ka, sika tan say kapolian mo.” (Deuteronomio 30:19) Mipadpara natan, nayarian tayo so manpili. On, nayarian tayo so manggawa na desisyon a manmatoor ed panaglingkor ed si Jehova tekep na ilalon andi-anggaan a bilay, odino nayarian tayon pilien so agpangunor ed sikato tan managmak na makapuy iran pansumpalan. Konsideraen so duaran alimbawa na totoo a nanggawa na mandumaan a desisyon.

5, 6. Anto so pinili nen Josue, tan anto so nansumpalan?

⁵ Nen 1473 K.K.P., indaulo nen Josue iray Israelita ya amaarap ed Insipan a Dalin. Diad mapuersan bilin to sakbay ya ompatey, oniay inkerew nen Josue ed interon nasyon: “No isipen yo a mauges so panlingkor ed si Jehova, manpili kayo ed sayan agew no siopa so panlingkoran yo; no saray dirios a nanlingkoran na saray atateng yo a wala ra nensaman ed nibaliw na Ilog, odino saray dirios na saray Amorreo, a dia ed dalin da so panaayaman yo.” Insan, diad impanukoy to ed pamilya to, oniay intuloy to: “Nipaakar ed siak tan say abung ko, manlingkor kami ed si Jehova.”—Josue 24:15.

⁶ Diad akadkauna, pinaseseg nen Jehova si Josue a manpakpel tan manpabiskeg, a binilin Ton ag-onkakasipa ed katutulok ed Ganggan na Dios. Imbes, nayarian nen Josue so ontalona ed dalan to diad maimatlek a pambasa to ed libro na Ganggan diad agew tan labi. (Josue 1:7, 8) Tan ontan so agawa. Say pinili nen Josue so nansumpal ed saray bendisyon. “Anggapo so linmiwat a balot ed anton maong a bengatla a si Jehova sinalita to ed abung na Israel,” so inyabawag nen Josue. “Amin [et] agawa.”—Josue 21:45.

7. Diad panaon nen Isaias, anto so pinili na arum ya Israelita, tan antoray nansumpalan?

⁷ Diad pidumaan, konsideraen pa so agawa ed Israel kayari na manga 700 a taon. Diad saman a panaon et dakel ya Israelita so ontutumbok ed saray paganon kustombre. Alimbawa, diad unor ya agew na taon, mantitipon so totoo ed sakey a lamisaan a walay nanduruman mananam a tagano tan masamit ya alak. Aliwa itan a simplin pandaragup na pamilya. Sakey itan a relihyoson seremonya a mamapagalang ed duaran paganon dirios. Inkurit nen propeta Isaias so panmoria na Dios ed ontan ya ag-inkamatoor: “Sikayo ya angikaindan ed kinen Jehova, ya angilingwan ed masanto a palandey ko, ya angitadia na sakey a dulang a nipaakar ed Kapalaran tan mamano ed alaokan ya alak ed Signo.” Panisiaan da a say ani ed loob na sakey taon so akadepende, aliwan ed pakawalaan na panamendisyon nen Jehova, noagta diad pamaliket ed dios na “Kapalaran” tan dios na “Signo.” Balet, diad katuaan to et say inkarebelyoso ra tan say ginetma ran desisyon so nandetermina ed nansumpalan da. “Igeter ta kayo naani ed kampilan,” so inyabawag nen Jehova, “et sikayo ondakmomo kayo naani ed managpatey; lapu ed sanen tinmawag ak, agkayo inmebat; sanen nansalita ak agyo tinalineng; noag ingen ginawa yo ray mauges ed saray matak, tan pinili yo ray agko panliketan.” (Isaias 65:11, 12)  Say agmakabat ya impamili ra so angitarok na kadederal da, tan anggapoy agawaan na dirios na Signo (odino suwerti) tan Kapalaran.

Gawaen so Suston Panagpili

8. Unong ed Deuteronomio 30:20, anto so nalalanor ed dugan panagpili?

⁸ Sanen sinimbawa nen Moises so Israel pian pilien da so bilay, impabitar to so taloran kundang a nepeg dan gawaen: “Say panangaro ed Jehova a Dios mo, say pananumpal ed boses to tan say ipepeket ed sikato.” (Deuteronomio 30:20) Usisaen tayo so kada sakey ed saraya ta pian duga so pilien tayo.

9. Panon tayon nipatnag so panangaro tayo ed si Jehova?

⁹ Diad pangaro ed si Jehova a Dios tayo: Pilien tayo so manlingkor ed si Jehova lapud sikatoy inaro tayo. Diad italineng ed manamasakbay iran alimbawa diad panaon na Israel, naresistian tayo so amin a tukso a manggawa na imoralidad tan napaliisan tayo iray estilo na kabibilay a nayarin mangilereg ed sikatayo ed patit na materyalismo ed mundo. (1 Corinto 10:11; 1 Timoteo 6:6-10) Mansiansia itayon matoor ed si Jehova tan tumboken tayo iray pananontonan to. (Josue 23:8; Salmo 119:5, 8) Sakbay ya onloob iray Israelitas ed Insipan a Dalin, oniay insimbawa ed sikara nen Moises: “Nengneng yo, imbangat ta kayo na saray panamatontonan tan bilibilin, salanti, singa say ingganggan ed siak nen Jehova a Dios ko, a nepeg yo a gawaen so ontan diman ed pegley na dalin a looban yo a kayarianen. Unoren yo ra sirin tan sumpalen yo ra; ta saya sikato so kakabatan yo tan pananalos yo ed pakanengneng na katooan, ya ondengel naani ed saraya ya amin a pananontonan.” (Deuteronomio 4:5, 6) Natan la so panaon pian ipatnag tayo so panangaro tayo ed si Jehova diad pangiyuna ed linawa to ed bilay tayo. Seguradon natumangan itayo no pilien tayon gawaen itan.—Mateo 6:33.

10-12. Antoran leksion so naaralan tayo ed pangonsidera ed agawa ed panaon nen Noe?

¹⁰ Diad italineng ed boses na Dios: Si Noe et “managpulong na katunongan.” (2 Pedro 2:5) Amin lawarin totoo sakbay na Delap so okupado ed arum iran bengatla tan ‘agda inim-imano’ iray pasakbay nen Noe. Say resulta? “Sinmabi so delap tan inyanor to ra ya amin.” Amasakbay si Jesus a miulibayan ed satan so panaon tayo, legan na “kiwawala na Anak na too.” Say agawa ed panaon nen Noe so onkanan pasakbay ed totoo natan ya agda pipilien so ontalineng ed mensahe na Dios.—Mateo 24:39, NW.

¹¹ Saramay manluludlurey ed saray madibinon pasakbay ya iyaabawag na saray lingkor na Dios natan so nepeg a makamoria no anto so kabaliksan na agda italineng ed saray pasakbay. Nipaakar ed saratan a managludlurey, oniay imbaga nen apostol Pedro: “Ta nanlinawaan da ya inlingwan a walaray katawenan nanlapu la’d inmunan panaon, tan say dalin ya wala ed danum tan utel na danum lapud salita na Dios: Lapu ed saya say mundo nensaman, dia ed inkayanep to na danum atawtaw: Balet saray tawen a wala natan, tan say dalin, impansiansia ra na dilin salitan niatol ya onkana ed apoy ed agew na panangukom, tan dia ed kaderal na saray mangaruksan totoo.”—2 Pedro 3:3-7.

¹² Midumaan ed saratan a totoo so pinili nen Noe tan say sankaabungan to. “Lapu ed pananisia si Noe, sanen binilin na Dios nipaakar ed saray bengatla ya agni anengneng, nensaman aragdag ed mapagalang a takot, angiparaan na sakey a biong.” Say intalineng to ed pasakbay so angitarok na kilalaban ed sankaabungan to. (Hebreos 11:7) Komon ta alisto itayon ondengel ed mensahe na Dios insan matulok a gawaen itan.—Santiago 1:19, 22-25.

13, 14. (a) Akin ya importante so ‘ipeket ed si Jehova’? (b) Panon tayon abuloyan si Jehova, ‘say Domadamili tayo,’ a manmoldi ed sikatayo?

¹³ Diad ipeket odino pansiansia ed si Jehova: Pian ‘napili so bilay tan mansiansian manbilay,’ aliwa lambengat a nepeg tayon aroen tan talinengen si Jehova noagta nepeg itayon ‘ompeket ed si Jehova,’ salanti, mantultuloy a manggawa na linawa to. “Dia ed pantepel yo natalima yo naani kamarerwa yo,” so inkuan nen Jesus. (Lucas 21:19) Diad katuaan to, say pilien tayo nipaakar ed satan so mangipatnag ed no anto so walad puso tayo. “Mapalar so too ya antakot a naynay; balet say mamaawet ed puso to napelag naani ed karumsisan,” so inkuan na Uliran 28:14. Say sakey lan alimbawa et si Faraon na kadaanan ya Ehipto. Legan a nagagawa nensaman so kada sakey  ed Samploran Bakbak, pinaawet nen Faraon so puso to imbes ya ipatnag to so maridios a takot. Agpinaskar nen Jehova si Faraon a magmaliw a matunganga noagta inabuloyan ton manpili itan a mapaatagey a manuley. Antokaman so kipapasen, agawa so linawa nen Jehova, a singa insalaysay nen apostol Pablo nipaakar ed panmoria nen Jehova ed si Faraon: “Lapu ed saya a getma pinaalagey ta ka, pian dia ed sika so pangipatnagan ko na pakayarik, tan pian say ngaran ko nibawag ed sankadalinan.”—Roma 9:17.

¹⁴ Pigaran siglo kayari na inkiliktar na Israel manlapud panangontrol nen Faraon, oniay inyabawag nen propeta Isaias: “O Jehova, sika so Ama mi; sikami pitek kami, et sika so domadamili; et sikami ya amin so gawa na limam.” (Isaias 64:8) Diad pangiyaabuloy tayo ed si Jehova a manmoldi ed sikatayo panamegley na personal a panagaral tan panangiyaplika ed Salita to, kalkalna tayon nisusulong so balon personalidad. Magmamaliw itayon mas mauyamo tan mainomay a moldien, a satan so mamainomay ed sikatayon manmatoor ed si Jehova lapud sikatoy labay tayon paliketen.—Efeso 4:23, 24; Colosas 3:8-10.

‘Ipaamtam Iratan’

15. Unong ed Deuteronomio 4:9, anton nankaduan responsabilidad so impanonot nen Moises ed Israel?

¹⁵ Oniay imbaga nen Moises ed adagup a nasyon na Israel sanen onloob la ra ed Insipan a Dalin: “Ad-adiaan mo so inkasika, tan talimaen mo so kamarerwam a sankaseetan, ompan lamang no nalingwanan mo so saray pamaakaran ya anengneng na matamatam, tan agla piga no ontaynan ira ed pusom ed amin ya agew na bilay mo; noag say ipaamtam ed saray anak mo tan saray anak na saray anak mo.” (Deuteronomio 4:9) Ta pian nagamoran so panamendisyon nen Jehova tan onaligwas diad dalin a magano lan tawiren da, kinaukolan a sumpalen na totoo so nankaduan responsabilidad diad arapan nen Jehova a Dios da. Agda nepeg a lingwanan iray alay abig a bengatlan ginawa nen Jehova ed imaton da, tan kinaukolan dan ibangat iratan ed saray ontumbok a kailalakan. Bilang totoo na Dios natan, nepeg ya ontan met so gawaen tayo no labay tayon ‘pilien so bilay tan mansiansian manbilay.’ Anto so naimatonan tayo lan ginawa nen Jehova ed biang tayo?

16, 17. (a) Anto so agawaan la na saray misionaryo a nipasal ed Gilead diad panangipulong ed Panarian? (b) Antoran alimbawa na ag-ontayer a seseg so amta yo?

¹⁶ Panliketan tayon nanengneng so impamendisyon nen Jehova ed panagpulong tan panaggaway-babangatan a kimey tayo. Manlapu la’d inggapo na Watchtower Bible School of Gilead nen 1943, indaulo na saray misionaryo so panaggaway-babangatan ed dakel a daldalin. Anggad sayan panaon, saray akadkaunan nangraduar ed sayan eskuelaan so amasiansia ed seseg da ed panangipulong ed Panarian, anggaman matakken la ra tan arum so nalilimitaan la ed makapuy a bunigas. Sakey lan maabig ya alimbawa et si Mary Olson, a nangraduar ed Gilead nen 1944. Sikato so nanlingkor bilang misionaryo—unona et diad Uruguay, insan diad Colombia, tan natan et diad Puerto Rico. Anggaman ompatnag a sikatoy nalilimitaan na saray problema ed bunigas lapud itatakken, pinansiansia nen Sister Olson so inkaligsa to ed panagpulong. Lapud panaaral to na lenguahen Español, iyeeskedyul to so sinimban piulop ed saray lokal a manangipalapag diad lawak na ministeryo.

 ¹⁷ Say abalo lan agi a si Nancy Porter, a nangraduar ed Gilead School nen 1947, so manseserbi nin siansia diad Bahamas. Sikato so sakey nin misionaryo ya okupadon tuloy ed panagpulong a kimey. “Nikaduman lapuan na liket so pangibangat ed arum nipaakar ed katuaan na Biblia,” so insalaysay nen Sister Porter ed istorya to ed bilay. * “Itatarya na satan so organisadon rotina ed espiritual ya amawala na uksoy tan inkaligen ed bilay ko.” Sano nodnonoten nen Sister Porter tan arum niran matoor a lingkor so apalabas da, agda nalingwanan so ginawa nen Jehova. Komusta itayo met? Kasin aapresyaen tayo so impamendisyon nen Jehova ed kimey ed Panarian diad komunidad tayo?—Salmo 68:11.

18. Anto so naaralan tayo no basaen tayo iray istorya na bilay na saray misionaryo?

¹⁸ Panliketan tayo so agawaan tan nagagawaan ni na sarayan abayag la ed katuaan. Say pambasa ed saray istorya na bilay da so makapaseseg ed sikatayo lapud sano namomoria tayo so ginawa la nen Jehova ed sarayan matoor, napapabiskeg so determinasyon tayon manlingkor ed si Jehova. Regular yo kasin babasaen tan dadalepdepen iratan a makapaliket a salaysay a nipalapag ed Say Panag-Bantayan?

19. Panon a nausar na saray Kristianon atateng iray istorya na bilay a nisalaysay diad Say Panag-Bantayan?

¹⁹ Pinanonotan nen Moises iray Israelita ya agda lilingwanan so amin a bengatlan ginawa la nen Jehova parad sikara tan nepeg a mansiansia iratan ed kapusoan da diad amin ya agew na bilay da. Insan oniay inyarum to ni a gawaen da: “Ipaamtam ed saray anak mo tan saray anak na saray anak mo.” (Deuteronomio 4:9) Saray peteg ya istorya na bilay so makapasagyat a tuloy. Nakaukolan na saray ombabaleg a kalangweran iray maong a napanuliranan. Saray walad kasuloan ya agagin bibii so makaaral ed matoor iran alimbawa na saray maedad lan agagin bibii a say impanbilay da et nisalaysay diad Say Panag-Bantayan. Saray agagi so nawalaan na apalaknab a pankanawnawa pian magmaliw ya okupado ed panangipulong ed maong a balita no manlingkor ira ed mismon teritorya ra a walay sankailin lenguahe. Sikayoran Kristianon atateng, akin ta no usaren yo iray eksperiensya na saray matoor a misionaryo ed Gilead tan arum nira pian napakiwas so ananak yon mamili ed bilay a sigpot-panaon a serbisyo?

20. Anto so nepeg tayon gawaen pian ‘napili so bilay’?

²⁰ Panon sirin a ‘makapampili na bilay’ so kada sakey ed sikatayo? Diad pangusar tayo ed alay abig a langkap na bulos a linawa odino panagdesisyon pian paneknekan ed si Jehova a sikatoy inaro tayo tan diad pantultuloy tayon panggawa ed anggaay nayarian tayo diad serbisyo ed sikato legan ya iyaabuloy to itan a pribilehyo. “Ta,” unong ed inyabawag nen Moises, “sikato so bilay mo tan kinarukey na saray agew mo.”—Deuteronomio 30:19, 20.

[Paimano ed leksab]

Kasin Natandaan Yo?

• Anto so naaralan yo ed saray alimbawa a kinonsidera tayo nipaakar ed mandumaan a pampilian?

• Antoran kundang so nepeg tayon gawaen ta pian ‘napili tayo so bilay’?

• Anton nankaduan responsabilidad so nipapaseseg a sumpalen tayo?

[Tepetepet Parad Panagaral]

[Litrato ed pahina 26]

‘Inyan ko ed arap yo so bilay tan say patey’

[Litrato ed pahina 29]

Lapud dinengel da so boses na Dios, nilaban si Noe tan say pamilya to

[Litrato ed pahina 30]

Mary Olson

[Litrato ed pahina 30]

Nancy Porter