Saray Pabitar ed Komaduan Libro na Salmos
Say Salita nen Jehova et Mabilay
Saray Pabitar ed Komaduan Libro na Salmos
BILANG lingkor nen Jehova, nailaloan tayon onsabi ed sikatayo iray subok tan pakasalsalian. Insulat nen apostol Pablo: “Amin so saray malabay a manbilay ed sinasanto ed Kristo Jesus, manako’ra naani pamasegsegang.” (2 Timoteo 3:12) Anto so ontulong ed sikatayo pian nasungdoan iray subok tan panamasegsegang, a mamaneknek ed integridad tayo ed Dios?
Say onkomadua ed limaran seksion na salmos so ontulong ed sikatayo. Ipapanengneng ed sikatayo na Salmos 42 ya anggad 72 a no labay tayon natalonaan iray subok, sikatayo so nepeg a sigpot a mankompiyansa ed si Jehova tan manalagar ed panangiliktar to. Agaylan makanakana itan a leksion parad sikatayo! Anggan natan et talagan “mabilay tan mabiskeg” so mensahe na Komaduan Libro na Salmos, a singa met ed arum a kabiangan na Salita na Dios.—Hebreos 4:12.
SI JEHOVA SO ‘SALIMBENGAN TAN BISKEG’ TAYO
Wala so sakey a Levita ya adakep. Sikato so maermen lapud agmakakar ed santuaryo pian mandayew ed si Jehova, kanian niligliwa to so inkasikato diad impangibagan: “Akin et alukbob ka, O kamarerwak? Tan akin et agka makareen ed loob ko? Manilalo ka ed Dios.” (Salmo 42:5, 11; 43:5) Impankokonektaan na sayan aminpigan pinmatnag a bersikulo so taloran estansa ed Salmos 42 tan 43 ed saksakey ya anlong. Say Salmo 44 et sakey a kerew ed biang na Juda—sakey a bansa a nagogonigon, nayarin lapud sesgan iyataki na Asirya diad panaon nen Arin Ezekias.
Say Salmo 45, a sakey a kanta nipaakar ed kasal na ari, so propesiyan nipaakar ed Mesianikon Ari. Si Jehova so ililitrato na onggendan a taloran salmo bilang ‘salimbengan tan biskeg,’ “sake’ya balbaleg ya ari ed amin a dalin,” tan “sakey ya apirengan.” (Salmo 46:1; 47:2; 48:3) Agaylan dakep so pangipapabitar na Salmo 49 ya anggapo so toon “makayari a manondon na agi to ed anggan anto a pangiparalanan”! (Salmo 49:7) Say primeron waloran salmo na komaduan seksion so insulat na saray ilalak nen Kora. Say komasiam, Salmo 50, so tinibukel nen Asap.
Makasulatan Iran Tepet a Naebatan:
44:19—Anto so lugar na “saray chakal”? Nayarin say tutukoyen na salmista et sakey a lawak na bakalan, a saramay inatey ditan et magmaliw a tagano na saray chakal.
45:13, 14a—Siopa so “bii ya anak na ari” a “niyakar ya angga ed ari”? Sikato so anak a bii na “Ari na saray tinaon,” si Jehova a Dios. (Apocalipsis 15:3) Irerepresenta to so niglorian kongregasyon na 144,000 a Kristiano, a tinagibi nen Jehova bilang ananak to sanen nilanaan to ra na espiritu to. (Roma 8:16) Sayan “bii ya anak” nen Jehova, a “nitadia a singa sakey a nobya ya akawesan nipaakar ed asawa to,” so niyakar ed nobyo—say Mesianikon Ari.—Apocalipsis 21:2.
45:14b, 15—Siopa so irerepresenta na “mamarikit” odino birhenes? Sikara so “baleg ya ulop” na saray tuan managdayew, a miuulop tan ontutulong ed saray alanaan a nakdaan. Lapud mabilay iran “nanlapu ed baleg ya irap,” wadia ira ed dalin sano nagawa la so pankasal na Mesianikon Ari ed tawen. (Apocalipsis 7:9, 13, 14) Diad satan ya okasyon et sikara so napano na “panliliket tan panggaygayaga.”
45:16—Diad anton paraan a walaray anak ya onsalat ed inmuunan atateng na ari? Sanen nianak si Jesus diad dalin, sikatoy awalaan dia na inmuunan atateng. Sikara so magmaliw ya ananak to sano paolien to ira manlapud saray inaatey legan na Sanlibon Taon ya Uley to. Arum ed sikara so magmaliw a kabiangan na saramay naturo bilang “prinsipes ed amin a dalin.”
50:2, Maung a Balita—Akin a say Jerusalem et atawag a “nagnap so dakep to”? Aliwa iyan lapud itsura na syudad. Noagta, lapud satan so inusar tan pinarakep nen Jehova diad impanggawa to ed satan bilang letnegan na templo to tan kabisera na saray ari a nilanaan to.
Saray Leksion Parad Sikatayo:
42:1-3. No panon a say kabatyan ya ulsa ed naklangan a rehyon et manpipirawat na danum, ontan met so pampipirawat na Levita ed si Jehova. Diad pirmin ermen na laki lapud agto makapandayew ed si Jehova diad santuaryo To, ‘saray lua to so pinagkakanen to ed agew tan labi’—anggapoy ganas ton mangan. Agta kaukolan tayon bayuboan so aralem ya apresasyon ed pakapandadayew tayo ed si Jehova a kaiba iray kapananisiaan tayo?
42:4, 5, 11; 43:3-5. No lapud pigaran agnapaliisan a rason et temporaryon niarawi itayo manlapud Kristianon kongregasyon, saray gayaga ed apalabas ya impilimog tayo so mamabiskeg ed sikatayo. Anggaman diad primero et mamaermen a tuloy itan ed sikatayo, ipanonot met na satan ed sikatayo a say Dios so pinagkasalimbengan tayo tan kaukolan tayo so manilalo ed sikato parad pakainawaan.
46:1-3. Antokaman so kalamidad a naeksperiensya tayo, nepeg a sigpot itayon mankompiyansa a ‘say Dios so salimbengan tan biskeg tayo.’
50:16-19. Siopaman a mansalita na panamalikdo tan mangagamil na mauges iran bengatla so agmanepeg a mangirepresenta ed Dios.
50:20. Imbes a magunaet ya ilabir iray lingo na arum, nepeg tayon lingwanan la iratan.—Colosas 3:13.
‘MAREEN KAN MANALAGAR ED DIOS’
Say gapo na sayan seksion na salmos et say impanpuson pikakasi nen David kayari na impankasalanan da nen Bat-seba. Ipapanengneng na Salmos 52 anggad 57 ya iliktar nen Jehova iramay mangipapaawit na awit da ed sikato tan maniilalo ed sikato parad kilalaban. Unong a nibalikas ed Salmos 58-64, legan na pirmin kagogonigon nen David et pinagmaliw to si Jehova a salimbeng to. Oniay inkanta to: “Kamarerwak, manalagar ka ed kareenan ed Dios a bukor; ta say panagtalaran ko manlapu ed sikato.”—Salmo 62:5.
Say inkaapit ed Manangiliktar tayo so nepeg a mamakiwas ed sikatayon ‘kantaen so kagalangan na ngaran to.’ (Salmo 66:2) Si Jehova so indayew bilang mabunlok a manangiter diad Salmo 65, bilang Dios na kilalaban diad Salmos 67 tan 68, tan bilang Manangiliktar diad Salmos 70 tan 71.
Makasulatan Iran Tepet a Naebatan:
51:12—Anton “mabulos ya espiritu” so inkerew nen David a natulongan? Ag-itan manutukoy ed inkamabulos na Dios a tulongan si David nisay ed masanton espiritu nen Jehova, noag say mismon espiritu nen David—say inklinasyon na nonot to. Kekerewen to ed Dios a sikatoy nawalaan komon na pampilalek a gawaen so duga.
53:1—Panon a say toon mangibuburi ed kiwawala na Dios et “andi-kalakal”? Say inkaandi-kalakal dia et agmankabaliksan na inkaandi na abilidad a manaral odino mantalos. Say pangipapabitar ed satan a too bilang andi-kalakal ed moral so natebek diad pangusisa ed iyaabeba na moral ya adeskribe ed Salmo 53:1-4.
58:3-5—Diad anton dalan a say mauges et singa sakey ya uleg? Say katilaan ya ibabaga ra nipaakar ed arum so singa dita na sakey ya uleg. Dederalen da so maong a reputasyon na saray biktima ra. ‘Singa say uleg a telek a pinepetan to so layag to,’ saray mauges so agpaiwanwan nisay pakorehi.
58:7—Panon a saray mauges et ‘natunaw a singa danudanum a managus a lanang’? Nayarin nononoten nen David so danudanum na pigaran lawak ed Nisipan a Dalin. Bangta mapmaples ya onaralem so danum ed ontan a lawak, sarayan danum so mapmaples met ya onekat tan naandi. Ipipikasi nen David so maples a kaandi na saray mauges.
68:13—Panon a “saray payapayak na malapati [et] pinalatea [odino akoloran na pilak], tan saray bago to [et] akoloran na duyaw a balitok”? Saray malapati a kolor-asul tan dapol et mansyayap iray bago ra. Saray payak na saratan so mankidyam a singa metal sano nasinagan na kolor-balitok ya agew. Nayarin inyaliling nen David iray onsasabi a mananalon mibabakal na Israel ed ontan a malapati—a matektekkiab tan masmasnag so itsura ra. Singa ibabaga na pigaran iskolar na Biblia, nayarin onaplika met itan ed sakey a produkto na arte, sakey a tropeo, ya inalan samsam. Antokaman so kipapasen, impabitar nen David iray impanbiktorya ya impagamor nen Jehova ed totoo to sumpad kakabusol da.
68:18, NW—Sioparay “langkap ed nengneng na totoo”? Saratan iramay lalakin inala ed saray akautibo sanen akonkesta so Insipan a Dalin. Saratan a lalaki so apabtangan ed saginonor a magmaliw a katulongan na saray Levita.—Esdras 8:20.
68:30—Anto so kabaliksan na kerew a “banoen so monanakap na kakawayanan”? Diad piguratibon impanukoy ed kakabusol na totoo nen Jehova bilang monanakap, odino atap ya ayayep, kinerew nen David ed Dios a banoen to ira, odino amperen to so pakayari ran mamasakit.
69:23—Anto so kabaliksan na ‘panggiwgiwen iray banel’ na kabusol? Makanakana iray masel ed banel odino balangbang pian nagawaan iray mairap a trabaho, a singa say pangalsa tan panakbat na ambelat iran awit. Saray makapuy a balangbang so mangisusuheri na kaandi la na puersa. Impikasi nen David a saray kalaban to et naandian na pakayari.
Saray Leksion Parad Sikatayo:
51:1-4, 17. Say pankasalanan et agkaukolan a mangiyarawi ed sikatayo manlapud si Jehova a Dios. No magbabawi itayo, nailaloan tayo so panangasi to.
51:5, 7-10. No nankasalanan itayo, makakerew itayo na panamerdona ed si Jehova nisesengeg ed atawir tayon inkamakasalanan. Nepeg tayo met ya ipikasi ed sikato a linisan to itayo, ipawil to itayo, a tulongan to itayon mangiwaklit ed saray makasalanan a tendensia manlapud kapusoan tayo, tan ikdan to itayo na maligen ya espiritu.
51:18. Saray kasalanan nen David so angapekta ed pankaabigan na interon nasyon. Kanian sikato so nampikasi parad maong a linawa na Dios ed Sion. Sano akagawa itayo na ambelat a kasalanan, mabetbet a mangitarok itan na kabalawan ed ngaran nen Jehova tan ed kongregasyon. Kaukolan tayo so manpikasi ed Dios ta pian naekal tayo so intarok tayon kaugsan.
52:8. Sikatayo so nayarin magmaliw a “malangbot a kiew ya olibo ed abung na Dios”—a maapit ed si Jehova tan mabunga ed panaglingkor ed sikato—no ontulok itayo ed sikato tan no mabulos tayon awaten so pananisiplina to.—Hebreos 12:5, 6.
55:4, 5, 12-14, 16-18. Asakitan a maong so liknaan nen David lapu ed impinonong na dilin anak ton si Absalom tan ed impantraidor na panmamatalkan ton managsimbawa a si Ahitopel. Balet, ag-itan amakapuy na kompiyansa nen David ed si Jehova. Nepeg ya agtayo abuloyan so sakit na liknaan a mamakapuy ed panmamatalek tayo ed Dios.
55:22. Panon tayon ipaawit ed si Jehova so pakabebelatan tayo? Nagawaan tayo iya (1) diad pampikasi ed sikato nipaakar ed pampapagaan tayo, (2) diad panmatalek ed Salita to tan ed organisasyon to parad giya tan tulong, tan (3) diad panggawa na anggaay nayarian tayo a resolbien so problema.—Uliran 3:5, 6; 11:14; 15:22; Filipos 4:6, 7.
56:8. Aglambengat amta nen Jehova so situasyon tayo noag pati say epekto na satan ed emosyon tayo.
62:11. Agmandependi so Dios ed antokaman ya akinpaway a lapuan na biskeg. Sikato so mismon lapuan na pakayari. ‘Say pakayari kien to.’
63:3. Say “abig na linawa [na Dios] magmaong nen say bilay” lapud no anggapo itan, say bilay et andian na kabaliksan tan gagala. Makabat no bayuboan tayo so pikakaaro ed si Jehova.
63:6. Marakep a panaon so labi pian mandalepdep, lapud mareen tan anggapoy makadisturbo.
64:2-4. Say makapasakit a panagtalabutob so maneral ed maong a reputasyon na arum. Kaukolan ya agtayo dengelen nisay ikayat itan a talabutob.
69:4. Pian napansiansia tayo so kareenan, nayarin makabat no maminsan so ‘mangipawil’ diad ikerew na dispensa, anggano ag-itayo kombinsido a sikatayo so akankasalanan.
70:1-5. Dedengelen nen Jehova iray kerew tayo parad tulong a kakkaukolan tayo. (1 Tesalonica 5:17; Santiago 1:13; 2 Pedro 2:9) Nayarin iyabuloy na Dios a mantultuloy so sakey a subok, ingen ta ikdan to itayo na kakabatan pian napidenengan so situasyon tan biskeg pian nasungdoan itan. Agto itayo abuloyan a natukso ed labas na nayarian tayo.—1 Corinto 10:13; Hebreos 10:36; Santiago 1:5-8.
71:5, 17. Awalaan si David na pakpel tan biskeg diad impankompiyansa to ed si Jehova legan na inkatobonbalo to—sakbay ni ingen ya inmarap ed Filisteon higante a Goliat. (1 Samuel 17:34-37) Nepeg a manmatalek iray kalangweran ed si Jehova ed amin a gawaen da.
“Say Sankadalinan Napano Komon na Gloria To”
Say unor a kanta na komaduan seksion na salmos, Salmo 72, so nipaakar ed uley nen Solomon, a mangiyaanino ed saray kipapasen a niwala diad silong na uley na Mesias. Agaylan makapalikliket iran kipapasen so nadedeskribe dia—daakan a kareenan, pangangga na panamairap tan karawalan, daakan ya ilik diad dalin! Kasin nakaiba itayo ed saramay manggayaga ed saraya tan ed arum niran bendisyon na Panarian? Nakaiba itayo daput no maliket itayon manalagar ed si Jehova a singa say salmista, a Sikato so gawaen tayo a salimbengan tan biskeg tayo.
“Saray pikakasi nen David . . . asumpal ira” tekep na saray salitan: “Nagalang si Jehova a Dios, say Dios na Israel, a sikato lambengat so manggawa na pankelawan a bengabengatla: Tan nagalang so magloria a ngaran to lawas; tan say sankadalinan napano komon na gloria to. Ontan pa komon, tan Amen.” (Salmo 72:18-20) Sigpot-puso itayo met a mamendito ed si Jehova tan mangidayew ed maglorian ngaran to.
[Litrato ed pahina 9]
Antam ta no siopay iyaanino na “bii ya anak na ari”?
[Litrato ed pahina 10, 11]
Say Jerusalem so natatawag a “nagnap so dakep to.” Antam no akin?