“Agayla so Panangarok ed Ganggan Mo!”

“Agayla so panangarok ed ganggan mo! Sikato so dalepdep ko ed amin ya agew.”—SALMO 119:97.

1, 2. (a) Anton kipapasen so inkidungetan na apuyanan a managsulat na Salmo 119? (b) Panon so inkiwas to, tan akin?

 SAY managsulat ed Salmo 119 so nidunget ed pirmin pakasubokan. Sikato so minudmora tan pinauges na saray mapalakbat a kakabusol ya angibaliwala ed ganggan na Dios. Nankokomplot iray prinsipe sumpad sikato tan pinasegsegang da. Sikato so apaliberan na saray mauges, tan napepeligro lay mismon bilay to. Lapud satan ya amin et sikatoy ‘apunaw ed kadedetdetan.’ (Salmo 119:9, 23, 28, 51, 61, 69, 85, 87, 161) Anggaman ed sayan subok, oniay inkanta na salmista: “Agayla so panangarok ed ganggan mo! Sikato so dalepdep ko ed amin ya agew.”—Salmo 119:97.

² Kaukolan ya oniay itepet mo, “Panon ya atambayo tan aligliwa so salmista ed ganggan na Dios?” Say amabiskeg ed sikato et say panagmatalek to ed panangasikaso nen Jehova ed sikato. Lapud kabisado to iray maaron probisyon na satan a ganggan, maliket so salmista anggaman ed saray kairapan a naeksperiensya to ed saray onsusumpa ed sikato. Bibidbiren to a si Jehova et mapangasin midedeneng ed sikato. Niarum ni, lapud inunor na salmista so panangigiya na ganggan na Dios, sikatoy nagmaliw a mas makabat nen saray kabusol to tan satan so amasiansia ni ingen ed bilay to. Lapud inunor to so ganggan, sikato so awalaan na kareenan tan maong a konsiensia.—Salmo 119:1, 9, 65, 93, 98, 165.

3. Akin a mairap parad saray Kristiano so pambilay unong ed saray maridios ya estandarte natan?

³ Arum ed saray lingkor na Dios natan so manasagmak met na mairap iran subok ed pananisia ra. Nayarin ag-itayo nipapaarap ed saray mapeligron problema a singa say inkidungetan na salmista, balet manbibilay itayo ed ‘panaon a maatap a mairap a pidenengan.’ Dakel a totoo ya inagew-agew tayon nakakalimog so andian na panamabli ed maespiritual iran estandarte—saray kalat da et akasentro labat ed dili ra tan ed materyal, tan sikaray mapangta tan agmarespeto. (2 Timoteo 3:1-5) Saray kalangweran a Kristiano so naynay a nipapaarap ed saray pakasubokan ed katooran da ed moral. Diad ontan a kipapasen, mairap a pansiansiaen so panangaro tayo ed si Jehova tan ed no anto so maptek. Panon tayon naprotektaan so inkasikatayo?

4. Panon ya impatnag na salmista so panamabli to ed ganggan na Dios, tan ontan met kasi so nepeg a gawaen na saray Kristiano?

⁴ Say akatulong ed salmista pian natalonaan to iray desdes a kipapaarapan to et say impangipanaon to ed panagaral tan panagdalepdep ed ganggan na Dios. Diad ontan a paraan et abayuboan to itan a panangaro. On, amin lawarin bersikulo na Salmo 119 so analambit ed pigaran aspekto na ganggan nen Jehova. * Saray Kristiano natan so agla nisilong ed Mosaikon Ganggan, ya inter na Dios ed nasyon na Israel nensaman. (Colosas 2:14) Balet, saray prinsipyon nipabitar ed satan a Ganggan so siansia nin makanakana. Saratan a prinsipyo so akaligliwa ed salmista, kanian  makaligliwa met itan ed saray lingkor na Dios a manbabanikel a mangarap ed saray kairapan na bilay natan.

5. Antoran aspekto na Mosaikon Ganggan so konsideraen tayo?

⁵ Nengnengen tayo no anton panamaseseg so nagamoran tayo ed talora lambengat ya aspekto na Mosaikon Ganggan: say uksoyan nipaakar ed Sabaton, say probisyon a panagtodtor, tan say ganggan sumpad panag-agum. Diad kada kipapasen, namoria tayo a say pakatalos ed saray prinsipyo na sarayan ganggan so importante no labay tayon naarap iray angat diad panaon tayo.

Pamenek ed Pankaukolan Tayo ed Espiritual

6. Antoran manunan kakaukolanen so walad amin a totoo?

⁶ Say katooan so apalsa a walaan na pigaran pankaukolan. Alimbawa, say tagano, iinumen, tan siroman so makanakana ta pian napansiansia na sakey a too so bunigas na laman to. Ingen, say katooan so kinaukolan met a mangasikaso ed “espiritual a pankaukolan” to. Say too so agpeteg a maliket no agto itan peneken. (Mateo 5:3, NW) Ipapasen nen Jehova ya importante so pamenek ed sayan nisipor a pankaukolan kanian ingganggan to so totoo to ya itunda da iray kimey da ed inagew-agew parad sakey ya agew ed kada simba ta pian nisentro ra so maespiritual iran pamaakaran.

7, 8. (a) Panon ya imbiig na Dios so Sabaton manlapud arum niran agew? (b) Anto so gagala na Sabaton nensaman?

⁷ Indanet na uksoyan nipaakar ed Sabaton so kaimportantian na espiritual iran gegemtan. Say primeron pakabasaan ed salitan “sabaton” diad Biblia et misiglaotan ed probisyon a mana diad kalawakan. Niganggan iray Israelita a nepeg iran mantipon na satan a mamilagron tinapay ed loob na anemiran agew. Diad komanem ya agew, nepeg a mantipon ira na tinapay odino “tagano parad duaran agew,” lapud anggapo la so naala ed komapiton agew. Say komapiton agew so magmaliw a ‘masanton agew a panagpainawa ya inonot ed si Jehova,’ a legan na satan et kada sakey so nepeg a mansiansia ed dilin ayaman to. (Exodo 16:13-30) Sakey ed saray nidatak ed Samploran Ganggan et anggapon balot so mankimey legan na Sabaton. Sagrado itan ya agew. Say dusa ed agpangunor ed satan et patey.—Exodo 20:8-11; Numeros 15:32-36.

⁸ Impabitar na ganggan a Sabaton so panangiyansakit nen Jehova ed pisikal tan espiritual a pankaabigan na totoo to. Imbaga nen Jesus a “say sabaton [so] agawan onkana’d too.” (Marcos 2:27) Aglambengat itan angiyabuloy ed saray Israelita a manpainawa noagta angiter met itan na pankanawnawa ed sikaran onapit tan mangipatnag na panangaro ra ed Manamalsa ra. (Deuteronomio 5:12) Satan ya agew so nidedika labat ed maespiritual iran interes. Laktipen na satan so panagdayew na pamilya, pikakasi, tan panagdalepdep ed Ganggan na Dios. Satan ya uksoyan so analimbeng ed saray Israelita a mangusar ed amin a panaon tan biskeg da diad materyal iran gegemtan. Impanonot ed sikara na Sabaton a say relasyon da ed si Jehova so  sankaimportantian a bengatla ed bilay da. Indanet nen Jesus itan ya agmanguman a prinsipyo sanen oniay inkuan to: “Walan nisulat, Aliwa a say tinapay labat so napambilay na too noag say amin a salitan ombesngaw ed sangi’ Dios.”—Mateo 4:4.

9. Anton leksion so naaralan na saray Kristiano ed uksoyan nipaakar ed Sabaton?

⁹ Saray totoo na Dios so agla nakaukolan a manngilin na literal a 24 oras a panagpainawa ed sabaton, balet say uksoyan nipaakar ed Sabaton so aliwa lambengat a makapainteres ya awaran. (Colosas 2:16) Agta sakey itan a panonot a nepeg tayon unaen iray espiritual a kimey? Saray sagradon interes so agnepeg a nadaeg na inkaokupado ed materyal odino panagligliwaan. (Hebreos 4:9, 10) Kanian oniay nayarin itepet tayo ed inkasikatayo: “Anto so manunaan ed bilay ko? Kasin iyuunak so panagaral, pikakasi, iyaatendi ed saray pantitipon na Kristiano, tan say panangipulong ed maong a balita na Panarian? Odino walaray arum ya intereses a manguupot na panaon parad saratan ya aktibidad?” No iyuna tayo iray maespiritual a bengatla ed bilay tayo, papaseguroan itayo nen Jehova ya ag-itayo naandian na saray pankaukolan ed bilay.—Mateo 6:24-33.

10. Panon itayon nagunggonaan ed pangitalaga tayo na panaon ed maespiritual iran bengatla?

¹⁰ Saray panaon ya uusaren ed panagaral na Biblia tan ed misiglaotan iran publikasyon, ontan met ed panumameng a maong ed mensahe na saratan, so makatulong pian lalon onapit itayo ed si Jehova. (Santiago 4:8) Si Susan, a manga 40 taon lan mangipapanaon na regular a panagaral na Biblia, so angaksobi a diad gapo et aliwan makapainteres so panaral. Singa makapabelat itan. Balet diad lalon pambabasa to, lalon nanliketan to itan. Natan et sikatoy naeermenan no walay rason ya agto nagawaan so personal a panagaral to. “Akatulong ed siak so panagaral pian nakabat ko si Jehova bilang Ama,” so inkuan to. “Sikato so napanmatalkan ko, nailaloan ko, tan komportable ak ya onaasingger ed sikato diad pikakasi. Alay abig a nanengneng so pangaaro a maong nen Jehova ed saray lingkor to, pangaasikaso to ed siak, tan say panutulong to ed siak.” Agaylan manliket itayo no naynay tayon pampagaan iray espiritual a pankaukolan tayo!

Say Ganggan na Dios Nipaakar ed Panagtodtor

11. Panon so inkurang na uksoyan nipaakar ed panagtodtor?

¹¹ Say komaduan aspekto na Mosaikon Ganggan ya angipatnag ed panangiyansakit na Dios ed pankaabigan na totoo to et say kanepegan a mantudtor. Ingganggan nen Jehova a sano say sakey ya Israelitan dumaralos et manani na saray bunga na uma to, nepeg ton abuloyan a todtoren na saray mankaukolan so alabsanan na saray manag-ani. Nepeg ya agla anien na saray dumaralos iray walad giliggilig na uma ra, odino agda tiponen so atilak iran ubas odino olibo. Agda la nepeg a pawilen iray dawa ya alabsanan ed daralusan da. Satan so maaron uksoyan nisesengeg ed saray mairap-bilay, sankaili, ulila, tan balo. Tua, nakaukolan so impasyan kimey ed biang da pian makapantodtor, balet ta diad panamegley na satan et napaliisan da so mipayabol.—Levitico 19:9, 10; Deuteronomio 24:19-22; Salmo 37:25.

12. Anton pankanawnawa so intarya na uksoyan nipaakar ed panagtodtor parad saray dumaralos?

¹² Ag-akaespisipiko ed ganggan so karakel na bunga a nepeg ya itilak na saray dumaralos parad saray mankaukolan. Akauley ira no kaunongan karakel odino karaiset so itilak da ed giliggilig na saray uma ra. Say ontan ya uksoyan so angibangat na pagmaliw a mabunlok. Angiter itan ed saray dumaralos na pankanawnawan ipatnag so apresasyon da ed Manangitarya ed ani, lapud “say walaan na panangasi ed naukolan [say Manamalsa to] so idayew to.” (Uliran 14:31) Ontan so ginawa nen Boaz. Sineguro to a si Rut, say balo a nantodtor ed uma to, so makapantipon na dakel ya ilik. Si Boaz so mapalabon tinumangan nen Jehova lapud inkamabunlok to.—Rut 2:15, 16; 4:21, 22; Uliran 19:17.

13. Anto so naaralan tayo ed ganggan nensaman nipaakar ed panagtodtor?

¹³ Agni anguman so prinsipyo na ganggan nipaakar ed panagtodtor. Iilaloan nen Jehova iray  lingkor to a magmaliw a mabunlok, nagkalalo la ed saray mankaukolan. No lalon mabulos itayo, lalon babaleg iray tumang ed sikatayo. “Mangiter kayo, et naikdan kayo,” so inkuan nen Jesus. “Sukat a maong, pinerper, aseksek tan manleplepwas, so iter da ed akwalan yo. Ta sukat a pansukat yo sikato met so pansukatan ed sikayo.”—Lucas 6:38.

14, 15. Panon tayon nipatnag so inkamabunlok, tan anto so posiblin gunggona ed inkasikatayo tan ed saramay tulongan tayo?

¹⁴ Binilin itayo nen apostol Pablo a “manggawa itayo na maabig ed saray amin, nagkalalo ed saray kaamong na pananisia.” (Galacia 6:10) Kanian, nakaukolan itayon manonot ed pankaukolan na saray kaparan Kristiano a makaawat na espiritual a tulong no sikara so nipaarap ed saray subok ed pananisia ra. Balet kasin mankaukolan met ira na praktikal a tulong, a singa say iyakar ed Kingdom Hall odino panaliw ed saray nakaukolan da? Wala ta so kakongregasyonan yo a maedad la, mansasakit, odino agla makaalis ed abung a panliketan to so makapaseseg ya ibibisita odino itulong na sakey? No pansagpotan tayo so magmaliw a maimano ed ontan iran pankaukolan da, nayarin usaren itayo nen Jehova bilang ebat ed saray pikakasi na sakey a mankaukolan. Anggaman obligasyon na sakey a Kristiano so pangasikaso ed balang sakey, makatulong met itan ed sakey a managkomponi. Say pangipatnag na puron panangaro ed saray kaparan managdayew so lapuan na baleg a liket tan aralem ya inkapnek a pakagamoran tayo na panangabobon nen Jehova.—Uliran 15:29.

¹⁵ Say sakey nin importantin paraan a nipatnag na sakey a Kristiano so agmasiblet ya awawey et say pangusar to ed panaon tan biskeg to pian ibalita so nipaakar ed saray gagala na Dios. (Mateo 28:19, 20) Siopaman ya aliketan ed intulong to ed sananey a too a mangidedika ed bilay to ed si Jehova so makaeksperiensya ed katuaan na saray salita nen Jesus: “Lalo a mapalar so mangiter nen say mangawat.”—Gawa 20:35.

Pambantay Sumpad Panag-agum

16, 17. Anto so isesebel na komasamplon ganggan, tan akin?

¹⁶ Say komatlon aspekto na Ganggan na Dios ed Israel a konsideraen tayo et say komasamplon ganggan, ya angisebel ed panag-agum. Oniay indatak na Ganggan: “Agmo iibegan so abung na kaparam a too, agmo iibegan so asawa na kaparam a too, odino say igaganggan to a bii, odino say baka to, odino say asno to, odino antokaman  a kayarian na kaparam a too.” (Exodo 20:17) Anggapo so too a makapangipaakseb ed satan a ganggan, lapud anggapo so makabasa ed puso. Balet, satan a ganggan so angitandoro ed Ganggan a mas atagtagey ni nen say hustisya na too. Angipurek itan ed kada Israelita a sikato so direktan mikuentaan ed si Jehova, a makabasa ed saray inklinasyon na puso. (1 Samuel 16:7) Niarum ni, nipaarap iyan ganggan ed say mismon sengegan na dakel ya isesebel a gawa.—Santiago 1:14.

¹⁷ Say ganggan sumpad panag-agum so amaseseg ed totoo na Dios ya ompaliis ed materyalismo, agum, tan panreklamo nipaakar ed kipapasen na bilay da. Satan so mangipaliis met ed sikara manlapud tukso a mantakew odino manggawa na imoralidad. Wala lawas iray totoo a walaan na materyal a kaykayarian a pandinayewan tayo odino diad nanduruman paraan et ompatnag a mas maasenso nen say sikatayo. No agtayo alwaran so panag-isip tayo ed ontan iran kipapasen, nayarin magmaliw itayon maingongot tan maibeg la ed arum. Say panag-agum so tinawag na Biblia bilang pakapatnagan na “mauges a kanonotan.” Magmaong no sikatayo so agmagmaliw a maagum.—Roma 1:28-30.

18. Anton espiritu so manodomina ed mundo natan, tan antoran negatibon epekto so pawalaen na satan?

¹⁸ Say espiritu a manodomina ed mundo natan so mangiyaalibansa na materyalismo tan kompetisyon. Diad panamegley na saray ipa-patalastas, isasagyat na komersyo so pampilalek ed balo iran produkto tan mabetbet a mangipapasabi ed ideya ya ag-itayo maliket no anggapo iratan ed sikatayo. Ontan a klase na espiritu so kokondenaen na Ganggan nen Jehova. Misiglaotan ed satan so pampilalek ya onasenso antokaman so nagawa tan say pantipon na kayamanan. Oniay impasakbay nen apostol Pablo: “Saray manpirawat ya onyaman napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang. Ta say aro ed pilak sikato so sakey a lamot na saray amin a nengneng na mauges; sikato a sanen inaguman na saray arum, abalbalang ira ed pananisia, tan atalos ira na dakel a kaermenan.”—1 Timoteo 6:9, 10.

19, 20. (a) Parad saray mangaaro ed ganggan nen Jehova, antoran bengatla so talagan makanakana? (b) Anto so tema na ontumbok ya artikulo?

¹⁹ Natatalosan na saramay mangaaro ed ganggan na Dios so kapeligroan na sakey a materyalistikon awawey kanian nasasalimbengan ira ed satan. Alimbawa, oniay impikasi na salmista ed si Jehova: “Ikiling mo so pusok ed saray panamintuaan mo, et aleg ed kaagapan. Say ganggan na sangim magmaong ed siak nen saray nilibo a balbalitok tan pilapilak.” (Salmo 119:36, 72) Lapud kombinsido itayo ed katuaan na sarayan salita, napansiansia tayo so inkabalanse a nakaukolan pian napaliisan tayo iray patit na materyalismo, inkaagum, tan ag-inkapnek ed kipapasen tayo ed bilay. “Say kasimpitan,” odino maridios a debosyon, so sekreto ed pakagamor na bengatlan sankaabigan, aliwan say panagtipon na kaykayarian.—1 Timoteo 6:6.

²⁰ Saray prinsipyo na Ganggan nen Jehova ed kadaanan a nasyon na Israel so makanakana ed sarayan mairap a panaon tayo a singa met nensaman sanen inter nen Jehova itan a Ganggan ed si Moises. No lalon iyaplika tayo iratan a prinsipyo ed bilay tayo, lalon natalosan tayo iratan, mas pablien tayo iratan, tan magmaliw itayon mas maliket. Pinansiansia na Ganggan so dakel iran makanakanan leksion parad sikatayo, tan saray malinew a panonot na saratan so napatnagan ed kabibilay tan saray eksperiensya na saray totoon asalambit ed Biblia. Konsideraen tayo so arum ed sikara diad ontumbok ya artikulo.

[Paimano ed leksab]

Panon Yon Ebatan?

• Akin a pinabli na managsulat na Salmo 119 so ganggan nen Jehova?

• Anto so naaralan na saray Kristiano ed uksoyan nipaakar ed Sabaton?

• Anto so magnayon a kablian na ganggan na Dios nipaakar ed panagtodtor?

• Panon itayon nasalimbengan na ganggan sumpad panag-agum?

[Tepetepet Parad Panagaral]

[Litrato ed pahina 21]

Anto so indanet na ganggan a Sabaton?

[Litrato ed pahina 23]

Anto so ibabangat ed sikatayo na ganggan nipaakar ed panagtodtor?