Ibubulaslas ed Limog na Nanduruman Totoo na Uganda

SAY Uganda, a sinayakop na Great Rift Valley na Bukig Aprika tan adalan na ekuador, so apalaboan na agaylan karakpan. Nandurumay itsura na kadalinan ditan, mabuna iray tantanaman, tan makapainteres iray ayayep. Lapud wala itan ed atagey a patar na maaw-awang ya Aprika, dugarugay klima ditan tan walaan na atalunton a pukdol a sabien toy masulok a nilasus kilometro.

Mataltalag so bansan diad melag labat a pasen et nanduruma lay klima, walay pasen a mayelo, wala met so tropikal, balet ta ontan so Uganda. Diad sagur, wadtan so naapisay niebe iran toktok na Kapalandeyan na Bulan, say Kapalandeyan na Ruwenzori, tan diad bukig et say medyo amagan pasen na bansa. Diad saray patar na satan et nanengneng iray elepanti, buffalo, tan leon. Walaray manaayam a gorilia, bakes, tan masulok a 1,000 a klase na mano-manok diad saray kapalandeyan tan katakelan na satan a masupok. No say kabalgan na kontinentin Aprika et nasasalot ed kelang tan eras, say Uganda et daakan ed ilog tan linok, a singa say Victoria, say linok a tabang a komadua’d sankabalegan ed interon mundo. Say mamaamianen a sanga na Linok Victoria et ompugta ed Ilog Nilo. Agpankelawan a tinukoy nen Winston Churchill iyan bansa bilang “say perlas na Aprika”!

“Say Perlas” so Mankirlap Natan

Balet, say manunan makapasagyat ed Uganda et saray totoo ditan a makaaro, maparawes, tan nanduruma. Sayan bansa a say kaslakan et “Kristiano,” et tutugyopen na nansasamok ya etnikon grupo tan kultura. Angga’d natan saratan a nanduruman totoo so nibiig ni ed tradisyon tan panangawes da.

Diad agano ni, ondarakel so totoo a taga-Uganda ya onkikiwas ed maong a balita na Biblia a nasabi panaon et niwala la so magnayon a kareenan ed  interon mundo. (Salmo 37:11; Apocalipsis 21:4) Mairap ya ipasabi iyan mensahe ed amin, diad sakey a bansan singa kabaleg lawari na Gran Britanya.

Manlapud melag a gapoan, sanen nampabautismo so sakey a lokal a residente bilang dedikadon Tasi nen Jehova, dia ed Linok Victoria nen 1955, “say daiset” so talagan nagmaliw a sanlibo nen 1992. Nanlapu la’d 1955, tuloy-tuloy lay ibubulaslas. Saya so mitunosan ed makapaseguro iran salita na Dios: “Siak, si Jehova, sikato naani gawaen ko a magano ed panaon to.”—Isaias 60:22.

Impanalona ed Saray Babeng Lapud Lenguahe

Ingles so opisyal a lenguahe ed Uganda tan satan so uusaren na karaklan, nagkalautla ed panagbangat, balet aliwan satan so lenguahen binalegan na maslak a taga-Uganda. Kanian, diad panggugunaet na saray Tasi nen Jehova a nipasabi so maong a balita ed totoo, ikokonsidera da met iray manunan lenguahe. Kaukolan iya lapud say masulok ya 80 porsiento na 25 milyon a populasyon na bansa et manaayam ed kabaryoan odino angkelag iran baley a ditan et say maslak ya uusaren na totoo ed inagew-agew a pitotongtong da et say lenguahen binalegan da. Kaukolan so baleg a sagpot pian nasabi irayan grupon nandurumay lenguahe tan pian peneken iray pankaukolan da ed espiritual.

Anggaman ontan, nanggunaetan na saray Tasi nen Jehova a peneken irayan pankaukolan panamegley na pantatasi ra ed sarayan totoo diad dilin lenguahe ra, tan diad pangitatarya ra na literatura na Biblia ed nanduruman lenguahe. Diad sangan opisina a walad kabisera, salanti, diad Kampala, walaray muyong na managpatalos diad apatiran lenguahe: Acholi, Lhukonzo, Luganda, tan Runyankore. Niarum ni, amayamay so onaatendi ed saray Makristianon asamblea a gagawaen ed nanduruman lenguahe diad interon bansa, a masulok a mamidua ed karakel na saray Tasi nen Jehova ed Uganda. Mabitar ya ipapanengneng na saya a saray pansasagpot pian nasabi iray grupon nandurumay lenguahe so ontutulong ed maples ya ibubulaslas ed espiritual. Balet ta aliwa labat a saya.

Indaulo na Saray Payunir so Kimey

Malikeliket a susuportaan na saray kongregasyon iray tinaon a kampanya ya iyakar ed saray niyarawi a teritorya ed loob na manga taloy bulan. (Gawa 16:9) Ondarakel so maseseg a kalangweran iran payunir, odino sigpot-panaon ya ebanghelisador, a mangidadaulo ed sayan kimey. Oonla ira ed  nisulinek iran pasen, a no maminsan et diad saramay agnin balot arengelan so maong a balita.

Walay duaran Tasi a niasain bilang espisyal payunir ed loob na taloy bulan dia ed Bushenyi, melag a baley ed mamasagur Uganda. Inibaan da so saksakey a Tasi nen Jehova ditan pian manpulong tan mangiyuksoy na saray Makristianon pantitipon. Diad loob na sakey bulan, say duaran payunir so mangikokondukta la na regular a panangisingbat na Biblia ed 40 ya indibidual, tan 17 ed saratan so onaatendi la ed saray pantitipon na saray Tasi nen Jehova. Oniay insalaysay na saray payunir: “Pigara ed saramay atilakan mi na brosyur ya Anto so Kakaukolanen na Dios ed Sikatayo? * so linma ed abung mi kayari pigaran agew, ya awit-awit daray piga-pigaran pahina ya angisulatan da na saray ebat ed tepetepet a walad brosyur. Labay dan naamtaan no duga kasi ray ebat da.” Natan, diad satan a baley et wala lay kongregasyon a walaan na dilin Kingdom Hall.

Duaran payunir so linma ed sakey a teritorya ed mamasagur Uganda, ya agnin balot apulongan na maong a balita. Insulat da: “Talagan napepegaan ed katuaan na Biblia iray totoo. Legan na taloy bulan ya impanpirmi mi dia, akapangigapo tan akapangikondukta kami la na 86 a panangiyaral na Biblia.” Agnambayag, pormal a niletneg so sakey a grupo na saray Tasi ed satan a pasen.

Arum nin Maseseg a Komikimey ed Lawak

Kabiangan ed saray maseseg a payunir iray pigaran indibidual ya akapanlingkor ed pigara lan taon. Si Patrick et datin managtogtog na clarinet diad air-force band nen Idi Amin a manuley na Uganda, antis ton nagmaliw a Tasi nen Jehova. Anem bulan kayari na bautismo to nen 1983, sikatoy akibiang ed rangko na saray sigpot panaon a ministro. Natan, sikatoy sakey lan manbiabiahen manangasikaso, a manbibisita tan mamapaseseg ed saray kongregasyon.

Si Margaret et abautismoan nen 1962. Anggaman ngalngali la man-80 años, tan lapud kondisyon na balambang to et mairap toy manakar-akar, diad sakey bulan et sikatoy makapanguusar na manga 70 oras a manginanabang ed saray kakaabay to na ilalon nibase ed Biblia. Iparungtal to iray literatura ed bangkon walad paway na abung to tan kakatongtongen to so siopaman ya ondadalan ya ondengel ed maong a balita nipaakar ed mareen a balon mundo.

Si Simon, sakey a dumaralos a taga mamabukig Uganda, so 16 a taon lan manaanap na katuaan sanen sikatoy akaromog na pigaran literaturan impalapag na saray Tasi nen Jehova nen 1995. Lapud saray abasa to, sikatoy nampilalek a mas nakabat so nipaakar ed Panarian na Dios tan say alay abig a gagala nen Jehova parad dalin. Anggapoy Tasi ed lugar di Simon, diad Kamuli, kanian  sikatoy nambaroy na 140 a kilometro paonla ed Kampala pian anapen ira. Natan, wala lay sakey a kongregasyon ed baryo ra.

“Mansiansia Kami Dia”

Singa met ed arum iran pasen na Aprika, iilaloan na dakel a totoo a walaan na matukoy a pasen a panagdayewan so sakey a relihyoson grupo. Ompatnag a baleg iyan problema parad arum a kongregasyon na saray Tasi nen Jehova, lapud kulang ira ed pinansyal a pangipaalagey na matukoy a Kingdom Hall. Agnadeskribe na saray agagi so pisalsalamat da sanen niletneg ed interon mundo nen mansamposampot na 1999 so programan maples a panagpaalagey ed saray Kingdom Hall. Diad tinmumbok a limay taon, 40 a balon Kingdom Hall so asumpal ed Uganda. Natan, amin lawarin kongregasyon et walaan na dilin Kingdom Hall a simpli ingen ta presentable. Say mensahen impasabi na satan a panagpaalagey a kimey ed saray lokal a komunidad et, “Mansiansia kami dia.” Tinmulong ed ibubulaslas so panagpaalagey ed saray Kingdom Hall.

Walay melag a kongregasyon ed mamaamianen Uganda a datin mantitipon ed silong na masalompapak iran kamanggaan. Sanen akasaliw iray dalin a pangipaalageyan, ginapoan a tampol so kimey. Saray agagin komikimey ed panagpaalagey, ya iibaan na saray lokal a Tasi, so ginmapon amaalagey na Kingdom Hall. Sakey a datin politiko a taga ditan so nandinayew ed kimey. Inyopresi toy garahe to pian nausar da ed saray pantitipon anggad pakasumpal na Kingdom Hall. Sikatoy angawat met na panangiyaral na Biblia ed sakey ed saray manbubulontaryo ed panagpaalagey. Natan, sikatoy sakey lan maseseg a bautismadon manangipalapag, a maliket a mandadayew ed si Jehova diad satan a marakdakep a balon Kingdom Hall!

Diad sakey nin proyekton ipapaalagey a Kingdom Hall ed mamaamianen-bukig a parte na bansa, walay lokal a kantiro ya ontan lan apakiwas ed naimatonan ton makaaro, maaro, tan makooperan awawey ed limog na saray agagi, a sikatoy namboluntaryon ontulong ed kimey. Sikatoy sanlabi ni ingen a nankimey sanen nasusumpal lay proyekto, pian diad kaimbuasan et akaparaan lay Kingdom Hall ya idedika na saray agagi. Oniay inkomento to: “Sikayo labat so talagan mangaaro ed balang sakey—ya aliwa labat a diad salita.”

Anggaman ed Magulon Kipapasen, Mawaya ni Iyaaligwas

Lapud pakasasabi ed saray balon teritorya ed Uganda, tuloy-tuloy so idarakel na saray Tasi ditan tan dakel iray interesadon mililimog ed saray kongregasyon. Balet, say sakey nin maganat ya ikokonsidera et say idadagsa na saray refugee ed Uganda. Say sibil a bakal ed kabangibang iran dalin so angapekta ed saray totoo nen Jehova. Saray Tasi ed kampo na saray refugee so angipatnag na makapadinayew a panagmatalek ed si Jehova. Nanonotan na sakey a datin atagey ya opisyal so datin mainawan bilay to. Sayan opisyal et nanlapud kabangibang a bansa tan dati met ya amasegsegang ed saray Tasi sanen nisebel ira ed satan a bansa. Kayari ton naaral so Biblia ed sakey ed saray kampo na refugee tan nagmaliw a Tasi, oniay inkomento to: “Anggapoy peteg a kakanaan na inkayaman ed materyal tan atagey a posisyon ed sayan mundo. Anggaman natan et mairap ak tan mansasakit, mas maong ni bilay ko nen say nensaman. Kabat ko lay Jehova, tan misalsalamat ak ed pribilehyon pikakasi. Nilikud ed mabiskeg ya ilalok ed arapen, amtak no akin a nepeg a sungdoan tayo iray problema natan. Kanian walaan ak na deen na nonot ya agkon balot naeksperiensya nensaman.”

Ibabagan no mangikotkot ka na bislak ed mabunan dalin na Uganda ed labi, kaimbuasan nanlamot la itan. Ipapabitar na ibubulaslas ed espiritual ed satan a bansa a say espiritual a dalin da so mabuna met. Pisalamatan tayo si Jehova diad impangiyabuloy ton dakel ni ed saray nanduruman totoo na Uganda so makaaral nipaakar ed Panarian to. Say kablian na saya so impareng nen Jesus ed “sakey a perlas a baleg so bili to.” Mandakel lan mandakel a totoo ed Uganda so makakatalos ed satan.—Mateo 13:45, 46.

[Paimano ed leksab]

[Saray mapa ed pahina 8]

(Parad aktual a format, nengnengen so publikasyon)

SUDAN

UGANDA

Ilog Nilo

Kamuli

Tororo

Kampala

Bushenyi

Linok Victoria

KENYA

TANZANIA

RWANDA

[Litrato ed pahina 9]

Talora ed saray amayamay a maseseseg a payunir a ministros

[Litrato ed pahina 10]

Patrick

[Litrato ed pahina 10]

Margaret

[Litrato ed pahina 10]

Simon

[Litrato ed pahina 10]

Distriton kombension ed Tororo

[Picture Credit Line ed pahina 8]

Background: © Uganda Tourist Board