‘Panliketan Ko Iray Panonot Mo’
‘Panliketan Ko Iray Panonot Mo’
“Saray bengatla a nisulsulat nensaman, nisulat ira ya onkana ed kibanga’tayo.”—ROMA 15:4.
1. Panon so pangitatarya nen Jehova ed saray panonot to ed sikatayo, tan akin a nakaukolan tayo iratan?
ITATARYA nen Jehova iray panonot to ed saray totoo to ta pian natulongan ira a mangarap ed saray pakadesdesan ed sarayan mairap a panaon. Arum ed saratan a panonot so nagamoran legan na personal a panagbasa na Biblia, bangta nipaparungtal so arum diad panamegley na impormasyon odino komento ed saray Makristianon pantitipon. Aliwa lan balo so karaklan ed nababasa odino narerengel tayo ed saratan. Nayarin, naaralan tayo la so miparan impormasyon nensaman. Balet, lapud ta mililingwan itayo, nakaukolan a mantultuloy tayon ubolen so memorya tayo nipaakar ed saray gagala, ganggan, tan bilibilin nen Jehova. Nepeg ya apresyaen tayo iray panonot na Dios. Saratan so lalon mamaseseg ed sikatayo pian manbilay itayo a mitunosan ed linawa na Dios. Kanian oniay inkanta na salmista ed si Jehova: “Saray panamintuaan [“panonot,” NW] mo sikara so kalikliket ko.”—Salmo 119:24.
2, 3. (a) Akin a pinansiansia nen Jehova iray istorya na bilay na saray totoo ed Biblia anggad panaon tayo? (b) Dinan iran salaysay ed Kasulatan so konsideraen ed sayan artikulo?
2 Mapuersa so Salitay Dios anggaman dakel lan siglo so apalabas manlapu la’d inkisulat na satan. (Hebreos 4:12) Ipaparungtal na satan ed sikatayo iray tuan salaysay nipaakar ed impanbilay na saray totoo ed Biblia. Anggaman anguma-uman la iray kustombre tan punto de bista manlapu la’d panaon na Biblia, saray probleman kipapaarapan tayo so mipadpara nensaman. Dakel ya istorya diad Biblia a pakagunggonaan tayo so mangitatarya na makapaligsay-puso iran alimbawa na totoon angaro ed si Jehova tan matoor a nanlingkor ed sikato anggaman ed mairap iran kipapasen. Impabitar na arum a salaysay so klase na kondukta a gugulaen na Dios. Amin na saratan a salaysay nipaakar ed totoo, maong man odino andi, so nilaktip ed Biblia bilang panonot. Ontan so insulat nen apostol Pablo: “Saray bengatla a nisulsulat nensaman, nisulat ira ya onkana ed kibanga’tayo, ta pian lapu ed anos tan lapu ed panamaligliwa na saray Sulsulat, wala so ilalo tayo.”—Roma 15:4.
3 Iyapasakey tayo ed taloran salaysay ed Kasulatan: say istorya nipaakar ed impideneng nen David ed si Saul, say nipaakar ed si Ananias tan Sapphira, tan say salaysay nipaakar ed kondukta nen Jose ed asawa nen Potifar. Makanakana iray leksion a naaralan ed kada sakey ed saratan.
Katooran ed Saray Uksoyan na Dios
4, 5. (a) Anton kipapasen so linmesa ed baetan nen Arin Saul tan David? (b) Panon so inkiwas nen David ed pambubusol nen Saul?
4 Agnanmatoor si Arin Saul ed si Jehova tan agla makanepegan a manuley ed totoo na Dios. Kanian sikato so impulisay na Dios tan inwanwan to si propeta Samuel pian lanaan si David bilang say manari ed Israel. Sanen impatnag nen David so nikaduman dunong tan inkakpel to bilang mibabakal a sengegay impandinayew ed sikato na totoo, sikato so impasen la nen Saul bilang kalaslasan. Aminpigan ginetma nen Saul a pateyen si David. Si David so akalegyas ed saratan a kipapasen lapud walad dapag to si Jehova.—1 Samuel 18:6-12, 25; 19:10, 11.
5 Diad loob na dakel a taon, si David so apaskar a manbilay bilang takas. Sanen sikatoy awalaan na pankanawnawan mamatey ed si Saul, sikato so kinombinse na kakaiba to a gawaen to la itan, ya imbaga ran inyawat la nen Jehova ed lima to so kabusol to. Ingen ta ag-itan ginawa nen David. Say katooran to ed si Jehova tan say respeto to ed posisyon nen Saul bilang nilanaan ya ari na totooy Dios so sengegan no akin ya ontan so inkiwas to. Agta si Jehova so anuro ed si Saul bilang ari na Israel? Si Jehova met so mangekal ed sikato diad dugan panaon. Inkatunongan nen David ya anggapoy kanepegan ton mibali ed satan. Kayari ton ginawa so amin a nayarian to ed saratan a kipapasen pian pakepaen so pambubusol nen Saul ed sikato, oniay inisip la nen David: “Si Jehova so mangabil ed sikato; odino say agew onsabi naani pian ompatey; odino onlasor ed bakal, tan natawtaw. Si Jehova insebel to ya yunat ko so limak sumpa ed nilanaan nen Jehova.”—1 Samuel 24:3-15; 26:7-20.
6. Akin ya importante ed sikatayo so istorya nipaakar ed si David tan Saul?
6 Lugan na sayan salaysay so importantin leksion. Kasin nitepet yo la ed inkasikatayo no akin ya onlelesa iray problema diad loob na Kristianon kongregasyon? Nayarin walay indibidual ya onkikiwas ed agmanepeg a paraan. Say kondukta to et nayarin aliwa met ya ambelat a kasalanan, balet ta nagogonigon kayo ed satan. Panon so ikiwas yo? Lapud pangiyaansakit yo ed Kristianon agi yo tan panmamatoor yo ed si Jehova, nayarin desidien yo so mitongtong ed sikato diad maabig a paraan, tekep na kalat a resolbien so problema. Panon to no mantutultuloy ni so problema? Kayari yon ginawa so amin lan makatunongan a nagawaan yo, nayarian yo lan ipalima itan ed si Jehova. Ontan so ginawa nen David.
7. Pian naalig tayo si David, panon so nepeg ya ikiwas tayo no makaeksperiensya itayo na ag-inkahustisya odino panangidumaduma?
7 Odino nayarin nipaarap kayo ed saray problema nipaakar ed ag-inkahustisya ed sosyedad odino panangidumaduma ed relihyon. Nayarin daiset odino anggapo lay nagawaan yo ed saratan diad sayan panaon. Nayarin mair-irap lan sungdoan so ontan a kipapasen, balet say reaksion nen David ed ag-inkahustisya so mangibangat ed sikatayo na sakey a leksion. Makapatenyeg iray salmo ya insulat nen David lapud impapuso iratan a pikakasi to ed Dios pian sikatoy makalegyas ed panangigagaem nen Saul tan ibabalikas met na satan so katooran to ed si Jehova tan ed panagpaga to ed kigloriaan na ngaran na Dios. (Salmo 18:1-6, 25-27, 30-32, 48-50; 57:1-11) Si David so nansiansian matoor ed si Jehova anggaman agmakatunongan so inkiwas nen Saul diad loob na pigaran taon. Nepeg a mansiansia itayo met a matoor ed si Jehova tan ed organisasyon to anggaman ed saray ag-inkahustisya a sasagmaken tayo tan antokaman so gawaen na arum. Napaseguroan itayo ya amta nen Jehova so nagagawa.—Salmo 86:2.
8. Panon so inkiwas na saray Tasi nen Jehova ed Mozambique sanen asubok so katooran da ed si Jehova?
8 Saray Kristiano diad Mozambique so sakey ya ehemplo natan na pigaran nanmatoor ed si Jehova diad panaon na subok. Nen 1984, saray baryo ra so aminpigan nilusob na saray armadon membro na saray rebelde, ya anakew, nampool ed saray kaabungan, tan amatey. Ompatnag ya anggapo lay nagawaan na sarayan tuan Kristiano pian idepensa so inkasikara. Saray manaayam ed satan a lugar so tatangguyoren a miulop ed saray militar odino papaskaren ya onsuporta diad arum a paraan. Impasen na saray Tasi nen Jehova ya agmitunosan itan ed talindeg da bilang neutral a Kristiano. Sinmanok ed sikara so grupo na militar lapud satan. Manga 30 a Tasi so inatey ed satan a magulon panaon, balet agnabuyak so katooran na totoo na Dios anggaman ed sesga na ipapatey. * Singa si David, sinungdoan da iray ag-inkahustisya balet diad saginonor et tinmalona ira.
Sakey a Manamasakbay a Panonot
9, 10. (a) Panon itayon nagunggonaan ed pigaran alimbawa ed Kasulatan? (b) Anto so makapuy a ginawa di Ananias tan Sapphira?
9 Arum ed saray indibidual ya asalambit ed Kasulatan so angitarya na manamasakbay iran panonot nipaakar ed kondukta a nepeg a paliisan. On, lugan na Biblia so dakel a salaysay nipaakar ed totoo, anggan diad limog na saray lingkor na Dios, a nanggawa na makapuy tan anagmak na saray makapuy a nansumpalan. (1 Corinto 10:11) Sakey lan salaysay et say nipaakar ed si Ananias tan Sapphira, a sanasawa a membro na inmunan-siglon Kristianon kongregasyon diad Jerusalem.
10 Kayari na Pentecostes 33 K.P., walay pankaukolan ed materyal a linmesa diad biang na saray balon mananisia a nansiansia ed Jerusalem pian nagunggonaan ira ed pililimog da ed saray apostol. Arum ed saray membro na kongregasyon so angilako ed saray kayarian da pian naseguro a natulongan so amin a mankaukolan. (Gawa 2:41-45) Inlako di Ananias tan Sapphira so sakey ya uma tan agda inter ed saray apostol so amin a nanlakoan da, bangta ibabaga ran say inregalo da et amin a nanlakoan da. Tua, walay kanepegan nen Ananias tan Sapphira a mangiter na dakel odino daiset a labay da balet ta mauges so motibo ra, tan agmatua iray kiwas da. Labay dan pandinayewen so arum tan ipatnag a mas dakel ni so gagawaen da nen say peteg a motibo ra. Si apostol Pedro, a pinuyanan na masanton espiritu, so angiwalwal ed ag-inkamatua tan pansimpisimpitan da, kanian pinatey ira nen Jehova.—Gawa 5:1-10.
11, 12. (a) Anto so arum ed saray panonot nipaakar ed inkamatua? (b) Antoray gunggona ed pagmaliw a matua?
11 No natutukso itayon mantila pian pandinayewen labat so arum, komon ta say agawa ed si Ananias tan Sapphira so onkanan mabiskeg a panonot. Nayarin napalikdo tayo iray kaparan totoo, balet agtayo napalikdo si Jehova. (Hebreos 4:13) Aminpigan insimbawa ed sikatayo na Kasulatan a magmaliw itayon matua ed balang sakey, lapud agmakapambilay iray matila diad dalin ya alinisan la manlapud ag-inkatunong. (Uliran 14:2; Apocalipsis 21:8; 22:15) Nepeg a mabitabitar so rason ed satan. Anggapo lay arum a mangiyaalibansa ed amin a katilaan noagta si Satanas a Diablo.—Juan 8:44.
12 Dakel a bendisyon so nagamoran no matua so kabibilay tayo. Arum ed saratan a bendisyon et say malinis a konsiensia tan say liket a panmamatalekan itayo na arum. Diad dakel a kipapasen, saray Kristiano so awalaan na trabaho odino nansiansia ed trabaho ra lapud matua ira. Balet, say sankaimportantian a nagunggona tayo et say pikakaaro na Makapanyarin-amin a Dios lapud inkamatua tayo.—Salmo 15:1, 2.
Pansiansiaen so Kasimpitan
13. Anton kipapasen so inkidungetan nen Jose, tan panon so inkiwas to?
13 Si Jose, ya anak nen patriarkan Jacob, so nilako ed inkaaripen diad edad a 17. Diad saginonor et sikato so nanserbi diad sankaabungan nen Potifar, sakey ya opisyal na korte ed Ehipto, a ditan so inkidungetan nen Jose ed panggusto na asawa na katawan to. Pinilalek na asawa nen Potifar so miakdol ed si Jose, a matarakin malangwer a laki, tan sikato so inagew-agew ton tatangguyoren: “Miakdol ka ed siak.” Si Jose so arawi ed pamilya to diad dalin ya anggapoy mikabat ed sikato. Nayarin main-inomay to so mirelasyon ed sayan bii ya anggapo so makaamta ed satan. Ingen ta sanen sikatoy siningkat na asawa nen Potifar, binmatik si Jose.—Genesis 37:2, 18-28; 39:1-12.
14, 15. (a) Akin a say istorya nen Jose so makapainteres ed sikatayo? (b) Akin a misalsalamat so sakey a Kristianon bii lapud inunor to iray panonot na Dios?
14 Si Jose so binmaleg ed sakey a pamilya a matakot ed Dios, tan amta to a kasalanan so seksual a relasyon ed baetan na agsanasawa. “Panon sirin so pakayarik a manggawa ed saya ya abalbaleg a kabaglan tan kasalanan ya onsumpa ed Dios?” so intepet to. Say desisyon to so seguradon inggiya na pikakabat to ed estandarte na Dios parad totoo unong a nidatak ed Eden, salanti, asawa labat na sakey. (Genesis 2:24) Saray totoo na Dios natan so nagunggonaan ed panumameng da ed paraan na inkiwas nen Jose ed satan a kipapasen. Diad arum a lugar, aliwan mapeget iray awawey nipaakar ed seksual a relasyon lapud saray kalangweran ya agmanggagawa na imoralidad et luludlureyen na saray kalimog da. Kaslakan la ed limog na saray wala’d edad so pirerelasyon ed agda asawa. Kanian, say istorya nipaakar ed si Jose so nipanpanaon a panonot ed sikatayo. Say estandarte na Dios et siansia nin kasalanan so pilalawanan tan pikakalugoran. (Hebreos 13:4) Mipakna so dakel ya adesdes a manggawa na isesebel a sekso a walay mabiskeg a rason pian paliisan iratan. Arum ed saray agmakapaliket a resulta et say liknaan a nababaingan, nagogonigon a konsiensia, panagselos, panlukon, tan pakaalisan na sakit ed sekso. Singa say ipapanonot ed sikatayo na Kasulatan, say too a mangaagamil na pilalawanan et “mankasalanan ya onsumpa ed laman ton dili.”—1 Corinto 5:9-12; 6:18; Uliran 6:23-29, 32.
15 Si Jenny, * sakey a marikit a Tasi nen Jehova, so walaan na rason pian pisalamatan to iray panonot na Dios. Diad trabaho et walay guapon katrabahoan to ya onkakaraw ed sikato. Sanen ag-inimano nen Jenny, say laki so lalon namporsigi a kinmaraw. Oniay inaksobi to: “Siak so mipupuligesgesan ed pansiansian masimpit lapud balibali ed liknaan no walay kasunian ed sekso ya onggugusto ed sika.” Ingen, naamtaan to a sikato so iyaarum labat manaya na satan a laki ed saray bibiin akirelasyonan to. Sanen alikna to so ikakapuy lay determinasyon ton manresisti, sikato so kinmerew na tulong ed si Jehova pian makapansiansian matoor ed Sikato. Amoria nen Jenny a saray naaralan to ed pansusukimat to diad Biblia tan saray Makristianon publikasyon et singa saray panonot a kinmanan managliing pian sikatoy mansiansian akabantay. Sakey ed saratan a panonot et say istorya nipaakar ed si Jose tan say asawa nen Potifar. “No lanang kon papanonotan so inkasiak nipaakar ed panangarok ed si Jehova,” so inkuan to, “agak nakaukolan ya ontakot ya ompan nagawak iyan baleg a kaugsan tan kasalanan sumpad sikato.”
Unoren Iray Panonot na Dios!
16. Panon itayon nagunggonaan ed panrepaso tan pandalepdep ed saray impanbilay na saray indibidual ya asalambit ed Biblia?
16 Napadaak tayo so apresasyon tayo ed saray estandarte nen Jehova no panggunaetan tayon talosan so rason no akin ya impaikurit to so pigaran salaysay diad Kasulatan parad sikatayo. Anto so leksion ed saratan? Antoran kalidad odino tendensia so inyalimbawa na saray totoo ed Biblia a nakaukolan tayon aligen odino paliisan? Nilasus ya indibidual so nikurit diad Salitay Dios. Nagunggonaan so amin a mangaaro ed bilin na Dios no bayuboan da so pampilalek ed manangiter-bilay a kakabatan, pati ed saray leksion a naaralan tayo ed saray alimbawan maalwar ya impaikurit nen Jehova. Sayan magasin so mabetbet a mangipaparungtal ed saray artikulo nipaakar ed saray istorya na saray indibidual a pakaaralan tayo. Akin ta no ipanaon so panrepaso ed saratan?
17. Anto so liknaan yo nipaakar ed saray panonot nen Jehova, tan akin?
17 Agaylay pisasalamat tayo ed maaron panangiyansakit nen Jehova ed saramay manggugunaet a manumpal ed linawa to! Ag-itayo ayadyari, a singa met saray lalaki tan bibii ya asalambit ed Biblia. Balet, say nisulat a rekord nipaakar ed inkiwas da so makagunggonan tuloy ed sikatayo. Diad italineng ed saray panonot nen Jehova, napaliisan tayo iray seryoson kalilingoan, tan naalig tayo iray maabig ya alimbawa na saramay nankurang ed paraan na inkatunong. No ontan so gawaen tayo, nikanta tayo so liknaan na salmista: “Mapalar so saray mangunor na panamintuaan [nen Jehova], tan saray mananap ed sikato a tinekepan na simoon a puso. Say kamarerwak inunor to so saray panamintuaan mo: tan aroen ko ra a mapalalo.”—Salmo 119:2, 167.
[Saray paimano ed leksab]
^ par. 8 Nengnengen so 1996 Yearbook of Jehovah’s Witnesses, pahina 160-2.
^ par. 15 Inuman so ngaran.
Panon Yon Ebatan?
• Anto so naaralan tayo ed awawey nen David nipaakar ed si Saul?
• Anto so naaralan tayo ed salaysay nipaakar ed si Ananias tan Sapphira?
• Akin a makapainteres ed sikatayo natan so istorya na bilay nen Jose?
[Tepetepet Parad Panagaral]
[Litrato ed pahina 26]
Akin ya ag-inabuloyan nen David a napatey si Saul?
[Litrato ed pahina 27]
Anto so naaralan tayo ed salaysay nipaakar ed si Ananias tan Sapphira?
[Litrato ed pahina 28]
Anto so rason ed impangipulisay nen Jose ed saray imoral a pangaanamot ed sikato?