Say Napanmatalkan a Giya Parad Panliket

“SAY panggegemtan na Liket” et kanepegan na amin a too. Ontan so panmoria na saramay amawala na Declaration of Independence na Estados Unidos na Amerika. Balet say panggegemtan ed sakey a kalat et midumaan ed pakadampot ed satan. Anggaman dakel a kalangweran so manggegemtan na saray karera ed panliliket tan isport, pigara ed sikara so kabat mo a talagan akagamor ed pampirpirawatan da? “Nayarin agka ontalona,” so inkuan na bantog a managkansion ya amta to so irap ed pagmaliw a matalonan musikero.

No naliliknam ya agka met ontalona ed panaanap mo na liket, kaukolan moy manpakpel. No gegemtanen mo so liket ed dugan paraan, nagamoran mo itan. Akin ya ontan so nibaga? Say akaunan artikulo so anukoy ed “maliket a Dios,” si Jehova. (1 Timoteo 1:11, NW) Diad Biblia et mangitatarya so Dios na giya ta pian agmansumpal ed pakadismaya so panggegemtan mo na liket. Natulongan ka nen Jehova a manalona ed kaslakan a pansesengegan na kaermenan. Alimbawa, konsideraen pa so pakaligliwaan ya iyoopresi to ed sika sano ompatey so sakey ya inad-arom.

Sano Inatey so Sakey ya Inad-aro

Wala ta so nibagan maabig nipaakar ed ipapatey? Say ipapatey so mangisisian ed atateng manlapud ananak da tan saray ananak manlapud atateng da. Pansiasianen na satan iray maapit a sankakaaro tan manesesga ed kaligenan na nankakasakey iran komunidad. Sano onsabi ipapatey, say maliket a pamilya et nayarin natalonaan na pirmin kaermenan.

 Anggapo lay kaukolan a mangibaga ed sika a say ipapatey et sakey a trahedya. Balet, walaray totoon mangibuburi ed satan a katuaan tan ililitrato ra a bendisyon so ipapatey. Imanoen pa so agawa kayarin dinmalan so bagyon si Katrina diad Gulpo na Mexico nen Agosto 2005. Diad sakey a ponpon na sakey a biktima, oniay inkuan na ministro: “Aliwan [say bagyon] si Katrina so amatey ed sikato. Say Dios so anawag ed sikato ed ayaman to.” Diad sananey met a kaso, sakey a clerk na ospital a walaan na maabig ya intension so angibaga ed sakey ya anak a bii ya agmanpaga, ta say Dios so angala ed si nanay to ed tawen. Say anak so inmurangal, a kuan to: “Akin, akin et kaukolan to nin alaen ed siak?”

Malinew a saray ontan a lingon ideya nipaakar ed inaatey et mabetbet ya agmakaligliwa ed saray inateyan. Akin? Lapud ag-ibabangat na saratan so katuaan nipaakar ed ipapatey. Mas alodloor ni, ililitrato ra so Dios bilang managsamsam na saray inad-aro manlapud kapamilyaan tan kakaaro ra diad makapasinagem tan makapaermen a paraan. Imbes a lapuan na ligliwa, papapawayen dan say Dios so responsable ed trahedyan ipapatey. Balet idadalatdat na Salitay Dios so katuaan nipaakar ed satan.

Tinukoy na Biblia so ipapatey bilang sakey a kabusol. Inyaliling na satan so ipapatey ed sakey ya ari a manuuley ed katooan. (Roma 5:17; 1 Corinto 15:26) Say ipapatey et sakey a mabisbiskeg a kabusol ya agnaamper na anggan siopa a too, tan kada ompatey ya inad-aro so sakey lamet ed dakerakel a biktima na satan. Sayan katuaan ed Biblia so suston manutukoy ed nalilikna tayon ermen tan inkaandi-pakayari sano ompatey so inad-aro tayo. Pepekderan na satan a normal labat iratan a liknaan. Anggaman kuan, kasin uusaren na Dios so kabusol ya ipapatey pian alaen ed tawen iray inad-aro tayo? Say Biblia so abuloyan tayon mangebat ed satan a tepet.

Oniay ibabaga na Eclesiastes 9:5, 10: “Saray inatey agda amta so bengatla . . . Anggapo so gawa, no kanonotan, no pakaamta, no kakabatan, dia ed Sheol, a laen mo.” Anto so Sheol? Satan so kaslakan a lubok na katooan a laen da sano ompatey ira. Diad lubok, saray inaatey et sigpot ya inaktibo, ag-ira onggagalaw, ag-ira makalikna, nisay makanonot na antokaman. Say kipapasen da et singa ra naugip a mait-itlep. * Kanian ipapalinew na Biblia ya ag-aalaen na Dios iray inaatey ya inad-aro pian nakaiba to ed tawen. Lapud inaatey la ra, anggapo la so bilay da diad lubok.

Pinekderan nen Jesus iyan katuaan kayarin inatey so kaaro ton si Lazaro. Inyaliling nen Jesus so ipapatey ed ugip. No si Lazaro et linma ed tawen pian nakaiba so Makapanyarin-amin a Dios, diad ontan et aliwan panangasi so impangipawil ed sikato nen Jesus diad dalin pian ompatey lanlamang. Ibabaga na impuyan a salaysay a diad pasen ya angiponponan, kinmelyaw si Jesus: “Lazaro, paway ka!” Intuloy na Biblia: “Saman so inatey pinmaway.” Si Lazaro et ginmapo lamet a nambilay. Amta nen Jesus ya agbalot tinmaynan si Lazaro diad dalin. Sikato so andiay-bilay ya akarukol ed pasen ya angiponponan ed sikato.—Juan 11:11-14, 34, 38-44.

Sayan inkagawa a nikurit diad Biblia so ontulong ed sikatayon natalosan a say ipapatey et aliwan paraan na Dios pian iyalis ed tawen iray totoo manlapud dalin. Diad ontan et napaapit itayo ed Dios, lapud amta tayo ya aliwan sikato so  sengegan na paneermen tayo. Makapanmatalek itayo met a sigpot ton natatalosan so kaermenan tan say makaderal ya epekto ed sikatayo na kabusol ya ipapatey. Tan say katuaan na Biblia nipaakar ed kipapasen na inaatey so mamaneknek a saray inaatey et agmaniirap ed impiernon-apoy odino purgatoryo noagta sikaray andian na bilay a walad lubok. Sirin, say pakanodnonotan ed saray inad-aro tayo so agkaukolan a mangiyarawi ed sikatayo ed Dios odino mamapaga ed sikatayo ya agnaamtaan so kawalaan da. Sakey ni, si Jehova so mangitatarya ed sikatayo na kaaruman nin ligliwa panamegley na Biblia.

Say Ilalo so Mangitonton ed Liket

Ipapabitar na saray teksto a siningbat tayo a say ilalo et importantin kabiangan na tuan liket. Say salitan “ilalo” unong a nausar diad Biblia so mankabaliksan na matalek a pantatalaran ed maabig. Pian naseguro no panon a makapangitonton ed liket so ilalo, pawilen tayo imay salaysay nipaakar ed impamaoli nen Jesus ed si Lazaro.

Wala so duaran rason no akin a ginawa nen Jesus iman a milagro. Unona et pian naandi so paneermen nen Marta, Maria, tan saray kakaaro ra. Napanggayagaan da lamet so pakapiulop ed inad-aro ra. Balet sinalambit nen Jesus ed si Marta so komadua tan mas importantin rason: “Agko ta inkuan ed sika a no manisia ka nanengneng mo so gloria na Dios?” (Juan 11:40) Impatalos na The New Testament in Modern English, nen J. B. Phillips, so unor iran balikas bilang “makapakelkelaw a nagawaan na Dios.” Diad impamaoli nen Jesus ed si Lazaro, impanengneng to so bengatla a nagawaan tan gawaen nen Jehova a Dios ed arapen. Niraya so kaaruman nin detalye nipaakar ed sayan “makapakelaw a nagawaan na Dios.”

Diad Juan 5:28, 29, oniay inkuan nen Jesus: “Agkayo mankelaw ed saya, ta onsabi oras, ya amin so saray wala ed saray [pakanodnonotan a] lubok narengel da so boses to, et ompaway ira.” Kabaliksan na satan ya onoli ed bilay so amin ya inaatey a walad Sheol, kabiangan la iray inad-aro tayo. Wala ni so ipaparungtal na Gawa 24:15 nipaakar ed sayan makapakelaw ya ebento, diad pangibabagan: “Wala naani kioli ed bilay na saray matunong tan agmatunong.” Kanian anggan saramay “agmatunong,” salanti, say dakel ya indibidual ya ag-akapikabat tan ag-akapanlingkor ed si Jehova, so nawalaan na pankanawnawa diad arapen a nagamoran so pabor na Dios.

Iner so pakagawaan na sayan kioli? Oniay ibabaga na Salmo 37:29: “Say matunong tawiren to so dalin tan manayam diman lawas.” Isipen pa so kabaliksan na satan! Saray pamilya tan sankakaaro ya asian lapud ipapatey so makapannenengnengan lamet diad dalin. Legan mon iisipen so maliket a pakapilimog ed saramay totoo a datin nanliketan mo so impakapiulop ed sikara, makatunongan labat ya onleppua so liket ed pusom.

Labay nen Jehova a Manliket Ka

Akonsidera tayo so duaran paraan a napaaralem nen Jehova so liket mo anggaman walaray problemam. Unona, sikatoy mangitatarya na pikakabat tan panangiwanwan manlapud Biblia ya ontulong ed sika pian natalonaan mo iray kairapan. Nilikud ed panutulong ed sikatayo na Biblia a nasungdoan so ermen ed ipapatey, makatulong met ed sikatayo so simbawa na satan pian naanosan iray kairapan ed panagbilay tan beblay na laman. Napabiskeg ka na satan pian nasungdoan mo so ag-inkahustisya ed sosyedad tan gulo ed politika. Tan no paiwanwan ka ed satan diad bilay mo, natulongan kan mangarap ed arum niran personal a problemam.

Komadua, diad panaral mo ed Biblia, nawalaan ka na ilalo a mabmablin tuloy nen say antokaman a nagamoran ed pililimog ed arum a totoo. Say kioli na kakaaro tan kapamilyaan so kabiangan ed ilalo a sinalambit na Biblia. Mangiiter na kaaruman a detalye so Apocalipsis 21:3, 4: “Say Dios met lanlamang so wala naani ed [katooan]; tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” Kabaliksan na satan ya agla manbayag et sigpot lan naandi so antokaman a makapaermen ed bilay. Seguradon nagawa so insipan na Biblia, tan makapanggayaga ka ed pakasumpal na satan. Nainawaan ka la diad pakaamta labat a wala so magmaong a panaon diad arapen. Say pakaamta ya agka lan balot  manirap lapud naandi lay ipapatey et sakey a rason pian manliket.

Pian iyilustra: Diad apalabas a pigaran taon et naimatonan nen Maria so impanirap na masiken to a kalkalnan inatey lapu ed sakit a kanser. Ag-abayag, kaleganan a paneermenan to ni so impatey na masiken to, sikato tan say taloran anak ton bibii so apaskar ya ontaynan ed ayaman da lapu ed saray problema ed pinansyal. Kalabas na duaran taon, naamtaan nen Maria a wala met so kanser to. Sikatoy amiduan naoperaan tan intetepel to so pirmin ot-ot ed kada agew. Anggaman ed sarayan problema to, positibon maong so panagnonot to a satan so amakiwas ed sikato pian pasesegen so arum a totoo. Panon ton napansiasiansia so liket to?

Oniay inkuan nen Maria: “Sano walay problemak, agko masyadon iisipen so inkasiak. Agko uumamengen iray tepet ya: ‘Akin a siak ni? Akin a kaukolan koy manirap na onia? Akin a kaukolan koy mansakit?’ Mangupot na kasil so negatibon kanonotan. Imbes, inusar koy biskeg ko ed panaglingkor ed si Jehova tan pananulong ed arum. Satan so amaliket ed siak.”

Anto so agawaan na ilalo diad bilay nen Maria? Niteen to so puso to diad arapen a paandien la nen Jehova so sakit tan arum niran problema na katooan. Sanen linma ed ospital pian manpatambal, innabang to itan ya ilalo ed arum a pasyente na kanser a nayarin naaandian la na ilalo. Kaunongan kaimportante so ilalo ed si Maria? Oniay inkuan to: “Mabetbet kon iisipen so ibabaga na Biblia diad Hebreos 6:19, a deneskribe ditan nen Pablo so ilalo bilang pataga na kamarerwa. No anggapo itan a pataga odino angkla, sika so niyanor a singa sakey a baloto ya intabag na bagyo. Balet no akapeket ka ed satan a pataga, magmaliw kan maligen anggaman nipapaarap ka ed singa-bagyo iran problema.” Satan a ‘paniilalo ed bilay ya andi-anggaan ya insipan na Dios, ya agnayarin manburi,’ so tinmulong ed si Maria pian mansiansian maliket. Ontan met so nagawaan na satan ed sika.—Tito 1:2.

Diad panaral ed Biblia, naromog mo so tuan liket anggaman walaray problema. Balet, nayarin walaray panduaruwaan mo nipaakar ed kakanaan na satan. Saray Tasi nen Jehova so maliket a mangipanengneng ed sika na Makasulatan iran ebat a kaukolan mon naamtaan ta pian sika so peteg a manliket. Legan kan manaalagar ed pakasumpal na ilalon iyoopresi nen Jehova, nakaiba ka ed saraman so adeskribe ed onia: “Narapat da naani inkagayaga tan liket, tan say ermen tan paney-ey onandi ra.”—Isaias 35:10

[Paimano ed leksab]

[Litrato ed pahina 5]

Say katuaan labat na Biblia so nayarin mamakepa na ermen

[Litrato ed pahina 7]

Say ilalon kioli ya insipan na Biblia so makapangitarok na liket