Seguradon Naromog Mo so Liket

LIKET—say puro tan magnayon a liket et mairap a naromog no maminsan. Say manunan rason et aliwa so panaanapan ed satan na dakel a totoo ya ag-ontutundan mananap. No wala labat komon so napanmatalkan tan marunong a kaaro ra a makapangituro na dugan direksion!

Say Biblia so lapuan na satan a nakaukolan a direksion. Konsideraen pa so sakey labat ed saray libro na satan—say Salmos. Sayan libro et sakey a koleksion na 150 a sagrado iran kanta parad si Jehova a Dios, a ngalngalin kapaldua na satan so tinibukel nen Arin David na kadaanan ya Israel. Balet nilikud ed pangamta no siopa iray nansulat ed satan, nagkalalon importante a naamtaan a nisulat iyan libro diad impangipuyan na sankamaongan a Kaaro na katooan, si Jehova. Makaseguro itayo sirin a lugan na satan so panangiwanwan na Dios a pankaabigan tayo tan ontulong itan ed sikatayo a naromog so liket.

Segurado iray managsulat na Salmos a say liket et resulta na pakawalaan na sakey a too na maabig a relasyon ed Dios. “Mapalar so too ya antakot to si Jehova,” so insulat na salmista. (Salmo 112:1) Say relasyon ed too, materyal a kayarian, tan say dilin agawaan so agbalot makapawala na liket a manlalapud pagmaliw a kabiangan na “totoo a say Dios da et si Jehova.” (Salmo 144:15) Saray bilay na dakel a modernon-agew a lingkor na Dios so mamekder ed satan.

Sakey lan alimbawa si Susanne, a mantaon na masulok ni labat a 40. * Oniay inkuan to: “Natan et dakel so mililimog ed pigaran grupo pian narapat da so kaslakan iran kalat odino pian makapibiang ira ed kaslakan iran paniinteresan. Balet, mataltalag dan ipapasen a kaaro so balang sakey ed grupo ra. Nidumaduma iray totoo nen Jehova. Sikami so papakiwasen na panangaro mi ed si Jehova pian pablien so sakey tan sakey. Komportable kami ed limog na totoo na Dios, anggan iner so kawalaan mi. Sayan pankakasakey  so mamaparakep ed kalidad na bilay mi. Siopa ta ni so makapangibaga a walaray kaaro ra manlapud saray grupo na totoon midumaan so sosyedad tan abenegan da tan manlapud dakel tan nanduruman nasyonalidad? Sigpot-puso a nibagak a talagan makapaliket so pagmaliw a kabiangan na totoo nen Jehova.”

Naaralan met nen Maree, a nianak ed Scotland, ya importante so pakawalaan na maabig a relasyon ed si Jehova ta pian nalikna na sakey so liket. Oniay insalaysay to: “Sakbay kon naaralan so katuaan ed Biblia, labalabay koy manbantay na makapataktakot (horror) iran pelikula. Balet agak makaugip ed labi no anggapoy sankabembenan kon krus a panaktakot ed saray anyani tan aswang, ya ontan so maslak a nipapalabas. Balet sanen naaralan ko la so katuaan, tan agak la manbabantay ed ontan iran palabas, say relasyon ko ed si Jehova so angekal na pakatatakot ko sano onugip ak la tan siak so maliket la natan a manlilingkor ed Dios a makapanyari ni nen saray demonyo odino saray aswang a gawagaway-isip.”

Say Panmatalek ed si Jehova so Mangitonton ed Liket

Anggapoy rason tayo pian panduaruwaan so inkamakapanyarin-amin na Manamalsa tan say andiay geter a kakabatan to. Lapud amta nen David a sigpot ton napanmatalkan si Jehova tan makapansalimbeng ed Sikato, oniay insulat to: “Mapalar so too a mangako ed Jehova a katalkan to.”—Salmo 40:4.

Oniay inkuan nen Maria: “Sanen wala ak ed España tan diad inerman a pasen, naeksperiensyak a sano gawaen tayo iray bengatla unong ed paraan nen Jehova, anggano dadagdagen itayo na liknaan tan emosyon tayo a gawaen so kasunian, manresulta itan ed sankaabigan. Magmaliw itayon maliket lapud lawas sankaabigan so paraan nen Jehova.”

Si Andreas, a sakey a Kristianon matatken ya akapanlingkor ed pigara lan bansa ed Europa, so akaaral met manlapud dilin eksperiensya to a makapanmatalek itayo ed si Jehova. Oniay inkuan to: “Say kuyak, ya agko kapananisiaan, so angimpluensyan maong ed siak legan na inkatobonbalok, a papasesegen to ak a manggegemtan na kareran pakaasensoan ed pinansyal. Sanen linmoob ak ed sigpot-panaon a ministeryo tan agak nanmatalek ed say tatawagen a kaligenan ya iyoopresi na sekular iran pension plan, sikatoy adismayan maong. Legan na panlilingkor ko a sigpot-panaon, agak nin balot kinmulang na nakaukolan, tan agamoran ko iray bendisyon a kugkugipen lambengat na arum.”

Nen 1993, si Felix so naimbitaan ya ontulong ed pamaawang na saray pasilidad na sangan opisina na saray Tasi nen Jehova ed Selters, Alemanya. Sanen asumpal la so kimey, sikatoy  naimbitaan diman a magmaliw a permanentin membro na pamilyay Bethel. Antoy reaksion to? “Inawat ko so imbitasyon anggaman walaray panduaruwaan ko. Balet natan et mansamploy taon ko la dia, tan kombinsido ak ya inebatan nen Jehova iray pikakasik. Amta to no antoy sankaabigan parad siak. Diad sigpot ya impanmatalek ko ed sikato tan impaiwanwan ak ed sikato, inabuloyan ko a nipanengneng to ed siak no anto so kaliktan ton gawaen ko.”

Si Susanne, ya asalambit diad gapo, et labalabay toy manlingkor bilang payunir, a sigpot-panaon a ministro, balet ta naiirapan a makalmo na part-time a trabaho. Kayari ton nanalagar na sakey taon ed antokaman ya onsabi, sikatoy kinmiwas tekep na panagmatalek ed si Jehova. Oniay insalaysay to: “Inter koy aplikasyon ko parad regular payunir. Say atipon kon kuartak et magenap labat lan gastosen ko ed manga sakey bulan. Tan agaylan makapaliket so agawa kayari na sakey bulan! Say ministeryok so akaliknaan ko na baleg a gayaga, bangta say nantutumbokan ya interbiok ed trabaho so ag-amaliket ed siak. Balet, unong ya insipan nen Jehova, agto ak pinaulyanan. Diad sampot ya agew na bulan, siak so akapanpirma na kontrata ed trabaho. Natan et asegurok la a talagan napanmatalkan ko si Jehova! Sayan inmunan naeksperiensyak ed sigpot-panaon a panaglingkor so amawala ed siak na makapatumang tan maliket a bilay.”

Say Pangawat ed Pananisiplina na Dios so Lalon Makapaliket

Si Arin David so akagawa na pigaran ambelat a kasalanan. Walaray panaon a kinaukolan to so makabat a simbawa. Kasin mabulos itayon mangawat na simbawa tan panamilin a singa si David?

Aminsan et amoria nen Aida, a taga-Pransya, a sikatoy akagawa na baleg a lingo. Oniay insalaysay to: “Say manunan nampagaan ko et say pangipawil ko na relasyon ko ed si Jehova. Anggapo lay arum a mas importante.” Sikatoy nampatulong ed Kristianon mamatatken. Diad masulok a 14 lan taon a panlilingkor to bilang sigpot-panaon, oniay nibaga to: “Agaylan makapaliket a naamtaan a pinerdona nen Jehova so kasalanan ko!”

Say inkamabulos tayon mangawat ed simbawa na Dios et talagan makapangipaliis ed sikatayo ed pakagawa na lingo. Oniay insalaysay nen Judith: “Sanen mantaon ak na 20, agustoan ko so sakey ya Aleman a kaibak ed negosyo a manggagawa na anggaay nayarian to pian pandinayewen to ak. Sikatoy respetado, maaligwas a maong so karera to, tan wala lay asawa to! Amoriak a kaukolan koy manpili no kasin unoren ko iray ganggan nen Jehova odino Sikatoy sigpot kon ipulisay. Impatuak itan ed atateng ko. Say amak so diretsaan ya angipanonot ed siak ed no antoy iilaloan nen Jehova ed siak. Sikatoy prangkan akitongtong ed siak—a satan so kakkaukolan ko! Anggaman ontan, nananap ak nin siansia na nibaraan ko. Pigay simba a say inak so nilabilabin mitotongtong ed siak nipaakar ed no panon kaimportante tan makapangisalba na bilay iray ganggan na Dios. Misalsalamat ak lapud kalkalnan niyasingger so pusok ed si Jehova. Say pananisiplina tan panangibangat to so pirmin amaliket ed siak—say dakel a makapenek a taon ed sigpot-panaon a ministeryo tan sakey a maomaong a Kristianon asawa, a mangaaro ed siak tan sigpot-puson mangaaro ed si Jehova.”

Malinew a saray ontan ya eksperiensya so mangidadanet ed katuaan na saray salita nen David: “Mapalar so naperdona so saray insusumlang to, say asakbongan so kasalanan to. Mapalar so too ya agnapakasalanan ed Jehova ed kasulitan.”—Salmo 32:1, 2.

Say Liket ed Pangipatnag na Konsiderasyon ed Arum

“Mapalar so mangimano na duka,” so insulat nen David. Tan intuloy to: “Ta si Jehova iliktar to ed agew na kaugsan. Si Jehova yapiger to tan pansiansiaen to a mabilay, tan sikato napapalar.” (Salmo 41:1, 2) Say maaron konsiderasyon ya impatnag nen David ed si Mefiboset, say piley ya anak na maapit a kaaro ton si Jonatan, so sakey ya alimbawa na dugan awawey nipaakar ed saray makapuy.—2 Samuel 9:1-13.

Si Marlies, a 47 a taon lan manlilingkor bilang misionaryo, so apribilehyoan a manpulong ed limog na saray totoon apaskar ya ontakas ed mapeligro iran lugar ed Aprika, Asia, tan Bukig ya Europa. Oniay inkuan to: “Nanduruma so problema  ra tan karaklan ed sikara et liknaen dan taga paway ira, tan biktima ira na panaglabi, a satan so tua. Say panulong ed ontan a totoo so lawas makapaliket.”

Si Marina, a masulok to ni labat ya 40, so nansulat: “Bilang walad kasuloan, makaligliwa no walaray totoon mabulos ya ontulong ed sika. Saya so amakiwas ed siak pian pasesegen iray totoo diad panamegley na telepono tan diad pansusulat ko ed sikara. Dakel so angibalikas na apresasyon da. Panliliketan ko so itutulong ed arum.”

Si Dimitar, a mantaon na masulok lan 20, so angikuan: “Say inak et bukbukor toy amabaleg ed siak. Sanen ugaw ak ni, malikeliket ak sanen say manangasikaso ed Panagaral na Kongregasyon ed Libro et itatagar to ak a sinimba pian nipasal ak diad ministeryo. Anggad natan et aapresyaen ko so inkaseet to. Amtak ya agak mainomay a napakiwas.” Lapud misalsalamat ed impanulong ed sikato nensaman, si Dimitar so ontutulong met natan ed arum: “Panggugunaetan koy mangitagar na sakey a kalangweran tan sakey met a maedad la diad lawak na ministeryo a maminsan ed sakey bulan.”

Say libro na Salmos so analambit na arum nin bengatla a makapaliket. Say sakey et say kaimportantian na panmatalek ed biskeg nen Jehova imbes a diad dilin biskeg tayo: “Mapalar so too a wala ed [si Jehova] so biskeg to.”—Salmo 84:5.

Ontan so naeksperiensya nen Corinna. Sikatoy inmalis ed sakey a bansa a baleg so pankaukolan diad ministeryo. “Nipaarap ak ed sakey a balon lenguahe, balon kultura, tan balon paraan na panagnonot. Pakaliknak et wala ak ed arum a planeta. Mankebbiew ak lapud agko kabisado so lugar a pampulongan ko. Kinmerew ak na tulong ed si Jehova, tan lapud panamabiskeg to et ayarian ko so nampulong a sanagew diad nisulinek a teritorya. Diad saginonor, singano satan la so sankainomayan a kimey. Akapangigapo ak na dakel a panangiyaral ed Biblia, tan nagugunggonaan ak ni anggad natan ed sayan eksperiensya. Naaralan ko a diad panamegley na biskeg nen Jehova, natalonaan tayo so anggan saray ompatnag ya abalbaleg a babeng.”

On, dakel a bengatla so makatulong pian naromog so liket, a singa say pamayubo na pikakaaro ed Dios tan ed totoo to, sigpot a panmatalek ed si Jehova, pangawat ed madibinon pananisiplina, tan pagmaliw a makonsidera ed arum. Diad pankurang ed saray dalan nen Jehova tan pangunor ed saray ganggan to, maliket tayon naeksperiensya so panangabobon to.—Salmo 89:15; 106:3; 112:1; 128:1, 2.

[Paimano ed leksab]

[Litrato ed pahina 12]

Si Maria

[Litrato ed pahina 13]

Si Maree

[Litrato ed pahina 13]

Si Susanne tan Andreas

[Litrato ed pahina 15]

Si Corinna

[Litrato ed pahina 15]

Si Dimitar