Tepetepet na Saray Manbabasa

Anto so labay ya ibaga nen Jesus sanen inkuan to ed si Nicodemo ya: “Anggapo so too a sinmegep ed tawen, noag say linmasur nanlapu ed tawen, salanti, Anak na too”?—Juan 3:13.

Diad saman et wadiad dalin si Jesus, tan agto ni sinmegep, odino pinmawil, ed tawen. Balet, makatulong so pikakabat tayo nipaakar ed si Jesus tan say konteksto na saray salita to pian natalosan tayo so labay ton ibaga.

Si Jesus et “linmasur nanlapu ed tawen” lapud sikatoy dati lan manaayam ed kawalaan na saray espiritu a kaiba nen Ama to, balet diad aturon panaon et niyalis so bilay na Anak ed panag-anakan nen Maria, anggad nianak si Jesus bilang too. (Lucas 1:30-35; Galacia 4:4; Hebreos 2:9, 14, 17) Kayari na ipatey to, si Jesus so paolien bilang espiritun pinalsa tan ompawil ed kawalaan nen Jehova. Kanian, sakbay a tuloy a sikatoy pateyen, ayarian nen Jesus ya ipikasin: “O Ama, igloria mo ak laktip ed inkasika ed samay gloria a walad sikata nen andi ni mundo.”—Juan 17:5; Roma 6:4, 9; Hebreos 9:24; 1 Pedro 3:18.

Si Jesus so agni akapawil ed tawen sanen mitotongtong ed si Nicodemo, a sakey a Fariseo tan managbangat ed Israel. Siempre, anggapo ni so too ya inatey insan sinmegep ed kawalaan na saray espiritu, salanti, diad tawen. Inkuan nen Jesus a mismo a si Juan Bautista et sakey a matalonggaring a propeta na Dios, balet ta “say kamelmelagan ed panariay tawen babaleg ni nen sikato.” (Mateo 11:11) Tan impaliwawa nen apostol Pedro ya anggan say matoor ya Arin David et inatey tan anggad natan et wala ni ed lubok to; si David et agsinmegep ed tawen. (Gawa 2:29, 34) Wala so rason no akin a saramay akaunan inatey nen si Jesus, a singa si David, Juan Bautista, tan saray arum nin matoor a lalaki, so aglinma ed tawen. Inatey la ra sakbay a nilukasan nen Jesus so dalan odino posibilidad parad totoo a napaoli ed mangatatawen a bilay. Insulat nen apostol Pablo a si Jesus, singa sakey a manunaan et ‘nilukasan to so dalan a balo tan mabilay’ a mamaarap ed tawen.—Hebreos 6:19, 20; 9:24; 10:19, 20.

Lapud si Jesus et agni inatey tan agni apaoli sanen mitotongtong ed si Nicodemo, anto so labay ton ibaga sanen inkuan to ed sikaton: “Anggapo so too a sinmegep ed tawen, noag say linmasur nanlapu ed tawen, salanti, Anak na too”? (Juan 3:13) Imanoen pa so konteksto, odino say itotongtong nen Jesus ed si Nicodemo.

Sanen linma ed si Jesus itan a Judion lider diad kabilungetan na labi, oniay inkuan nen Jesus ed sikato: “Tua, tua, kuan ko ed sika, No say sakey a too agnianak a napasimbalo, agto nanengneng so panariay Dios.” (Juan 3:3) Bilang ebat, oniay intepet nen Nicodemo: ‘Panon a nagawa itan? Panon a say sakey a too so nianak a pidua?’ Agto atalosan itan a madibinon bangat nipaakar ed pagmaliw a kabiangan na Panarian na Dios. Wala ta so paraan pian natalosan to itan? Bueno, agto itan natalosan unong ed kakabatan na too; anggapo so toon makapangibangat na satan lapud anggapo so too a nanlapu ed tawen tan makayarin mangipaliwawa na antokaman a nipaakar ed pakaloob ed Panarian. Si Jesus labat so makapangipaliwawa ed satan. Ayarian ton imbangat si Nicodemo tan say arum nira lapud Sikatoy linmasur a nanlapu ed tawen tan Sikatoy kualipikadon mangibangat ed saray totoo nipaakar ed saratan a bengatla.

Kanian say tepet nipaakar ed sayan teksto so mangiyiilustra ed makanakanan punto nipaakar ed panagaral ed Salitay Dios. Agmakatunongan a panduaruwaan la so sakey a teksto lapu lambengat ta ompatnag a mairap itan a talosan. Say ibabaga na Biblia ed sakey a bersikulo so nepeg a talosan diad tulong na arum niran teksto tan nepeg a mitunosan ed saratan. Niarum ni, mabetbet a makatulong ed sikatayo so konteksto—say kipapasen odino say sisingbaten—pian naromog tayo so makatunongan tan malinew a kabaliksan na makapawetwet a teksto.