Apabiskeg so Arum Lapud Pananisia To

SANEN nianak si Silvia nen Disyembre 1992, ompatnag a sikatoy mabunbunigas ya ugaw. Balet sanen duay taon to la, asuri si Silvia a walaan na cystic fibrosis, sakey ya agnatambal a sakit a pansesengegan na onloloor a problema ed panag-ingas tan ed eges. Pian naanosan to so sakit to, si Silvia so inagew-agew a mantutumar na 36 tableta, mansusungap na inhaler, tan manpapa-terapi. Lapud 25 porsiento labat so normal a kapasidad na bala to, sikato so nepeg a manusar na melag a tangki na oksiheno, anggano sikato so ompaway ed abung.

“Balet makapakelaw no panon so panatalona nen Silvia ed satan a sakit to,” so inkuan na ina ton si Teresa. “Lapud pikakabat to ed Kasulatan, mabiskeg so pananisia to. Satan a pananisia so akatulong pian natalonaan to so ermen tan irap na kipapasen to. Sankanonot ton naynay so balon mundo ya insipan nen Jehova, ya onabig lan amin so mansasakit.” (Apocalipsis 21:4) No nadidismaya so pamilya to, say makompiyansan kakaimis nen Silvia so mamapabiskeg ed sikara. Oniay ibabaga to ed atateng to tan ed agi ton laki: “Say bilay ed balon mundo so mamaandi ed amin a paniirap tayo natan.”

Say maong a balita na Salitay Dios so regular ya inanabang nen Silvia ed arum, tan naiimano na saray totoon katongtong to so liket tan liga ed lupa to. Panliliketan met a maong na saray membro na Kristianon kongregasyon ya aatendian to ed Canary Islands so italineng ed saray komento to tan pakanengneng ed pibibiang to. Tan kayari na kada aral, labalabay nen Silvia so mansiansia ni ed Kingdom Hall pian makapitongtong ed saray Kristianon agagi to. Say maliket tan masayaksak a personalidad to so amakiwas ed amin diad loob na kongregasyon a mangaro ed sikato.

“Ibabangat ed sikatayo nen Silvia so importantin tuloy a leksion,” so inkuan na ama ton si Antonio. “Anggano walaray problema tayo, say bilay et regalo na Dios, tan nepeg tayon pablien itan.” Singa si Silvia, amin a lingkor na Dios—kalangweran tan maedad la—so magunaet a mantatalaran ed panaon sano “say manaayam agto naani ikuan, Mabeblay ak.”—Isaias 33:24.

[Litrato ed pahina 31]

Ibabasa nen Silvia so sakey a bersikulo na Biblia legan a sankaegnaan nen nanay to so tangki na oksiheno