Nianak Ira a Kabiangan na Sakey a Nasyon a Pinili na Dios

“Si Jehova a Dios mo pinili to ka a katooan a kien to a bukor.”—DEUTERONOMIO 7:6.

1, 2. Antoray makapanyarin ginawa nen Jehova parad totoo to, tan anton pisisiglaotan so akipaknaan na saray Israelita ed Dios?

 NEN 1513 B.C.E., intarok nen Jehova iray lingkor to ed dalin diad sakey a balon pisisiglaotan ed sikato. Diad saman a taon et inyabeba to so sakey a pakayari ed mundo tan imbulos to iray Israelita manlapud inkaaripen. Diad satan a ginawa to, sikato so nagmaliw a Manangilaban tan Makankayarian ed sikara. Sakbay ya onkiwas so Dios et oniay imbaga to ed si Moises: “Salitam ed saray anak na Israel, Siak si Jehova, et lukposen ta kayo ed pamadpairap na saray Ehipsio ed sikayo, tan yagel ta kayo ed panangaripen da, tan dondonen ta kayo naani na akaunat a taklay tan saray angkakabaleg a panangukom. Et alaen ta kayo ed siak a sakey a totoo tan siak so Dios yo.”—Exodo 6:6, 7; 15:1-7, 11.

² Kapaway da ed Ehipto, saray Israelita so akisipanan ed Dios da, si Jehova. Imbes a say pidenengan nen Jehova et saray indibidual, pamilya, odino boleg, si Jehova so awalaan na organisadon totoo, sakey a nasyon, diad dalin. (Exodo 19:5, 6; 24:7) Intarya to ed totoo to iray ganggan ya angigiya ed inagew-agew a panagbilay da tan, mas importante, diad panagdayew da. Oniay inkuan nen Moises ed sikara: “Dinan ta so wala a baleg a nasyon, a wala so dios to ya asingger a tuloy ed sikara, a singa say kaasingger nen Jehova a Dios tayo ed kapagno ontawag itayo ed sikato? Tan anto ta so wala a balbaleg a nasyon, a wala so saray pananontonan tan bilibilin to ya alay inkatunong a singa saya so ganggan ya impatnag ko ed arap yo natan ed sayan agew?”—Deuteronomio 4:7, 8.

Nianak ed Sakey a Nasyon na Saray Tasi

3, 4. Anto so importantin rason na inkiwala na Israel bilang nasyon?

³ Kayari na pigaran siglo, pinanonotan nen Jehova iray Israelita, diad panamegley nen propeta ton Isaias, nipaakar ed importantin rason na inkiwala ra bilang sakey a nasyon. Oniay imbaga nen Isaias: “Onia so kuan nen Jehova ya amalsa ed sika, O Jacob, tan sikato ya anibukel ed sika, O Israel; agka antakot, ta siak dinondon ta ka; siak tinawag ta ka ed ngaran mo, sika so kayarian ko. Ta siak si Jehova a Dios mo, say Santo na Israel, a Manangilaban mo. . . . Yakar mo so saray anak mo a lalaki a manlapu ed arawi, tan saray anak mo a bibii a manlapu ed sampot na dalin; balang sakey a natumangan ed ngaran ko, tan sikato so pinalsak a nipaakar ed gloriak, sikato so tinibukel ko, on ginawak. Sikayo so saray tasik, kuan nen Jehova tan say aripen ko a pinilik, . . . say ombaley a ginawak a nipaakar ed siak lanlamang, pian ipatnag  da komon so kigalang ko.”—Isaias 43:1, 3, 6, 7, 10, 21.

⁴ Bilang totoon tinawag ed ngaran nen Jehova, saray Israelita so nagmaliw a saray tasi ed inkasoberano to diad imaton na saray nasyon. Sikara so kinaukolan a magmaliw a totoo to ya ‘apalsa nipaakar ed gloria nen Jehova.’ Sikara so nepeg a ‘mangipatnag ed kagalangan nen Jehova,’ ya isalaysay da iray makapakelaw a gawa na panangiliktar to tan igloria ra so masanton ngaran to. Diad simplin panangibaga, sikara so magmaliw a nasyon na saray tasi nen Jehova.

5. Diad anton paraan a say Israel et dedikadon nasyon?

⁵ Nen koma-11 a siglo B.C.E., impabitar nen Arin Solomon a say Israel so ginawa nen Jehova bilang nikabiig a bansa. Oniay impikasi to ed si Jehova: “Insian mo ra ed nanleleetan na saray amin a baley ed dalin, pian sikara so tawir mo.” (1 Arari 8:53) Saray sinansakey ya Israelita so awalaan met na nikabiig a pisisiglaotan ed si Jehova. Diad akadkauna et oniay imbaga la nen Moises ed sikara: “Sikayo so saray anak nen Jehova a Dios yo. . . . Ta sakey ka a katooan a masantos a totoo nen Jehova a Dios mo.” (Deuteronomio 14:1, 2) Kanian, saray kalangweran ya Israelita so agla nakaukolan a mangidedika na bilay da ed si Jehova. Sikara so nianak la bilang kabiangan na dedikadon totoo na Dios. (Salmo 79:13; 95:7) Say kada balon kailalakan so nibabangat nipaakar ed saray ganggan nen Jehova tan obligado iran manumpal ed satan lapud impisipanan na Israel ed si Jehova.—Deuteronomio 11:18, 19.

Bulos Ira a Manpili

6. Anton desisyon so kinaukolan a gawaen na saray sinansakey ya Israelita?

⁶ Anggaman nianak iray Israelita bilang kabiangan na dedikadon nasyon, say kada indibidual so nepeg a manggawa na personal a desisyon to a manlingkor ed Dios. Sakbay ira ya onloob ed Insipan a Dalin, oniay imbaga nen Moises ed sikara: “Tawagen ko so tawen tan say dalin a manasi sumpa ed sika ed saya ya agew, ya inyan ko ed arap mo so bilay tan say patey, say bendisyon tan say ayew, sikato so makasengeg a pilien mo so bilay ta pian manbilay ka, sika tan say kapolian mo. Say panangaro ed Jehova a Dios mo, say pananumpal ed boses to tan say ipepeket ed sikato; ta sikato so bilay mo tan kinarukey na saray agew mo, ta pian makapanayam ka ed dalin ya insamba nen Jehova ed saray amam, a di Abraham, Isaac, tan Jacob, ya iter ed sikara.” (Deuteronomio 30:19, 20) Sirin, saray sinansakey ya Israelita so kinaukolan a mandesidin mangaro ed si Jehova, ontalineng ed boses to, tan mansiansia ed sikato. Lapud saray Israelita so walaan na bulos a linawa, sikara so kinaukolan a mangawat ed saray pansumpalan na desisyon da.—Deuteronomio 30:16-18.

7. Anto so agawa kayari na impatey na kailalakan nen Josue?

⁷ Say panaon na Uko-ukom so malinew a mangiyiilustra ed saray nansumpalan na impanmatoor tan ag-impanmatoor. Sakbay a tuloy na satan a panaon, tinumbok na saray Israelita so maong ya alimbawa nen Josue kanian abendisyonan ira. “Say baley nanlingkor ed Jehova ed amin na saray agew nen Josue, tan ed amin na saray agew na saray mamasiken a nambilay ed kayari nen Josue, ya anengneng da so amin a baleg a gawa nen Jehova a ginawa to nipaakar ed Israel.” Balet kayari na impatey nen Josue, “inmalagey so sananey a kailalakan ed kayari ra, ya agda inamta si Jehova, ya anggan say gawa a ginawa to nipaakar ed Israel. Et saray anak na Israel ginawa ra so mauges ed pakanengneng nen Jehova.” (Uko-ukom 2:7, 10, 11) Mapatnag ya agpinabli na satan a balo tan andiay-eksperiensyan kailalakan so tawir da bilang kabiangan na dedikadon totoo, a lapud sikara et ginawa na Dios dan Jehova iray makapanyarin gawa nensaman.—Salmo 78:3-7, 10, 11.

Say Pambilay Da Unong ed Dedikasyon Da

8, 9. (a) Anton uksoyan so angiyabuloy ed saray Israelita a mangipatnag ed dedikasyon da ed si Jehova? (b) Anto so naako odino agamoran na saramay angisaklang na saray boluntaryon apay?

⁸ Inikdan nen Jehova iray totoo to na saray pankanawnawan manbilay unong ed dedikasyon da bilang nasyon. Singa bilang, nitarya ed  Ganggan to so sakey a sistema na saray bagat, odino apay, ya arum ed saratan et obligadon gawaen, bangta say arum et boluntaryo. (Hebreos 8:3) Saratan a bagat so angilaktip ed saray apay a popoolan, apay a bukebukel, tan apay a pandurungoan a boluntaryon gawaen—saray langkap ya inyapay ed si Jehova pian nagamoran so pabor to tan nibalikas so pisasalamat ed sikato.—Levitico 7:11-13.

⁹ Saratan a boluntaryon bagat so makapaliket ed si Jehova. Nibaga a say apay a popoolan tan say apay a bukebukel et ‘ambalingit ed si Jehova.’ (Levitico 1:9; 2:2) Nipaakar ed bagat a pandurungoan, say dala tan say taba na ayep so inyapay ed si Jehova, balet saray kabiangan na karne so kanen na saray saserdote tan say angiyapay. Satan sirin so simbolikon panangan a mankabaliksan na mareen a pisisiglaotan ed si Jehova. Oniay inkuan na Ganggan: “No mangiyapay kayo na bagat a yaapay ed pipupulangan ed kinen Jehova, idakmomo yo naani pian naako kayo.” (Levitico 19:5) Anggaman dedikado ed si Jehova so amin ya Israelita lapud inkianak da, saramay peteg ya anumpal ed dedikasyon da diad panamegley na boluntaryo iran apay da et ‘naako’ tan apalaboan na daakan.—Malaquias 3:10.

10. Diad panaon nen Isaias tan Malaquias, panon ya imbalikas nen Jehova so agto panliket?

¹⁰ Balet, say dedikadon nasyon na Israel et aliwan lawas matoor ed si Jehova. Diad panamegley na propeta ton si Isaias, oniay imbaga ed sikara nen Jehova: “Agka angiyakar ed siak na nanlapu ed saray karnerom a nipaakar a napoolan a bagat: Agmo ak inggalang ed saray bagat mo. Agtaka pinaawitan ed saray nibagat.” (Isaias 43:23) Niarum ni, diad imaton nen Jehova et anggapoy kakanaan na saray panangiyapay ya apilitan labat a ginawa tan aliwan unong ed aro. Singa bilang, taloran siglo kayari na impanbilay nen Isaias, diad panaon nen propeta Malaquias, saray Israelita so angiyapay na ayayep a nandepekto. Kanian oniay imbaga ed sikara nen Malaquias: “Siak andian ak na liket ed sikayo, kuan nen Jehova na saray ehersito, agko met naani awaten so sakey a bagat ed lima yo. . . . Inyakar yo so nala ed panamegley na duksa, tan say piley, tan say mabeblay; dia ed ontan yakar yo so bagat: Awaten ko ta so saya ed lima yo? kuan nen Jehova.”—Malaquias 1:10, 13; Amos 5:22.

 Nipulisay Bilang Dedikadon Nasyon

11. Anton pankanawnawa so niiter ed Israel?

¹¹ Diad samay panaon a saray Israelita so nagmaliw a nasyon a dedikado ed si Jehova, oniay insipan to ed sikara: “No tuloken yo so boses ko a tuatua, tan em-eman yo so sipanan ko, sikayo ed satan so pabpablien ko a pinagka-kayamanan ko a manuna nen saray amin a totoo: ta amin a dalin kien ko. Et sikayo naani singa sakey a panarian na saray saserdote, tan sakey a masimpit a nasyon.” (Exodo 19:5, 6) Say insipan a Mesias so ompatnag ed limog da tan sikara so unonan panginatnatan na pankanawnawan magmaliw a membro na gobierno na Panarian na Dios. (Genesis 22:17, 18; 49:10; 2 Samuel 7:12, 16; Lucas 1:31-33; Roma 9:4, 5) Balet say karaklan ed nasyon na Israel so agnambilay unong ed dedikasyon da. (Mateo 22:14) Impulisay da so Mesias tan diad saginonor et sikato so pinatey da. —Gawa 7:51-53.

12. Antoray imbalikas nen Jesus ya angipabitar a say Israel et nipulisay la bilang dedikadon nasyon nen Jehova?

¹² Pigaran agew sakbay na impatey nen Jesus, oniay imbaga to ed saray Judion relihyoson lider: “Agyo ta ni abasa ed saray sulsulat, Say bato ya imbantak na saray manangipaalagey na abung, sikato lanlamang so agawa ya ulo na suyok; Saya nanlapu ed Katawan, et sikato so makapakelaw ed saray mata tayo? Kanian kuan ko ed sikayo, Say panariay Dios naekal naani ed sikayo, tan niiter naani ed sakey a nasyon a mamapaway na saray bungabunga to.” (Mateo 21:42, 43) Pian nipabitar to a sikara so impulisay la nen Jehova bilang nasyon a dedikado ed Sikato, oniay imbaga nen Jesus: “O Jerusalem, Jerusalem, a mamatey ed saray propeta, tan tupaken to ray nibaki ed sikato! aminpigapigan nilabay ko komon a tinipon ya impandaragup iray anak mo, a singa sakey a nganak ya tiponen to ’ray siwsiw to ed silong na saray payak to, et agmo nilabay! Nia, say abung yo nataynan ed sikayo ya andi lugan.”—Mateo 23:37, 38.

Sakey a Balon Dedikadon Nasyon

13. Anto so mapropetikon imbalikas nen Jehova diad panaon nen Jeremias?

¹³ Diad panaon nen propeta Jeremias, walay balon impasakbay nen Jehova nipaakar ed totoo to. Oniay nabasa tayo: “Nia, saray agew onsabi ra, kuan nen Jehova, a siak manggawa ak naani na sakey a balo a sipan ed abung na Israel, tan ed abung na Juda. Ag-unong ed sipan a ginawak ed saray atateng da, dia ed agew ya impangitabin ko ya angipaway ed sikara ed dalin na Ehipto; saman a sipan ko dineral da, anggan sakey ak nensaman ya asawa a laki ed sikara, kuan nen Jehova. Balet saya so sipan a gawaen ko naani ed abung na Israel kayari na saraman ya agew, kuan nen Jehova: Iyan ko naani tunong ko ed saray akindalem a kabiangan da, tan dia ed puso ra sikato so isulat ko naani et siak naani Dios da, et sikara naani baley ko.”—Jeremias 31:31-33.

14. Kapigan tan anton basiyan so angiletnegan na balon dedikadon nasyon nen Jehova? Iter so pakabidbiran ed satan a balon nasyon.

¹⁴ Niletneg so basiyan na satan a balon sipanan sanen inatey si Jesus tan diad saginonor et impresenta to ed si Ama to so balor na nipaagus a dala to nen 33 C.E. (Lucas 22:20; Hebreos 9:15, 24-26) Balet, diad inkiyibung na masanton espiritu nen Pentecostes 33 C.E. tan diad inkiletneg na sakey a balon nasyon, “say Israel na Dios,” satan a balon sipanan so inmepekto la. (Galacia  6:16; Roma 2:28, 29; 9:6; 11:25, 26) Sanen sinulat to iray alanaan a Kristiano, oniay inyabawag nen apostol Pedro: “Sikayo so apili a kapolian, peteg ya inkasaserdote, masantos a nasyon, sakey a baley na Dios a dilin kayarian to, a mangibelyaw na karlangan na saman so angekal ed sikayo ed kabilungetan, ta tinawag to kayo ed makapakelaw a silew to: Sikayo a dia ed saray apalabas a panaon aliwa kayo nensaman a baley.” (1 Pedro 2:9, 10) Angangga la so nikaduman siglaotan ed baetan nen Jehova tan say nasyon na Israel. Nen 33 C.E., say panangabobon nen Jehova so inekal ed mangaraldalin ya Israel insan inyalis ed espiritual ya Israel, say Kristianon kongregasyon, say “nasyon a mamapaway na saray bungabunga” na Mesianikon Panarian.—Mateo 21:43.

Say Dedikasyon na Kada Sakey

15. Nen agew na Pentecostes 33 C.E, anton bautismo so imbaga nen Pedro a gawaen na saray onderengel ed sikato?

¹⁵ Kayari na Pentecostes 33 C.E., say kada Judio odino Gentil so kinaukolan a manggawa na personal a dedikasyon ed Dios tan manpabautismo “ed ngaray Ama, tan say Anak, tan say espiritu santo.” * (Mateo 28:19) Nen Pentecostes, oniay imbaga nen apostol Pedro ed saray maawat a Judio tan proselita: “Magbabawi kayo, tan manbinyag so sinansakey ed sikayo ed ngaran nen Jesu-Kristo, pian pakapaandian na kasalanan yo: et awaten yo naani langkap na espiritu santo.” (Gawa 2:38) Saratan a Judio tan proselita so kinaukolan a mangisimbolo ed bautismo ra, aliwa labat a lapud indedika da la so bilay da ed si Jehova, noagta lapud inawat da met si Jesus bilang say usaren nen Jehova pian naperdona iray kasalanan da. Kinaukolan dan bidbiren a sikato so tinuro nen Jehova ya Atagey a Saserdote tan Lider da, say Ulo na Kristianon kongregasyon.—Colosas 1:13, 14, 18.

16. Diad panaon nen Pablo, panon a saray nikiling ed kaptekan—saray Judio tan Gentil—so nagmaliw a kabiangan na espiritual ya Israel?

¹⁶ Kayari na pigaran taon, oniay imbaga nen apostol Pablo: “Impakabat ko ya inmuna ed saray taga-Damasco, tan ed Jerusalem, tan ed amin a dalin na Judea, tan ed saray Gentiles, a mansibkel ira, komon tan ompawil ira ed Dios, a manggawa ra na saray manepeg ed pagbabawi.” (Gawa 26:20) Kayarin akombinse nen Pablo iray totoo—saray Judio tan Gentil—a si Jesus so Kristo, say Mesias, tinulongan to ira a mangidedika tan manpabautismo. (Gawa 16:14, 15, 31-33; 17:3, 4; 18:8) Diad inyasingger da ed Dios, saratan a balon babangatan so nagmaliw a kabiangan na espiritual ya Israel.

17. Anton kimey a panagtatak so magano lan nasumpal, tan anto nin kimey so maples a nagagawa?

¹⁷ Natan, asingger lan nasumpal so unor a panagtatak ed nakekeraan ya espiritual ya Israel. Sano nasumpal itan, say ‘apatiran anghel’ a mamebemben ed saray dagem na kadederal na “baleg ya irap” so nautorisaan a mangibulos ed saratan. Kaleganan ni, say panagtipon ed “baleg ya ulop,” a maniilalon manbilay ya andi-anggaan diad dalin, so maples a nagagawa. Sarayan “arum a karnero” so mabulos a nandesidi a mangagamil na pananisia ed “dala na Kordero” tan nampabautismo ira bilang simbolo na dedikasyon da ed si Jehova. (Apocalipsis 7:1-4, 9-15; 22:17; Juan 10:16; Mateo 28:19, 20) Kaiba ed sikara so dakel a kalangweran a pinabaleg na Kristianon atateng. No sakey kan kalangweran, nainteresan kan manbansa ed ontumbok ya artikulo.

[Paimano ed leksab]

Bilang Panrepaso

• Akin a saray kalangweran ya Israelita et agla kinaukolan a manggawa na personal a dedikasyon da ed si Jehova?

• Panon a nipatnag na saray Israelita a nambilay ira unong ed dedikasyon da?

• Akin ya impulisay nen Jehova so Israel bilang dedikadon nasyon to, tan panon itan ya asalatan?

• Manlapu la’d Pentecostes 33 C.E. a manpatuloy, anto so kinaukolan a gawaen na saray Judio tan Gentil pian magmaliw iran kabiangan na espiritual ya Israel?

[Tepetepet Parad Panagaral]

[Litrato ed pahina 21]

Saray kalangweran ya Israelita so nianak bilang kabiangan na nasyon a pinili na Dios

[Litrato ed pahina 23]

Kinaukolan a personal a mandesisyon so kada sakey ya Israelita a manlingkor ed Dios

[Litrato ed pahina 23]

Saray boluntaryon apay so angiter ed saray Israelita na pankanawnawan mangipatnag na aro ra ed si Jehova

[Litrato ed pahina 25]

Kayari na Pentecostes 33 C.E., saray patumbok nen Kristo so kinaukolan a personal a mangidedika ed inkasikara diad Dios tan isimbolo ra itan diad bautismo