Panliliketan Dan Gawaen so Linawa na Dios

ANGILETNEG si Jesus na pangaligan parad amin a Kristiano sanen oniay impikasi to ed Ama to: “Aliwa a say linawak noag say linawam so nasumpal.” (Lucas 22:42) Satan a mapaabeban balikas na panagpasakop ed si Jehova so ipapatnag natan na minilyon a lingkor na Dios. Kabiangan ed sikara so 52 ya estudyante na koma-120 a klase na Watchtower Bible School of Gilead. Nen Marso 11, 2006, saray nangraduar a klase so aliketan ed pankanawnawa ran manggaway linawa na Dios diad nanduruman bansa, anggaman ed makapaangat iran sirkumstansya.

Anto so amakiwas ed saratan a nangraduar pian paiwanwan da so bilay da ed linawa nen Jehova? Oniay inkomento di Chris tan Leslie, a sanasawan nibaki ed Bolivia pian manlingkor bilang misionaryo: “Manlapu la nen intalirak mi iray dilin panlabayan mi, labay min iparaan so inkasikami a manggawa ed antokaman a misiglaotan ed organisasyon nen Jehova.” (Marcos 8:34) Oniay inkomento met di Jason tan si Chere, a nibaki ed Albania: “Amin ya asainmin a naaawat mi manlapud organisasyon nen Jehova et walaray angat. Balet, si Jehova so momoriaen min makanepegan lambengat na sigpot a panagmatalek mi.”

Panamaseseg Pian Manpasakop ed Linawa nen Jehova

Si George Smith, a membro na pamilyay Bethel a manlilingkor diad Art Department, so angilukas ed programa parad pangraduar panamegley na pikakasi. Amin ya inmatendi so inabrasa nen Stephen Lett, a membro na Mananguley ya Ulop na Saray Tasi nen Jehova tan tsirman na programa ed pangraduar. Saray bisita a nanlalapud 23 a daldalin so linma ed Watchtower Educational Center diad Patterson, New York, pian makaatendi ed sayan maliket ya okasyon. Inkuan nen Brother Lett ed saray estudyanten nangraduar a wala so “bengatlan makapanyari a tuloy” a nepeg dan sumpalen. Impaimano to so “saray malet a fortalezas”—saray palson doktrina—a sarag a bagbagen na saray balon misionaryo diad panamegley na pakayari na Kasulatan. (2 Corinto 10:4, 5) Sinampotan to itan, a kuan to: “Agaylan manliket kayo lapud sikayoy usaren nen Jehova a mamagbag ed saray malet a fortalezas a walad saray matuan-impanpuson totoo diad saray teritoryan angibakian ed sikayo!”

Si Harold Jackson, a sakey ed saray staff ed hedkuarter, so angipaliwawa ed teman “Saray Pigaran Bengatla a Nepeg a Nodnonoten.” Inkuan to a nepeg ya agbalot lilingwanan na saray balon misionaryo ya ‘anapen nin unona so panarian tan say inkatunong na Dios.’ (Mateo 6:33) Nepeg dan nodnonoten a say “panangaro so mamaabig” tan seguradon makatulong pian ontalona ira. (1 Corinto 8:1) Inkuan to: “Komon ta say aro so magmaliw a giya yo diad pidedeneng yo ed arum.”

Kayari to, si Geoffrey Jackson, a membro na Mananguley ya Ulop a nanlingkor bilang misionaryo manlapud 1979 ya anggad 2003, so nantepet ed saray nangraduar, “Kasin Responsable Kayo?” Indanet to a nakaukolan so pakawalaan na  asimbang a panmoria ed dili tan ed ministeryo. Saray Kristiano so walaay responsabilidad a mansagpot diad pantanem tan pansalog ed saray bini na katuaan. Balet, say ibubulaslas ed espiritual et responsabilidad nen Jehova, lapud “say Dios sikato so mamabaleg.” (1 Corinto 3:6-9) Oniay inkuan ni nen Brother Jackson: “Responsabilidad yo ed si Jehova so mansiansian mabiskeg ed espiritual. Balet anto so manunan responsabilidad yo? Say pangaro ed si Jehova tan ed saray totoo a tulongan yo.”

Say instruktor na Gilead a si Lawrence Bowen so angonsidera ed teman “Amtaen No Panon so Nepeg Yon Ikiwas.” Pinanonotan to iray estudyante a si Jehova so mamilagron angigiya tan analimbeng ed saray Israelita diad kalawakan. (Exodo 13:21, 22) Sikatoy mangigigiya tan manasalimbeng met ed sikatayo natan, a say sakey a paraan et diad panamegley na alanaan a Kristianon kongregasyon, say “lusek tan sakurong na katuaan.” (1 Timoteo 3:14, 15) Saray balon misionaryo so nepeg a mangitandoro  ed katuaan a mangigigiya tan manasalimbeng ed saray mapaabeba.

Si Wallace Liverance, a sakey met ya instruktor na Gilead, so amilin ed saray nangraduar ya agda lilingwanan so salita na Dios a walad ‘benegan’ da. Say salita na Dios et walad benegan tayo diad pantalos a say Biblia so akompleto diad apalabas iran siglo. Singa say managpastol ya ontatawag manlapud benegan na pulok na karnero, si Jehova so walad benegan na totoo to, a sikaray ididirehi to panamegley na “matoor tan makabat ya aripen.” (Isaias 30:21; Mateo 24:45-47) Say eskuelaan na Gilead so tinmulong ed saray nangraduar a mamaaralem ed apresasyon da ed satan ya aripen a klase. Say “aripen” so angitarya met na New World Translation of the Holy Scriptures. Oniay impaseseg na espiker ed saray nangraduar: “Awaten yo iyan nisimpen a kayamanan a napno na impormasyon, tan usar yo itan diad pambangat yo ed arum.”—Mateo 13:52.

Panggawa ed Linawa na Dios Diad Lawak na Ministeryo

Diad parte na programa a “Magunaet ya Iyabawag so Maong a Balita,” say instruktor na Gilead a si Mark Noumair so angipabitar ed pigaran eksperiensya na saray nangraduar diad lawak na ministeryo legan iran manaaral ed Gilead School. (Roma 1:15) Diad impanginterbio ed saray nangraduar, apatnagan a sikaray talagan magunaet a manpulong diad amin a pankanawnawa.

Saray nangraduar so akaawat na kaaruman a panamaseseg diad impanginterbio nen Kenneth Flodin ed taloran ombiabiahen manangasikaso a peles a manlilingkor diad Estados Unidos. Si Richard Keller tan si Alejandro Lacayo, a nanlingkor nensaman diad Abalaten tan Sentral ya Amerika, so angipaliwawa no panon iran akapansungdo ed nanduruman subok tan insalaysay da so pigaran bendisyon ya agamoran da sanen manlilingkor ni ra bilang misionaryo. Insalaysay met nen Moacir Felisbino so panangipasal a naawat to legan na maapit a pikikimey to ed saray misionaryo ed Brazil, a ditan so binalegan to.

Si David Schafer so nan-interbio met ed taloran eksperiensyadon misionaryo, a si Robert Jones, Woodworth Mills, tan si Christopher Slay. Insalaysay na sarayan taloran agagi no panon dan naaralan so onkiwas tekep na kompiyansa ed si Jehova sanen nidunget ira ed saray kairapan. Pinaseguroan da iray estudyante a say impangipasal ed sikara na organisasyon nen Jehova so angiparaan a maong ed sikara parad saray asainmin da bilang misionaryo. Oniay impanegek ed satan nen Brother Mills: “Aliwan say akademikon kabiangan na Gilead so akatulong a maong ed siak, noagta say imbangat na eskuelaan ed siak nipaakar ed kapaabebaan tan panangaro.”

Say membro na Mananguley ya Ulop a si Guy Pierce so angipresenta ed manunan paliwawa, ya apauloan na “Agbalot Onsaew si Jehova.” Si Adan et sinmaew, balet kasin mankabaliksan itan a sinmaew so Dios? Kasin sinmaew so Dios diad impamalsa to ed si Adan bilang ayadyari, unong ya ibabaga na arum a totoo? Andin balot, lapud “say [tuan] Dios ginawa to so too a maptek.” (Eclesiastes 7:29) Say matoor ya impankurang nen Jesus anggaman ed sankairapan a subok diad dalin so mamaneknek ya “anggapo so nikatunongan odino nibaraan nen Adan pian onsaew,” so inkuan na espiker. Say subok ed katutulok nen Adan diad hardin na Eden et mas mainomay no ikompara ed say subok ya atalonaan nen Jesus. Ingen, si Adan et sinmaew. Anggaman kuan, si Jehova et agbalot onsaew. Say gagala to so nasumpal. (Isaias 55:11) Oniay inkuan nen Brother Pierce ed saray balon misionaryo: “Walaan kayo na pribilehyon mangigalang ed si Jehova panamegley na say dilin-masakripisyon awawey yo. Komon ta tulongan nen Jehova so balang sakey ed sikayo inerman so panlilingkoran yo ed sikato bilang misionaryo.”

Kayarin impasabi na tsirman, a si Brother Lett, iray pabano a nanlapud nanduruman sangan opisina na saray Tasi nen Jehova, inyawat to ed saray nangraduar iray diploma tan asainmin da. Si Vernon Wisegarver, ya abaybayag lan membro na pamilyay Bethel, so angirepresenta ed saray dumerengel diad pansaran pikakasi.

Say programa ed pangraduar so lalon amaseseg ed 6,872 ya inmatendi pian gawaen so linawa na Dios. (Salmo 40:8) Oniay inkuan na saray kabiangan na nangraduar a si Andrew tan Anna: “Indedika mi so bilay mi ed si Jehova. Insipan mi ed si Jehova a gawaen mi so antokaman a pagawa to ed sikami. Tan sikami natan so ibabaki nen Jehova diad Cameroon, Aprika.” Sikara tan saray arum nin estudyante a nangraduar so magunaet a mangigapo na sakey a karera a mamenek tan mamaliket ed sikara. On, panliliketan dan gawaen so linawa na Dios.

[Kahon ed pahina 17]

SARAY ESTADISTIKA NA KLASE

Bilang na bansan inrepresenta: 6

Bilang na bansan angiyasainan: 20

Bilang na estudyante: 52

Promedyon edad: 35.7

Promedyon taon ed katuaan: 18.3

Promedyon taon ed sigpot-panaon a ministeryo: 14.5

[Litrato ed pahina 18]

Koma-120 a Klase a Nangraduar ed Watchtower Bible School of Gilead

Diad listaan ed leksab, saray dasig so anumeroan manlapud arap a pasener, tan saray ngaran so akalista manlapud kawigi a manpakawanan ed kada dasig.

(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.