Say Pakaromogan ed Tuan Pakaliwawaan

NEN Disyembre 18, 1810 et walay makatantandan agawa. Mansirunget la ed saman. Diad mabagyon kadayatan ed banda’d abalaten-bukig a baybay na Scotland, say barkon HMS Pallas na British Navy so nababalang. Lapud lalon ombibilunget tan onuuran ni na niebe, agnanengneng na saray tripulante so silew na parola a kakkaukolan da pian nimaneobra ra so bapor ed liktar a pasen. Agaylay impakainawaan da sanen akanengneng iran siansia na silesilew tan impaarap da so barko ra ed saratan! Balet, makapaermen ta aliwan saratan manaya iramay nakaukolan da a manangigiyan silesilew. Diad tua et saratan so apoy a pansisilew na saray mantratrabaho diad asingger ed baybay. Sinmadsar so Pallas ed angkakabaleg a bato kanian nakneb itan. Nalner so labinsakey a tripulante. Agaylan trahedya!

Unong ed say agawa ed Pallas, say sakey a lingo et nansumpal ed desyang. Balet ta no maminsan et nipapaarap iray marino ed mas mapeligron kipapasen—diad manamalikdo iran sigsilew. Saratan so gagagalaen a pawalaen pian naayat iray barko ya onsadsar ed mabaton pasen ta pian natakewan iratan sano nakneb, unong ed libron Wrecks, Wreckers and Rescuers.

‘Saray Masanto a Sulat a Mansumpal ed Kilalaban’

Diad panaanap mo na pakaliwawaan, sika so nipaarap met ed saray kapeligroan a mipadpara ed saray inkidungetan na saramay marino. Nayarin lingo ya impormasyon so natumbok mo, odino nayarin nabiktima ka ni ingen na ginagalan panamalikdo. Balang la’d satan a dua et mansumpal ed trahedya. Anto so nagawaan mo pian napaliisan itan? Seguroen a puro tan napanmatalkan so pananapan mo na pakaliwawaan. Diad masulok lan 125 a taon, sayan magasin so manusuporta ed impuyan a Salitay Dios, say Biblia, bilang say manunan napanmatalkan a lapuan na pakaliwawaan lapud lugan na satan so “Masanton Sulat a makaiter ed sikay kakabatan a mansumpal ed kilalaban.”—2 Timoteo 3:15-17, Maung a Balita.

Siempre, pian nawalaan ka na kompiyansa ed Biblia bilang say napanmatalkan a manangigiyan  liwawa, makatunongan labat ya usisaen mo iray pamaneknek na satan. (Salmo 119:105; Uliran 14:15) Nayarian moy mansulat ed saray manangipalapag na sayan magasin pian makaawat ka na impormasyon ya akakombinse la ed minilyon a totoo a say Biblia et talagan impuyan na Dios. Alimbawa, salim pan basaen so brosyur ya apauloan na Libron Parad Amin a Totoo. * Dakel so impormasyon a lugan na satan a mangipanengneng a say Biblia et susto, autentiko, tan impuyan.

Saray Manunan Katuaan

Anto sirin so pigaran manunan katuaan a lugan na sarayan “masanton sulat”? Imanoen iray onggendan ya alimbawa.

Wala so Makapanyarin-amin a Dios tan Manamalsa a nanggawa na amin a bengatla. (Genesis 1:1) Wadia itayo natan lapud say Dios et ‘pinalsa to so lapag a bengatla’ tan inikdan to itayo na bilay. (Apocalipsis 4:11) Kanian sikato lambengat so makanepegan na panagdayew tayo. Say Manamalsa so mogmon Lapuan na amin a pakaliwawaan. (Salmo 36:9; Isaias 30:20, 21; 48:17, 18) Wala so personal a ngaran to a labay ton usaren tayo. (Exodo 3:15) Satan a ngaran, a nisulat ed Hebreo iran letra tan nirepresenta bilang YHWH, so 7,000 a danay a pinmatnag diad Biblia. Say ngaran a “Jehova” ed salitan Pangasinan et abaybayag lan uusaren.—Salmo 83:18.

Pinalsa nen Jehova so totoo pian manbilay ya andi-anggaan ed Paraiso iran kipapasen diad mismon dalin. Pinalangkapan to so totoo na espiritual a kalidades a pakapatnagan na mismon kalidades to. Inikdan to ira na saray talento tan abilidad pian napanggayagaan da so magnayon tan makapenek a bilay diad dalin. (Genesis 1:26-28) Agton balot ginetma a say dalin et magmaliw labat a pasen a panubokan ed totoo—pian iparaan ira parad espiritun bilay ed tawen, a singano diman da labat napanggayagaan so pisisiglaotan ed Dios.

Anggapo so kaugsan ed too a pinalsa na Dios. Linmesa lambengat so kaugsan sanen walaray pinalsa na Dios—namparan too tan espiritu—a lingoy impangusar da ed kawayangan dan manpili tan nanrebelde ra ed Dios. (Deuteronomio 32:5) Inala na inmunan atateng tayo so agda kanepegan a pandesidin bukor ed no anto so maong tan mauges. (Genesis 2:17; 3:1-5) Satan so angitarok na ipapatey ed katooan. (Genesis 3:19; Roma 5:12) Pian naresolbe iray isyu a linmesa lapud impanrebelde, denesidi nen Jehova so temporaryon pangiyabuloy ed karelmengan. Balet agbalot anguman so gagala to parad dalin tan parad katooan. (Isaias 45:18) Saray totoo so manayam nin siansia ya andi-anggaan ed Paraiso iran kipapasen diad alinisan lan dalin.—Mateo 6:10; Apocalipsis 21:1-5.

Si Jesu-Kristo et aliwan Makapanyarin-amin a Dios, noagta Anak na Dios. Oniay imbangat a mismo nen Jesu-Kristo ed saray patumbok ya ipikasi ra: “Ama min wala ka ed tawen, nagalang komon so ngaran mo.” (Mateo 6:9) Agton balot imbaga a sikatoy mipara ed Dios. Imbes, oniay inkuan to: “Say Ama babaleg nen say siak.”—Juan 14:28.

Makanakana so betang nen Jesus ed pakasumpal na gagala na Dios. Sikatoy imbaki na Dios bilang “silew dia ed mundo, pian say siopaman a  manisia ed [sikato] agmansiansia ed kabilungetan.” (Juan 12:46) Inkuan nen apostol Pedro ya “anggapo so arum a kilabanan.” (Gawa 4:12) Tua itan lapud akadepende lambengat so kilalaban tayo diad mablin dala nen Kristo. (1 Pedro 1:18, 19) Imbagat nen Jesu-Kristo so bilay to pian narondon so katooan manlapud kasalanan ya impasa na inmunan atateng tayo, si Adan tan Eva, ed pamilya na too. (Mateo 20:28; 1 Timoteo 2:6) Ontan met, si Jesus so inusar na Dios a mangiparungtal ed linawa tan gagala To.—Juan 8:12, 32, 46, 47; 14:6; Gawa 26:23.

Say Dios so angiletneg na mangatatawen a Panarian, odino gobierno, a tugyopen nen Jesu-Kristo tan saramay apili ed limog na katooan. Sayan nauulit-ulit a tema so naromog ed Biblia. Inmatalek na Dios ed sayan gobierno so paneguro a nagawa so linawa to diad dalin a singa dia ed tawen. (Mateo 6:10) Agkabiangan ed orihinal a gagala na Dios a walay siopaman ed katooan ya onla ed tawen. Say panayaman da et diad dalin. Balet kayarin nankasalanan so too, wala so balon bengatla a ginagala na Dios. Inyuksoy to so pamili ed totoo “ed balang kailalakan tan salita tan baley tan nasyon . . . [pian] manari” ra a kaiba nen Kristo diad mangatatawen a gobierno. (Apocalipsis 5:9, 10) Agla manbayag et ‘buybuyaken tan upoten’ na satan a gobierno na Panarian so amin a klase na pananguley na too, a mangitatarok na pirmin kairapan tan ot-ot ed katooan.—Daniel 2:44.

Ompatey so kamarerwa. Ipapalinew a maong na sayan manunan katuaan ed Biblia so nipaakar ed too tan say magmaliw ya arapen na bilay to. Ipepetek met na satan so pikewet a pakatalos tan lingon impormasyon a manwewetwet ed totoo nipaakar ed kipapasen na inaatey.

Oniay ibabaga ed sikatayo na say unonan libro na Biblia: “Si Jehova a Dios, say sapok na dalin so ginawa to a too, tan inlinawa to ed saray sangab na eleng to so linawa na bilay; et say too nagmaliw a too a mabilay a sikakamarerwa [“kamarerwa,” NW].” (Genesis 2:7) Amtam ta so kabaliksan na satan? Say kamarerwa et aliwan singa-anino a walad loob na laman na too. Say too et andian na kamarerwa. Sikato so kamarerwa—say pinantekep iran elemento na “sapok na dalin” tan puersa na bilay a nanlapud Dios. Say kamarerwa et aliwan imortal. Sano ompatey so too, ompatey so kamarerwa.—Genesis 3:19; Eclesiastes 9:5, 10.

Saray inaatey so ombilay lamet panamegley na kioli. Sano anampot la so panaon na temporaryon impangiyabuloy na Dios ed karelmengan, “amin so saray wala ed saray [pakanodnonotan a] lubok narengel da so boses [nen Jesus] et ompaway ira, saray nanggawa na maong, nipaakar ed kioli ed bilay, bang saray nanggawa na mauges, dia met ed kioli ed bilay ed kaukom.” (Juan 5:28, 29; Gawa 24:15) Diad panamegley na  kioli, saray totoo so makapambilay lamet diad paraison dalin, say bilay ya unong ed orihinal a gagala na Dios parad totoon pamilya to.

Maalwar ya Usisaen so Kasulatan ed Inagew-agew

Amtam ta no panon kan natulongan na saratan a manunan katuaan? Diad sayan mapeligro tan magulon panaon, nasalimbengan ka na satan a pikakabat manlapud say “ningaran a kakabatan balet aliwa a tua” ya ikakayat nen Satanas a Diablo. Sikatoy mankunkunwarin “anghel na liwawa,” tan saray demonyo to so ompapatnag a “ministros na katunongan.” (1 Timoteo 6:20; 2 Corinto 11:13-15) Say suston pikakabat ed Biblia so nayarin manalimbeng ed sika manlapud say tatawagen a pakaliwawaan a nibase ed saray pilosopiya na “saray makabat tan makatalos” a totoo ed mundo, saramay ‘angiwaklit ed salita nen Jehova.’—Mateo 11:25; Jeremias 8:9.

Lapud dakdakel so makapalikdon bangabangat tan pilosopiya diad panaon nen apostol Juan, pinasakbayan to iray Kristiano nen inmunan-siglo: “Agyo ra sisiaen so amin ya espiritu [“impuyan a salita,” NW].” Tan inkuan to: “Salien yo so saray [impuyan a salita] no kien ira na Dios.” (1 Juan 4:1) Nonoten pa iyan ilustrasyon. No walay mensahe a makaapekton maong ed bilay mo, kasin awaten mo itan ya agmo la pannonotan lapud ompatnag a maabig so nanlapuan na satan? Siempre andi. Amtaen mo ni no iner so nanlapuan na satan tan usisaen mon maong so mensahe sakbay kan onkiwas unong ed satan.

Diad impangitarya na Dios ed pinuyanan a kasulatan a pakaromogan na manuna iran katuaan, ginawa ton posible a sikan mismo so ‘manali’ odino maneguro no kasin susto iray tutumboken mo a manangigiyan liwawa, odino silesilew a panandaan. (1 Tesalonica 5:21) Nakomendaan iray mapagalang a totoo nen inmunan-siglo lapud “inagew-agew ya inusisa ra so sulat, no [kasin] peteg irayan bengatla.” (Gawa 17:11) Nagawaan mo met itan. Paigiya ka ed Biblia, a singa “sakey a silewan ya onsisinag ed pasen ya ambilunget,” a mamaarap ed liktar a pasen. (2 Pedro 1:19-21) No ontan so gawaen mo, “naromog mo so pikakabat ed Dios,” a mangitarok na tuan pakaliwawaan.—Uliran 2:5.

[Paimano ed leksab]

[Litrato ed pahina 4]

Say Salita na Dios et singa sakey a silewan

[Litrato ed pahina 5]

Anto so ngaran na Dios?

[Litrato ed pahina 5]

Anto so arapen na katooan?

[Litrato ed pahina 6]

Kasin si Jesus et Makapanyarin-amin a Dios?

[Litrato ed pahina 6]

Iner so kawalaan na saray inaatey?

[Litrato ed pahina 7]

Say kioli na inaatey et sakey ed saray manunan katuaan ya ibabangat na Biblia