Sikayoran Tobonbalo, Pilien Yo so Manlingkor ed si Jehova

“Manpili kayo ed sayan agew no siopa so panlingkoran yo.”—JOSUE 24:15.

1, 2. Antoran lingon nengneng na panagbautismo so inagamil na Kakristianoan?

 “PANKRISTIANOEN [so ananak] sano sarag da lan kabaten so nipaakar ed si Kristo.” Sarayan salita so insulat nen Tertullian sanen mansampot lay komaduan siglo C.E. Kinontra to so panagbinyag ed saray kapangiyanak, sakey ya agamil a nanlapu ed apostatan Inkakristiano ed panaon to. Balet si Augustine, ya Ama na Simbaan, so anuppiat ed si Tertullian tan say Biblia lapud inkuanto a diad bautismo et naekal so matik na orihinal a kasalanan tan saray kapangiyanak ya ompatey ya agni abinyagan so nakondena ed impiernon-apoy. Inyalibansa na satan a sisiaen so panagbinyag ed saray kapangiyanak a no posible et kayari a tampol na kiyanak da.

² Dakel ed saray manunan relihyon na Kakristianoan so siansia nin manbibinyag ed saray kapangiyanak. Niarum ni, diad interon awaran et inagamil na saray manuley tan relihyoson lider na saray tatawagen a Kristianon nasyon so paskaran a panagbinyag ed saray adakep a “pagano.” Balet ta agnibase ed Biblia so panagbinyag ed kapangiyanak tan say paskaran a panagbinyag ed saray wala la’d edad.

Anggapo so Nisipor a Dedikasyon Natan

3, 4. Anto so makatulong ed ananak na dedikadon atateng pian makapanggawa ira na boluntaryon dedikasyon?

³ Ipaparungtal na Biblia ya ipapasen na Dios iray malangwer nin ugugaw bilang masanto anggano sakey labat ed saray ateng da so matoor a Kristiano. (1 Corinto 7:14) Kabaliksan kasi na satan a saray ananak et dedikado lan lingkor nen Jehova? Andi. Balet, saray ananak a pinabaleg na atateng a dedikado ed si Jehova so makakaawat na panangipasal a mangigiya ed sikara pian makapanggawa ira na boluntaryon  dedikasyon ed si Jehova. Oniay insulat nen makabat ya Arin Solomon: “Ana’ko, unoren mo so ganggan na amam, tan agmo ikaindan so tunong nen inam. . . . Sano manakar ka, sikato so mangitonton ed sika; sano naugip ka, sikato so manbantay ed sika; tan sano nabangon ka, sikato so misalita ed sika. Ta say ganggan sikato so sakey a tingkaw; et say tunong sikato so liwawa; tan saray panamaat na pangibangat sikara so dalan na bilay.”—Uliran 6:20-23.

⁴ Say panangigiya na Kristianon atateng so makasalimbeng ed saray kalangweran, no mabulos dan unoren itan. Oniay imbaga nen Solomon: “Say makabat ya anak panliketen to so ama; balet say maatiw ya anak sikato so makapabelat ed ina to.” “Ondengel ka, ana’ko, tan onkabat ka, tan itonton mo so pusom ed dalan.” (Uliran 10:1; 23:19) On, pian nagunggonaan ed panangipasal na atateng, sikayoran kalangweran so nepeg a mabulos a mangawat ed bilin, simbawa, tan disiplina. Sikayo so agnianak a makabat, balet nayarian yoy magmaliw a ‘makabat’ tan boluntaryon ontumbok ed “dalan na bilay.”

Anto so Labay ya Ibaga na Manametek-Kanonotan?

5. Anto so insimbawa nen Pablo ed saray ananak tan kaamaan?

⁵ Oniay insulat nen apostol Pablo: “Sikayon anak, ontulo’kayo ed saray kaatatengan yo dia ed Katawan; ta saya sikato so matunong. Igalang mo so amam tan inam (a sikato so manunan ganggan a wala so sipan to), ta makapaabig ed sika tan makapambilay ka na andukey dia ed tapew na dalin. Tan, sikayo ya atateng [“kaamaan,” NW], agyo ilagyat a pasanoken so saray anak yo: noag ingen bangatan yo’ra ed kadudusa tan panamilin na Katawan.”—Efeso 6:1-4.

6, 7. Anto so nalalanor ed panamabaleg ed ananak unong ed ‘panametek-kanonotan nen Jehova,’ tan akin ya ag-itan mankabaliksan a saray atateng et agmakatunongan a mangiimpluensya ed ananak da?

⁶ Kasin saray Kristianon atateng et agmakatunongan a mangiimpluensya ed ananak da sano papabalegen da ira ed “kadudusa tan panamilin [“panametek-kanonotan,” NW] na Katawan”? Andi. Siopa so makapanhusga ed atateng a mangibabangat ed ananak da nipaakar ed ipapasen dan susto tan makagunggona ed moral? Saray ateista so agnababalaw ed pangibabangat da ed ananak da ya anggapo so Dios. Isipen na saray Romanon Katoliko ya obligado iran mamabaleg ed ananak da diad Katolikon pananisia, tan sikara so mataltalag a nabalaw ed panggagawa ra ed satan. Mipadpara, agnepeg ya akusaen iray Tasi nen Jehova a kokontrolen da so isip na ananak da sano papabalegen da iran mangawat ed panag-isip nen Jehova nipaakar ed manuna iran katuaan tan prinsipyo ed moral.

⁷ Unong ed Theological Dictionary of the New Testament, say orihinal a Griegon salita a nipatalos a “panamilin” odino panametek-kanonotan diad Efeso 6:4 so manutukoy ed sakey a proseso a “mangipepetek ed panag-isip, mangokorehi ed aliwa, tan mamapaaligwas ed awawey ed espiritual.” Panon to no aglabay na sakey a kalangweran so panangipasal na atateng to lapud desdes na saray kalimog to, say pilalek a makapibarkada ed saray kaedaran to? Siopa so nibaga a mangidedesdes na makapuy—saray atateng odino saray kalimog na kalangweran? No dedesdesen na saray kalimog so sakey a kalangweran pian mandruga, oninum na dakel ya alak, odino manggawa na imoral, nepeg kasin tetelen so atateng ed panggugunaet dan mangipetek ed panag-isip na anak da tan ed itutulong da ed sikato a makamoria ed saray pansumpalan na ontan a mapeligron kondukta?

8. Anto so nalalanor ed ‘impanisia’ odino inkakombinse nen Timoteo a manisia?

⁸ Oniay insulat nen apostol Pablo ed malangwer nin Timoteo: “Mansiansia ka ed saray bengatla ya inaral mo tan sinisiam, ya amtam no siopa so nanaralan mo ed sikara. Tan nanlapu ed inkaugaw mo akabatan mo so saray masanto a Sulsulat, a makayari a manggawa ed sika a makabat ed kilalaban lapu ed panamegley na pananisia a wala ed Kristo Jesus.” (2 Timoteo 3:14, 15) Manlapu la’d impanugaw nen Timoteo, say ina tan bai to so malet ya angiletneg na  pananisia to ed Dios diad pikakabat ed Masanton Kasulatan. (Gawa 16:1; 2 Timoteo 1:5) Diad saginonor, sanen nagmaliw iran Kristiano, agda pinilit si Timoteo a manisia noagta sikato so ‘anisia’ odino akombinsin manisia diad panamegley na maabig a panagkatunongan a nibase ed pikakabat ed Kasulatan.

Papasesegen Ka nen Jehova a Manpili

9. (a) Panon a pinagalangan nen Jehova iray pinalsa to, tan lapud anton rason? (b) Panon ya inusar na bogbogtong ya Anak na Dios so kawayangan ton manpili?

⁹ Nayarian nen Jehova a gawaen a singa-robot iray pinalsa to, a niprograma lan mangunor ed linawa to ya anggapoy nagawaan da. Balet, pinagalangan to ira diad impangipagamor to ed sikara na kawayangan a manpili. Say labay na Dios et saramay mabulos a manpasakop. Panliketan ton nanengneng iray pinalsa to, maedad la tan malangwer, a manlingkor ed sikato lapud aro. Say sankaabigan ya ehemplo na maaron impanpasakop ed linawa na Dios et say bogbogtong ya Anak to, ya oniay imbaga nen Jehova nipaakar ed sikato: “Saya so Ana’ko ya inararok; napaliket ak a maong ed sikato.” (Mateo 3:17) Onia met so imbaga na sayan panguloan ya Anak ed si Ama to: “Makaliket ak a mangunor na linawam, O Dios ko; on, say ganggan mo wala ed dalem na pusok.”—Salmo 40:8; Hebreos 10:9, 10.

10. Anto so basiyan na naabobonan a panaglingkor ed si Jehova?

¹⁰ Iilaloan nen Jehova ed saramay manlingkor ed sikato diad panangidirehi na Anak to ya ipatnag da so ontan met a mabulos a panagpasakop ed linawa To. Oniay mapropetikon inkanta na salmista: “Say katooan mo ‘yapay da so inkasikara a mabulbulos dia ed agew na pakayarim, dia ed masanton ulop: ya ompaway ed panag-anakay kabuasan wala ed sika so linaew na kaugawan mo.” (Salmo 110:3) Say interon organisasyon nen Jehova, diad tawen tan diad dalin, so onkukurang lapud maaron panagpasakop da ed linawa na Dios.

11. Anton pampilian so niparungtal ed saray kalangweran a pinabaleg na dedikadon atateng?

¹¹ Kanian sikayoran kalangweran, nepeg yon amtaen ya agkayo papaskaren na atateng yo odino saray Kristianon mamatatken ed kongregasyon pian manpabautismo. Say pilalek a manlingkor ed si Jehova so nepeg a manlapu ed sikayo. Oniay imbaga nen Josue nensaman ed saray Israelita: “Manlingkor kayo ed [si Jehova] ed maralus tan dia ed katuaan. . . . Manpili kayo ed sayan agew no siopa so panlingkoran yo.” (Josue 24:14-22) Mipadpara, nepeg a sikayon mismo so mandesidin mangidedika ed inkasikayo ed si Jehova tan italaga yo so bilay yo ed panggawa na linawa to.

Awaten Yo so Responsabilidad

12. (a) Anggaman nayarian na atateng ya ipasal so ananak da, anto so agda nagawaan parad saray ananak da? (b) Kapigan a magmaliw a responsable so sakey a kalangweran ed imaton nen Jehova parad saray desisyon a gawaen to?

¹² Onsabi so panaon sano sikayoran kalangweran et agla nasalimbengan na katooran na atateng yo. (1 Corinto 7:14) Oniay insulat nen babangatan a Santiago: “Dia ed satan a too ya amta ton gawaen so maong, et agto gawaen dia ed sikato so kawalaan na kasalanan.” (Santiago 4:17) Saray atateng so agnayarin makapanlingkor ed Dios parad ananak da a singa met say ananak et agmakapanlingkor ed Dios parad atateng da. (Ezequiel 18:20) Naaralan yo la kasi so nipaakar ed si Jehova tan ed saray gagala to? Kasin wala kayo la’d suston edad pian natalosan yoy naaralan yo tan nawalaan na personal a relasyon ed sikato? Agta makatunongan sirin ya isipen a sikayo so ipapasen la na Dios a makapandesidin manlingkor ed sikato?

13. Antoray nepeg ya itepet na saray agni abautismoan a katayatdang?

 ¹³ Kasin sakey kan agni abautismoan a kalangweran a pinabaleg na maridios ya atateng, onaatendi la ed saray Makristianon pantitipon tan mibibiang ni ingen ed panangipulong ed maong a balita na Panarian? No ontan, onia so matuan itepet mo ed inkasika: ‘Akin a gagawaen ko iya? Kasin onaatendi ak ed saray pantitipon tan mibibiang ak ed panagpulong lapud iilaloan iratan ed siak na atateng ko odino lapud labay kon paliketen si Jehova?’ Kasin pinaneknekan mo la ed inkasika so “maong, tan makapaliket, tan nasnaspot a linawa na Dios”?—Roma 12:2.

Akin ya Ipaleen so Pampabautismo?

14. Antoran alimbawa ed Biblia so mangipabitar a say bautismo et agmakatunongan ya ipaleen?

¹⁴ “Anto so makasbel a nabinyagan ak?” Diad saman labat naamtaan na lakin Etiope ya angitepet ed satan ed ebanghelisador a Felipe a si Jesus so Mesias. Balet sikato so walaan lay magenap a pikakabat ed Kasulatan pian namoria to ya agto la nepeg ya ipaleen so maparungtal a pamaneknek to a panlingkoran to la si Jehova bilang kabiangan na Kristianon kongregasyon, tan nanliketan ton maong itan. (Gawa 8:26-39) Ontan met, sakey a biin manngaran na Lidia, a say puso to et “nilukasan . . . pian imatonan to so saray sasalitaen nen Pablo,” so tampol ya “abinyagan,” pati say sankaabungan to. (Gawa 16:14, 15) Mipadpara, say managpangaw ed Filipos so dinmengel ed si Pablo tan Silas sanen “impaliwawa ra ed sikato so Salita na Katawan,” tan “tampol ya impabinyagan, sikato tan amin a [sankaabungan] to.” (Gawa 16:25-34) Sirin, no wala lay manunan pikakabat yo nipaakar ed si Jehova tan ed saray gagala to, masimoon a pilalek a gawaen so linawa to, maong a reputasyon ed kongregasyon, a naynay kayo lan onaatendi ed saray pantitipon tan mibibiang ed panangipulong ed maong a balita na Panarian, akin ya ipaleen yo ni so pampabautismo?—Mateo 28:19, 20.

15, 16. (a) Anton lingon panagkatunongan so nayarin mangaamper ed arum a kalangweran a manpabautismo? (b) Panon ya onkanan salimbeng ed saray kalangweran so dedikasyon tan bautismo?

¹⁵ Agyo ni labay kasin gawaen itan ya importantin kundang lapud natatakot kayo ompano mikuentaan kayo no makapankasalanan kayo? No ontan, isipen pa iya: Agmo labay kasi so mangalay lisensia ed panmaneho lapud antakot ka ya onsabi so agew et nayarin naaksidente ka? Siempre andi! Ontan met, agkayo nepeg a masuyat a manpabautismo no kualipikado kayo la. On, sikayo so napakiwas a maong a manggawa na anggaay nayarian yo ya ompaliis ed panggaway kasalanan no indedika yo la so bilay yo ed si Jehova tan akipakna kayon gawaen so linawa to. (Filipos 4:13) Sikayoran kalangweran, agyo la komon ipapaleen so pampabautismo lapud labay yo labat a napaliisan so pikuentaan yo. Sano nasabi yo la so edad a responsable kayo la ed gawaen yo, walan walay ebatan yo ed si Jehova ed paraan na ikiwas yo balanglan abautismoan kayo odino andi.—Roma 14:11, 12.

¹⁶ Inisip na dakel a Tasi diad interon mundo  ya atulongan iran maong lapud desisyon dan manpabautismo sanen malangwer ni ra. Bilang alimbawa, ikonsidera pa so 23 años a Tasi ed Sagur ya Europa. Nanonotan to a say impanpabautismo to ed edad a 13 so amakiwas ed sikaton manalwar pian agnatalonaan na “saray ib-ibeg ya inuugaw.” (2 Timoteo 2:22) Sanen sikato so malangwer ni, ginawa ton kalat so panserbi bilang sigpot-panaon a ministro. Natan, sikato so maliket a manlilingkor diad sangan opisina na saray Tasi nen Jehova. Daakan a bendisyon so manaalagar ed amin a tobonbalo, pati ed sika, a mandesiden manlingkor ed si Jehova.

17. Diad antoran aspekto a nakaukolan a tebeken no anto so ‘linawa na Katawan’?

¹⁷ Say dedikasyon tan bautismo so gapoan na sakey a bilay ya ikokonsidera tayo so linawa nen Jehova ed amin ya aspekto na saray kimey tayo. Say panumpal tayo ed dedikasyon tayo so mangilalanor ed ‘panganamot ed panaon.’ Panon tayon nagawaan itan? Diad pangusar ed panaon a nayarin usaren tayo ed anggapoy kakanaan iran gegemtan, ya ikana tayo la itan diad seryoson panagaral na Biblia, regular a pipiaral, tan diad sigpot a pibibiang ed panangipulong ed “ebanghelyo na panarian.” (Efeso 5:15, 16; Mateo 24:14) Say dedikasyon tayo ed si Jehova tan say pilalek tayon manggawa na linawa to so makagunggona ed amin ya aspekto na bilay tayo, pati ed panaon a panagrelaks tayo, panangan tan kakainum tayo, tan say klase na musika a dedengelen tayo. Akin ta no pilien so sakey a klase na panagligliwaan a napanggayagaan yo ed andi-anggaan? Nilibon kalangweran a Tasi so makapangibaga ed sikayo a dakel so makagunggonan paraan na panliket ya agnibabaliwala so ‘linawa nen Jehova.’—Efeso 5:17-19.

‘Mila Kami ed Sikayo’

18. Anto so nepeg ya itepet na saray kalangweran ed inkasikara?

¹⁸ Manlapu la’d 1513 B.C.E. anggad Pentecostes 33 C.E., walay inorganisa nen Jehova a totoo to diad dalin a pinili ton mandayew ed sikato tan magmaliw a tasi to. (Isaias 43:12) Saray kalangweran ya Israelita so nianak ed satan a nasyon. Manlapu nen Pentecostes, si Jehova so angiletneg na balon “nasyon” ed dalin, say espiritual ya Israel, saray “totoo a nipaakar ed ngaran to.” (1 Pedro 2:9, 10; Gawa 15:14; Galacia 6:16) Imbaga nen apostol Pablo a nilinisan la nen Kristo parad inkasikato so “sakey a baley a nipaakar a kien ton dili, mapaga ed saray maabig a gawa.” (Tito 2:14) Sikayoran kalangweran so bulos a mananap no iner so pakaromogan ed saratan a totoo. Siopa natan so manugyop ed “matunong a nasyon” a walaan na matoor a kondukta, a manbibilay unong ed saray prinsipyo na Biblia, onkikiwas bilang matoor a Tasi nen Jehova, tan mangiyaabawag ed Panarian to bilang say alenleneg ya ilalo na katooan? (Isaias 26:2-4) Imanoen pa iray simbaan na Kakristianoan tan arum niran relihyon, tan ikompara yo so kondukta ra ed no anto so kakaukolanen na Biblia ed saray tuan lingkor na Dios.

19. Anto so akakombinsian na minilyon a totoo diad interon mundo?

¹⁹ Minilyon a totoo ed interon mundo, pati ed dakel a kalangweran, so kombinsido a saray alanaan a nakdaan na saray Tasi nen Jehova so manibukel ed satan a “matunong a nasyon.” Oniay ibabaga ra ed saratan ya espiritual ya Israelita: “Mila kami naani ed sikayo, ta sikami nadngelan mi a say Dios wala ed sikayo.” (Zacarias 8:23) Iilaloan mi tan ipipikasi mi a sikayoran kalangweran et mandesidi lan magmaliw a kabiangan na totoo na Dios ta pian ‘napili yo so bilay’—say bilay ya andi-anggaan diad balon mundo nen Jehova.—Deuteronomio 30:15-20; 2 Pedro 3:11-13.

Bilang Repaso

• Anto so nalalanor ed panametek-kanonotan?

• Anton klase na panaglingkor so aabobonan nen Jehova?

• Anton napampilian so nipaarap ed amin a kalangweran a pinabaleg na saray dedikadon atateng?

• Akin a nepeg ya agmakatunongan ya ipaleen so pampabautismo?

[Tepetepet Parad Panagaral]

[Saray litrato ed pahina 26]

Siopa so dengelen yo?

[Litrato ed pahina 28]

Panon kan nasalimbengan na dedikasyon tan bautismo?

[Litrato ed pahina 29]

Anto so mangaamper ed sikayon manpabautismo?