Anto so Panarian na Dios?

AGAYLAN teribli a trahedya so asagmak na katooan sanen kagapogapo ni labat na awaran na too! Sakey ya anghel so nanrebelde ed autoridad na samay mismon amalsa ed sikato. Sayan rebelde so anukso ed sankaunaan a bii, si Eva, a mangan ed isesebel a prutas. Onia so inkuan na sayan anghel, a tutukoyen to si Eva tan say asawa ton si Adan: “Agkayo ompatey: Noag say amta na Dios a dia ed agew na pangan yo ed saman, nalukasan so saray mata yo ed satan, et singa kayo Dios, ya amta yo so maong tan mauges.” (Genesis 2:16, 17; 3:1-5) Sayan rebelden anghel so tinawag a Diablo tan Satanas.—Apocalipsis 12:9.

Kasin dinengel nen Eva so imbaga nen Satanas? Oniay ibabaga na Biblia ed sikatayo: “Anengneng na bii so kiew et maong a pantagano, tan makapaliket ed saray mata, tan anengneng to so sakey a kiew a pampirawatan a makapangiter na karunongan, amodbor na bunga, tan angan, et angiter met ed asawa to a laki ya ibiba to, et si asawa to angan.” (Genesis 3:6) On, akinonong so sankaunaan a sanasawa, si Adan tan Eva, ed impanrebelde nen Satanas. Say resulta et abalang da so Paraison parad sikara tan saray ilalak da. Saray anak a nepeg komon a nianak a perpekto tan walaan na ilalon andi-anggaan a bilay, so akatawir laingen na kasalanan tan ipapatey.—Roma 5:12.

Antoy ginawa nen Jehova a Dios, say Soberanon Manuley na uniberso? Inyuksoy toy probisyon parad kaperdona na saray kasalanan. (Roma 5:8) Si Jehova a Dios so angiletneg met na sakey ya uksoyan na pananguley a mangasikaso ed sayan problema. Sayan uksoyan et tinawag a ‘say panarian na Dios.’ (Lucas 21:31) Lapud inletneg iyan Panarian pian manuporta ed uley na Dios ed uniberso, saya so walaan na espisipikon gagala.

Anto so gagala na Panarian na Dios? Antoray pigaran aspekto na satan, tan panon iratan a nikompara ed pananguley na too? Kapigan ginmapon nanuley so Panarian? Sarayan tepet so singbaten ed onsublay ya artikulo.