Iliktar nen Jehova so Maniirap

“Amayamay so pakapaermenan na matunong: balet si Jehova iliktar to ya ipaway ed saraya ya amin.”—SALMO 34:19.

1, 2. Anton problema so inkidungetan na sakey a matoor a Kristiano, tan akin a nayarin ontan met so nalikna tayo?

 SAKEY a malangwer a biin manngaran na Keiko * so sakey ed saray Tasi nen Jehova ed loob la na masulok a 20 taon. Sikato so nanlingkor bilang regular payunir, odino sigpot-panaon a manangiyabawag na Panarian. Papablien ton maong itan a pribilehyo. Balet diad agano ni et si Keiko so atalonaan na saray liknaan ya inkaandiay-ilalo tan pambukbukor. “Say nagawaan ko labat et onakis,” so inkuan to. Pian agmakapan-isip na negatibo, mas malaem a panaon so inusar nen Keiko ed personal a panagaral. “Balet, agko ni siansian nauman so panag-isip ko,” so inkuan to. “Sinmabi ed punton labay ko lay ompatey.”

² Kasin mipupuligesgesan ka met ed ontan a maermen a liknaan? Bilang sakey ed saray Tasi nen Jehova, sika so walaan na baleg a rason pian manliket lapud say maridios a debosyon so ‘walaan na sipan ed sayan bilay a peles, tan ed onsabi.’ (1 Timoteo 4:8) Natan et manaayam ka la ed espiritual a paraiso! Balet, kabaliksan kasi na satan ya asalimbengan ka la manlapud amin a kairapan? Andi! Ibabaga na Biblia ya: “Amayamay so pakapaermenan na matunong.” (Salmo 34:19) Aliwan makapasurprisa itan, lapud ‘say sankamundoan et mandukdukol ed [pakayari na] mauges a sakey,’ si Satanas a Diablo. (1 Juan 5:19) Diad arum a paraan, amin tayo so makakaeksperiensya na saray epekto na satan.—Efeso 6:12.

Saray Epekto na Paniirap

3. Mangiter na saray alimbawa na saray lingkor na Dios ya akaeksperiensya na aralem a gonigon.

³ Say mabayag a kagogonigon so mangapektan maong ed interon panmoria tayo. (Uliran 15:15) Nodnonoten pa so maptek a toon si Job. Sanen sikatoy nidunget ed graben subok, oniay imbaga nen Job: “Say too a nianak ed bii, daiset so saray agew to, tan napno ed gonigon.” (Job 14:1) Naandi so gayaga nen Job. Walay panaon ya inisip to ni ingen a sikato so inkaindan la nen Jehova. (Job 29:1-5) Aliwa labat a si Job, a lingkor na Dios, so akaeksperiensya na pirmin kaermenan. Ibabaga ed sikatayo na Biblia a si Ana so ‘walaan na kapaitan na kamarerwa’ lapud agto pakaanak. (1 Samuel 1:9-11) Lapud nagogonigon ed situasyon na pamilya to, oniay imbaga nen Rebeca: “Maalipanes ak ed bilay ko.” (Genesis 27:46) Sanen anonotan nen David iray impakalingoan to, oniay imbaga to: “Agonigon ak tan apabikotkot ak a tuloy.” (Salmo 38:6) Sarayan pigaran  alimbawa so malinew a mangipapabitar a saray matakot ed Dios a lalaki tan bibii nen sakbay-Kristianon panaon so nansungdo ed saray panaon na pirmin gonigon.

4. Akin ya agmakapasurprisa a walaray “nagogonigon a kamarerwa” diad limog na saray Kristiano natan?

⁴ Komusta met iray Kristiano? Amoria nen apostol Pablo a nakaukolan ton bilinen iray taga-Tesalonica a ‘mansalita ra na makaligliwa ed saray nagogonigon a kamarerwa.’ (1 Tesalonica 5:14, NW) Idadalatdat na sakey a reperensya a say Griegon salita a nipatalos a “nagogonigon a kamarerwa” so nayarin ontukoy ed saramay “temporaryon atalonaan na pakadesdesan ed bilay.” Ipapabitar na saray salita nen Pablo a walaray alanaan na espiritu diad kongregasyon na Tesalonica a nabebelatan ed puso. Wala met iray nagogonigon ya indibidual ed limog na saray Kristiano natan. Balet akin a naeermenan ira? Konsideraen tayo so taloran kaslakan a sengegan.

Makagonigon ed Sikatayo so Makasalanan a Kipapasen Tayo

5, 6. Anton ligliwa so nagamoran ed Roma 7:22-25?

⁵ Aliwan singa saray mauuges ya indibidual ya ‘uunoren da so liknaan da,’ saray tuan Kristiano so naiirapan ed makasalanan a kipapasen da. (Efeso 4:19) Nalilikna ra so alikna nen Pablo, a nansulat: “Manliket ak ed ganggan na Dios: Bangbalet wala so nanengneng ko a sananey a ganggan ed saray kabiangan ko, a mibakal ya onsumpa ed ganggan na isip ko, tan arakep to ak ed ganggan na kasalanan a wala ed saray kabiangan ko.” Insan oniay inkuan nen Pablo: “Alay kasegsegangan ko a too!”—Roma 7:22-24.

⁶ Aliknam met la kasi so alikna nen Pablo? Aliwa met a makapuy no sankanonot mo so agmo inkayadyari, lapud nipupurek na satan ed sika so belat na kasalanan tan napapabiskeg so determinasyon mon paliisan so mauges. Balet agnakaukolan a naynay ka lan nagonigon ed saray kakulangan mo. Diad saray inaon labat a salita nen Pablo a pakapatnagan na gonigon to, oniay inyarum to: “Misalamat ak ed Dios lapud Jesu-Kristo a Katawan tayo.” (Roma 7:25) On, si Pablo so walaan na kompiyansa a say niyibung a dala nen Jesus so makarondon ed sikato manlapud atawir a kasalanan.—Roma 5:18.

7. Anto so makatulong ed sakey a too pian agnagonigon lapud makasalanan iran tendensia to?

⁷ No natatalonaan ka na makasalanan a kipapasen mo, naligliwa ka ed saray salita nen apostol Juan, ya oniay insulat to: “Ana’ko ra ya ankekelag, sarayan bengatla isulat ko ed sikayo pian agkayo mankasalanan. Tan no wala so toon mankasalanan, wala so apireng tayo ya onarap ed Ama, si Jesu-Kristo a matunong; tan sikato so manamaandi kasalanan tayo, tan aliwa lambengat ed saray kasalanan tayo, noag met kasalanan na lapag a mundo.” (1 Juan 2:1, 2) No nagogonigon ka lapud saray makasalanan a tendensiam, lawas nodnonoten a si Jesus so inatey parad saray managkasalanan, aliwan parad ayadyarin totoo. Diad tua, “amin nankasalanan, tan makulang ira ed gloria na Dios.”—Roma 3:23.

8, 9. Akin a nepeg tayon ipulisay iray kanonotan a mangokondena ed dili?

⁸ Balet, ipasen pa ya akapankasalanan ka na ambelat nensaman. Andi-duaruwan sinalambit mo la itan ed si Jehova diad pikakasi, a nayarin mabetbet ni ingen. Akaawat ka la na espiritual a tulong manlapud saray Kristianon mamatatken. (Santiago 5:14, 15) Peteg a nagbabawian mo la itan kanian akapansiansia kan kabiangan na kongregasyon. Odino nayarin walay panaon a tinaynan mo so organisasyon na Dios, balet diad saginonor et nagbabawi ka tan awalaan ka lamet na malinis a talindeg. Antokaman so kipapasen, nayarin onsebang-sebang ed kanonotan mo so impankasalanan mo nensaman tan nagogonigon ka. No ontan so nagagawa, tandaan a si Jehova so talagan mameperdona ed saray tuan magbabawi diad “daakan” a paraan. (Isaias 55:7) Niarum ni, agto labay a liknaen mo ya akondena ka tan andian lay ilalo. Ontan so labay nen Satanas a naliknam. (2 Corinto 2:7, 10, 11) Say Diablo so naderal lapud manepeg itan ed sikato, balet labay ton liknaen mo ya ontan met a kaderal so makanepegan ed sika. (Apocalipsis 20:10) Agmo aabuloyan si Satanas ya ontalona ed satan a pakana ton deralen so pananisiam. (Efeso 6:11) Imbes, sikato so ‘sumpaen  mo’ nipaakar ed satan, a singa met ed arum niran paraan.—1 Pedro 5:9.

⁹ Diad Apocalipsis 12:10, si Satanas so tinawag a manag-akusa odino “manangidalem ed saray agagi tayo”—saray alanaan a Kristiano. Sikato so “manangidalem ed sikara ed arap na Dios tayo ed agew tan labi.” No dalepdepen mo itan a bersikulo, namoriam a si Satanas, say palson manag-akusa, so manliket no akusaen tan kondenaen mo so inkasikan dili, anggaman ag-itan gagawaen nen Jehova. (1 Juan 3:19-22) Akin a mansiansia ka nin nagogonigon ed saray kalilingoan mo anggad punton labay mo lay onsuko? Agmo aabuloyan a deralen nen Satanas so relasyon mo ed Dios. Agmon balot aabuloyan a bulagen ka na Diablo ed katuaan a si Jehova so “mapangasi tan mapaaro, mapalna ya onsanok, tan daakan ed maaro ya abig na linawa.”—Exodo 34:6.

Makadismaya ed Sikatayo Iray Limitasyon Tayo

10. Diad antoran paraan a nayarin nadismaya itayo ed saray limitasyon tayo?

¹⁰ Nadidismaya so arum a Kristiano lapud naaapektoan na saray limitasyon da so serbisyo ra ed Dios. Ontan kasi so kipapasen mo? Nayarin satan et seryoson sakit, itatakken, odino arum niran sirkumstansya a mangaamper ed sikan mangusar na malaglaem nin panaon ed ministeryo a singa datin nagagawaan mo. Tua, napapaseseg iray Kristiano ya anamoten da so panaon ed serbisyo ra ed Dios. (Efeso 5:15, 16) Balet panon to no walaray limitasyon mo a talagan mangaamper ed sikan manggaway malaglaem diad ministeryo tan pakakadismayaan mo la itan?

11. Panon itayon nagunggonaan ed simbawa nen Pablo a nikurit ed Galacia 6:4?

¹¹ Papasesegen itayo na Biblia ya agmanngiras balet magmaliw ya “umaalig ed saraman so lapu ed pananisia tan anos tawiren da so saray sipasipan.” (Hebreos 6:12) Nagawaan tayo labat itan no usisaen tayo so maabig ya alimbawa ra tan aligen tayo so pananisia ra. Balet, ag-itayo nagunggonaan no agmatukoy ya ikompara tayo so inkasikatayo ed arum tan isipen tayo ya aliwan maabig so nagagawaan tayo. Nepeg tayo sirin ya iyaplika so simbawa nen Pablo: “Balang sakey patnagen to komon so gawa ton dili, et dia ed ontan wala naani sirin so like’to nipaakar ed sikato, [tan aliwan diad pangikompara ed arum a too].”—Galacia 6:4.

12. Akin a nayarian tayoy manliket ed panaglingkor tayo ed si Jehova?

¹² Saray Kristiano so walaan na maong a rason pian manliket, anggano nalilimitaan ira lapud grabe iran problema ed bunigas. Papaseguroan itayo na Biblia: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.” (Hebreos 6:10) Lapud saray kipapasen ya agmo nakontrol, nayarin naiirapan kan makapankimey na malaglaem a singa ed datin gagawaen mo nensaman. Balet, diad tulong nen Jehova, nayarin sigpot kan makapibiang ed pigaran aspekto na Makristianon ministeryo, a singa say panagpulong panamegley na telepono tan sulat. Napaseguroan ka a bendisyonan ka nen Jehova a Dios lapud interon-kamarerwan panlilingkor mo tan say aron ipapanengneng mo ed sikato tan ed kaparam a totoo.—Mateo 22:36-40.

Nayarin Nagonigon Itayo ed “Saray Panaon a Maatap”

13, 14. (a) Diad antoran paraan a nayarin pansesengegan na irap tayo so ‘maatap iran panaon’? (b) Panon a napatnagan natan so kakulangan na aro ed loob na pamilya?

¹³ Anggaman iilaloan tayo so bilay ed matunong a balon mundo na Dios, natan et manbibilay itayo ed “saray panaon a maatap.” (2 Timoteo 3:1) Naligliwa itayo ed pakaamtan saray makapagonigon a nagagawa so mangipapabitar ed asingger lan kiliktar tayo. Ingen, naaapektoan itayo ed saray kipapasen na kaliberliber tayo. Alimbawa, panon to no anggapo so trabahom? Nayarin daiset so naromog a trabaho, tan diad ilalabas na saray bulan et nayarin nononoten mo no kasin nanenengneng nen Jehova so kidudungetan mo odino narerengel to iray pikakasim. Odino nayarin abiktima ka na panangidumaduma odino arum niran nengneng na ag-inkahustisya. Anggan say pambasa lambengat ed saray paulon-balita na peryodiko so pakaliknaan mo ed alikna na matunong a toon si Lot, ya “apaermen a tuloy” lapud imoral a kondukta na saramay walad kaliberliber to.—2 Pedro 2:7.

 ¹⁴ Wala so sakey ya aspekto na kaunoran iran agew ya agtayo nibaliwala. Impasakbay na Biblia a dakel so ‘naandian na aro ed nianakan.’ (2 Timoteo 3:3) Ombebetel so aro ed pamilya diad dakel a sankaabungan. On, “ipapatnag na ebidensya a saray totoo so nayarin napatey, naduksa, odino naabuso ed emosyonal tan seksual a paraan na arum niran kapamilyaan nen say siopaman ni,” so inkuan na libron Family Violence. “Parad arum a wala la’d edad tan ananak, say pasen a nepeg a nalikna na totoo so aro tan kaligenan et sankapeligroan a pasen ed amin.” Saramay nidudunget ed aliwan maabig ya ayaman so makalikna na sebangsebang a kapagaan tan ermen. Panon to no ontan so naeeksperiensyam?

15. Panon a say panangaro nen Jehova et matalonggaring nen say panangaro na anggan siopan too?

¹⁵ Oniay inkanta nen salmistan David: “Bangno paulyan ak na amak tan inak, si Jehova ed satan ampopoen to ak.” (Salmo 27:10) Agaylan makaligliwan naamtaan a say aro nen Jehova so agnaparaan na panangaro na siopaman ya ateng a too! Anggaman nayarin ansakit no sikay ipulisay, maltratoen, odino taynanan na sakey ya ateng, ag-itan mangapekta ed pangiyaansakit a maong nen Jehova ed sika. (Roma 8:38, 39) Tandaan mo ya iyaasingger nen Jehova ed sikato iramay aaroen to. (Juan 3:16; 6:44) Anggan panon lay impantrato ed sika na totoo, sika so aaroen na mangatatawen ya Ama tayo!

Saray Praktikal a Paraan Pian Onkepa so Paneermen

16, 17. Sano nalilikna na sakey a too so pirmin ermen, anto so nagawaan to pian mansiansian mabiskeg ed espiritual?

¹⁶ Walaray praktikal a kundang pian natalonaan mo so paneermen. Singa bilang, tumboken so makapabiskeg a programa na Makristianon kimey. Dalepdepen so Salitay Dios, nagkalalo la sano ompatnag a natatalonaan itayo na pakakadismaya. Oniay inkanta na salmista: “Sanen imbagak so, Say salik so nikakarunyas; say panangasim, O Jehova, inegnaan to ak. Dia ed kinaraklan na saray [nagogonigon a] kanonotan ko ed loob ko, saray ligliwam pinaliket da so kamarerwak.” (Salmo 94:18, 19) Makatulong so regular a panagbasa ed Biblia pian napano so nonot mo na makatambayo iran salita tan makapabiskeg iran kanonotan.

¹⁷ Importante met so pikakasi. Anggano agmo sigpot a nibalikas so akindalem iran liknaan mo, amta nen Jehova no anto so labay mon ibaga. (Roma 8:26, 27) Onian panamaseguro so inter na salmista: “Paawit mo ed Jehova so awit mo, et sikato bembenan to ka: agton balot paulyan so matunong a natentenyeg.”—Salmo 55:22.

18. Antoran praktikal a kundang so nayarin gawaen na sakey a manlilikna na depresyon?

¹⁸ Arum so maneermen lapud clinical depression. * No ontan so naliliknam, panggunaetan  mon iyapasakey so kanonotan mo diad balon mundo na Dios tan ed panaon sano “say manaayam agto naani ikuan, Mabeblay ak.” (Isaias 33:24) No mabetbet lan negatibo so naliliknam, nayarin makabat no onkonsulta ka la ed doktor. (Mateo 9:12) Importante met ya asikasoen mo so laman mo. Makatulong so dugan panangan tan ehersisyo. Seguroen mo a makapampapainawa kay susto. Agka manpupuyat ed panagbantay na telebisyon, tan paliisan iray panligliwaan a makapakesaw tan makapakapuy na liknaan. Manuna ed amin, itultuloy mo so mangagamil na maridios iran bengatla! Anggaman aliwa nin panaon a “punasen [la nen Jehova] so amin a lua,” tulongan to kan makapansungdo.—Apocalipsis 21:4; 1 Corinto 10:13.

Manbilay Diad ‘Silong na Makapanyarin Lima na Dios’

19. Anto so insipan nen Jehova ed saramay maniirap?

¹⁹ Papaseguroan itayo na Biblia ya anggaman dakel so pakakagonigonan na saray matunong, “iliktar to [ira] ya ipaway ed saraya ya amin.” (Salmo 34:19) Panon itan a gawaen na Dios? Sanen aminpigan impikasi nen apostol Pablo so kiliktar to manlapud “sabit ed laman” to, oniay imbaga nen Jehova ed sikato: “Say pakayarik agawan ayadyari ed kakapuyan.” (2 Corinto 12:7-9) Anto so insipan nen Jehova ed si Pablo, tan anto so isisipan to ed sika? Aliwan say iyabig a tampol natan, noagta say pakayarin mansungdo.

20. Anggaman ed saray subok ed sikatayo, anto so ipapaseguro ed sikatayo na 1 Pedro 5:6, 7?

²⁰ Oniay insulat nen apostol Pedro: ‘Manpaabeba kayo sirin ed silong na makapanyarin limay Dios, pian itandoro to kayo ed manepeg a panaon; imatalek yo ya amin ed sikato so kapagaan yo; ta sikato asikasoen to kayo.’ (1 Pedro 5:6, 7) Lapud iyaansakit ka nen Jehova, agto ka paulyanan. Tulongan to ka anggaman ed saray subok a kidudungetan mo. Tandaan a saray matoor a Kristiano so walad “silong na makapanyarin limay Dios.” Legan itayon manlilingkor ed si Jehova, ikdan to itayo na biskeg pian makapansungdo. No matoor itayo ed sikato, anggapo so permanentin mamasakit ed sikatayo diad espiritual a paraan. Pansiansiaen tayo sirin so katooran tayo ed si Jehova ta pian napanggayagaan tayo so andi-anggaan a bilay diad insipan ton balon mundo tan nanengneng tayo so panaon sano permanente to lan iliktar so maniirap!

[Saray paimano ed leksab]

Kasin Natandaan Yo?

• Akin ya anggan saray lingkor nen Jehova et apektado na kairapan?

• Anto so pigaran sengegan na paneermen na arum a totoo na Dios?

• Panon itayon tutulongan nen Jehova pian natalonaan iray kapagaan?

• Diad anton paraan a wala itayo ed “silong na makapanyarin limay Dios”?

[Tepetepet Parad Panagaral]

[Saray litrato ed pahina 25]

Anggaman ed saray subok, walay rason pian manliket iray totoo nen Jehova

[Litrato ed pahina 28]

Say panagpulong panamegley na telepono so sakey a paraan pian niiter tayo ed si Jehova so sankaabigan tayo