Iyapasakey so Imano ed Kamaongan na Organisasyon nen Jehova
Iyapasakey so Imano ed Kamaongan na Organisasyon nen Jehova
“Sikami napesel kami na saray kaabigan a wala ed abung mo.”—SALMO 65:4.
1, 2. (a) Saray uksoyan nipaakar ed templo so walaan na anton epekto ed totoo na Dios? (b) Antoran probisyon so ginawa nen David parad kipaalagey na templo?
SI David na kadaanan ya Israel so sakey ed saray alay abig a totoo ya asingbat ed Hebreon Kasulatan. Sayan managpastol, managtogtog, propeta, tan ari so sigpot a nanmatalek ed si Jehova a Dios. Say maapit a relasyon nen David ed si Jehova so anagyat ed sikaton manpilalek a mangipaalagey na sakey ya abung parad Dios. Satan ya abung, odino templo, so magmaliw a sentro na tuan panagdayew ed Israel. Amta nen David a saray uksoyan nipaakar ed templo so mangitarok na liket tan panamendisyon ed totoo na Dios. Kanian oniay inkanta nen David: “Mapalar so too a pilien mo tan paasinggeren mo ed sika [Jehova], pian sikato et makapanayam ed arapan na abung mo. Sikami napesel kami na saray kaabigan a wala ed abung mo, salanti, kaabigan na masanto a templom.”—Salmo 65:4.
2 Agnaabuloyan si David a mangasikaso ed kipaalagey na abung nen Jehova. Imbes, satan a pribilehyo so nipabtang ed ilalak ton si Solomon. Si David so agnannguronguro lapud niiter ed arum so pribilehyon pampipilalekan ton maong. Say sankaimportantian ed sikato et say kipaalagey na templo. Sikato so sigpot-puson tinmulong ed proyekto diad impangiter to ed si Solomon na saray plano na paalagey a naawat to ed si Jehova. Niarum ni, inorganisa nen David so nilibo iran Levita diad saray grupo na serbisyo tan sikatoy angidonar na baleg a kantidad na balitok tan pilak parad kipaalagey na templo.—1 Awaran 17:1, 4, 11, 12; 23:3-6; 28:11, 12; 29:1-5.
3. Anto so awawey na saray lingkor na Dios ed saray uksoyan parad tuan panagdayew?
3 Saray matoor ya Israelita so sinmuporta ed saray uksoyan parad tuan panagdayew diad abung na Dios. Bilang saray lingkor nen Jehova natan, susuportaan tayo met iray uksoyan ed panagdayew diad loob na mangaraldalin a kabiangan na organisasyon nen Jehova. Ipapatnag tayo sirin a mipadpara so awawey tayo ed si David. Aliwa itayon mareklamo. Imbes, iyaapasakey tayo so imano tayo ed kamaongan na organisasyon na Dios. Naisip yo la kasi so dakel a maabig a bengatla a talagan pisalsalamatan tayo? Konsideraen tayo so pigara ed saratan.
Pisalamatan Iramay Mangidadaulo
4, 5. (a) Panon a susumpalen na “matoor tan makabat ya aripen” so niganggan ed sikato? (b) Anto so liknaan na arum a Tasi nipaakar ed espiritual a tagano a naaawat da?
4 Walaan itayo na makatunongan a rason pian pisalamatan so “matoor tan makabat ya aripen” ya angimatalkan nen Jesu-Kristo ed saray kayarian to diad dalin. Say aripen a klase na saray Kristianon alanaan na espiritu so mangidadaulo ed panangipulong ed maong a balita, mangiyaarunsa ed saray pantitipon parad panagdayew, tan mangipapalapag na saray literaturan nibase ed Biblia diad masulok a 400 a lenguahe. Minilyon a totoo ed sankamundoan so maliket a mangaawat ed sayan espiritual a “tagano ed panaon a kinepeg to.” (Mateo 24:45-47) Seguradon anggapo so rason pian mannguronguro nipaakar ed satan.
5 Diad loob na dakel a taon, naeksperiensya na maedad lan Tasi nen Jehova a manngaray Elfi so ligliwa tan tulong diad impangiyaplika to ed simbawa na Kasulatan a naromog ed saray publikasyon na aripen a klase. Lapud aralem ya apresasyon to, oniay insulat nen Elfi: “Anto la kasi so gawaen ko no anggapo so organisasyon nen Jehova?” Say sanasawan Peter tan Irmgard so abaybayag met lan lingkor na Dios. Imbalikas nen Irmgard so pisasalamat to lapud amin a probisyon na “maaro tan maasikason organisasyon nen Jehova.” Sarayan publikasyon so mangilaktip ed saramay imparaan parad totoon walaan na nikaduma iran pankaukolan, a singa saray totoon walaan na makapuy lan pakanengneng odino pakadngel.
6, 7. (a) Panon a naaasikaso iray kimey na saray kongregasyon ed interon mundo? (b) Anto so imbaga na arum nipaakar ed mangaraldalin a kabiangan na organisasyon nen Jehova?
6 Say ‘matoor ya aripen’ so irerepresenta na Mananguley ya Ulop na saray Tasi nen Jehova, sakey a melag a grupo na saray alanaan na espiritun lalaki a manlilingkor diad sankamundoan a hedkuarter na saray Tasi nen Jehova ed Brooklyn, New York. Tuturoen na Mananguley ya Ulop iray eksperiensyadon lingkor nen Jehova pian manserbi diad saray sangan opisina a mangaasikaso ed saray kimey na masulok a 98,000 a kongregasyon ed interon mundo. Saray lalaki a makakakapet ed saray kakaukolanen na Biblia so tuturoen bilang mamatatken tan ministeryal a lingkor ed sarayan kongregasyon. (1 Timoteo 3:1-9, 12, 13) Saray mamatatken so mangidadaulo tan maaron manpapastol ed pulok na Dios a walad panangasikaso ra. Agaylan bendisyon so pagmaliw a kabiangan na satan a pulok tan naeksperiensya so aro tan pankakasakey a walad limog na ‘interon impanaagi’!—1 Pedro 2:17; 5:2, 3.
7 Imbes a manreklamo, mabetbet ya ibabalikas na saray indibidual so apresasyon da ed maaron panangigiya ed espiritual a nagagamoran da ed saray mamatatken. Alimbawa, konsideraen pa si Birgit, sakey a Kristianon asawan bii a manedad na masulok a 30. Sanen sikatoy tinedyer ni, sikato so akaiba na saray makapuy a kaulop tan naplag lawari ed kasalanan. Balet say malinew a simbawa na saray mamatatken manlapud Biblia tan say suporta na saray kapananisiaan so angiliktar ed sikato ed sakey a kipapasen a pankaugsan to komon. Anto so liknaan nen Birgit natan? Imbaga to: “Misalsalamat ak a maong ta kabiangan ak ni na alay abig ya organisasyon nen Jehova.” Oniay inkuan na 17 años a si Andreas: “Sayan talaga so organisasyon nen Jehova, saya so sankaabigan ya organisasyon ed mundo.” Agta misalsalamat itayo ed kamaongan na mangaraldalin a kabiangan na organisasyon nen Jehova?
Ag-ayadyari Iray Mangidadaulo
8, 9. Panon so inkiwas na arum ed saray kapanaonan nen David, tan panon so inkiwas nen David ed ontan ya awawey?
8 Siempre, ag-ayadyari iramay aturon mangidaulo ed tuan panagdayew. Amin ira et nalilingo, tan walaan na saray kaleteyan a pansasagpotan dan daegen. Paningongotan tayo kasi itan? Andi. Anggan saray indibidual ya angimatalekan na baleg a responsabilidad diad Israel nensaman so akagawa na ambelat iran lingo. Singa bilang, sanen malangwer ni si David et sikato so akerew a manlingkor bilang managtogtog pian manambayo ed nagogonigon ya Arin Saul. Diad saginonor, labay nen Saul a pateyen si David kanian kinaukolan to so ontakas pian makaliktar.—1 Samuel 16:14-23; 18:10-12; 19:18; 20:32, 33; 22:1-5.
9 Mapalikdo met so inkiwas na arum ya Israelita. Singa bilang, say komandante militar nen David a si Joab so amatey ed kanayon nen Saul a si Abner. Akikomplot si Absalom sumpad si ama ton David lapud labay toy manari. Tan say panmamatalekan nen David a managsimbawa ton si Ahitopel so nantraidor ed sikato. (2 Samuel 3:22-30; 15:1-17, 31; 16:15, 21) Ingen, si David so agnagmaliw a maem-em a managreklamo; nisay impulisay to so tuan panagdayew. Diad tua, midumaan a tuloy so inkiwas nen David. Sanen maniirap si David, sikato so nandependi ed si Jehova tan pinansiansia to so maabig ya awawey sanen sikato so nanamot-amot lapud si Saul. Diad saman a panaon et oniay inkanta nen David: “Kasian mo ak komon, O Dios, kasian mo ak; ta say kamarerwak onsalimbeng ed sika: on, dia ed silong na saray payapayak mo so gawaen ko a salimbeng ko, ya angga ed kilabas na saraya a kasegsegangan.”—Salmo 57:1.
10, 11. Anto so naeksperiensya na Kristianon manngaray Gertrud sanen sikatoy malangwer ni, tan anto so imbaga to nipaakar ed ag-inkayadyari na saray kapananisiaan to?
10 Anggapo so rason tayo pian ireklamo a walay panagliput diad loob na organisasyon na Dios natan. Ag-aabuloyan nen Jehova odino saray anghel to odino saray maespiritual a managpastol so kiwala na saray managliput tan marelmeng diad loob na Kristianon kongregasyon. Anggaman ontan, amin tayo so nipapaarap ed agtayo inkayadyari tan ag-inkayadyari na arum a lingkor na Dios.
11 Sanen malangwer ni si Gertrud, sakey ya abaybayag lan mandadayew ed si Jehova, sikato so inakusaan bilang impostor tan aliwan sigpot-panaon a manangiyabawag na Panarian. Anto so reaksion to? Kasin nannguronguro si Gertrud ed ontan ya impantrato ed sikato? Andi. Sakbay na impatey to nen 2003 diad edad a 91, anonotan to iray apalabas ya agawa ed bilay to tan oniay insalaysay to: “Naaralan ko ed saray eksperiensyak nensaman tan diad saginonor ya anggaman nalilingo iray indibidual, si Jehova so mangiwawanwan ed importantin kimey to, ya uusaren to itayo ya ag-ayadyarin totoo.” Sanen kinaukolan a pidenengan nen Gertrud so ag-inkayadyari na arum iran lingkor na Dios, sikato so masimoon a nampikasi ed si Jehova.
12. (a) Anton makapuy ya alimbawa so impatnag na arum a Kristiano nen inmunan siglo? (b) Anto so nepeg a pangiyapasakeyan tayo ed kanonotan tayo?
12 Lapud agmet ayadyari iray sankamatooran tan debosyonadon Kristiano, mantultuloy tayon gawaen so ‘amin a bengatla ya anggapo so panagnguronguro’ anggano nalingo so sakey ya aturon lingkor. (Filipos 2:14) Agaylan makapaermen sano tumboken tayo so makapuy ya alimbawa na arum ed Kristianon kongregasyon nen inmunan siglo! Unong ed babangatan a Judas, saray palson managbangat ed saman a panaon et ‘impasen dan andi-kana so pakauley tan pinauges da iray atagey ya inkabtang.’ Niarum ni, saraman a managgaway-mauges et “managnguronguro, reklamador nipaakar ed kipapasen da ed bilay.” (Judas 8, 16, NW) Komon ta ipulisay tayo so kurang a tutumboken na saray managnguronguron reklamador tan iyapasakey tayo iray kanonotan tayo ed maabig iran bengatla a nagagamoran tayo panamegley na ‘matoor ya aripen.’ Komon ta pablien tayo so kamaongan na organisasyon nen Jehova tan ‘mantultuloy tayon gawaen so amin a bengatla ya anggapo so panagnguronguro.’
‘Makapatalagnaw Itan a Salita’
13. Anto so reaksion na arum nipaakar ed pigaran bangat nen Jesu-Kristo?
13 No panon ya arum nen inmunan siglo so nannguronguro sumpad saray aturon lingkor, arum so nanmeremere sumpad saray bangat nen Jesus. Unong a nikurit ed Juan 6:48-69, oniay imbaga nen Jesus: “Say mangan na laman ko tan oninum na dalak walaan na maandon bilay.” Sanen nadngel da iratan a salita, “amayamay ed saray babangatan to, . . . inkuan da, Saya masoliwet [“makapatalagnaw,” NW] a salita; siopa so makayarin ondengel ed sikato?” Amta nen Jesus a “saray babangatan to nantalabutob ira ed saya.” Niarum ni, “nisengeg ed saya amayamay ed saray babangatan to [so] sinmener ira, tan agla ra akila ed sikato.” Balet aliwan amin a babangatan to so nannguronguro. Imanoen pa so agawa sanen oniay intepet nen Jesus ed 12 ya apostol to: “Laba’yo met so ontaynan?” Oniay inyebat nen apostol Pedro: “Siopa so laen mi? Wala ed sika so saray salita na maando a bilay. Et anisia tan amta mi a sika so Santo na Dios.”
14, 15. (a) Akin a walaray pigaran nagmaliw a maingongot ed arum iran Makristianon bangat? (b) Anto so naaralan tayo ed kipapasen na sakey a lakin manngaran na Emanuel?
14 Diad modernon panaon, naningongotan na pigpigaran indibidual ed limog na totoo na Dios so sakey ya aspekto na Makristianon bangat tan nannguronguro ira sumpad mangaraldalin a kabiangan na organisasyon nen Jehova. Akin ya ontan so agawa? Say mabetbet a sengegan na satan et say kakulangan na pakatalos da ed paraan na panggagawa na Dios ed saray bengatla. Progresibon ipaparungtal na Manamalsa so katuaan ed totoo to. Kanian, no maminsan et nakaukolan a napino so pakatalos tayo ed Kasulatan. Panliketan na karaklan a totoo nen Jehova so ontan iran pananguman. Balet, walaray nagmaliw a ‘maptek ya alabas’ tan nanem-eman da iray pananguman. (Eclesiastes 7:16) Nayarin say inkamapaatagey so sakey a sengegan, tan arum so akalotan na independentin panag-isip. Antokaman so rason, makaderal so ontan a panagnguronguro, lapud niguyor itayo na satan a papawil ed mundo tan ed daladalan na satan.
15 Singa bilang, si Emanuel so sakey a Tasi a nankritiko ed pigaran bengatla ya abasa to ed saray publikasyon na “matoor tan makabat ya aripen.” (Mateo 24:45) Sikato so tinmundan nambasa ed Makristianon literatura tayo tan diad saginonor et imbaga to ed saray mamatatken ed kongregasyon da ya onekal la bilang Tasi nen Jehova. Balet, agnambayag et amoria nen Emanuel a saray bangat na organisasyon nen Jehova so susto manaya. Sikato so akitalosan ed saray Tasi, inawat to so lingo to, tan akapawil bilang Tasi nen Jehova. Bilang resulta, sikato so nagmaliw lamet a malikeliket a too.
16. Anto so makatulong ed sikatayo pian naandi iray panduaruwa tayo ed pigaran Makristianon bangabangat?
16 Panon to no natutukso itayon mannguronguro lapud walaray panduaruwa tayo nipaakar ed pigaran bangat na totoo nen Jehova? No ontan, mananos itayo. Nayarin diad saginonor et walay ipalapag na ‘matoor ya aripen’ a mangebat ed saray tepet tayo tan mangekal ed saray panduaruwa tayo. Makabat so onkerew na tulong ed saray Kristianon mamatatken. (Judas 22, 23) Say pikakasi, personal a panagaral, tan pililimog ed saray maespiritual a kapananisiaan so makatulong met pian naekal iray panduaruwa tan onaralem so apresasyon tayo ed makapabiskeg-pananisia iran katuaan na Biblia a naaralan tayo diad panamegley na paralanan ya uusaren nen Jehova a mitalosan.
Pansiansiaen so Positibon Awawey
17, 18. Imbes a mannguronguro, anto so nepeg ya awawey tayo, tan akin?
17 Tua, saray ag-ayadyarin totoo so walaan na sipor a tendensian mankasalanan, tan arum so nayarin walaan na mabiskeg a tendensian mangibalikas na andiay-basiyan iran reklamo ra. (Genesis 8:21; Roma 5:12) Balet no sikatayo so magmaliw a managnguronguro, ipepeligro tayo so relasyon tayo ed si Jehova a Dios. Kanian, nakaukolan tayon kontrolen so antokaman a posiblin tendensia a mannguronguro.
18 Imbes a mannguronguro nipaakar ed saray bengatla diad loob na kongregasyon, nepeg tayon pansiansiaen so positibon awawey tan tumboken so rotina a mamasiansia ed sikatayon okupado, maliket, mapagalang, balanse, tan mabunigas ed pananisia. (1 Corinto 15:58; Tito 2:1-5) Si Jehova so mangokontrol ed amin a bengatla diad loob na organisasyon to, tan amta nen Jesus iray nagagawa ed loob na kada kongregasyon, a singa met nen inmunan siglo. (Apocalipsis 1:10, 11) Maanos a manalagar ed Dios tan ed si Kristo, say Ulo na kongregasyon. Saray responsablin managpastol so nayarin nausar a mangipetek ed saray bengatlan nakaukolan ya ipetek.—Salmo 43:5; Colosas 1:18; Tito 1:5.
19. Anggad sano sigpot lan kontrolen na Panarian iray pakurang na katooan, anto so nepeg tayon pangiyapasakeyan na imano tayo?
19 Magano lan mangangga iyan marelmeng a sistema na bengabengatla, tan sigpot lan kontrolen na Mesianikon Panarian iray pakurang na katooran. Anggad agni agawa itan, importantin tuloy a pansiansiaen na kada sakey ed sikatayo so positibon awawey! Satan so makatulong ed sikatayo pian nanengneng iray maong ya ugali na saray kapanisiaan tayo, imbes a piimano tayo iray kalilingoan da. Magmaliw itayon maliket no say imanoen tayon naynay et saray maong ya aspekto na personalidad da. Sikatayo so napaseseg tan napabiskeg ed espiritual, imbes ya onkapuy so liknaan tayo lapud panagnguronguro.
20. Say positibon awawey so ontulong ed sikatayo pian napanggayagaan so anto iran bendisyon?
20 Say positibon awawey so makatulong met ed sikatayo pian nanonotan so dakel iran bendisyon a panggagayagaan tayo lapud mililimog itayo ed mangaraldalin a kabiangan na organisasyon nen Jehova. Saya lambengat so organisasyon ed mundo a matoor ed Soberano na uniberso. Anto so liknaan yo nipaakar ed satan a katuaan tan say pribilehyon mibiang ed panagdayew ed alenleneg a tuan Dios, si Jehova? Komon ta mipara so awawey yo ed si David, ya oniay inkanta to: “O sika a dengelen mo so pikakasi, amin a laman ondago ed sika. Mapalar so too a pilien mo tan paasinggeren mo ed sika, pian sikato et makapanayam ed arapan na abung mo: sikami napesel kami na saray kaabigan a wala ed abung mo.”—Salmo 65:2, 4.
Kasin Natandaan Yo?
• Akin a nepeg itayon misalamat ed saramay mangidadaulo ed kongregasyon?
• Anto so nepeg a reaksion tayo sano nalingo iray responsablin agagi tayo?
• Panon so nepeg a panmoria tayo ed saray pananguman ed pakatalos ed Kasulatan?
• Anto so makatulong ed sakey a Kristiano pian naandi iray panduaruwa to?
[Tepetepet Parad Panagaral]
[Litrato ed pahina 20]
Inter nen David ed si Solomon iray plano na templo tan sigpot-puso ton sinuportaan so tuan panagdayew
[Litrato ed pahina 23]
Maliket ya itatarya na saray Kristianon mamatatken so espiritual a tulong