‘Paliisan so Pannguronguro’
‘Paliisan so Pannguronguro’
“Gawa yo ya amin so bengatla ya anggapoy talabutob [“pannguronguro,” NW].”—FILIPOS 2:14.
1, 2. Anto so insimbawa nen apostol Pablo ed saray Kristiano diad Filipos tan Corinto, tan akin?
DIAD impuyan na Dios a sulat nen Pablo ed Kristianon kongregasyon ed Filipos nen inmunan siglo, baleg a komendasyon so imbalikas to. Kinomendaan to iray kapananisiaan to ed satan a syudad lapud mabunlok tan maseseg ya awawey da, tan imbalikas to so panliket to lapud maabig iran gawa ra. Anggaman kuan, pinanonotan ira nen Pablo a ‘gawaen da so amin a bengatla ya anggapoy pannguronguro.’ (Filipos 2:14) Akin ya ontan so insimbawa na apostol?
2 Amta nen Pablo no anto so epekto na panagnguronguro. Pigaran taon la ed asasakbay, pinanonotan to so kongregasyon ed Corinto a mapeligro so pannguronguro. Impabitar nen Pablo a si Jehova so aminpigan pinasanok na saray Israelita sanen wala ira ed kalawakan. Anto so ginawa ra? Pinilalek da iray makapasakit a bengatla, sinubok da si Jehova, tan nannguronguro ira. Pinaseseg nen Pablo iray taga-Corinto a manaral ed saratan ya alimbawa. Oniay insulat to: “Agkayo mantalabutob [odino, mannguronguro] komon, a singa arum ed sikara nantalabutob ira, tan inatey ira ed managbagbag.”—1 Corinto 10:6-11.
3. Akin a makapainteres ed sikatayo natan so tema nipaakar ed panagnguronguro?
3 Bilang lingkor nen Jehova ed sayan panaon, ipapatnag tayo met so impatnag na kongregasyon ed Filipos. Maseseg itayo ed maabig iran gawa, tan walaan itayo na aro ed limog tayon dili. (Juan 13:34, 35) Balet, nisengeg ed mauges ya epekto na panagnguronguro ed limog na totoo na Dios nensaman, walaan itayo na maong a rason pian talinengen so simbawan: ‘Gawa yo ya amin so bengatla ya anggapoy pannguronguro.’ Konsideraen tayo nin unona iray alimbawa na panagnguronguro ya asalambit ed Kasulatan. Insan singbaten tayo so arum ed saray nagawaan tayo pian napaliisan natan so mauges ya epekto na panagnguronguro.
Sakey a Mauges a Duypo a Nannguronguro Sumpad si Jehova
4. Diad anton paraan so impannguronguro na saray Israelita ed kalawakan?
4 Say Hebreon salita a mankabaliksan na ‘pannguronguro, panngemngem, panreklamo, odino maingal a panmeremere’ so nausar ed Biblia a misiglaotan ed saray agawa legan na 40 taon na Israel diad kalawakan. Walay inkagawa ya agnankontento iray Israelita ed kipapasen da tan impatnag da itan diad impannguronguro ra. Alimbawa, pigaran simba ni labat kayari na inkibulos da manlapud inkaaripen ed Ehipto, ‘say duypo na ananak na Israel so nantalabutob sumpad si Moises tan Aaron.’ Nanreklamo iray Israelita nipaakar ed tagano, a kuan da: “Komon no inatey kami la ingen ed lima nen Jehova diman ed dalin ya Ehipto, nen nanyuyurong kami ed abay na panaglutoan na laman, tan sanen angan kami a napnapsel na tinapay; ta inala yo kami la ingen dia ed saya a kalawakan, a pateyen ed eras ya amin a sankamuyongan.”—Exodo 16:1-3.
5. Sanen nanreklamo iray Israelita, siopa so talagan puntirya na panagnguronguro ra?
5 Diad tua, saray Israelita so intaryaan nen Jehova na nakaukolan da diad kalawakan, a maaro to iran inikdan na tagano tan danum. Anggapon balot so kapeligroan ya ompatey so totoo na Israel lapud eras ed kalawakan. Balet lapud agda inkakontento, alablabas so impangipasen da la ed mairap a kipapasen da kanian nannguronguro ira. Anggaman say panrereklamoan da et si Moises tan Aaron, diad imaton nen Jehova et Sikaton mismo so talagan puntirya na reklamo ra. Oniay imbaga nen Moises ed saray Israelita: “Si Jehova narengel to so panagngemngem yo a panngengem a sumpa ed sikato: Et anto kami ta? Saray panagngemngem yo aliwa a sikami sumpaen da, noag say sumpa ra ed Jehova.”—Exodo 16:4-8.
6, 7. Unong a nipaimano ed Numeros 14:1-3, panon ya anguman so awawey na saray Israelita?
6 Agnambayag et nannguronguro lamet iray Israelita. Angibaki si Moises na 12 lalaki pian man-espiya ed Insipan a Dalin. Samplora ed sikara so sinmempet a walaan na mauges a report. Say resulta? “Amin ya anak na Israel nantalabutob ira na onsumpa ed Moises tan ontan met ed Aaron: tan say lapag na muyong inkuan da ed sikara. Agkami la ingen komon inatey diman ed dalin na Ehipto! Odino agkami la komon inatey ed saraya a takel! Et anto so makasengeg na angiyakaran nen Jehova ed sikami ed sayan dalin [na Canaan], ta pian ompatey kami ed kampilan? Saray kaasawaan mi tan angkekelag mi naruksa ra ya amin. Agkomon maong no ompawil kami ed Ehipto?”—Numeros 14:1-3.
7 Anguma-uman so awawey na Israel! Diad primero, apakiwas ira a mankanta na panangidayew ed si Jehova lapud pisasalamat da ed inkibulos da manlapud Ehipto tan inkiliktar da ed Ambalangan Dayat. (Exodo 15:1-21) Balet, lapud nipaarap ira ed irap diad kalawakan tan tinmakot ira ed saray Canaanita, satan a maapresyan awawey na totoo na Dios so asalatan na ag-inkakontento. Imbes a pisalamatan da so Dios lapud inkibulos da, sikato so tinetel da lapud lingon ipapasen da a sikaray sisibletan. Say panagnguronguro sirin so pakapatnagan na kakulangay suston apresasyon ed saray probisyon nen Jehova. Agpankelawan sirin no akin ya oniay imbaga to: “Kaunongan kabayag so pantepel ko ed sayan mauges a sankatiponan, a mantalabutob na sumpa ed siak?”—Numeros 14:27; 21:5.
Impannguronguro nen Inmunan Siglo
8, 9. Mangiter na saray alimbawa na panagnguronguro a nikurit ed Kristianon Griegon Kasulatan.
8 Say inmuuna iran alimbawa na panagnguronguro so nipaakar ed saray ulop na totoo a maparungtal a mangibabalikas ed agda pankontento. Balet, sanen walad Jerusalem si Jesu-Kristo parad Piesta na Kobongkobong nen 32 C.E., “wala so dakel a dalamurom ed saray karaklan nipaakar ed sikato.” (Juan 7:12, 13, 32) Sikaray nan-eesaesan nipaakar ed sikato, a walaray mangibabagan sikatoy maong a too, balet ibabaga na arum ya andi.
9 Diad sananey ya inkagawa, si Jesus tan saray babangatan to so bisita ed abung nen Levi, odino Mateo, say managsingil na buis. “Saray Fariseo tan saray eskriba ra nantalabutob ira sumpa ed saray babangatan to, a kuan da, Akin a mikan tan miinum kayo ed saray publikano tan saray makasalanan?” (Lucas 5:27-30) Kalabas na pigaran panaon, diad Galilea, “saray Judio nantalabutob ira nipaakar ed [si Jesus], lapud inkuanto, Siak so tinapay a linmasur a nanlapu ed tawen.” Anggan say pigaran patumbok nen Jesus so naopendi ed imbaga to tan nanmeremere la.—Juan 6:41, 60, 61.
10, 11. Akin a nannguronguro iray Judion mansasalita na Griego, tan panon a nagunggonaan iray Kristianon mamatatken ed paraan na impangasikaso ed reklamo?
10 Mas positibo so resulta na sakey a kaso na panagmeremere ya agawa kayarin tuloy na Pentecostes 33 C.E. Panggagayagaan nensaman na dakel ya akomberte ni labat a babangatan a nanlapud paway na Israel so inkamaparawes na saray kapananisiaan ed Judea, balet linmesa iray problema nipaakar ed pananginabang ed walan akatarya. Oniay kuan na salaysay: “Nantalabutob so saray Griego a Judio ya onsumpa ed saray Hebreos, lapud saray bibii a babalo ed sikara napapaulyan ira ed pannanabangan ya inagew-agew.”—Gawa 6:1.
11 Miduma irayan nanmeremere no ikompara ed saray Israelita ed kalawakan. Aliwan sinisiblet so motibo na saray Judion mansasalitay Griego sanen imbalikas da so agda panliket ed kipapasen da ed bilay. Say impaimano ra et say agpakakaasikaso ed saray pankaukolan na pigaran abalo. Niarum ni, agnanggulo iray nanmeremere, nisay maparungtal ira a nanreklamo sumpad si Jehova. Sikaray direktan nanreklamo ed saray apostol, ya angasikason tampol ed satan lapud makatunongan so reklamo. Agaylan abig ya alimbawa na saray apostol ya aligen na saray Kristianon mamatatken natan! Seseguroen na sarayan espiritual a managpastol ya ‘agda pepepetan iray layag da ed akis na duka.’—Uliran 21:13; Gawa 6:2-6.
Manalwar ed Makaderal ya Impluensya na Panagnguronguro
12, 13. (a) Iyilustra iray epekto na panagnguronguro. (b) Anto so nayarin sengegan na pannguronguro na sakey a too?
12 Maslak ed saray Makasulatan ya alimbawa a kinonsidera tayo so mangipapatnag a say panagnguronguro so sengegan na pirmin deral ed limog na totoo na Dios nensaman. Kanian, nepeg tayon isipen a maong so makaderal ya impluensya na satan natan. Nayarin makatulong so sakey ya ilustrasyon. Dakel a klase na metal so mainomay a nalatian. No ibaliwala iray onggagapo lan lati, say metal so nalupok anggad agla nausar itan. Dakerakel a luluganan so ibabantak, aliwan lapud aderal a makina, noagta lapud latian lan maong iratan kanian delikado lan usaren. Panon tayon niyaplika iyan ilustrasyon ed panagnguronguro?
13 No panon a walaray metal a mainomay a nalatian, saray ag-ayadyarin totoo so walaan na tendensian manreklamo. Nepeg ya alerto itayon mangibiig ed antokaman a pakabidbiran na tendensian manreklamo. No panon a say linaew tan dagem na dayat so mamapeles ed ilati, say kairapan so lalon pansengegan na panagnguronguro. Lapud pakakadetdetan, say ingongot so magmaliw a panagreklamo. Lapud iloloor na saray kipapasen ed sarayan kaunoran ya agew na sayan sistema, maseguron onloor met iray posiblin pansesengegan na reklamo. (2 Timoteo 3:1-5) Kanian, say sakey a lingkor nen Jehova so nayarin onggapon mannguronguro sumpad arum. Say sengegan et nayarin melag ya isyu, a singa say pakakaingongot ed saray kaleteyan, abilidad, odino pribilehyo na sakey a too diad panaglingkor.
14, 15. Akin a nepeg ya ag-itayo padaeg ed tendensian manreklamo?
14 Antokaman so pakakaingongotan tayo, no padaeg itayo ed tendensia tayon manreklamo, mamawala itan ed sikatayo na espiritu na ingongot tan magmaliw itayo lan managnguronguro. On, sigpot itayon naapektoan na makaderal ed espiritual a panagnguronguro. Sanen nanmeremere iray Israelita nipaakar ed bilay diad kalawakan, sikara so sinmabi‘d punto a tinetel da la si Jehova. (Exodo 16:8) Agkomon itan nagawa ed sikatayo!
15 Say ilati na metal so napaliisan no pintaan itan na kontra-lati tan tampol a linisan iray nalalatian la. Diad mipadparan paraan, no naimano tayo la ed dili tayo so tendensian manreklamo, satan so naamper sano manpikasi itayo tan ipetek tayon tampol itan. Panon?
Imanoen Iray Bengatla Unong ed Punto de Bista nen Jehova
16. Panon a natalonaan so tendensian manreklamo?
16 No mannguronguro itayo, say kanonotan tayo so niyaapasakey ed dili tayo tan ed saray problema tayo tan nibaliwala la iray bendisyon a panggagayagaan tayo bilang Tasi nen Jehova. Pian nadaeg tayo so tendensian manreklamo, nakaukolan tayon nodnonoten a naynay iray bendisyon ed sikatayo. Singa bilang, balang sakey ed sikatayo so walaan na alay abig a pribilehyon mangakbibit ed personal a ngaran nen Jehova. (Isaias 43:10) Nabayuboan tayo so maapit a relasyon ed sikato, tan makapanpikasi itayo ed ‘Dumerengel na pikakasi’ ed antokaman a panaon. (Salmo 65:2; Santiago 4:8) Say bilay tayo so walaan na peteg a kabaliksan lapud amta tayo so isyu na sankatalbaan ya inkasoberano tan nonodnonoten tayo so pribilehyon manmatoor ed Dios. (Uliran 27:11) Regular itayon makapibiang ed panangipulong ed maong a balita na Panarian. (Mateo 24:14) Say pananisia ed dondon bagat nen Jesu-Kristo so mangiter ed sikatayo na malinis a konsiensia. (Juan 3:16) Saratan a bendisyon so panggayagaan tayo antokaman so kaukolan tayon sungdoan.
17. Akin a nepeg tayon panggunaetan a moriaen iray pamaakaran unong ed punto de bista nen Jehova, anggano walaan itayo na makatunongan a rason pian manreklamo?
17 Salien tayon moriaen iray bengatla unong ed punto de bista nen Jehova, aliwan ed dili tayo. “Iparungtal mo ed siak so saray dalan mo, O Jehova; ibangat mo ed siak so saray basbas mo,” so inkanta nen salmistan David. (Salmo 25:4) No walaan itayo na makatunongan a rason pian manreklamo, naiimano itan nen Jehova. Nayarian ton ipetek itan a tampol. Balet, akin ya aabuloyan to no maminsan a mantultuloy so kairapan? Nayarin makatulong itan ed sikatayo pian nabayuboan tayo iray maabig a kalidad, a singa say panag-anos, panagsungdo, pananisia, tan panagtepel.—Santiago 1:2-4.
18, 19. Iyilustra so posible iran epekto na agmareklamon panag-anos ed saray agmaabig a kipapasen.
18 Say agmareklamon panaanos tayo ed saray agmarakep a kipapasen so aglambengat mamaaligwas ed personalidad tayo noagta nayarin pandinayewan met itan na saramay makakaimaton ed kondukta tayo. Nen 2003 et walay grupo na saray Tasi nen Jehova a nambiahe panamegley na bus manlapud Alemanya pian onatendi ed kombension diad Hungary. Aliwan Tasi so drayber, tan talagan agto labay a nakaulop iray Tasi diad loob na samploran agew. Balet, kayari na saman a biahe, sigpot ya anguman so kanonotan to. Akin?
19 Legan na biahe, walaray bengatlan agmaabig ya agawa. Balet agbalot nanreklamo iray Tasi. Imbaga na drayber a saman so sankamaongan a grupo na saray pasahero ya inlugan to! Diad tua, insipan to a diad ontumbok ya itoktok na saray Tasi diad puerta to, palooben to ira tan dengelen to iran maong. Agaylan abig ya impresyon so apawala na saray pasahero diad ‘agda impannguronguro’!
Say Panamerdona so Mangiyalibansa na Pankakasakey
20. Akin a nepeg a manpeperdonaan so balang sakey?
20 Panon to no walay reklamo tayo sumpad sakey a kapananisiaan? No seryoso so pamaakaran, nepeg tayon iyaplika iray prinsipyon naromog ed imbaga nen Jesus unong a nikurit ed Mateo 18:15-17. Balet, agmet itan kapilitan a gawaen lapud karaklan ed saray reklamo et angkekelag. Akin ta no ipasen itan a situasyon bilang pankanawnawan ipatnag so panamerdona? Oniay insulat nen Pablo: “Mantetepelan so sakey tan sakey, tan manpeperdonaan so balang sakey, no say siopaman a too wala so pangidaleman to ed siopaman; unong ed impamerdona na Katawan ed sikayo, ontan met so gawaen yo: Tan lalo la ed saraya ya amin a bengatla ikawes yo so aro, a sikato so singer yo ed inkayadyari.” (Colosas 3:13, 14) Kasin mabulos itayon mamerdona? Agta walay kanepegan nen Jehova a manreklamo nipaakar ed sikatayo? Balet, sikato so aminpigan angipatnag na panangabagey tan panamerdona.
21. Panon a nayarin naapektoan iramay onderengel ed panagnguronguro?
21 Antokaman so reklamo, agnaresolbe na panagnguronguro so problema. Say kabaliksan met na Hebreon termino a “mannguronguro” et maingal a panmeremere. Seguradon nasisikig itayo no say kaiba tayo et naynay a mannguronguro tan paliisan tayo itan a too. No sikatayoy mannguronguro, odino maingal a manmeremere, ontan met so nalikna na saray onderengel. Agayla, nayarin nasisikig iran maong kanian labay da itayon paliisan! Say maingal a panagmeremere so nayarin mangalay imano na sakey a too, balet seguradon ag-itan makapasagyat ed sikato.
22. Anto so imbaga na sakey a kalangweran a bii nipaakar ed saray Tasi nen Jehova?
22 Say manamerdonan awawey so mangiyaalibansa na pankakasakey—bengatlan papablien na totoo nen Jehova. (Salmo 133:1-3) Diad sakey a bansa na Europa, nansulat so 17 años a Katolikon bii ed sangan opisina na saray Tasi nen Jehova pian ibalikas to so pandinayew to ed sikara. Oniay inkuan to: “Sikayo lambengat so organisasyon ya amtak ya agnaapag iray membro lapud pambubusolan, agum, inkapeget, inkasiblet, odino agpankakasakey.”
23. Anto so singbaten ed ontumbok ya artikulo?
23 Say pangapresya ed amin ya espiritual a bendisyon a nagagamoran tayo bilang managdayew ed tuan Dios a Jehova so ontulong pian niyalibansa tayo so pankakasakey tan napaliisan tayo so pannguronguro sumpad arum nipaakar ed personal iran pamaakaran. Ipabitar na ontumbok ya artikulo no panon a saray maridios a kalidad so mangamper ed sikatayo manlapud mas mapeligro ni ingen a nengneng na panagnguronguro, salanti, say pannguronguro sumpad mangaraldalin a kabiangan na organisasyon nen Jehova.
Kasin Natandaan Yo?
• Anto so nalalanor ed panagnguronguro?
• Panon a niyilustra iray epekto na panagnguronguro?
• Anto so makatulong pian nadaeg tayo so tendensian mannguronguro?
• Panon a say inkamabulos a mamerdona so ontulong pian napaliisan tayo so panagnguronguro?
[Tepetepet Parad Panagaral]
[Litrato ed pahina 14]
Diad tua, saray Israelita so nanmeremere sumpad si Jehova!
[Litrato ed pahina 17]
Kasin iimanoen tayo iray bengatla unong ed punto de bista nen Jehova?
[Saray litrato ed pahina 18]
Say panamerdona so mangiyaalibansa ed pankakasakey na saray Kristiano