Saray Pabitar ed Komatlo tan Komapat a Libro na Salmos
Say Salita nen Jehova et Mabilay
Saray Pabitar ed Komatlo tan Komapat a Libro na Salmos
DIAD pikakasi na salmista ed Dios, oniay intepet to: “Nipaamta ta so maaro ya abig na linawam ed lubok, odino say katooran mo ed kabagbag?” (Salmo 88:11) Siempre, say ebat et andi. Agtayo nidayew si Jehova no anggapoy bilay tayo. Say pangidayew ed si Jehova et maabig a rason a sikatayoy mantultuloy a manbilay, tan say pakawalaan na bilay et maabig a rason pian sikatoy idayew tayo.
Say Komatlo tan Komapat a Libro na Salmos, a tugyopen na Salmo 73 ya anggad 106, so mangiiter ed sikatayo na dakel a rason pian idayew so Manamalsa tan igalang so ngaran to. Say pandalepdep ed sarayan salmo so nepeg a mamaaralem na apresasyon tayo ed “salita na Dios” tan mamakiwas ed sikatayo pian palaknaben tan paaligwasen so paraan na panangidayew tayo ed sikato. (Hebreos 4:12) Tekep na masimoon ya interes, konsideraen tayon unona so Komatlon Libro na Salmos.
“MAONG ED SIAK SO ONDERE ED ABAY NA DIOS”
Say primeron 11 a salmo na komatlon seksion so tinibukel nen Asaf odino na saray membro na sankaabungan nen Asaf. Isasalaysay na unonan kanta no anto so akatulong ed si Asaf pian sikatoy agnibalang na lingon kanonotan. Sikatoy akapannonot na duga. Oniay inkanta to: “Ta maong ed siak so ondere ed abay na Dios.” (Salmo 73:28) Say Salmo 74 et nipaakar ed impantagleey ed inkaderal na Jerusalem. Diad Salmo 75, 76, tan 77, si Jehova so deneskribe bilang maptek ya Ukom, Manangilaban ed saray mauyamo, tan Dumerengel na pikakasi. Say Salmo 78 so nanrepaso ed apalabas ya awaran na Israel, manlapud panaon nen Moises ya anggad panaon nen David. Say koma-79 a Salmo et nipaakar ed impantagleey ed inkaderal na templo. Insan say koma-80 a Salmo et nipaakar ed pikakasi parad kipawil na totoo na Dios. Say Salmo 81 et nipaakar ed bilin a tuloken si Jehova. Say Salmo 82 tan 83 et saray pikakasi parad pangidapo na Dios na panangukom ed saray mauges ya ukom ontan met ed saray kakabusol na Dios.
“Say kamarerwak manpilalek, lanti, nalemay ni ed pantintindek to ed saray saban nen Jehova,” so inkanta na saray ilalak nen Kora. (Salmo 84:2) Say Salmo 85 et sakey a kerew a bendisyonan na Dios iray pinmawil a manlapud inkadestiero. Idadanet na sayan salmo a nagkalalon importante iray espiritual a bendisyon nen saray pisikal a bendisyon. Diad Salmo 86 et kinerew nen David ed Dios a sikatoy bantayan tan ibangat To. Say Salmo 87 et sakey a kanta nipaakar ed Sion tan saramay nianak ditan, a tinumbokan na pikakasi ed si Jehova diad Salmo 88. Say abig na linawa nen Jehova unong a nipatnag diad Davidikon sipan so nidanet ed Salmo 89, a tinibukel nen Ethan, a nayarin sakey ed saray apatiran makabat a lalaki diad panaon nen Solomon.—1 Arari 4:31.
Makasulatan Iran Tepet a Naebatan:
73:9—Panon a saray marelmeng et ‘inyarap da so sangi ra ed tawen, tan say dila ra et binatak da so dalin’? Lapud anggapoy siopaman ed tawen odino diad dalin a papagalangan na saray marelmeng, sikaray agmasuyat a mangayew ed Dios panamegley na sangi ra. Papaugesen da met iray totoo diad panamegley na dila ra.
74:13, 14—Kapigan a si Jehova et ‘binetag to so ulo-ulo na saray tongol ed saray danum tan minisimisi to so ulo-ulo na Leviatan’? Si “Faraon ya ari na Ehipto” so tinawag a “baleg ya olimaw a wala ed pegley na saray ilog to,” say ilog Nilo. (Ezequiel 29:3) Nayarin say Leviatan et mangirerepresenta ed “saray mabibiskeg a totoo nen Faraon.” (Salmo 74:14) Nayarin say tutukoyen na inkabetag na ulo ra et say pirmin inkatalo nen Faraon tan say armada to sanen imbulos nen Jehova iray Israelita manlapud inkaaripen ed Ehipto.
75:4, 5, 10—Anto so kabaliksan na terminon “saklor”? Saray saklor na ayep et mabiskeg ya ayura. Kanian, say terminon “saklor” et piguratibon mankabaliksan na pakayari, odino biskeg. Si Jehova so mamapatubo ed saklor na totoo to, a mangitandoro ed sikara, bangta ‘pupungilen to so saklor na saray bagel.’ Sikatayo so pinasakbayan ya ‘agtayo iyaayag so saklor tayo,’ salanti, ag-itayo nepeg a magmaliw a mapaatagey odino matangsit. Lapud si Jehova so manangitandoro, saray naaawat tayon responsabilidad diad kongregasyon et nepeg tayon ipasen a manlalapud sikato.—Salmo 75:7.
76:10—Panon a “say sanok na too” et mangidayew ed si Jehova? Sano aabuloyan na Dios ya onsanok so totoo ed sikatayo lapud panlilingkor tayo ed sikato, nayarin walay positibon pansumpalan na satan. Antokaman a kairapan a nayarin sagmaken tayo et satan so makapangibangat ed sikatayo diad sakey a paraan. Aabuloyan lambengat nen Jehova so panirap diad laknab a satan so mangipasal ed sikatayo. (1 Pedro 5:10) ‘Say pambayag na sanok na too, patundaen na Dios a mismo.’ Panon to no manresulta la ed ipapatey so paniirap tayo? Satan met so mangidayew ed si Jehova lapud saraman so makaimano ed matoor ya impansungdo tayo et nayarin igloria ra so Dios.
78:24, 25; Maung a Balita—Akin a say mana so tinawag a “tagano a nanlapu ed tawen” tan “kakanen daray anghel”? Agkabaliksan na satan a balikas a say mana et aakanen na saray anghel. Satan so “tagano a nanlapu ed tawen” lapud mangatatawen so lapuan na satan. (Salmo 105:40) Lapud manaayam ed tawen iray anghel, odino “saray makapanyari,” say balikas a ‘kakanen na saray anghel’ et nayarin mankabaliksan labat ya intarya itan na Dios, a manaayam ed tawen. (Salmo 11:4) Nayarin inusar met nen Jehova iray anghel a mangitarya na mana parad saray Israelita.
82:1, 6—Siopay tutukoyen na saray “dirios” tan ‘ananak na Sankatageyan’? Tutukoyen na parehon balikas iray totoon ukom ed Israel. Matukotukoy iya lapud kaukolan iran manlingkor bilang pinagkasangiyan tan manangilaman na Dios.—Juan 10:33-36.
83:2—Anto so kabaliksan na ‘pangitangwa na sakey ed ulo to’? Satan ya andawes et mankabaliksan na inkamaparaan a mangusar na pakayari odino onkiwas, a kaslakan et pian onsumpa, onlaban, odino mamairap.
Saray Leksion Parad Sikatayo:
73:2-5, 18-20, 25, 28. Agtayo nepeg a panibegan so iyaaligwas na saray marelmeng tan tumboken iray agmaridios a daladalan da. Saray marelmeng et walad andanglel a pasen. Seguradon ‘napelag ira ed kadederal.’ Niarum ni, lapud agnapaandi na ag-ayadyarin uley na too so karelmengan, kaapaan lambengat sirin so pansagpot tayon mangekal ed satan. Singa si Asaf, sikatayoy makabat no itepel tayo so karelmengan diad ‘idere ed abay na Dios’ tan diad panliket ed maapit a pisisiglaotan ed Sikato.
73:3, 6, 8, 27. Nepeg a paliisan tayo so panaglastog, panagpaatagey, panagmudmora, tan panagpalikdo. On, anggaman singano walay bentaha ed pakawalaan na ontan ya ug-ugali.
73:15-17. Sano nawewetwet so kanonotan tayo, kaukolan ya agtayo itan ipatnag diad publiko. Say ‘pansalita na ontan’ so manismaya lambengat ed arum. Nepeg tayon motekteken a mareen iray kapagaan tayo tan resolbien iratan diad pilimog ed saray kapananisiaan tayo.—Uliran 18:1.
73:21-24. Say ‘pakapairap na kamarerwa’ odino paningongot lapud ompatnag ya iyaaligwas na saray marelmeng et mipadpara ed ikiwas a singa ayayep ya andi-kalakal. Sayan kakikiwas et bengatbengat, a nibase lambengat ed emosyon. Diad kasunian, nepeg itayon paiwanwan ed simbawa nen Jehova, a sigpot a matalek ya ‘itabin to itayo ed kawanan a lima’ tan tulongan to itayo. Niarum ni, si Jehova so ‘mangawat ed sikatayo ed gloria,’ salanti, diad maapit a pisisiglaotan ed sikato.
77:6. Say masimoon a panangimano ed espiritual iran katuaan tan maalwar a panagsukimat ed saratan et mankaukolan na panaon parad panaral tan pandalepdep. Agaylan importante ya ipanaon tayo so mareereen a pambukbukor tayo!
79:9. Dedengelen nen Jehova iray pikakasi tayo, lalo la no nipaakar iratan ed panamasantos ed ngaran to.
81:13, 16. Say italineng ed boses nen Jehova tan pankurang ed daladalan to et pakagamoran na daakan a bendisyon.—Uliran 10:22.
82:2, 5. Nayeyegyeg so “palpaletneg na dalin” makasengeg ed saray ag-inkahustisya. Saray agmakatunongan a gawa so manesesga ed inkaligen na sosyedad na too.
84:1-4, 10-12. Say panamabli na saray salmista ed pasen a panagdayewan ed si Jehova tan say inkakontento ra ed saray pribilehyo ra ed panaglingkor so napanuliranan tayo.
86:5. Agaylan misalsalamat itayo lapud si Jehova so ‘akaparaan a mamerdona’! Sikatoy manaanap na antokaman ya ebidensya a pangibasiyan to ed pangipatnag to na panangasi ed sakey a magbabawin nankasalanan.
87:5, 6. Kasin saramay makaawat na bilay diad mangaraldalin a Paraiso et naamtaan da so kangaranan na saramay napaoli ed mangatatawen a bilay? Ipapabitar na sarayan bersikulo a posible itan.
88:13, 14. Say agpakaawat a tampol na ebat ed saray pikakasi tayo nipaakar ed sakey a problema et nayarin mankabaliksan a labay nen Jehova a paneknekan tayo so inkapuro na debosyon tayo ed sikato.
“MISALSALAMAT KAYO ED SIKATO, TAN IGALANG YO SO NGARAN TO”
Imanoen pa so nanduruman rason parad pangidaydayew ed si Jehova a nidatak diad komapat a seksion na saray salmo. Diad Salmo 90 et pinandumaan nen Moises so kiwawala na “Ari ya andi-angga” tan say magangganon bilay na too. (1 Timoteo 1:17) Unong ed Salmo 91:2, tinukoy nen Moises si Jehova bilang ‘salimbeng to tan kiyagelan to’—say Lapuan na kaligenan to. Say tinmumbok a pigaran salmo so analambit ed saray maabig a kalidad na Dios, saray atagey a kanonotan to, tan saray makapakelaw a gawa to. Taloran salmo so ginmapo panamegley na saray balikas a “si Jehova manari.” (Salmo 93:1; 97:1; 99:1) Diad impanalambit na salmista ed si Jehova bilang Managgawa tayo, sikatayoy papasesegen to a ‘misalsalamat ed sikato tan mangigalang ed ngaran to.’—Salmo 100:4.
Panon so nepeg a panuley na sakey ya arin walaay takot ed si Jehova? Eebatan itan na Salmo 101, a tinibukel nen Arin David. Ibabaga ed sikatayo na ontumbok a salmo a si Jehova so ‘mamapabli ed pikakasi na naukolan, tan agto balawen so pikakasi ra.’ (Salmo 102:17) Say koma-103 a Salmo so mangipapaimano ed maaron-kaabigan tan panangasi nen Jehova. Diad impanukoy na salmista ed dakel a pinalsa na Dios diad dalin, oniay inkanta to: “O Jehova, agayla so kinaraklan na saray gawam! Dia ed karunongan so nanggawaan mo ed saraya ya amin.” (Salmo 104:24) Say kaunoran a duaran kanta na Komapat a Libro so mangidadayew ed si Jehova lapud saray makapakelaw a gawa to.—Salmo 105:2, 5; 106:7, 22.
Makasulatan Iran Tepet a Naebatan:
91:1, 2—Anto so “maamot a pasen na Sankatageyan,” tan panon so ‘pakapanayam’ tayo ditan? Saya so piguratibon pasen na espiritual a kaligenan—sakey a liktar a kipapasen ya anggapoy pakapeligroan ed espiritual. Satan so maamot lapud ag-amta itan na saramay agmanmamatalek ed si Jehova. Pagmaliwen tayo ya ayaman si Jehova diad panilalo ed sikato bilang salimbengan tan kiyagelan tayo, diad pangidayew ed sikato bilang say Soberanon Manuley ed uniberso, tan diad pangipulong ed maong a balita na Panarian. Nalilikna tayo so inkaligen ed espiritual lapud amta tayo a lawas akaparaan si Jehova ya ontulong ed sikatayo.—Salmo 90:1.
92:12—Diad anton paraan a saray matunong et “onsalindak a singa say kiew a palma”? Kabkabat so kiew a palma lapud inkamabunga na satan. Say matunong et singa kiew a palma lapud sikatoy maptek ed imaton nen Jehova tan lawas mamapawala na “maabig a bunga,” a laktipen na satan iray maabig a gawa—Mateo 7:17-20.
Saray Leksion Parad Sikatayo:
90:7, 8, 13, 14. Say pankakasalanan tayo et lawas manederal ed relasyon tayo ed tuan Dios. Tan agniyamot ed sikato iray kasalanan. Balet, no peteg itayon magbabawi tan ikaindan tayo iray mauges a kurang, sikatayo so abobonan lamet nen Jehova, a ‘peselen to itayo ed panangasi to.’
90:10, 12. Lapud antiktikey so bilay, nepeg tayon ‘bilangen iray agew tayo.’ Panon? Diad igamor na “puso na kakabatan,” odino pangagamil na kakabatan ta pian agnadarak iray nakekeraan ya agew tayo noagta nausar iratan a mamaliket ed si Jehova. Kakaukolanen na satan a sikatayoy mangiletneg na espiritual iran prayuridad tan makabat a mangusar ed panaon tayo.—Efeso 5:15, 16; Filipos 1:10.
90:17. Manepeg ya ipikasi ed si Jehova a ‘paligenen to iray gawa na limalima tayo’ tan bendisyonan to iray sagpot tayo diad ministeryo.
92:14, 15. Diad pagmaliw a maseet ya estudyante na Salitay Dios tan maparanay a pilimog ed saray totoo nen Jehova, saray maedad la so mantultuloy a “makbol tan malangbot”—a mabiskeg ed espiritual—tan magmaliw ira a mabmablin kabiangan na kongregasyon.
94:19, Maung a Balita. Antokaman so sengegan na ‘kapagaan tan kagogonigon’ tayo, natambayo itayo diad pambasa tan pandalepdep ed saray ‘makaligliwa’ a naromog diad Biblia.
95:7, 8. Say italineng, pangimano, tan mabulos a pangunor ed simbawan manlalapud Kasulatan so mangamper ed sikatayo ed pagmaliw ya anawet-puso.—Hebreos 3:7, 8.
106:36, 37. Isisiglaot na sarayan bersikulo so panagdayew ed talintao dia ed panagbagat ed saray demonyo. Ipapabitar na satan a say toon manguusar na taltalintao et nayarin naimpluensyaan na demonyo. Oniay ibibilin ed sikatayo na Biblia: “Arawian yo iray kinondiosdiosan.”—1 Juan 5:21.
“Idayew Yo si Jehova”
Anampot so taloran kanta na Komapat a Libro na Salmos panamegley na onian panamaseseg: “Idayew yo si Jehova.” Say unor a salmo so ginmapo met panamegley na ontan a balikas. (Salmo 104:35; 105:45; 106:1, 48) Diad tua, say balikas ya “Idayew yo si Jehova” so mabetbet a pinmatnag diad Komapat a Libro na saray salmo.
Talagan dakel so rason tayo pian idayew si Jehova. Say Salmo 73 ya anggad 106 so angitarya ed sikatayo na dakel a pannodnonotan, a mamano ed kapusoan tayo na pisasalamat ed mangatatawen ya Ama tayo. Sano nonoten tayo so amin a ginawa to la parad sikatayo tan say gawaen to ni parad sikatayo diad arapen, ag-itayo kasi napakiwas a ‘mangidayew ed si Jehova’ ed amin a biskeg tayo?
[Litrato ed pahina 10]
Singa si Asaf, nitepel tayo so karelmengan diad ‘idere ed abay na Dios’
[Litrato ed pahina 11]
Asagmak nen Faraon so inkatalo diad Ambalangan Dayat
[Litrato ed pahina 11]
Amta yo ta no akin a say mana et tinawag a “tagano na saray makapanyari”?
[Litrato ed pahina 13]
Anto so nayarin mamaandi ed ‘kapagaan tan kagogonigon’ tayo?