Kagalangan na Too​—Posible Parad Amin

“Nepeg a mangiletneg itayo na sakey a balon mundo—sakey a mundon alay abig so kipapasen—a rerespetoen ditan so magnayon a kagalangan na too.”​—PRESIDENTE NA ESTADOS UNIDOS A SI HARRY TRUMAN, SAN FRANCISCO, CALIFONIA, E.U.A., ABRIL 25, 1945.

SINGA met ed papanisiaan na karaklan a totoo a nambilay ed saray taon kayari na Guerra Mundial II, anisia si Presidente Truman a say too so makaaral manlapud awaran tan makapawala na “sakey a balon mundo” a napagalangan la so amin a too. Makapaermen ta aliwan ontan so kipapasen ed sayan modernon panaon. Mantutultuloy a nigagatin-gatin so “magnayon a kagalangan na too” lapud say talagan sengegan na problema et aliwan too, noagta say manunan kabusol to.

Say Sengegan na Problema

Ipapabidbir na Biblia iyan kabusol bilang si Satanas a Diablo, sakey a marelmeng ya espiritun pinalsa ya anuppiat ed kanepegan na Dios a manuley diad gapo ni labat na awaran na too. Manlapu nen akitongtong si Satanas ed si Eva diad hardin na Eden, say getma to la et iyarawi so totoo ed panlingkor ed Manamalsa ra. (Genesis 3:1-5) Isipen pa iray makapadesyang ya epekto ed si Adan tan Eva sanen inunor da so pananugsog na Diablo! Say nansumpalan a tampol na insunggay dan dua ed ganggan na Dios nipaakar ed isesebel a bunga  na kiew et ‘inyamotan da si Jehova a Dios.’ Akin? Oniay impatua nen Adan: ‘Antakot ak, ta lakseb ak kanian sinmanib ak.’ (Genesis 3:8-10) Anguman so relasyon nen Adan ed mangatatawen ya Ama to tan say pakanengneng to ed dili to. Sikatoy nababaingan tan agla komportable ed pakakaimaton ed sikato nen Jehova.

Akin a kaliktan na Diablo a naekalan na dilin-respeto si Adan? Lapud ginawa so too a kaulibay na Dios, tan panliketan nen Satanas a nanengneng so too ya onkiwas ed paraan a pakaderalan na gloria na Dios. (Genesis 1:27; Roma 3:23) Saya so mangipalinew no akin a kasmak la ed awaran na too iray gawan panangipaabeba. Bilang “dios na sayan panaon,” si Satanas so mangiyaalibansa ed sayan awawey ‘diad panaon a say too et walaan na pakayari ed sananey a too pian pankaugsan to.’ (2 Corinto 4:4; Eclesiastes 8:9; 1 Juan 5:19) Kasin mankabaliksan itan ya aglan balot nipawil so manepeg a kagalangan na too?

Papagalangan nen Jehova so Pinalsa To

Isipen pa lamet iray kipapasen diad hardin na Eden sakbay a nankasalanan si Adan tan Eva. Walaan ira na daakan a tagano, makapnek a kimey, tan pankanawnawan nawalaan na mabunigas tan agmanampot a bilay ontan met iray magmaliw ya ilalak da. (Genesis 1:28) Amin ya aspekto na bilay da so mangipapabitar ed maaro tan mapagalang a gagala na Dios parad katooan.

Kasin anguman so panmoria nen Jehova nipaakar ed kagalangan na too sanen nankasalanan si Adan tan Eva? Andi. Impatnag to so konsiderasyon parad kababaingan ya alikna ra lapud lakseb ira. Say Dios so maaron angitarya na ‘kawekawes a katat’ pian salatan iray tapitapi a bulong na higos a dinedeyeng da. (Genesis 3:7, 21) Imbes a paulyanan to ran nababaingan, say Dios so akideneng ed sikara tekep na kagalangan.

Diad saginonor, sanen akidenengan nen Jehova so nasyon na Israel, impatnag to so panangabagey ed saray ulila, balo a bibii, tan manaayam a sankaili—saray kabiangan na sosyedad a mabetbet a naaabuso. (Salmo 72:13) Alimbawa, sano anien la na saray Israelita iray trigo ra, saray olibo, tan ubasan da, binilin ira ya agda la totodtoren iray atilak da. Imbes, ingganggan na Dios a saramay totodtoren et “onkana la naani ed sankaili, dia ed ulila, tan dia ed balo a bii.” (Deuteronomio 24:19-21) Sanen inunor da irayan ganggan, anggapo so kinaukolan a mipayabol tan anggan saramay sankadukaan so awalaan na mapagalang a trabaho.

Pinagalangan nen Jesus so Arum

Legan a wadiad dalin so Anak na Dios, si Jesu-Kristo, impatnag to so interes ed kagalangan na arum. Alimbawa, sanen walad Galilea, sikatoy inasinggeran na sakey a lakin walaan na graben kating. Unong ed Mosaikon Ganggan, pian agnaalisan na sakey ya akating so arum, sikatoy kaukolan ya onkelyaw na: “Marumsis, marumsis!” (Levitico 13:45) Balet, sayan laki et agkinmelyaw pian mamasakbay legan ya onaasingger ed si Jesus. Imbes, indakmomo to so lupa to tan akikasi  ed si Jesus: “Katawan, no labay mo, nayarian mo ak a linisan.” (Lucas 5:12) Panon so inkiwas nen Jesus? Agkinondena nen Jesus itan a laki lapud impanumlang to ed Ganggan, nisay imbaliwala odino pinaliisan To. Imbes, pinagalangan to so akating diad impaniwit to ed sikato tan inkuan to: “Labay ko; nalinisan ka.”—Lucas 5:13.

Diad arum ya inkagawa, impatnag nen Jesus so abilidad ton mamaabig anggan agto nadiwit so walaan na sakit—a no maminsan et anggan walad arawi. Balet diad sayan kipapasen et denesidi ton diwiten so laki. (Mateo 15:21-28; Marcos 10:51, 52; Lucas 7:1-10) Lapud “napno na kating” so laki, andi-duaruwan abaybayag la a sikatoy ag-adiwit na arum a too. Agaylan makaligliwa a nalikna to lamet so diwit na sakey a too! Seguradon say iilaloan labat na saman a laki et say pamaabig ed kating to. Ingen, say paraan na impamaabig ed sikato nen Jesus et andi-duaruwan akatulong pian nipawil so sakey nin bengatla—say kagalangan na laki. Kasin realistiko so panisia a say ontan a kapagaan parad kagalangan na arum et niwala ed sosyedad tayo natan? No ontan, panon itan a napatnagan?

Say Totontonen a Mamapagalang

Si Jesus so angibalikas na bengatlan ipapasen na dakel bilang say sankabantogan lan niiter a bangat nipaakar ed relasyon na too: “Amin a bengatla sirin a labay yo a gawaen na totoo ed sikayo, ontan so gawaen yo met ed sikara.” (Mateo 7:12) Sayan Binmalitok a Totontonen, unong ya ontan so mabetbet a panatawag ed satan, so mamapakiwas ed sakey pian respetoen so kapara ton too tan maniilalo a sikatoy respetoen met.

Unong ya ipapanengneng na awaran, aliwan mainomay so pangiyaplika ed sayan totontonen—a mabetbet et kasunian ni ingen so nagagawa. “Labalabay kon talaga nensaman ya ipabpaabeba so arum,” so inkuan na sakey a lakin ingaran  tayoy Harold. “Anggan diad daiset labat a salitak et onsyodot la ra, nabaingan la ra, tan onakis ni ra ingen no maminsan.” Balet walay agawa ya akapanguman ed paraan na pidedeneng nen Harold ed arum. “Walaray Tasi a ginmapon dinmalaw ed siak. Nanonotan ko a siak so nababaingan sanen amoriak iramay imbabagak tan say paraan na impantratok ed sikara no maminsan. Balet ag-ira tinmunda, tan kalkalna a saray katuaan ed Biblia so anenyeg ed pusok tan amakiwas ed siak a manguman.” Natan et manlilingkor lay Harold bilang sakey a matatken diad Kristianon kongregasyon.

Say eksperiensya nen Harold so talagan mamaneknek a ‘say salita na Dios et mabilay tan mabiskeg, tan makdem nen say anggan dinan a kampilan a duaray tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.’ (Hebreos 4:12) Walaan na pakayari so Salitay Dios a manenyeg ed puso na too tan manguman ed kanonotan tan ugali to. Saya so manunan basiyan pian pagalangan so arum—say impapuson pilalek ya ontulok imbes a mamasakit, mamagalang imbes a mangiyabeba.—Gawa 20:35; Roma 12:10.

Nipawil la so Manepeg a Kagalangan

Ontan met a pilalek so mamapakiwas ed saray Tasi nen Jehova pian itongtong da ed arum so alay abig ya ilalon wala ed Biblia. (Gawa 5:42) Anggapo lay magmaong a paraan pian narespeto tan napagalangan na sakey so kapara ton too noag say panginabang ed sikato na “maong a balita na kaabigan.” (Isaias 52:7) Laktipen na “kaabigan” so pangisulong ed “balon too,” a mangiwaklit ed “mauges a getma” ya ipaabeba so arum. (Colosas 3:5-10) Kabiangan met ed satan so gagala nen Jehova a magano lan naandi iray kipapasen tan awawey a mangeekal ed kagalangan na too, pati say manangisugsog na satan, si Satanas a Diablo. (Daniel 2:44; Mateo 6:9, 10; Apocalipsis 20:1, 2, 10) Sano say dalin et “napano [la] ed pikakabat ed Jehova,” nagamoran la ed satan na amin a too so kagalangan.—Isaias 11:9.

Pasesegen mi ka a manaral nipaakar ed sayan alay abig ya ilalo. Diad pilimog mo ed saray Tasi nen Jehova, naamtaan mon mismo a say pangiyaplika ed saray prinsipyo na Biblia et mamagalang ed arum. Tan naaralan mo met no panon a say Panarian na Dios et magano lan mangitarok ed ‘sakey a balon mundo ya alay abig so kipapasen,’ a ditan et magmaliw lan peteg so “magnayon a kagalangan na too,” tan aglan balot nigatin-gatin.

[Kahon/Litrato ed pahina 6]

Say Impanmatoor Da so Amasiansia ed Kagalangan Da

Legan na Guerra Mundial II, masulok a 2,000 a Tasi nen Jehova so niiyan ed panangipangawan iran kampo na Nazi lapu ed sisisiaen da. Diad pangipapaimano ed makatantandan paraan na impangipatnag da ed katooran da, oniay insalaysay na datin priso ed Ravensbrück a si Gemma La Guardia Gluck diad libro ton My Story: “Aminsan et inyanunsio na Gestapo a siopaman ya Estudyante na Biblia a mangitalirak ed sisisiaen to tan manpirma ed dokumenton mamaneknek ed satan, sikato so naikdan na kawayangan tan agla napasegsegang.” Nipaakar ed saramay agnampirma ed dokumento, oniay insulat to: “Mas nilabay da so manirap tan mananos a manalagar ed panaon a sikara lay sigpot a nibulos.” Akin ya ontan so talindeg da? Oniay impaliwawa na 80 años la natan a si Magdalena, ya asalambit diad gapo na akaunan artikulo: “Say pansiansian matoor ed si Jehova et mas importante nen say panggawa na antokaman pian nabilay labat. Say impanmatoor mi so amasiansia ed kagalangan mi.” *

[Paimano ed leksab]

[Litrato ed pahina 5]

Pinagalangan nen Jesus iramay pinaabig to

[Litrato ed pahina 7]

Papagalangan na saray Tasi nen Jehova so arum diad panginanabang da ed sikara na “maong a balita na kaabigan”