Magmaliw a Makabat​—Takotan so Dios!

‘Say takot ed si Jehova so sengegan na kakabatan.’—ULIRAN 9:10.

1. Akin ya ipapasen natan na dakel a totoo ya agnatalosan so ideyan itakot ed Dios?

 WALAY panaon sanen ipapasen nin komplimento so paneskribe ed sakey a too bilang matakot ed Dios. Natan, ipapasen la na dakel a karaanan tan agnatalosan so ideyan itakot ed Dios. Oniay nayarin itepet da, ‘No say Dios et aro, akin a sikatoy nepeg a takotan?’ Parad sikara, say kabaliksan na takot et negatibo tan makapagiwgiw ni ingen a liknaan. Balet, say tuan takot ed Dios et walaan na mas malaknab a kabaliksan tan, unong ya imanoen tayo, aliwa labat itan a liknaan odino emosyon.

2, 3. Anto so lalaktipen na puron takot ed Dios?

² Positibo so impangusar na Biblia ed ideyan itakot ed Dios. (Isaias 11:3) Satan so aralem a panangigalang tan panagrespeto ed Dios, sakey a mabiskeg a pilalek a sikatoy agnapaermen. (Salmo 115:11) Laktipen na satan so pangawat tan mapeget ya itulok ed saray moral ya estandarte na Dios tan say pilalek a manbilay unong ed ibabaga na Dios a duga odino aliwa. Ipapabitar na sakey a reperensya a satan a positibon takot et mangipapatnag na “importantin awawey parad Dios a manresulta ed makabat a kiwas tan say kipaliis ed amin a nengneng na kaugsan.” Matukoy so ibabaga ed sikatayo na Salitay Dios: ‘Say takot ed si Jehova so sengegan na kakabatan.’—Uliran 9:10.

³ On, say takot ed Dios so misiglaotan ed dakel ya aspekto na kimkimey na too. Aglambengat itan misiglaotan ed kakabatan noagta ontan met ed gayaga, deen, inkaaligwas, andukey a pambilay, ilalo, panagmatalek, tan kompiyansa. (Salmo 2:11; Uliran 1:7; 10:27; 14:26; 22:4; 23:17, 18; Gawa 9:31) Satan so maapit a misiglaotan ed pananisia tan aro. Diad tua, lalanoren na satan so interon pisisiglaotan tayo ed Dios tan ed kaparan totoo. (Deuteronomio 10:12; Job 6:14; Hebreos 11:7) Say takot ed Dios so mangilaktip ed mabiskeg a kombiksion a sikatayo so personal ya aasikasoen na mangatatawen ya Ama tayo tan sikato so akaparaan a mamerdona ed saray impakaluksoan tayo. (Salmo 130:4) Saray agmagbabawin marelmeng lambengat so nepeg ya onggiwgiw ed takot diad arap na Dios. *—Hebreos 10:26-31.

Aralen so Ontakot ed si Jehova

4. Anto so makatulong ed sikatayo pian ‘naaralan tayo so ontakot ed si Jehova’?

⁴ Lapud say takot ed Dios et makanakana pian sikatayoy makagawa na makabat iran desisyon tan makagamor na saray bendisyon na Dios, panon tayon ‘naaralan a maong so ontakot ed si Jehova’? (Deuteronomio 17:19) Dakel ya alimbawa na matakot-ed-Dios a lalaki tan bibii so nikurit ed Kasulatan pian ‘kibangatan’ tayo. (Roma 15:4) Pian natalosan tayo so peteg a kabaliksan na itakot ed Dios, morekdeken tayo so bilay na sakey ed saratan ya ehemplo, si Arin David na Israel.

5. Panon a naaralan nen David so takot ed si Jehova diad pampapastol to?

⁵ Impulisay nen Jehova so inmunan ari na Israel, si Saul, lapud takot to ed totoo tan kakulangan toy takot ed Dios. (1 Samuel 15:24-26) Diad biek a dapag, say impanbilay nen David tan say maapit a relasyon to ed si Jehova so pakabidbiran na takot to ed Dios. Manlapu la’d kalangweran to, si David so mabetbet a mangipapastol ed saray karnero nen ama to. (1 Samuel 16:11) Diad saray labin manpapastol si David a tangtangayen to so mabitewen a katawenan, atalosan to so takot ed si Jehova. Anggaman daiset labat so natalosan nen David no panon kaawang so uniberso, sikato so awalaan na dugan konklusyon—say Dios so manepeg tayon respetoen tan itandoro. “No umamengen ko so saray tawen mo, kimey na saray gamegamet mo, say bulan tan saray bitewen, ya  ingganam,” so insulat to ed saginonor, “anto ta so too a manonot ka ed sikato? Tan say anak na too, a sikato so dalawen mo?”—Salmo 8:3, 4.

6. Anto so alikna nen David sanen atebek to so inkatalonggaring nen Jehova?

⁶ Matukoy labat a nasagyat si David sanen inkompara to so inkamelanting to ed maaw-awang tan mabitewen a katawenan. Imbes ya onggiwgiw ed takot, satan a pikakabat so amakiwas ed sikaton mangidayew ed si Jehova tan mangibagay: “Saray tawen ipaliwawa ra so gloria na Dios; tan say sansinakoban iparungtal to so gawa na saray lima to.” (Salmo 19:1) Lapud ontan a panangigalang nen David ed Dios, sikato so lalon inmapit ed si Jehova tan apakiwas ya aralen tan tumboken iray ayadyarin paraan To. Isipen pa so nalilikna nen David sanen oniay inkanta to ed si Jehova: ‘Sika et balbaleg ka, tan managgawa ka na pankelkelawan iran bengatla. Sika so Dios a bukbukor. Ibangat mo ak ed dalan mo, O Jehova; manakar ak ed katuaan mo. Iyapasakey mo so pusok ya ontakot ed ngaran mo.’—Salmo 86:10, 11.

7. Panon a say takot nen David ed Dios so akatulong ed sikaton onlaban ed si Goliat?

⁷ Sanen inmataki iray Filisteo ed bansa na Israel, say siamera tan kapalduan piye a mibabakal da, si Goliat, so angantiaw ed saray Israelita, ya onia so ompatnag ya imbaga to: ‘Mamili kayo na sakey a laki ya onarap ed siak! No sikato so manalo, manlingkor kami ed sikayo.’ (1 Samuel 17:4-10) Pinmayakot si Saul tan say interon armada to—balet ta agtinmakot si David. Amta to a si Jehova lambengat so nepeg a takotan, aliwan say siopaman a too, anggan panon lay kabiskeg na satan. “Ondago ak ed sika dia ed ngaran nen Jehova na saray ehersito,” so imbaga nen David ed si Goliat, “tan naamtaan na saya ya amin a dagup a si Jehova agmangilaban ed panamegley na kampilan tan gayang: ta say bakal kien nen Jehova.” Panamegley na palsot to tan sakey a bato—tan diad tulong nen Jehova—apatumba nen David so higante.—1 Samuel 17:45-47.

8. Anto so naaralan tayo ed saray alimbawa ed Biblia nipaakar ed saray matakot ed Dios?

⁸ Nayarin aarapen tayo met iray mairap a babeng odino kakabusol a singa ed inarap nen David. Anto so gawaen tayo? Naarap tayo met iratan diad paraan na impangarap nen David tan say arum niran matoor nensaman, salanti, diad panamegley na maridios a takot. Say takot ed Dios so manaeg ed takot ed too. Si Nehemias, a matoor a lingkor na Dios, so amaseseg ed saray kapara ton Israelitas, a dedesdesen na saray kakabusol da: “Agkayo antakot ed sikara: nonoten yo so Katawan, a sikato so baleg tan makapataktakot.” (Nehemias 4:14) Diad tulong nen Jehova et tinmalona si David, Nehemias, tan arum niran matoor a lingkor na Dios diad impanumpal da ed saray asainmin dan inter na Dios. Nagawaan tayo met itan no walaan itayo na maridios a takot.

Arapen Iray Problema Tekep na Maridios a Takot

9. Diad antoran kipapasen ya impatnag nen David so takot ed Dios?

⁹ Sanen apatey nen David si Goliat, sikato so aminpiga nin pinambiktorya nen Jehova. Balet, say maimon a Saul so angigagaem a mamatey ed si David, diad unona et bengatbengat, insan tekep na kasiliban, tan diad kaunoran et panamegley na sakey ya armada. Anggaman impaseguro la nen Jehova ed si David a sikato so magmaliw ya ari, sikato so pigay taon nin nanamot-amot, akilaban, tan nanalagar ed panaon nen Jehova pian sikatoy magmaliw ya ari. Anggaman ed satan ya amin, impatnag nen David a sikato so tinmakot ed tuan Dios.—1 Samuel 18:9, 11, 17; 24:2.

10. Panon ya impatnag nen David so takot ed Dios anggaman ed kapeligroan?

¹⁰ Diad aminsan ya inkagawa, si David so nanamot ed kawalaan nen Akis, say ari ed Filisteon syudad na Gat, say binalegan nen Goliat. (1 Samuel 21:10-15) Saray lingkor na ari so angondena ed si David bilang kabusol na bansa ra. Panon so inkiwas nen David ed ontan a mapeligron kipapasen? Sikato so masimoon a nampikasi ed si Jehova. (Salmo 56:1-4, 11-13) Anggaman kinaukolan to so mankuankuanan a naatapis pian makatakas, amta nen David a si Jehova so talagan angiliktar ed sikato diad impanumang To ed saray sagpot to. Say interon-puson impanmatalek nen David ed si Jehova tan say kompiyansa to ed Sikato so pakapatnagan a si David so talagan walaay takot ed Dios.—Salmo 34:4-6, 9-11.

11. Singa si David, panon tayon nipatnag so maridios a takot legan a nasusubok?

¹¹ Singa si David, nipatnag tayo met so takot ed Dios diad panmatalek ed sipan ton tulongan to  itayon manalona ed saray problema tayo. “Ipiam ed Jehova so dalan mo; manmatalek ka met ed sikato: et sikato igawa to,” so kuan nen David. (Salmo 37:5) Ag-itan mankabaliksan ya ipalima tayo labat ed si Jehova iray problema tayo insan anggapo lay gawaen tayo, ya ilaloan tayo lan sikatoy manolbar ed problema tayo. Si David so aglambengat kinmerew na tulong ed Dios panamegley na pikakasi insan impalima to lan amin. Inusar to so abilidad to ed pisikal tan say pakasarag ton manisip ya inter nen Jehova ed sikato pian nasolbar toy problema to. Ingen, amta nen David ya ag-onaligwas so sagpot labat na too. Kanian nepeg ya ontan itayo met. No ginawa tayo lay anggaay nayarian tayo, nepeg tayon imatalek la ed si Jehova so arum niran bengatla. Diad tua et mabetbet ya anggapoy nagawaan tayo noag say manmatalek ed si Jehova. Diad ontan a kipapasen so pakapangipatnag tayon mismo na takot ed Dios. Naligliwa itayo ed impapuso iran balikas nen David: “Say pikakaaro ed Jehova wala ed saray ontakot ed sikato.”—Salmo 25:14.

12. Akin a nakaukolan tayon seryosoen iray pikakasi tayo, tan anton awawey so agtayon balot nepeg ya ipatnag?

¹² Nakaukolan tayo sirin a seryosoen iray pikakasi tayo tan say relasyon tayo ed Dios. Sano onasingger itayo ed si Jehova, nepeg a ‘sisiaen tayo a sikatoy wala, tan sikato so mananumang ed saray manaanap ed sikato.’ (Hebreos 11:6; Santiago 1:5-8) Tan sano tulongan to itayo, nepeg tayon ipatnag so ‘pisalsalamat’ tayo, unong ed insimbawa nen apostol Pablo ed sikatayo. (Colosas 3:15, 17) Agtayon balot aaligen iramay deneskribe na sakey ya eksperiensyadon alanaan a Kristiano: “Iisipen da a say Dios et singa sakey a serbidor a walad katawenan,” so inkuanto. “Sano walay nakaukolan da, tawagen da labat so Dios tan labay dan sikatoy onkiwas lan tampol. Tan sano naawat da lay nakaukolan da, sikato so paarawien da la.” Say ontan ya awawey et pakapatnagan na kakulangan na maridios a takot.

Sanen Naandi so Takot ed Dios

13. Kapigan so impakaandi na panagrespeto nen David ed Ganggan na Dios?

¹³ Lapud naeksperiensya nen David so tulong nen Jehova legan na kagogonigon to, lalon inmaralem so maridios a takot to tan apabiskeg so kompiyansa to ed Dios. (Salmo 31:22-24) Balet, diad amitlon inkagawa et naandi so takot nen David ed Dios, a nansumpal ed seryoso iran bengatla. Say inmuna et sanen impaiyalis to so kaban na sipanan nen Jehova diad Jerusalem panamegley na sakey a kariton imbes a sakbaten itan na saray Levita, unong ed Ganggan na Dios. Sanen si Uza, ya angulop ed kariton, so amemben ed Kaban  pian ag-itan natumba, sikato so inatey a tampol lapud “lingo” odino agmapagalang a kiwas to. On, ambelat so kasalanan nen Uza, ingen ta say makasengeg et naandi so suston panagrespeto nen David ed Ganggan na Dios a nansumpal ed makapasinagem ya agawa. Say kabaliksan na takot ed Dios et say panggawa ed saray bengatla unong ed uksoyan to.—2 Samuel 6:2-9; Numeros 4:15; 7:9.

14. Anto so resulta sanen impabilang nen David iray Israelita?

¹⁴ Diad saginonor, impabilang nen David iray lalakin mibabakal to lapud sugsog nen Satanas. (1 Awaran 21:1) Diad impanggawa to ed satan, naandi nen David so takot to ed Dios, a nanresulta ed impatey na 70,000 ya Israelita. Anggaman nagbabawi si David ed arap nen Jehova, sikato tan saramay walad kaliberliber to so nanirap a maong.—2 Samuel 24:1-16.

15. Anto so sengegan na inkaplag nen David ed seksual a kasalanan?

¹⁵ Say sananey nin inkagawa a naandi so takot nen David ed Dios et say imoral a relasyon to ed si Batseba, say asawa nen Urias. Amta nen David a kasalanan so pikalugoran odino anggan say panibeg ed asawa na arum. (Exodo 20:14, 17) Ginmapo so problema sanen anengneng nen David si Batseba a manaames. No walay suston takot nen David ed Dios, tampol ya agto la komon ninengneng tan ninonot iman. Imbes, si David so mapatnag a ‘linminggis’ ed si Batseba anggad say pantindek to et anaeg la ed takot to ed Dios. (Mateo 5:28; 2 Samuel 11:1-4) Alingwanan nen David so maapit a pisiglaotan nen Jehova ed mismon bilay to.—Salmo 139:1-7.

16. Antoran nansumpalan so asagmak nen David lapud impankasalanan to?

¹⁶ Say imoral a relasyon nen David ed si Batseba so nambunga na sakey ya ilalak. Kayarin tuloy na satan, imbaki nen Jehova si propeta Natan pian iwalwal so kasalanan nen David. Sanen amorian siansia nen David so kasalanan to, alikna to lamet so takot ed Dios tan sikatoy nagbabawi. Sikato so akikasi ed si Jehova pian sikatoy agnitalirak odino naekal ed sikato so masanton espiritu To. (Salmo 51:7, 11) Si David so pinerdona nen Jehova  kanian kinmepa so ambelat a dusa ed sikato, balet sikato so agsinalimbengan nen Jehova manlapud amin a mauges iran nansumpalan na saray ginawa to. Inatey so ilalak nen David, tan niwala so gonigon tan desyang diad pamilya to manlapu la’d saman. Agaylan belat itan a bayar na kakulangay takot ed Dios!—2 Samuel 12:10-14; 13:10-14; 15:14.

17. Iyilustra pa so sakit na liknaan ya epekto na makasalanan iran gawa.

¹⁷ Natan, say ag-itakot ed Dios diad moral iran pamaakaran so walaan met na seryoso tan manbayag iran pansumpalan. Isipen pa so ansakisakit a liknaan na sakey a malangwer nin asawan bii sanen naamtaan to ya agnanmatoor ed sikato so Kristianon asawa to a mantratrabaho ed arum a bansa. Abikotkot la kalamor ed impakabigla tan pirmin ermen to, a pinepetan to lay lupa to legan a mannangnangis. Kaunongan kabayag kasi so panaon ya onlabas insan napapawil so panagmatalek tan respeto to ed asawa to? Napaliisan so ontan iran makapasinagem a pansumpalan no talagan walay takot ed Dios.—1 Corinto 6:18.

Natulongan Itayo na Takot ed Dios Pian Ag-itayo Mankasalanan

18. Anto so gagala tan metodo nen Satanas?

¹⁸ Maples so panederal nen Satanas ed moral iran estandarte na sayan mundo, tan labalabay ton deralen iray tuan Kristiano. Pian nagawaan to itan, aanamoten to so direktaan a tuloy a mangimpluensya ed puso tan kanonotan tayo, salanti, diad panamegley na saray sentido tayo, nagkalautla la ed mata tan layag tayo. (Efeso 4:17-19) Panon so ikiwas yo sano walay agnailaloan ya anengneng yon imoral iran litrato odino totoo, odino nadngel yo iran imoral a salita?

19. Panon ya atalonaan na sakey a Kristiano so sakey a tukso lapud takot to ed Dios?

¹⁹ Nonoten pa so kipapasen nen André, * sakey a Kristianon matatken tan ama, tan doktor diad Europa. Sano sanlabin man-duty ed ospital, walaray bibiin katrabahoan to a mangipepeket ed danganan to na antikey tan de-kampuso iran sulat, a manasagyat ed sikaton mirelasyon ed sikara diad sekso. Si André so mapekder ya angipulisay ed pangaanamot da. Niarum ni, pian niyarawi to so inkasikato ed mauges a kaliberliber, sikato so nananap na trabaho ed arum a pasen. Say takot nen André ed Dios so talagan makabat a tuloy tan akagamoran to na saray bendisyon, lapud sikato natan et part-time a manseserbi diad sangan opisina na saray Tasi nen Jehova diad kawalaan ton bansa.

20, 21. (a) Panon itayon natulongan na takot ed Dios pian napaliisan tayo so pankasalanan? (b) Anto so konsideraen ed ontumbok ya artikulo?

²⁰ No pinonot na sakey a too iray mauges a bengatla, satan so mangitonton ed kipapasen na kanonotan ya italirak to la so mablin relasyon to ed si Jehova bilang kasalat ed bengatlan agto kanepegan. (Santiago 1:14, 15) Diad biek a dapag, no tatakotan tayo si Jehova, paliisan tayo—ya arawian tayo ni ingen—iray totoo, pasen, gawagawa, tan panligliwaan a mamakapuy ed katooran tayo ed moral. (Uliran 22:3) Antokaman so kababaingan odino sakripisyo a nalalanor, ag-itan nikompara ed pakabalang ed panangabobon na Dios. (Mateo 5:29, 30) No walay takot tayo ed Dios, agtayon balot gagalaen a nengnengen so antokaman ya imoral, a mangilaktip ed antokaman a klase na pornograpiya, noagta ipaliis tayo iray mata tayo ed ‘pannengneng ed andi-kakanaan.’ No ontan so gawaen tayo, makapanmatalek itayo ed si Jehova a ‘pasiglaten’ odino pansiansiaen to itayon mabilay tan iter to so amin a talagan nakaukolan tayo.—Salmo 84:11; 119:37.

²¹ On, say ikiwas tekep na puron takot ed Dios so lawas makabat a kurang. Lapuan met itan na tuan liket. (Salmo 34:9) Nipalinew itan diad ontumbok ya artikulo.

[Saray paimano ed leksab]

Kasin Nipaliwawa Yo?

• Antoran Makristianon kalidad so lalaktipen na takot ed Dios?

• Panon a nadaeg na takot ed Dios so takot ed too?

• Panon tayon nipatnag so dugan panmoria ed pikakasi?

• Panon itayon natulongan na takot ed Dios pian ag-itayo makapankasalanan?

[Tepetepet Parad Panagaral]

[Litrato ed pahina 23]

Naaralan nen David so ontakot ed Dios sanen inumameng to iray pinalsa nen Jehova

[Saray litrato ed pahina 24]

Panon so ikiwas mo sano agnailaloan a nidunget ka ed makapatukson kipapasen?