Say Kawes a Gawa’d Bago tan Espiritualidad
Say Kawes a Gawa’d Bago tan Espiritualidad
SI Arin Louis IX na Pransya so nansulong na kawes a gawa’d bago. Diad tulong na satan a klase na kawes, si Sir Thomas More so makapansiasiansian aliing nensaman diad loob na 19 odino 20 oras ed kada agew diad loob na pigaran bulan sanen nanaral na abogasiya legan na inkatobonbalo to. On, kabkabat si More a lanang ya akasulong na ontan a kawes. Tan sanen pinatey so Arsobispo na Canterbury, a si Thomas Becket, diad Katedral na Canterbury, ag-inilaloan so pakadiskobre ed sikato na ontan a pandalem a kawes . Anto so pampadparaan na sarayan maawaran a totoo? Ginetma ra a sakitan so laman dan dili diad impansulong da na kawes a gawa’d bago.
Say kawes a gawa’d bago et sakey a magasal a kawes a gawa ed bago na kanding ya uusaren bilang pandalem, pian nagatel so laman tan nagasgas so baog, a pansengegan na pirmin ag-inkakomportable. Labalabay met itan a panayaman na kuto. Nibaga a si Thomas Becket so nansulong na kawes a gawa’d bago pati karsonsilyo a gawa’d ontan met a materyal, ya anggad “nanayaman la itan na saray kuto.” Kayari na koma-16 a siglo, say bago na kanding so sasalatan no maminsan na pino iran alambri ya ontuturok-turok ed laman. Ontan so ginawa pian lalon makalikna na ag-inkakomportable imay mansulong.
Unong ed sakey a reperensya, say gagala na kawes a gawa’d bago, a singa ed arum a nengneng na panagpasakit ed laman, et pian “kontrolen iray makasalanan a pilalek na laman, a diad ontan et nabayuboan so mas maespiritual a disposisyon tan kabibilay.” Aliwa lambengat a saray asetiko so nansulong na ontan; anggan saray ordinaryon totoo tan saramay akaposisyon ed gobierno, so kabkabat met ya angusar ed satan. Anggan natan et walaray relihyoson muyongan a siansia nin mangaagamil na ontan.
Kasin say pansulong na kawes a gawa’d bago odino pantepel ed nanduruman nengneng na panamairap-ed-dili et pagmaliwen ton maespiritual so sakey a too? Andi, agmandedependi ed saratan ya agamil so pagmaliw a maespiritual. Diad tua, sinuppiat nen apostol Pablo so ‘panagdusa ed laman.’ (Colosas 2:23) * Imbes, say tuan espiritualidad so manlalapud pananap na pikakabat ed Dios diad maseet a panaral ed Salita to tan pangiyaplika ed satan a pikakabat diad bilay na sakey a too.
[Paimano ed leksab]
^ par. 5 Parad kaaruman a diskusyon nipaakar ed sayan tema, nengnengen so Awake! Oktubre 8, 1997, “The Bible’s Viewpoint: Is Asceticism the Key to Wisdom?”
[Picture Credit Lines ed pahina 32]
Arin Louis IX, tagey: Inala ed libron Great Men and Famous Women; Thomas Becket, pegley: Inala ed libron Ridpath’s History of the World (Vol. IV); Thomas More, leksab: Inala ed libron Heroes of the Reformation, 1904