Say Takot ed Dios​—“Bangat na Kakabatan”

SAY tuan kakabatan so angorganisa na baleg a piesta. “Imbaki to iray katulong ton bibii ya onla ra’d sankatageyan a pasen ed baley ta ibando ra: ‘Loob kayo, sikayon totoon anggapoy amta!’ Insan diad toon makulangkulang kuan to, ‘Gala dia, mangan ka’d kakanen ya imparaan ko tan inum ka ed alak a tinimplak. Taynan moy ulopan da ray totoon anggapoy amta, tan manbilay ka. Mankurang ka’d dalan na pakaamta.’”—Uliran 9:1-6, Maung a Balita.

Say pampiesta diad dulang na kakabatan so agbalot mansumpal ed antokaman a mauges odino makapasakit. Say italineng ed maridios a kakabatan a lugan na pinuyanan iran proverbio tan say pangawat ed panangibangat na satan so talagan manresulta ed maabig. Ontan iray makabat a proverbio a nikurit diad Uliran 15:16-33. * Say italineng ed simbawa na sarayan antikey a proverbio so makatulong ed sikatayo pian magmaliw a kontento ed daiset, magmaliw a progresibo, tan nalikna so liket ed panagbilay. Makatulong met itan ta pian makapanggawa itayo na makabat iran desisyon tan makapansiansia itayo ed dalan a mamaarap ed bilay.

Sano Magmaong so Daiset

“Magmaong so melag, a tekep na takot ed Jehova, nen say baleg a kayamanan tan gonigon so katekep to,” so kuan nen Arin Solomon na kadaanan ya Israel. (Uliran 15:16) Kakulangkulangan so pangibaliwala na sakey ed Manamalsa tan gawaen ton manunan kalat ed bilay to so panggegemtan ed materyal a kaykayarian. Say ontan a klase na bilay so pirmin makapadetdet tan dakel so kapagaan. Agaylan pakaskasi so sakey no namoria ton say interon bilay to so nagmaliw a maapa tan andiay kabaliksan sano tinmakken la! Peteg ya aliwan makabat so pantipon na dakel a kaykayarian ya atekepan na “gonigon.” Agaylan abig so pakaaral ed sekreto na pagmaliw a kontento tan manbilay unong ed satan! Nalikna so peteg ya inkakontento diad itakot ed si Jehova—diad pisisiglaotan ed sikato—aliwan diad materyal a kaykayarian.—1 Timoteo 6:6-8.

Diad pangidadanet nen Solomon ed babaleg a kablian na maabig a relasyon ed arum nen say inkadaakan ed materyal, oniay inkuan to: “Magmaong so pangugtoan ya ag-agayep, a kawalaan na aro, nen say pinataba a baka tan kawalaan na gula.” (Uliran 15:17) On, say panaaroan ed loob na sankaabungan so mas papablien nen say pakawalaan na daakan a tagano. Diad sakey a pamilya na mansusulon ateng, nayarin daiset so materyal a kaykayarian. Diad arum a daldalin et simplin tagano so nayarian da labat ya itarya. Balet, mas nabilay so pamilya diad pasen a walay panaaroan tan panamabli.

Anggan diad saray pamilya a sipor lan wala so panaaroan, nayarin onlesa iray problema. Nayarin sakey a membro na pamilya so makapangibaga odino makapanggawa na bengatlan makaopendi  ed sananey. Panon so nepeg ya ikiwas na samay naopendi? Oniay ibabaga na Uliran 15:18: “Say maisasanok a too patuloen to so kolkol; balet say matantan a manpasnok paepasen to so sangsangan.” Say ebat a mabanayar, aliwan maisasanok, so mamawala na kareenan. Onaplika met iyan simbawa na proverbio diad arum niran aspekto na bilay, laktip la iray aktibidad ed kongregasyon tan diad mapublikon ministeryo.

Sano ‘Say Basbas Nagawa a Polong’

Ipapabitar na ontumbok a proverbio so pandumaan na samay agmangiimano ed kakabatan tan saramay mangiimano ed satan. “Say dalan na mangiras sikato so singa alar a sabisabit,” so kuan na makabat ya ari, “balet say basbas na maptek nagawa a polong.”—Uliran 15:19.

Say alar a sabisabit et talagan masabit tan nanturok-turok. Say mangiras a too so maniisip ed amin lan makasbel tan ibabaraan to iratan pian nikatunongan to so agto pakapangigapo ed sakey a kimey. Diad biek a dapag, saray matunong so agmanpapaga ed saray babeng a nayarin mangamper ed sikara. Sikaray makulikuli a mankikimey tan aasikasoen dan tampol so kikimeyan. Kanian napapaliisan da so dakel a masabit a problema a nayarin kidungetan da no mapaulyan ira. Say dalan da so “nagawa a polong,” salanti, maaligwas. Nigagapo ra so kimey da tan manliket ira ed iyaaligwas na satan.

Konsideraen pa bilang alimbawa so nipaakar ed igamor na suston pikakabat ed Salita na Dios tan say iyaaligwas ed inkatakken ed espiritual. Nakaukolan so pansagpot. Nayarin magmainomay ya ibaraan na sakey a too a limitado so edukasyon to, agmarunong a manbasa, odino makapuy so memorya to diad agto panseseet ed personal a panagaral na Biblia. Agaylan abig a tuloy no ag-iratan isipen bilang makasbel ed igamor na pikakabat! Anggan limitado so abilidad tayo, nayarian tayoy mansagpot pian napaaligwas tayoy dunong tayo ed panagbasa tan say pakatalos tayo ed babasaen tayo, a nayarin mangusar na diksionaryo sano nakaukolan. Makagamor itayo na pikakabat tan onaligwas itayo ed espiritual no walaan itayo na positibon awawey.

Sano ‘Manggayaga so Ama’

“Say makabat ya anak pagayagaen to so ama,” so inkuan na ari na Israel, “balet say maatiw a too mudmoraen to so ina to.” (Uliran 15:20) Agta  manggayaga so atateng sano onkiwas a makabat so ananak da? On, nepeg ya ipasal tan ibangat na saray ateng so ananak da pian nagamoran da so ontan a maabig iran resulta. (Uliran 22:6) Balet agaylan makapaliket ed atateng so sakey a makabat ya anak. Ingen, say makulangkulang ya anak so pansengegan na agmanganggan ermen da.

Diad impangusar ed terminon “liket” diad sananey a kipapasen, oniay inkuan na makabat ya ari: “Say inkaatiw sikato so liket ed andian na kakabatan; balet say too a makatalos peteken to so panakar to.” (Uliran 15:21) Saraman so andian na kakabatan so naliliketan ed makulangkulang a paneelekan tan panliliket ya agmangiiter na tuan inkapnek. Balet, say toon makatebek et namomoria to so kakulangkulangan na pagmaliw a ‘maaro ed likeliket a lalo nen say dia ed Dios.’ (2 Timoteo 3:1, 4) Lapud panutumbok to ed maridios iran prinsipyo, sikatoy mansiasiansian maptek tan lawas ton nipepetek so dalan to.

Sano “Wala so Nagawaan”

Say pambilay a mitunosan ed saray prinsipyo na Dios so makagunggona diad arum niran aspekto na bilay tayo. Oniay ibabaga na Uliran 15:22 unong ed New World Translation: “Onsasaew iray plano no anggapo so mareen a pantotongtong, balet diad kinaraklan na mananimbawa et wala so nagawaan.”

Say mareen a pantotongtong et mankabaliksan na maamot balet ta matuan pitatalosan ed baetan na saray indibidual. Say Hebreon salita a nipatalos a “mareen a pantotongtong” so nipatalos a “maapit ya ulopan” diad Salmo 89:7 ed New World Translation. Ipapatnag na saya so inkaapit ed pitatalosan. Say mareen a tongtongan et aliwan ataptapew a pantotongtong noagta balang sakey so mangibabalikas ed puron kanonotan tan liknaan da. Sano saray asawan lalaki tan bibii ontan met ed saray anak tan atateng et bulos a mitalosan ed sakey tan sakey ed onian paraan, wala so kareenan tan pankakasakey ed limog da. Balet no anggapo so mareen a pantotongtong, magmaliw ya agmaligen tan maproblema so bilay na pamilya.

Sano manggawa itayo na importantin desisyon, makabat so italineng ed simbawan: “Diad kinaraklan na mananimbawa et wala so nagawaan.” Alimbawa, sano mandedesidi itayo no anton medikal a panagtambal so pilien tayo, agta makabat so onkonsulta ni ed komadua odino komatlon espisyalista, nagkalautla no seryoso iran pamaakaran so nalalanor?

Importantin tuloy met so pakawalaan na dakel a mananimbawa diad pangasikaso ed espiritual iran pamaakaran. Sano saray mamatatken et ontupleg ed sakey tan sakey tan usaren da so kakabatan da bilang grupo, “wala so nagawaan.” Niarum ni, saray balon aturon manangasikaso so nepeg ya agmasuyat ya onkerew na simbawa manlapud saray abayag la tan mas eksperiensyadon mamatatken, nagkalautla no mairap a pamaakaran so kaukolan ya asikasoen.

Sano Wala so “Liket ed Ebat”

Antoy nayarin maabig a resulta na panagsalitan atekepan na aralem a pakatalos? “Say too walaan na liket ed ebat na sangi to,” so inkuan na ari  na Israel, “et say salita ed kanepegan to, agayla so abig to!” (Uliran 15:23) Agta manliket itayo sano tinalineng so ebat odino simbawa tayo insan nanresulta ed maabig? Balet pian magmaliw ya epektibo so simbawa tayo, nepeg a nakapet na satan so duaran kakaukolanen.

Unona, nepeg a say simbawa et malet a nibase ed Salita na Dios, say Biblia. (Salmo 119:105; 2 Timoteo 3:16, 17) Insan, nepeg ya ibalikas itan diad dugan panaon. Anggan saray matuan salita ya imbalikas ed agmatukoy a panaon et makaderal. Alimbawa, say panimbawa lan tampol ed sakey ya agni nadngel so amin a kaukolan ton ibaga et aliwan makabat nisay makatulong. Agaylan importante so pagmaliw tayon ‘masiglat ya ondengel tan mapalna ed pansalita’!—Santiago 1:19.

“Say Dalan na Bilay Mamatagey”

Oniay ibabaga na Uliran 15:24: “Ed makabat say dalan na bilay mamatagey; pian makaarawi a manlapu ed Sheol ed leksab.” Say too ya onkikiwas tekep na aralem a pakatalos so mankukurang ed basbas ya agmamaarap ed Sheol, say kaslakan a lubok na katooan. Aarawian to iray makaderal ya agamil a singa say sebel a relasyon ed sekso, panangabuso ed druga, tan panagbuanges—a diad ontan et napapaliisan to so masakbay ya ipapatey. Say dalan to so ompugta ed bilay.

Diad pidumaan, imanoen pa so dalan na saramay andian na aralem a pakatalos: “Si Jehova bagoten to so abung na mapangta; balet iletneg to so ketegan na balo a bii. Saray mauges a kanonotan sikara so makapadimla ed Jehova; balet saray makapaliket a salita sikara so malinis. Say maagum ed tubo gonigonen to so dili ya abung to; balet say manggula ed saray [pasuksok] manbilay.”—Uliran 15:25-27.

Diad pangibabangat ed sikatayo no panon a napaliisan so kaslakan a patit, oniay inkuan na ari na Israel: “Say puso na maptek aralen to so onebat; balet say sangi na marelmeng manibong na mauges a bengabengatla.” (Uliran 15:28) Agaylan makanakana so simbawa na sayan proverbio! Saray andiay-kakanaan tan makulangkulang ya ebat a basta labat ompapaway ed sangi so mataltalag a manreresulta ed maabig. Sano ikonsidera tayo so nanduruman sengegan a makaapekto ed sakey a pamaakaran, laktip la iray kipapasen tan liknaan na arum, maseguron agtayo labay so mansalita na bengatlan pagbabawian tayo lanlamang.

Anto sirin so nagunggona ed itakot ed Dios tan pangawat ed panangibangat to? Oniay ebat na makabat a too: “Si Jehova arawi a manlapu ed marelmeng; balet denglen to so pikakasi na maptek.” (Uliran 15:29) Say tuan Dios so arawi ed saray marelmeng. Ibabaga na Biblia a “say  mangiyarawi ed layag to manlapu ed pandengel ed tunong, anggan say pikakasi to sikato so makapadimla.” (Uliran 28:9) Saramay walaan na takot ed Dios tan manggugunaet a manggawa na maptek ed imaton to so bulos a makaasingger ed sikato tan sigpot a makapanmatalek a dengelen to ra.

No Anto so ‘Mamaliket ed Puso’

Diad impangusar nen Solomon ed makapatenyeg-kanonotan a panangikompara, oniay inkuan to: “Say liwawa na saray mata panliketen to so puso; et saray maong a balita patabaen da so saray pukel.” (Uliran 15:30) Saray pukel so ‘napataba’ sano napano iratan na utek. Diad ontan et onkasil so interon laman tan napaliket so puso. Tan say maliket a puso et napatnagan diad maliwliwawan kamataan. Ontan so epekto na maabig a balita!

Agta saray balita nipaakar ed ilalaknab na panagdayew ed si Jehova diad sankamundoan so peteg a mamapaseseg ed sikatayo? Talagan napapabiskeg itayon mibiang a nagkalalo diad ministeryo sano nakakabatan tayo so amin a nagagawaan diad kimey a panangipulong ed Panarian tan panaggaway-babangatan. (Mateo 24:14; 28:19, 20) Saray eksperiensya na saramay mamibidbir ed si Jehova bilang Dios da tan onkakamang ed tuan panagdayew so makapaliket a tuloy ed kapusoan tayo. Lapud walaan na baleg ya epekto so “maong a balita a manlapu ed arawi a dalin,” agaylan importante sirin ya iter tayo so suston report tayo tan sinononot a mangireport ed nagagawaan tayo diad ministeryo!—Uliran 25:25.

“Say Panagpaabeba Unona ed Dayew”

Diad pangidadanet ed kablian na pangawat ed nanduruman nengneng na disiplina, oniay ibabaga na makabat ya ari: “Say layag ya ondengel ed panamaat na bilay manayam ed saray makabat. Say mangiwaklit na panangibangat mudmoraen to so dili a kamarerwa to; balet say ondengel ed panamaat makagamor na pakatalos.” (Uliran 15:31, 32) Say panamaat, odino disiplina, ya onsabi ed puso na too insan onkiwas unong ed satan, so mamaaralem ed pakatalos to. Agpankelawan a say “panaklay na panangibangat” so mangeekal ed ‘inkaatiw a nisinger ed puso na ugaw’! (Uliran 22:15) Say sakey ya ontatalineng ed disiplina odino panangibangat so makakagamor met na dugan motibo. Diad biek a dapag, say agmangawat na disiplina so mangipupulisay ed bilay.

Talagan makagunggona so pangawat ed pananisiplina na kakabatan tekep na kapaabebaan. Say panggawa ed satan so aglabat manresulta ed inkakontento, iyaaligwas, liket, tan italona ed kimey noagta mansumpal met ed gloria tan bilay. Oniay impanampot na Uliran 15:33: “Say takot ed Jehova sikato so bangat na kakabatan; et say panagpaabeba unona ed dayew.”

[Paimano ed leksab]

[Litrato ed pahina 17]

Say panaaroan ed loob na ayaman so mas papablien nen say pakawalaan na dakel a naakan

[Litrato ed pahina 18]

Anggaman walaan itayo na saray limitasyon, say positibon awawey so ontulong ed sikatayon makagamor na pikakabat

[Litrato ed pahina 19]

Say mareen a pantotongtong et panangibalikas ed puron kanonotan tan liknaan na sakey tan sakey

[Litrato ed pahina 20]

Amta yo ta no panon a ‘saray pukel et napataba ed saray maong a balita’?