Takotan si Jehova​—Magmaliw a Maliket!

“Maliket so too ya ontatakot ed si Jehova.”—SALMO 112:1, NW.

1, 2. Anto so nagamoran no ipatnag so takot ed si Jehova?

 ALIWAN mainomay a nagamoran so liket. Say peteg a liket so akadepende ed panggawa na duga iran desisyon, panggawa na maptek, tan ipaliis ed mauges. Inter na Nanggawa ed sikatayo, si Jehova, so Salita to, say Biblia, pian nibangat itayo no panon a panggayagaan so sankaabigan a dalan na bilay. Diad pananap tan panumbok ed panangidirehi nen Jehova, ya ipapatnag tayo so takot ed Dios, nayarian tayo so magmaliw a peteg a napnek tan maliket.—Salmo 23:1; Uliran 14:26.

² Diad sayan artikulo, konsideraen tayo iray ehemplo ed Biblia tan ed modernon panaon, a mangipapabitar no panon a say puron takot ed Dios so mangiter na biskeg ed sakey pian natalonaan toy desdes a manggawa na mauges ontan met ed inkakpel pian manggawa na maptek. Natalosan tayo a say maridios a takot so mangiter ed sikatayo na liket, a napakiwas itayon mangipetek ed lingon kurang, a singa ginawa la nen David. Namoria tayo met a say takot ed si Jehova so mabmablin nipatawir na atateng ed ananak da. On, ipapaseguro ed sikatayo na Salitay Dios: “Maliket so too ya ontatakot ed si Jehova.”—Salmo 112:1, NW.

Pakagamor Lamet ed Naandin Liket

3. Anto so akatulong ed si David pian makabangon manlapud impankasalanan to?

³ Unong ed kinonsidera tayo la ed inmunan artikulo, walay amitlon inkagawa a naandi nen David so manepeg a takot to ed Dios kanian sikatoy akapankasalanan. Balet, say inkiwas to ed pananisiplina nen Jehova so angipatnag a sikatoy talagan walaan na takot ed Dios. Say panangigalang tan respeto to ed Dios so amakiwas ed sikaton mangaksobi ed kasalanan to, mangipetek ed kurang to, tan mangipawil lamet ed maong a relasyon to ed si Jehova. Anggaman saray kasalanan to et sengegan na impanirap to tan saray arum, say puron panagbabawi to so akagamoran to na nantultuloy a tulong tan panamendisyon nen Jehova. Say alimbawa nen David so seguradon mamabiskeg met  ed saray Kristiano natan ya akagawa na ambelat a kasalanan.

4. Panon a makatulong so takot ed Dios pian nagamoran lamet na sakey a too so liket to?

⁴ Ikonsidera pa so kipapasen nen Sonja. * Anggaman manlilingkor bilang sigpot-panaon ya ebanghelisador, si Sonja so akapiulop ed mauges iran kakaiba kanian alanor ed agmakristianon kondukta, tan sikatoy kinaukolan a dispelosipen ed Kristianon kongregasyon. Sanen amoria to so kipapasen to, ginawa nen Sonja so amin a nakaukolan pian napapawil so relasyon to ed si Jehova. Sinmabi so panaon et sikato so akapawil ed loob na kongregasyon. Anggaman ed satan ya amin, agbalot sinmuko si Sonja ed pilalek ton manlingkor ed si Jehova. Diad saginonor, sikato lamet so linmoob ed sigpot-panaon a panagpayunir. Insan, sikato so akapiasawa ed napanuliranan a Kristianon matatken, tan natan et sikara so maliket a manlilingkor diad kongregasyon. Anggaman nanermenan nen Sonja so temporaryon inkasipa to manlapud basbas na Kristiano, sikato so maliket ya akapawil lapud takot to ed Dios.

Magmaong Lay Manirap Nen say Mankasalanan

5, 6. Ipaliwawa no panon tan akin ya agpinatey nen David si Saul diad amiduan pankanawnawa.

⁵ Siempre, magmaong no napaliisan la na sakey so pankasalanan lapud takot to ed Dios. Tua itan ed biang nen David. Nensaman, sanen si David so uusilan na talon libon sundalo, linmoob si Saul ed ungib—diad mismon ungib a panaamotan nen David tan saray bataan to. Sikato so sinagyat na saray bataan to a pateyen to la si Saul. Agta iyaawat la nen Jehova ed lima nen David so kabusol to? Si David so ag-aliklikas ya inmasingger ed si Saul tan ginayat to so saloy na kawes nen Saul. Lapud takot nen David ed Dios, sikato so akonsiensia anggaman agmakapatey iman a ginawa to. Pinatayak nen David iray agresibon bataan to, tan oniay imbaga to: “Si Jehova isebel to a gawaen ko so saya a bengatla ed katawan ko, a nilanaan nen Jehova.” * —1 Samuel 24:1-7.

⁶ Diad tinmumbok ya agawa, nankampamento si Saul ed labi, tan sikato tan say amin a sundalo to so akaugip a maong “lapu ed sakey a maitlek ya ugip a nanlapu ed Jehova.” Si David tan say makpel a kaanakan ton si Abisai so linmoob ed pegley na kampo tan akaalagey ira ed abay na naugi-ugip a Saul. Labay nen Abisai a pateyen la si Saul, balet sikato so inamper nen David, ya oniay intepet to: “Siopa so makapangiyunat na lima to sumpa ed nilanaan nen Jehova tan andi-kasalanan?”—1 Samuel 26:9, 12.

7. Anto so angamper ed si David pian agmankasalanan?

⁷ Akin ya agpinatey nen David si Saul anta diad amiduan pankanawnawa et nayarian to komon a gawaen itan? Lapud mas tinakotan to si Jehova nen say si Saul. Si David so akaparaan a manirap no nakaukolan imbes a mankasalanan lapud sikatoy walaan na manepeg a takot ed Dios. (Hebreos 11:25) Sikato so walaan na nagnap a kompiyansa ed panangasikaso nen Jehova ed totoo To tan ed sikato bilang indibidual. Amta nen David a say pangunor tan panmatalek ed Dios et pakagamoran na liket tan dakel a bendisyon, bangta say pangibaliwala ed Dios et pakabalangan to na panangabobon na Dios. (Salmo 65:4) Amta met nen David a sumpalen na Dios so insipan To ed si David a magmaliw ya ari tan ekalen to si Saul unong panaon tan paraan To.—1 Samuel 26:10.

Say Itakot ed Dios so Pakagamoran na Liket

8. Panon ya onkanan alimbawa so awawey nen David diad silong na pananesdes?

⁸ Bilang Kristiano, nailaloan tayo so panagbalaw, panamasegsegang, tan arum niran subok. (Mateo 24:9; 2 Pedro 3:3) No maminsan et nayarin naeksperiensya tayo ni ingen iray problema ed saray kapara tayon managdayew. Balet, amta tayon nanenengneng nen Jehova so amin a bengatla, narerengel to iray pikakasi tayo tan, diad dugan panaon to et ipetek to iray pamaakaran unong ed linawa to. (Roma 12:17-21; Hebreos 4:16) Sirin, imbes a takotan tayo iray onsusumpa ed sikatayo, takotan tayo so Dios tan manilalo itayo ed panangiliktar to. Singa si David, ag-itayo ombawi, nisay ikompromiso iray matunong a prinsipyo pian napaliisan labat so kairapan. Diad kaunoran, mangitarok itan na liket. Balet panon?

9. Mangiter na alimbawa no panon a say takot ed Dios so manresulta ed liket anggaman ed panamasegsegang.

 ⁹ Oniay insalaysay na sakey ya abayag lan misionaryo diad Aprika: “Nononoten ko so alimbawa na sakey ya ina tan say tinedyer lan anak ton bii a lapud neutralidad da bilang Kristiano et ag-ira analiw na political party card. Sikara so maruksan inataki na grupo na lalaki insan da ira pinasempet. Diad panaakar da, niligliwa na ina so manak-akis ya anak to, a naiirapan a makatalos no akin ya agawa iman. Agda iman panliketan, balet walaan ira na malinis a konsiensia. Diad saginonor, sikara so malikeliket lapud inunor da so Dios. No analiw ira na political party card, panliketan ira na samay grupo na lalaki. Sikara komon so inikdan da na iinumen tan sinayawan da ira anggad makasabi ra ed abung da. Balet amta na tinedyer tan say ina to a no akikompromiso ira, sikara so sankaermenan a totoo ed mundo.” Apaliisan da itan lapud walaan ira na takot ed Dios.

10, 11. Anto so maabig iran resulta na intakot ed Dios na sakey a bii?

¹⁰ Say pangipatnag na takot ed Dios so manresulta met ed liket sano nasusubok nipaakar ed panangigalang ed inkasagrado na bilay. Sanen ilulukon nen Mary so komatlon anak to, sikato so kinombinse na doktor a paekal to lay lukon to. “Delikado so kipapasen mo,” so inkuan na doktor. “Kapiganman et nawalaan kay komplikasyon tan ompatey ka ed loob na 24 oras. Ompatey met so ugaw. Antokaman so kipapasen, agnigarantiya no normal so ugaw.” Si Mary so papairayalan la na Biblia ed saray Tasi nen Jehova balet agni abautismoan. Oniay inkuan nen Mary: “Anggaman ontan, denesidik lan panlingkoran si Jehova, tan determinado ak ya ontulok ed sikato, antokaman so nagawa.”—Exodo 21:22, 23.

¹¹ Legan na panlulukon to, nantultuloy ya okupado si Mary ed panaaral to na Biblia tan ed pangaasikaso to ed pamilya to. Insan nianak la so ugaw. “Medyo mairap so impandages ko ed sayan ana’ko nen samay duaran inmuna, balet anggapo so grabe iran komplikasyon,” so inkuan nen Mary. Say takot ed Dios so akatulong ed si Mary pian nawalaan na maong a konsiensia tan agnambayag et sikatoy abautismoan. Sanen binmaleg met la imay ugaw, naaralan to met a takotan si Jehova, tan natan et sikato so manseserbi la ed sakey ed saray sangan opisina na saray Tasi nen Jehova.

‘Pakasil Yoy Inkasikayo ed si Jehova’

12. Panon a say takot ed Dios so amakasil ed si David?

¹² Say takot nen David ed si Jehova so aglambengat angamper ed sikaton manggawa na kasalanan. Satan so amabiskeg ed sikato ya onkiwas a determinado tan sikakabat diad silong na mairap iran kipapasen. Diad loob na sakey taon tan apat bulan, nanamot si David tan saray bataan to ed Ziklag diad probinsya na Filisteo, lapud uusilan ira nen Saul. (1 Samuel 27:5-7) Sanen anggapo iray lalaki, pinoolan na saray linmusob ya Amalekitas so syudad tan inawit da so amin a kaasawaan, ananak, tan saray pulok na lalaki. Sanen kasempet da tan anengneng da so agawa, nannangis si David tan saray bataan to. Say ermen so tampol ya asalatan na sanok, tan imbaga na saray bataan nen David a sikato so tupaken da. Anggaman agonigon, si David so agnakalan na ilalo. (Uliran 24:10) Lapud takot to ed Dios, sikato so apakiwas a manilalo ed si Jehova, tan ‘pinakasil to so inkasikato ed si Jehova.’ Diad tulong na Dios, atalo nen David tan saray bataan to iray Amalekitas tan abawi ra so amin a bengatla.—1 Samuel 30:1-20.

13, 14. Panon ya atulongan so sakey a Kristiano a manggawa na duga iran desisyon?

¹³ Nipapaarap met iray lingkor na Dios natan diad saray situasyon a mankaukolan na panagmatalek ed si Jehova tan inkakpel pian onkiwas a determinado. Sakey lan alimbawa et si Kristina. Bilang tobonbalo, si Kristina so impaiyaralan na Biblia ed saray Tasi nen Jehova. Balet labay to so magmaliw a piyanista ed konsierto, tan baleg so inaligwasan to ed satan. Niarum ni, sikato so nababaingan a manpulong kanian antakot ton awaten iray responsabilidad a katekep na bautismo. Diad impantultuloy nen Kristina a nanaral ed Salitay Dios, alikna to so inkabiskeg na satan. Naaralan to so ontakot ed si Jehova, tan amoria to ya iilaloan nen Jehova ed saray lingkor to a sikato so aroen da diad interon puso, nonot, kamarerwa, tan biskeg da. (Marcos 12:30) Satan so amakiwas ed sikaton mangidedika ed inkasikato ed si Jehova tan abautismoan.

 ¹⁴ Si Kristina so kinmerew na tulong ed si Jehova pian onaligwas ed espiritual. “Amtak a say bilay na sakey a piyanista ed konsierto so mangilalanor ed naynay a pambiahe tan saray kontratan mantogtog ed anggad 400 a konsierto ed loob na sakey taon,” so insalaysay nen Kristina. “Kanian denesidik so magmaliw a maestra ta pian nasuportaan ko so inkasiak ed pinansyal tan makapanlingkor ak bilang sigpot-panaon ya ebanghelisador.” Diad saman a panaon, si Kristina so akaeskedyul la ed primeron pantogtog to ed sankabantogan a panagkonsiertoan diad bansa to. “Say primeron konsiertok so nagmaliw a sampot lan konsiertok,” so inkuan to. Manlapud saman, si Kristina so akapiasawa ed sakey a Kristianon matatken. Sikaran dua natan so manlilingkor ed sakey ed saray sangan opisina na Tasi nen Jehova. Sikato so maliket lapud sikato so pinabiskeg nen Jehova a manggawa na duga iran desisyon tan uusaren to natan so panaon tan biskeg to ed panaglingkor ed si Jehova.

Sakey a Mablin Tawir

15. Anto so labay ya ipatawir nen David ed ananak to, tan panon ton ginawa itan?

¹⁵ “Gali dia, sikayo anak, talineng kayo ed siak,” so insulat nen David. “Ibangat ko ed sikayo so itakot ed Jehova.” (Salmo 34:11) Bilang sakey ya ama, determinado si David a mangiter ed ananak to na mabmablin nipatawir to—say puro, asimbang, tan mabunigas a takot ed si Jehova. Diad salita tan gawa, inlitrato nen David si Jehova, ya aliwan sakey a mapegpeget tan makapataktakot a Dios, ya akaparaan a mananap ed impakasumlang ed saray ganggan To, noagta sakey a maaro, manangiyansakit, tan manamerdonan Ama ed mangaraldalin ya ananak To. ‘Siopa so makatalos ed saray kalilingoan?’ so intepet nen David. Insan, diad pangipapatnag toy kompiyansa to ya agnaynay ya aanapen nen Jehova iray kalilingoan tayo, oniay inyarum to: “Linisan mo ak ed saray maamot a kinulkulangan.” Diad  pisunian, segurado si David a no gawaen to so sankaabigan to, saray salita tan kanonotan to so magmaliw a makapaliket ed si Jehova.—Salmo 19:12, 14.

16, 17. Panon a nibangat na atateng so ananak da pian ontakot ed si Jehova?

¹⁶ Si David so onkanan alimbawa parad saray atateng natan. “Sikami so pinabaleg na atateng mi diad paraan a makapaliket so katuaan,” so inkuan nen Ralph, a kaiba to natan so agi to a manlilingkor diad sakey a sangan opisina na saray Tasi nen Jehova. “Sanen ugugaw kami ni, sikami so ibibiang da ed pantotongtong da nipaakar ed saray kimey ed kongregasyon, tan nagmaliw kamin maseseg ed katuaan a singa sikara. Diad impamabaleg da ed sikami, imbangat da a walaray makagunggonan nagawaaan mi diad panaglingkor ed si Jehova. Diad tua, diad loob na pigaran taon et nanayam kamin sankapamilyaan diad sakey a bansan walay baleg a pankaukolan na saray manangipalapag na Panarian, tan tinmulong kami ed pangiletneg na saray balon kongregasyon.

¹⁷ “Say akatulong ed sikami pian mansiansia ed maptek a basbas et aliwan say dakerakel a mapeget a totontonen noagta say katuaan a parad atateng mi et petepeteg, mapangpangasi, tan maomaong si Jehova. Nampilalekan dan kabaten a maong tan paliketen si Jehova, tan akaaral kami ed puron takot tan panangaro ra ed Dios. Anggano walay agawa min lingo, ag-ipapalikna ed sikami na atateng mi ya agkami la inaro nen Jehova; nisay sisasanok da kamin pinegetan. Diad maslak a panaon, sikara so kalmadon mitotongtong ed sikami, a no maminsan et si Nanay so makakalua, a sasalien ton sabien so kapusoan mi. Tan epektibon tuloy itan. Naaralan mi ed panagsalita tan gawa na atateng mi a say takot ed si Jehova et alay abig a bengatla tan makapaliket so pagmaliw a Tasi nen Jehova, aliwan makapabelat.”—1 Juan 5:3.

18. Anto so nagamoran tayo ed itakot ed tuan Dios?

¹⁸ Oniay nabasa tayo ed kabiangan na ‘saray unor a salita nen David’: “Sakey a manuley ed saray totoo a matunotunong, a manuley ed takot ed Dios, sikato naani singa sakey a liwawa na kabuasan, sano say banwa ompelnak.” (2 Samuel 23:1, 3, 4) Si Solomon, say ilalak nen David tan sinmalat ed sikato, so mapatnag ya akaaral ed saratan a salita, lapud inkerew to ed si Jehova so matulok odino “makatalos a puso” tan say pakasarag a ‘mangibiig ed maong tan mauges.’ (1 Arari 3:9) Atebek nen Solomon a say takot ed si Jehova so pakagamoran na kakabatan tan liket. Diad saginonor, sinegek to so libro na Eclesiastes diad panamegley na sarayan salita: “Saya sikato so anggaan na kanonotan; amin, sikara so nadngel: Takotan mo so Dios, tan unoren mo so saray ganggan to; ta saya sikato so katiponan na kanepegan na too. Ta say Dios ipatnag to so balang gawa ed kaukom, pati balang inyamot a bengatla, no sikato kasi maong, odino sikato kasi mauges.” (Eclesiastes 12:13, 14) No tuloken tayo itan a simbawa, talagan namoria tayo a “say tumang na kauyamoan tan say takot ed Jehova” et aliwa lambengat a kakabatan tan liket noagta satan met so “kayamanan, tan dayew, tan bilay.”—Uliran 22:4.

19. Anto so makatulong ed sikatayo pian natalosan so “takot ed Jehova”?

¹⁹ Unong ed saray alimbawa ed Biblia tan saray modernon-agew ya eksperiensya, atalosan tayo a say manepeg a takot ed Dios so walaan na positibon betang ed bilay na saray tuan lingkor nen Jehova. Satan a takot so aglambengat mangamper ed sikatayo manlapud panggawa na agmakapaliket ed mangatatawen ya Ama tayo noagta mangiter met itan ed sikatayo na inkakpel ya arapen iray kakabusol tayo tan biskeg a sungdoan iray subok tan kairapan ya onsabi ed sikatayo. Sikatayo sirin, kalangweran man odino matatken la, so manseet a manaral ed Salitay Dios, mandalepdep ed naaralan tayo, tan onapit ed si Jehova diad regular tan impapuso iran pikakasi. No ontan so gawaen tayo, agtayo lambengat naromog so “pikakabat ed Dios,” noagta natalosan tayo met so “takot ed Jehova.”—Uliran 2:1-5.

[Saray paimano ed leksab]

Kasin Nipaliwawa Yo?

Panon a say takot ed Dios et

• makatulong ed sakey a makabangon manlapud seryoson kasalanan?

• mangitarok na liket anggaman ed saray subok tan panamasegsegang?

• mamabiskeg ed sikatayo a manggawa na linawa na Dios?

• magmaliw a mablin nipatawir ed ananak tayo?

[Tepetepet Parad Panagaral]

[Litrato ed pahina 26]

Lapud takot nen David ed si Jehova, agto kinabil si Arin Saul

[Saray litrato ed pahina 29]

Say takot ed Dios so mablin nipatawir na atateng ed ananak da