Tepetepet na Saray Manbabasa
Tepetepet na Saray Manbabasa
Panon tayon naseguro a say impaneskribe na Uliran 8:22-31 ed kakabatan et onaplika ed si Jesu-Kristo sakbay na impagmaliw ton too?
Nabasa ed libro na Uliran so impuyan a panangideskribe ed kakabatan: “Si Jehova kinayarian to ak dia ed gapo na dalan to, arapen na saray gawa to nen inmuna. . . . Siak nipaway ak [a singano katekep na pampapasakit] . . . [sakbay] a niletneg so saray palandey, arapen a nipaway so saray pukdol . . . Sanen inletneg to so saray tawen, wala ak diman: . . . diad saman wala ak ed abay to, singa uloen a komikimey; tan siak nensaman so inagew-agew a panggayagaan to, a malikeliket lawas ed arap to, . . . et say panggayagaan ko wala nensaman ed saray anak na totoo.”
Sayan teksto so aglambengat manasaglawi ed madibinon kakabatan odino ed matudion panagnonot. Akin ya andi? Lapud say kakabatan ya adeskribe ditan et “nipaway,” odino apalsa, bilang gapoan na dalan nen Jehova. Si Jehova a Dios so lawas lan wala tan lawas a makabat. (Salmo 90:1, 2) Say kakabatan to so andian na gapoan; ag-itan pinalsa nisay pinawala. Satan so ‘agnipaway a singano katekep na pampapasakit.’ Niarum ni, sayan kakabatan so nilitrato a mansasalita tan onkikiwas, a mangirerepresenta ed too.—Uliran 8:1.
Inkuan na libro na Uliran a nensaman la et say kakabatan so walad abay nen Jehova, say Manamalsa, bilang say “uloen a komikimey” to. Satan so seguradon onaplika ed si Jesus. Sakbay ni na inyakar nen Jesus diad dalin et sikato so maapit ya akikimeyan ed si Jehova, kanian oniay inkuan na Salitay Dios: “Sikato so wala ed unaan na amin a bengatla, tan amin a bengatla atugyop ed sikato.”—Colosas 1:17; Apocalipsis 3:14.
Matukoy so impangilitrato ed Anak na Dios bilang say kakabatan, ta sikato so angiparungtal ed saray makabat a gagala tan pananontonan nen Jehova. Sakbay na impagmaliw ton too, si Jesus so Salita na Dios, odino Pinagkasangiyan to. (Juan 1:1) Sikato so adeskribe bilang say “pakayari [na] Dios tan karunongan na Dios.” (1 Corinto 1:24, 30) Agaylan dakep a panangideskribe ed Anak na Dios, ya apakiwas a mangiter ed bilay to bilang dondon ed katooan lapud panamabli to ed sikara!—Juan 3:16.
[Litrato ed pahina 31]
‘Nipaway ak la sakbay a niletneg iray palandey’