Kasin Nanonotan Yo?

Agunggonaan kayo kasi ed impanbasa ed agano niran paway na Say Panag-Bantayan? Salien yo pan ebatan so onggendan a tepetepet:

• Panon ya ‘iliktar nen Jesus iray naukolan’ odino pobri, unong a nipasakbay ed Salmo 72:12?

Legan na uley to, nagamoran la na amin so inkahustisya, ya anggapo lay inkakurakot. Say guerra so mabetbet a mansusumpal ed kairapay-bilay, balet ta itarok nen Kristo so naspot a kareenan. Sikato so walaan na pililikna ed totoo tan pankakasakeyen to so amin a totoo, tan seguroen ton wala so daakan a tagano parad katooan. (Salmo 72:4-16)—5/1, pahina 7.

• Panon a nipatnag tayo bilang Kristiano so ‘kawayangan tayon mansalita’? (1 Timoteo 3:13; Filemon 8; Hebreos 4:16)

Nagawaan tayo itan diad maseseg a pampulong ed arum tekep na inkakpel, diad alisto tan epektibon pambangat tan panimbawa, tan diad sigpot a pangibesngaw tayo na liknaan tayo ed Dios diad pikakasi, a matalek tayon dengelen tan ebatan to itayo.—5/15, pahina 14-16.

• Diad silong na Ganggan, akin a say pigaran natural ya usar na sekso et pagmaliwen ton ‘agmalinis’ so sakey a too?

Saray ganggan nipaakar ed ag-inkalinis lapud ipapaway na semilya, panagregla, tan panag-anak so angiyalibansa na kalinisan ed laman tan mabunigas ya estilo na panagbilay, angidanet ed inkasagrado na dala, tan angipanengneng ed pankaukolan na pananakbong ed saray kasalanan.—6/1, pahina 31.

• No labay na sakey a too so magmaliw a maliket, akin a makagunggona ed sikato a konsideraen so libro na Salmos?

Kabat na saray anibukel na Salmos a say liket et resulta na pakawalaan na maabig a relasyon ed Dios. (Salmo 112:1) Indanet da a say relasyon ed too, materyal a kayarian, tan say dilin agawaan so agbalot makapawala na liket a manlalapud pagmaliw a kabiangan na “totoo a say Dios da et si Jehova.” (Salmo 144:15)—6/15, pahina 12.

• Anton nikaduman siglaotan ed si Jehova so niwala ed saray Israelita nensaman?

Nen 1513 B.C.E., intarok nen Jehova iray Israelita diad sakey a balon siglaotan ed sikato, diad sakey a sipanan. (Exodo 19:5, 6; 24:7) Kayari na satan, saray Israelita so nianak bilang kabiangan na nasyon a pinili na Dios a dedikado ed sikato. Balet, kada indibidual so kinaukolan nin siansia a manggawa na personal a desisyon a manlingkor ed Dios.—7/1, pahina 21-2.

• Akin a nepeg tayon gawaen so amin a bengatla ya “anggapoy talabutob [“odino pannguronguro,” NW]”? (Filipos 2:14)

Ipapabitar na dakel ed saray Makasulatan ya alimbawa a say panagnguronguro so akaderal ed limog na totoo na Dios. Nepeg tayon isipen a maong so nipaakar ed makaderal ya impluensya na satan natan. Saray ag-ayadyarin totoo so walaan na tendensian manreklamo, tan nepeg ya alerto itayon mangibiig ed antokaman a pakabidbiran ed satan tan paliisan itan.—7/15, pahina 16-17.

• Panon tayon amta a say kakabatan ya adeskribe ed Uliran 8:22-31 et aliwan kakabatan a walad nonot labat (abstract)?

Satan a kakabatan so “nipaway,” odino pinalsa, bilang gapoan na dalan nen Jehova. Say Dios so lawas lan wala tan lawas a makabat; say kakabatan to so agpinalsa. Say kakabatan ed Uliran 8:22-31 so walad abay na Dios bilang “uloen a komikimey,” ya onaplika ed espiritun pinalsa a nagmaliw a Jesus tan maapit ya akikimeyan ed Dios diad panamalsa. (Colosas 1:17; Apocalipsis 3:14)—8/1, pahina 31.