Maedad la Balet Agbegtebegtew

LAPUD epekto na itatakken, dakel so magmamaliw a baldado kanian agla ra makapilimog ed arum a totoo. Balet, aliwan ontan so kipapasen nen Fernand Rivarol, ya inatey ed edad a 95 diad Geneva, Switzerland. Bukbukor to ed abung lapud inatey lay akulaw to tan say naasawa lan anak ton bii et wala lay dilin ayaman to. Anggaman sikato so agla makapaway ed abung to, sikatoy agbegtebegtew. Mabetbet a sikatoy akayurong diad abay na lamiseta ed salas, a sankabembenan toy telepono tan tatawagan to iray totoo ta pian mitongtong ed sikara nipaakar ed espiritual iran pamaakaran.

Legan na makapainteres a panaon na bilay to, walay inkagawa ya aktual ya apukok si Fernand. Akin? Sanen nagmaliw ya aktibon Tasi nen Jehova si Fernand tan say akulaw to nen 1939, tinmerak so Guerra Mundial II ed Europa. Nansiansia si Fernand ed desisyon ton nibase’d Biblia ya agto sakitan so arum. Lapud satan et naandi so trabaho to tan kinaukolan a nipisok—ami-amin et limara tan kapalduan taon—a kaleganan na satan et sikato so nisian ed akulaw to tan ed melag nin anak ton bii.

Oniay inkuan nen Fernand no nanonotan to itan: “Parad dakel a totoo, singano intalirak ko so maligen a trabaho tan tinaynan ko so pamilyak ya andiay suporta. Binalawbalaw ak na totoo tan intrato da ak a singa sakey a kriminal. Anggaman kuan, sano nodnonoten ko iratan a mairap a taon, natantandaan ko so impanuporta tan impanulong nen Jehova ed siak. Dakel lan taon so linmabas nanlapula’d satan, balet say panagmatalek ko ed si Jehova so siansia nin mabiskeg a singa ed saraman a panaon.”

Say ontan a pananisia so amakiwas ed si Fernand pian inabang ed arum so Makasulatan ya ilalo to panamegley na telepono. No interesado so akatongtong to, sikato so mangipawit na literatura na Biblia panamegley na koreo ed satan a too. Diad saginonor et tawagan to ed telepono itan a too pian amtaen no kasin nanggayagaan to iman a literatura. No maminsan et onkiwas iray totoo tekep na sakey a sulat na pisasalamat, a satan so amaliket a maong ed sikato.

Ompano sikayo so nakatongtong na sakey a singa si Fernand ed lugar yo. Akin ya agdengelen so ibaga to pian naamtaan yo so sisisiaen to? Lawas maliket iray Tasi nen Jehova a manginabang ed sikayo na saray sisiaen da.