Makapaliket ya Idaraak Diad Sakey a Marakdakep ya Isla

SARAY ombibisita ed Taiwan et talagan mandinayew ed saray mabirdin tropikal a kakiewan tan tanaman ya ontutubo diad isla. Say balibalin inkabirdi na abeba nin kapageyan so magmamaliw a kolor-balitok diad panaon na panagani. Saray gilig na kapalandeyan so sasakbongan na dakerakel tan masalompapak a kakiewan. Midumaan ed saray matoon syudad, saray mabunabuna tan birdin tanaman diad kaumaan tan kapalandeyan et makaparepreskon tuloy. Diad tua, satan so amakiwas ed primeron taga-Sagur ya akanengneng ed isla pian ingaran itan ya Ilha Formosa, odino “Marakdakep ya Isla.”

On, marakdakep ya isla so Taiwan anggaman melmelag itan—a 390 kilometro labat so karukey na satan tan manga 160 kilometro so anggaan lan kalapar na satan. Maslak a lugar ed isla et atataragey a kapalandeyan. Say Yü Shan (Palandey Morrison) et mas atagey ni nen say Palandey Fuji ed Hapon odino say Palandey Cook ed New Zealand. Diad saray pandukey a patar ed gilig na dayat ya akapaliber ed sentro iran palandey so maslak a panaayaman na okupado iran totoo ed Taiwan, a masulok lan 22 milyon natan so populasyon.

Sananey a Klase na Idaraak

Balet wala so sananey nin klase na idaraak a lalon napapatnagan diad Taiwan—say espiritual ya idaraak. Napatnagan iya diad pagmamaliw a maseseg na totoo—malangwer man odino matakken—bektaman ya akabatan da so tuan Dios, si Jehova. Talagan makapadinayew so pakaimaton ed idaraak na bilang na saramay maseseg a mankikimey pian tulongan so arum a makaaral nipaakar ed si Jehova tan ed saray gagala to.

Kinaukolan so panamalaknab lapud idaraak. Nen Disyembre 1990, wala so sinaliw a lote pian pabalegen so sangan opisina na saray Tasi nen Jehova. Say datin pasilidad a walad Taipei so melmelag lan tuloy parad pangasikaso ed saray aktibidad na 1,777 a manangipalapag na Panarian ed Taiwan diad saman a panaon. Kayari na pigaran taon a makulin impankimey na saray internasyonal tan lokal a boluntaryo a nandurumay  edad, nipaalagey so alay dakep a balo iran pasilidad diad Hsinwu tan uusaren la itan manlapu nen Agosto 1994. Diad saman a panaon et wala lay 2,515 a mibibiang ed panangiwakawak na maong a balita a manlalapud Salitay Dios, say Biblia. Natan, kayari na masulok a samploy taon, sayan bilang so masulok ya adoble, a sinmulok ed 5,500 a manangipalapag, tan kada bulan et ngalngalin kakapat na satan a bilang so mankikimey a sigpot-panaon diad panag-ebanghelyo. Say makatantanda et saray kalangweran a lalaki tan bibii a singa ra makaparepreskon “linaew” ed kabuasan.—Salmo 100:3.

Espiritual ya Ibubulaslas ed Limog na Saray Kalangweran

Dakel ed saray maseseg a manangipalapag na maong a balita et malalangwer nin tuloy. Arum so wala ni lambengat ed elementarya. Alimbawa, diad sakey a baley ed amianen a Taiwan, walay sanasawa a primero da labat ni so makaatendi ed Teokratikon Eskuelaan Parad Ministeryo, a ditan aaralen na saray Tasi nen Jehova no panon dan ibangat iray katuaan ed Biblia. Nikelawan so sanasawa ed impakanengneng da ed sakey ya ugaw nin laki, a si Weijun, a nambasa na Biblia diad entablado tan mas marunong ni nen say panagbasa na dakel a wala la’d edad. Insan diad arum a pantitipon a naatendian da, mandinayew iran maong lapud anggan saray ugugaw a kinder ni labat et marundunong la ya onebat. Nankomento met iyan sanasawa nipaakar ed inkadisiplinado na saray ugugaw diad Kingdom Hall.

Akin ya ontan lan kaatentibo irayan ugugaw diad edukasyon ed Biblia anggaman maslak a totoo ed sayan bansa et Buddhista tan Taoista? Say rason et iyaaplika na Kristianon atateng da iray prinsipyo ed Biblia tan paeeleten dan maong so relasyon da ed si Jehova bilang maliket a pamilya. Lapud panggugunaetan na saray ateng nen Weijun a gawaen a makapaliket so panagaral da ed Biblia bilang pamilya tan say lawak na ministeryo, say kuya tan atsi to so abautismoan la bilang Tasi. Diad agano ni, sanen impila si Weijun ed panagpulong a kimey, inkuan na ina to a mas dakel nin magasin so nipalima to ed saman a bulan nen say impantetekep lan bilang na nipalima na arum ed sikaran sankapamilyaan. Mapatnag a labalabay to ya itongtong so nipaakar ed katuaan, mankomento diad saray miting, tan inabang ed arum so naaaralan to.

Legan na Ibabaleg Da

Komusta iratan a kalangweran legan na ibabaleg da? Dakel ed sikara so mantutultuloy a mangipapatnag na tuan panangaro ed si Jehova tan ed ministeryo. Alimbawa, si Huiping et sakey ya estudyante. Sakey ya agew et inkuan na maestro to a saray membro na sakey a relihyon et agmalabay a pasaksakan na dala balet ta agto amta no siopa iratan. Kasumpal na klase, imbaga na sayan kalangweran a biin Kristiano ed instruktor to a saray Tasi nen Jehova so tutukoyen to tan impaliwawa to no akin ya ontan so talindeg da.

Wala met so sakey ya instruktor ya angipabantay na sakey a video nipaakar ed saray sakit a naaala diad pirerelasyonan ed sekso. Sinaglawi na sayan video so 1 Corinto 6:9, balet inkuan na instruktor ya agkokondenaen na Biblia so homoseksualidad. Si Huiping et awalaan lamet na pankanawnawa pian ipaamta ed instruktor to so panmoria na Dios ed satan a pamaakaran.

Sanen manpaparaan na sakey a report so kaklase ton si Shuxia nipaakar ed karawalan ed pamilya, sikatoy inikdan nen Huiping na kopya na Nobyembre 8, 2001 ya Awake! a walaay apis ya apauloan na “Help for Battered Women” tan impaliwawa to a lugan na satan so dakel ya impormasyon a nibase ed Biblia nipaakar ed satan a tema. Asabi panaon, si Shuxia so nagmaliw lan agbautismadon manangipalapag. Sikara nen Huiping so manginanabang la natan na maong a balita ed saray arum.

Parad dakel a Kristiano a maneeskuela et sakey ya angat a sikaray kabkabat bilang totoon mambibilay a mitunosan ed saray prinsipyo na Biblia. Ontan so kipapasen diad melag iran baley ya arawi ed syudad. Si Zhihao et kaukolan ton arapen so pananesdes na kaedaran to lapud pananisia to tan pampupulong to. Inkuan to: “Nadidismaya ak a maong lapud natatakot ak a miarap ed saray kaklasek legan kon mibibiang diad ministeryo. No maminsan et samplora ra a mangakantiaw ed siak!” Sakey ya agew, si  Zhihao so inikdan na maestro to na asainmin a manpaliwawa nipaakar ed relihyon to diad arap na klase. “Ginapoan koy paliwawak diad Genesis kapitulo 1 insan siningbat ko iray tepet a singa say: Siopa so amalsa na dalin tan amin a bengatlan wadtan? Tan panon a niwala so too? Sanen basaen ko la so Biblia, walaray manelek ed siak, a kuan dan maanito ak. Balet, intuloy koy nansalita tan sinumpal koy paliwawak. Kayari na satan, awalaan ak na pankanawnawan mitongtong a mismo ed arum a kaklasek nipaakar ed kimey tayo tan say pananisia tayo. Natan et agda ak la eelekan sano nanengneng da ak a manpupulong!”

Oniay intuloy nin Zhihao: “Lapud saray ateng ko et Tasi, kinabuasan min kokonsideraen so inagew-agew a teksto. Sikami met so regular a manaaral na Biblia tan onaatendi ed saray pantitipon. Satan so rason no akin a sarag ko lan piarapan so siopaman ni a mankantiaw ed siak sano inanabang ko ed arum so makaligliwa iran katuaan ed Biblia.”

Si Tingmei et sakey ya estudyante diad teknikal ya eskuelaan parad bibii. Aminsan et sikatoy inimbitaan na arum a kaklase to a man-piknik, a walaray nakaiba dan lalaki manlapud sananey ya eskuelaan. Atebek to so kapeligroan ed moral diad ontan a panlilimog kanian denesidi toy ag-onla. Sikatoy aminpigan inimbitaan na saray kaklase to, anggaman inanabang to la ed sikara iray maabig ya impormasyon manlapud libron Questions Young People Ask—Answers That Work. * Bilang resulta et sikatoy niludlurey na saray kaklase to, a kuan dan sikatoy karaanan a too. Balet, apaneknekan a talagan makabat so panumbok ed saray prinsipyo na Biblia sanen sakey ed saratan a kaklase to so nanlukon tan nampaekal. Oniay inkuan nen Tingmei: “Lapud inunor ko so panangiwanwan nen Jehova, awalaan ak na malinis a konsiensia. Bilang resulta, aliknak so akindalem a liket tan pirmin inkapnek.”

Panalona ed Saray Babeng ed Iyaaligwas

Sakey ed saray maapit a kakaaro nen Tingmei et si Ruiwen. Sanen ugaw ni, inisip nen Ruiwen a say iyaatendi ed Makristiano iran pantitipon tan pibibiang ed lawak na kimeyan et makapakesaw labat a rotina. Balet, sanen naimano to so pandumaan na puron panangaro na saramay walad kongregasyon to tan say andi-kabaliksan a pikakaaro ed saray kaklase to, sikatoy akombinse a nakaukolan toy manggawa na saray pananguman ed bilay to. Ginapoan nen Ruiwen a pinulongan iray kaklase to tan ag-abayag et lalon atebek to no antoy kaukolan ton gawaen. Sikatoy ginmapon nanlingkor bilang auxiliary payunir, a manguusar na masulok a 50 ya oras kada bulan diad ministeryo. Insan nagmaliw a  regular payunir, a manguusar na masulok a 70 oras kada bulan diad serbisyo. Oniay inkuan nen Ruiwen: “Talagan misalsalamat ak a maong ed si Jehova. Sikatoy agbalot sinmawa ed siak. Anggaman walaray ginawak a makapadismaya ed sikato, inaro to ak nin siansia. Ontan met a panangaro so impanengneng nen inak tan arum nira diad kongregasyon. Lapud limara la natan so iyaaralan ko na Biblia, naliliknak a kabiangan ak ed makapenek a tuloy a kimey.”

Diad sakey a haiskul ya arawi ed syudad, duaran estudyante a Tasi so aturon mangirepresenta ed eskuelaan da diad sakey a kontis a folk-dance. Sanen naamtaan da no anton klase itan a pakontis, amoria na sarayan kalangweran a Tasi a nasumlang so konsiensia ra bilang Kristiano no mibiang ira. Sanen impaliwawa ra so panmoria ra tan kinerew da ya agla ra mibiang, agda ra inabobonan. Imbes, imbaga na saray managbangat da a nepeg day onla lapud sikara so aturo. Lapud agda labay so mikompromiso, sarayan kalangweran a Tasi so angusar na Internet tan angipawit ira na sulat diad Web site na departamento na edukasyon, ya impaliwawa ray problema ra. Anggaman agpersonal ya inebatan irayan kalangweran, say eskuelaan da so akaawat na panangidirehi ya agda nepeg a paskaren so siopaman a mibiang ed ontan a pakontis. Agaylay liket na sayan duaran kalangweran lapud say impangipasal ed sikara na Biblia so aglambengat angigiya ed konsiensia ra noagta amabiskeg met ed sikara pian nitalindeg da no anto so duga!

Anggan saramay walaan na saray limitasyon ed pisikal so manliliket a tuloy ed panginanabang da ed arum na ilalo ran nibase ed Biblia. Si Minyu so paralisado la manlapud inkianak to. Agto sarag ya usaren iray lima to diad pangibukay ed saray pahina na Biblia, kanian say dila to so uusaren to diad pananap ed teksto a labay ton basaen. No walay parte to ed Teokratikon Eskuelaan Parad Ministeryo diad Kingdom Hall, sikatoy onyurong diad abeban bangko, tan say kaiba to ya onaakto bilang unabung ya akayurong ed bangketo tan sikatoy mamebemben ed mikropono. Agaylan makapaliket a nanengneng so pansasagpot nen Minyu pian niparaan iray asainmin to!

Sanen labay la nen Minyu so magmaliw a manangipalapag na Panarian, inaral na arum ya agagin bibii diad kongregasyon no panon so manpulong panamegley na telepono ta pian sikatoy natulongan da. Itetelmer to iray numero panamegley na dila to bangta saray kakaiba to so ontutulong ed sikaton mangirekord ed saray atawagan to. Panliliketan ton maong itan a kimey kanian sikatoy nan-auxiliary payunir, a manguusar na 50 ya anggad 60 oras kada bulan diad telepono pian itongtong ed arum so nipaakar ed Panarian na Dios. Walaray aromog to a malabay a mangawat na literatura na Biblia tan inmabuloy ira a tawagan to lamet ira. Wala natan so taloran iyaaralan to na Biblia ya aromog to diad ontan a paraan.

On, singa saray makarepreskon linaew, saray kalangweran a lalaki, ontan met ed saray bibii, diad 78 a kongregasyon na saray Tasi nen Jehova ed Taiwan so mabulos tan maseseg a mangipapasabi na mananustuni-bilay a maong a balita na Panarian diad minilyon a totoo a manaayam diad sayan matoon isla. Melag labat iya a kabiangan na sankamundoan a kasumpalan na onggendan a propesiya ed Biblia: “Say katooan mo iyapay da so inkasikara a mabulbulos dia ed agew na pakayarim, dia ed masanton ulop: ya ompaway ed panag-anakay kabuasan wala ed sika so linaew na kaugawan mo.” (Salmo 110:3) Agaylan makapaseseg irayan kalangweran parad saray mamatakken la a kakimeyan da, tan manuna ed amin, agaylan napapaliket da so mangatatawen ya Ama ra, si Jehova a Dios!—Uliran 27:11.

[Paimano ed leksab]

[Kahon/Litrato ed pahina 10]

DAKEL NIN KINGDOM HALL SO NAKAUKOLAN

Lapud idarakel na saray manangipalapag ed Taiwan, lalon makapaangat so pakawalaan na magenap a Kingdom Hall. Akin? Lapud ngalngalin anggapo so lote a matukoy a pangipaalageyan na saray Kingdom Hall, nilikud ed pigaran pasen ya arawi ed syudad. Sakey ni et mabmabli so presyo na lote, tan mapegpeget iray ley nipaakar ed partisyon na lote. Diad angkakabaleg iran baley tan syudad, say nagawaan lambengat et say panaliw na saray kuarton pan-oopisinaan insan pagmaliwen iratan a Kingdom Hall. Anggaman ontan, maslak ya opisina et abebbebay gobeda, atagtagey so bayar parad panagmintina, agbasta makaloob so anggan siopa, odino arum niran sengegan ya ag-iratan matukoy ya usaren bilang Kingdom Hall.

Siansia ni, diad agano niran taon, saray Tasi nen Jehova ed Taiwan so awalaan na pigaran balon Kingdom Hall. Mantutultuloy ni so panag-anap na nakayarian iran balon lote legan a mabulbulos a mismo iray Tasi nen Jehova ya onsuporta ed pinansyal ontan met ed panamaaligwas ed saray nakaukolan a dunong ed panagpaalagey.