“Nadngelan Yo so Impantepel nen Job”

“Nadngelan yo so impantepel nen Job, tan anengneng yo so anggaan ya initer na Katawan; no panon a say Katawan maabagey a tuloy, tan mapangasi.”—SANTIAGO 5:11.

1, 2. Anton subok so inkidungetan na sakey a sanasawa diad Polandiya?

 SANEN kinobkob na armada nen Hitler so Danzig (natan et Gdańsk) diad amianen a Polandiya, masulok lan sakey taon nen Harald Abt bilang Tasi nen Jehova. Insan nagmaliw a mair-irap tan mapeligron tuloy so kipapasen na saray tuan Kristiano diman. Si Harald so pinaskar na Gestapo a manpirma ed dokumenton mangipupulisay ed pananisia to, balet agto nampirma. Kayari na pigaran simba ed prisoan, si Harald so inyalis ed panangipangawan a kampo na Sachsenhausen, tan diman da aminpigan pinagyaw tan pinekpek. Inturo na sakey ya opisyal so pasngawan na asewek na crematorium (panagpoolan na bangkay) tan oniay imbaga to ed si Harald, “Sika so onsengaw ed satan insan mamaarap ka ed dadayewen mon Jehova diad loob na 14 agew no mansiansia ka ni ed pananisiam.”

² Sanen inerel si Harald, say asawa ton si Elsa so manpapasuso ni ed samploy-bulan ya anak dan bii. Balet ta si Elsa so inerel met na Gestapo. Agnambayag, say anak to so inala ed sikato tan si Elsa so inawit da ed panagpateyan a kampo diad Auschwitz. Ingen ta sikato so nansiansian mabilay ed loob na pigaran taon, a singa met ed si Harald. Diad The Watchtower na Abril 15, 1980, dakel ni so nabasa yo nipaakar ed impansungdo ra. Oniay insulat nen Harald: “Diad ami-amin et 14 taon na bilay ko so nausar ed saray panangipangawan a kampo tan prisoan lapud pananisiak ed Dios. Oniay nitepet ed siak: ‘Akatulong kasi ed sika so akulaw mo pian nasungdoan mon amin iratan?’ On, baleg so nitulong to ed siak! Amtak a manlapu la’d gapo et agton balot ikompromiso so pananisia to, tan satan so amabiskeg ed siak. Amtak a mas labay to nin nanengneng ya inatey ak a matoor nen say nibulos ak ya akikompromiso. . . . Intepel nen Elsa so dakel ya irap legan na saray taon a sikatoy walad saray panangipangawan a kampo na Aleman.”

3, 4. (a) Legan a mansusungdo iray Kristiano, napaseseg ira ed saray alimbawa na sioparan totoo? (b) Akin a papasesegen itayo na Biblia ya usisaen so eksperiensya nen Job?

³ Talagan aliwan mainomay so mantepel na kaugsan, unong a papaneknekan na dakel a Tasi. Lapud sayan rason, oniay insimbawa na Biblia parad amin a Kristiano: “Panuliranan yo, agagik, so impantepel tan say anos na saray propeta, a nansalita’ra ed ngaran na Katawan.” (Santiago  5:10) Diad loob na dakel a siglo, dakel a lingkor na Dios so pinasegsegang ya anggapoy makasengeg. Saray alimbawa na sayan dakel a “lurem na saray tasi” so makapaseseg ed sikatayo pian mantultuloy itayo ed babatiken tayo bilang Kristiano.—Hebreos 11:32-38; 12:1.

⁴ Diad rekord na Biblia, si Job so alay abig ya ehemplo na panagsungdo. “Nia, ibilang tayo a mapalar so saray managtepel,” so insulat nen Santiago. “Nadngelan yo so impantepel nen Job, tan anengneng yo so anggaan ya initer na Katawan; no panon a say Katawan maabagey a tuloy, tan mapangasi.” (Santiago 5:11) Say eksperiensya nen Job so mangiter ed sikatayo na pagpaunan pikakabat nipaakar ed tumang a manatalaran ed saray matoor, a bebendisyonan nen Jehova. Mas importante ni, ipaparungtal na satan iray katuaan a makagunggona ed sikatayo legan na saray panaon na irap. Natulongan itayo na libro na Job pian naebatan irayan tepet: Sano nasusubok, akin a nepeg tayon talosan iray nalalanor a manunan isyu? Antoran kalidad tan awawey so makatulong pian makapansungdo itayo? Panon tayon napabiskeg iray maniirap a kaparan Kristiano?

Talosan so Interon Situasyon

5. Anto so manunan isyu a nodnonoten sano nidudunget itayo ed saray subok odino tukso?

⁵ Pian napansiansia tayo so inkasimbang ed espiritual anggaman ed kairapan, nakaukolan tayon talosan so interon situasyon. No andi, say personal iran problema tayo so mamuragas la ed espiritual a panmoria tayo. Sankaimportantian so isyu nipaakar ed katooran ed Dios. Oniay kerew na mangatatawen ya Ama tayo a nepeg tayon ipapuso: “Ana’ko, onkabat ka, tan paliketen mo so pusok, pian naebatan ko so mamalaw ed siak.” (Uliran 27:11) Agaylan nikaduman pribilehyo itan! Anggaman ed saray kaleteyan tan agtayo inkayadyari, napaliket tayo so Manamalsa tayo. Nagawaan tayo itan sano say aro tayo ed si Jehova et ontulong ed sikatayo pian natalonaan iray subok tan tukso. Say tuan Makristianon panangaro so mangitepel ed amin a bengatla. Ag-itan balot onsaew.—1 Corinto 13:7, 8.

6. Panon so pangakantiaw nen Satanas ed si Jehova, tan anggad anton laknab?

⁶ Malinew ya ipaparungtal na libro na Job a si Satanas imay mangakantiaw ed si Jehova. Ipaparungtal met na satan so mauges ya ugali na sayan agnanengneng a kabusol tan say pilalek ton deralen so siglaotan tayo ed Dios. Unong ed impatnag na kipapasen nen Job, iyaakusa nen Satanas a sinisiblet so motibo na amin a lingkor nen Jehova tan panggugunaetan ton paneknekan ya ombetel so panangaro ra ed Dios. Kinantiawan to so Dios diad loob na nilibo lan taon. Sanen nibasileng si Satanas manlapud tawen, walay boses ed tawen ya aneskribe ed sikato bilang ‘say manangidalem ed agagi tayo’ tan mangaakusa ed sikara “ed arap na Dios tayo ed agew tan labi.” (Apocalipsis 12:10) Diad matoor a pansungdo tayo, nipatnag tayo ya anggapoy katuaan na saray akusasyon to.

7. Anto so sankaabigan a paraan pian natalonaan tayo so pisikal a kaleteyan?

⁷ Nepeg tayon tandaan ya aanamoten na Diablo so antokaman a kairapan a nayarin sagmaken tayo pian niyarawi to itayo ed si Jehova. Kapigan so impanukso to ed si Jesus? Sanen narnarasan la si Jesus kayari na pigay agew ya impan-ayunal to. (Lucas 4:1-3) Balet, say espiritual a biskeg nen Jesus so akatulong ed sikato pian mapekder ton nipulisay iray tukso na Diablo. Agaylan importante a labanan so antokaman a pisikal a kaleteyan—a nayarin makasengeg ed sakit odino itatakken—diad panamegley na espiritual a biskeg! Anggaman ‘say too tayo ed paway et nadederal,’ agtayo onsuko lapud ‘say too tayo ed loob et ombabalo ya inagew-agew.’—2 Corinto 4:16.

8. (a) Panon a makapakapuy iray negatibon liknaan? (b) Anton awawey so impatnag nen Jesus?

 ⁸ Niarum ni, saray negatibon liknaan so nayarin maneral ed sakey a too diad espiritual a paraan. ‘Akin ya aabuloyan iya nen Jehova?’ so nayarin umamengen na sakey. ‘Akin ya onman so impantrato ed siak na sakey ya agi?’ so nayarin itepet na sakey kayari na agmapangasin impantrato ed sikato. Say ontan iran liknaan so nayarin pansengegan na pangibaliwala tayo la ed saray manunan isyu tan iyapasakey la ed personal iran kipapasen tayo. Say inkadismaya nen Job ed taloran nalilingon kakaiba to so ompatnag ya akaapekton maong ed liknaan to a singa met say epekto na sakit ed laman to. (Job 16:20; 19:2) Mipadpara, impabitar nen apostol Pablo a say mantutultuloy a sanok so nayarin mangiter na pankanawnawa odino ‘mamalongkit ed Diablo.’ (Efeso 4:26, 27) Imbes ya ibesngaw so inkadismaya odino sanok ed saray indibidual odino alablabas ya iyapasakey ed ag-inkahustisya na sakey a situasyon, magmaong no aligen la na saray Kristiano si Jesus ya ‘imatalek da so laman da ed manangiter na tunong,’ si Jehova a Dios. (1 Pedro 2:21-23) Say pakawalaan na “kanonotan” nen Jesus so magmaliw a manunan depensa sumpad saray panangataki nen Satanas.—1 Pedro 4:1.

9. Anto so panamaseguro na Dios ed sikatayo nipaakar ed saray pakakabelatan tayo odino saray tukson kidudungetan tayo?

⁹ Manuna ed amin, agtayon balot ipapasen iray problema tayo bilang ebidensya na agpanliket na Dios ed sikatayo. Say ontan a lingon panmoria so angonigon ed si Job sanen sikatoy nansalitaan na ansasakit na saramay manligliwa komon ed sikato. (Job 19:21, 22) Papaseguroan itayo na Biblia panamegley na sarayan salita: “Say Dios agnayari a tuksoen na mauges tan agmet manukso na siopaman a too.” (Santiago 1:13) Diad pisunian, insipan nen Jehova a tulongan to itayon manakbat ed antokaman a pakakabelatan tayo tan mangipaliis ed sikatayo manlapud antokaman a tukso a mamapaermen ed sikatayo. (Salmo 55:22; 1 Corinto 10:13) No onapit itayo ed Dios diad panaon na gonigon, napansiansia tayo so dugan panmoria ed saray bengatla tan matalona tayon nasumpa so Diablo.—Santiago 4:7, 8.

Saray Tulong Pian Makapansungdo

10, 11. (a) Anto so akatulong ed si Job pian makapansungdo? (b) Panon ya akatulong ed si Job so impakawalaan to na malinis a konsiensia?

¹⁰ Impansiansia nen Job so katooran to, anggaman ed mair-irap a kipapasen to, pati ed ansakit iran salita na saray “managligliwa” ed sikato tan say inkakewkew ton mismo ed peteg a pansesengegan na sinagmak to. Anto so naaralan tayo ed impansungdo to? Seguradon say manunan rason na intalona to et say katooran to ed si Jehova. ‘Sikato so tinmakot ed Dios tan pinmaliis ed mauges.’ (Job 1:1) Satan so dalan na kabibilay to. Ag-impulisay nen Job si Jehova, anggan agto atalosan so rason no akin a biglan agawa so mauges iran bengatla. Panisiaan nen Job a nepeg ton panlingkoran so Dios diad maabig tan mauges iran kipapasen.—Job 1:21; 2:10.

¹¹ Say impakawalaan na malinis a konsiensia so akaligliwa met ed si Job. Sanen sikatoy ompatnag a ngalngali la ompatey, sikato so aligliwa lapud amta ton ginawa to so sankaabigan to diad impanulong ed arum, tan ed impangunor to ed saray matunong ya estandarte nen Jehova, tan ed impaliis to ed antokaman a nengneng na palson panagdayew.—Job 31:4-11.

12. Panon so inkiwas nen Job ed tulong a naawat to ed si Elihu?

¹² Siempre, tua a kinaukolan nen Job so tulong pian nipetek so panmoria to ed pigaran aspekto. Tan mapaabeba ton inawat itan a tulong—say sakey nin importantin akatulong ed matalonan impakapansungdo to. Marespeton dinengel nen Job so makabat a simbawa nen Elihu, tan positibo so inkiwas to ed panametek nen Jehova. “Binitlak so agko atalosan,” so inaksobi to. “Kagulak so inkasiak, tan magbabawi ak ed dabok ed dapodapol.” (Job 42:3, 6) Anggaman ed sakit a siansian amairap ed sikato, nanliketan nen Job so impametek ed panag-isip to a lalon amaapit ed sikato ed Dios. “Amtak a sika [Jehova] nagawam so amin a bengabengatla,” so imbaga nen Job. (Job 42:2) Lapud deskripsion nen Jehova ed karlangan To, lalon atalosan nen Job so mismon kipapasen to no ikompara ed Manamalsa.

13. Panon ya akagunggona ed si Job so impangipatnag toy panangasi?

¹³ Diad kaunoran, si Job so sakey a matalonggaring  ya alimbawa na panangasi. Si Job so asakitan a maong ed saray palson managligliwa ed sikato, ingen ta inunor to so ganggan nen Jehova ya ipikasi to ra. Diad saginonor, impawil nen Jehova so bunigas nen Job. (Job 42:8, 10) Malinew, say makatulong ed sikatayo pian makapansungdo et aliwan say panem-em na sakit na linawa noagta say aro tan panangasi. Say pamalabas ed sakit na linawa so makarepresko ed sikatayo diad espiritual a paraan tan satan so kurang a bebendisyonan nen Jehova.—Marcos 11:25.

Makabat Iran Managsimbawa ya Ontutulong ed Sikatayon Mansungdo

14, 15. (a) Antoran kalidad so makatulong ed sakey a managsimbawa pian napaabig so arum? (b) Ipaliwawa no akin a matalona si Elihu ed impanulong to ed si Job.

¹⁴ Say sakey nin leksion a naaralan tayo ed salaysay nen Job et say kaimportantian na makabat iran managsimbawa. Sikara so singa agagi a “nianak nipaakar ed kasumlangan” odino pakakagonigon. (Uliran 17:17) Balet unong ed eksperiensya nen Job, arum a managsimbawa et makapasakit imbes a makapaabig. Nakaukolan ya ipatnag na sakey a maong a managsimbawa so empatya, respeto, tan panangasi, a singa si Elihu. Saray mamatatken tan arum niran maespiritual a Kristiano so nayarin mankaukolan a mangipetek ed panag-isip na saray agagin nabebelatan ed saray problema ra, tan nipaakar ed saya et dakel so naaralan na saray managsimbawa manlapud libro na Job.—Galacia 6:1; Hebreos 12:12, 13.

¹⁵ Wala so dakel a maabig a leksion a naaralan ed paraan na impangasikaso nen Elihu ed ontan a pamaakaran. Sikato so maanos a dinmengel sakbay a sikato so inmebat ed lingo iran imbaga na taloran kakaiba nen Job. (Job 32:11; Uliran 18:13) Inusar nen Elihu so ngaran nen Job tan sikato so akisimpatya ed sikato bilang kaaro. (Job 33:1) Aliwan singa say taloran palson managligliwa, ag-impasen nen Elihu so inkasikato ya atagtagey nen say si Job. “Agawa ak [met] ed dalin,” so inkuan to. Agto labay ya aruman so paniirap nen Job diad panamegley na ansakit iran panagsalita. (Job 33:6, 7; Uliran 12:18) Imbes a kritikoen so datin kondukta nen Job, kinomendaan nen Elihu so inkatunong nen Job. (Job 33:32) Mas importante, minoria nen Elihu iray bengatla unong ed punto de bista na Dios, tan tinulongan to si Job a mangiyapasakey ed katuaan a si Jehova so agbalot onkiwas ya agmakatunongan. (Job 34:10-12) Pinaseseg to si Job a manilalo ed si Jehova, imbes a panggunaetan ton ipatnag so dilin inkatunong to. (Job 35:2; 37:14, 23) Saray Kristianon mamatatken tan arum nira so seguradon nagunggonaan ed saratan a leksion.

16. Panon a nagmaliw ya instrumento nen Satanas iray taloran palson managligliwa nen Job?

¹⁶ Say makabat a simbawa nen Elihu so midumaan ed saray ansakit a salita nen Elifaz, Bildad, tan Zofar. ‘Agyo sinalita nipaakar ed siak so bengatla a maptek,’ so imbaga nen Jehova ed sikara. (Job 42:7) Anggano imbaga ra a maabig iray intension da, kinmana ira bilang instrumento nen Satanas imbes a matoor a kakaiba. Diad gapo ni et impasen dan talo a si Job so natetel a mismo ed saray trahedyan sinmabi ed sikato. (Job 4:7, 8; 8:6; 20:22, 29) Unong ed si Elifaz, agpanmamatalekan na Dios iray lingkor to, tan ag-importante ed Sikato no matunong itayo odino andi. (Job 15:15; 22:2, 3) Walaray kasalanan ya inyakusa ni ingen nen Elifaz ed si Job anta agto iratan ginawa. (Job 22:5, 9) Diad biek a dapag, tinulongan nen Elihu si Job diad espiritual a paraan, a satan so lawas a gagala na sakey a maaron managsimbawa.

17. Anto so nepeg a nodnonoten tayo sano nasusubok?

 ¹⁷ Wala ni so sakey a leksion nipaakar ed panagsungdo a naaralan tayo manlapud libro na Job. Iimanoen na maaron Dios tayo so kipapasen tayo tan sikato so mabulos tan makayarin ontulong ed sikatayo diad nanduruman paraan. Diad gapo et naamtaan tayo so eksperiensya nen Elsa Abt. Nodnonoten pa so walan naisip to: “Sakbay ak a naerel, abasak so sulat na sakey ya agin bii ya inkuan ton diad silong na pirmin subok et papakalmaen na espiritu nen Jehova so liknaan tayo. Inisip ko ya alablabas so imbaga to. Balet sanen nidunget ak a mismo ed saray subok, amoriak a duga so imbaga to. Onman a talaga so nagawa. Mairap itan ya isipen no agmo ni itan naeksperiensyan mismo. Ingen ta saman so talagan agawa ed siak. Ontutulong si Jehova.” Agtutukoyen nen Elsa so nagawaan nen Jehova odino ginawa to la ed apalabas a piganlibon taon diad panaon nen Job. Tutukoyen to so nipaakar ed panaon tayo. On, “ontutulong si Jehova!”

Maliket so Too a Mansusungdo

18. Antoran gunggona so agamoran nen Job lapud impansungdo to?

¹⁸ Pigara ed sikatayo so nakaukolan a mangarap ed pirmin kairapan a singa say asagmak nen Job. Balet antokaman so subsubok a kidungetan tayo diad sayan sistema na bengabengatla, walaan itayo na makatunongan a rason pian pansiansiaen so integridad tayo, a singa si Job. Diad tua, apalaboan so bilay nen Job lapud impansungdo to. Lapud satan et sikatoy nagmaliw a naspot tan nagnap. (Santiago 1:2-4) Satan so amabiskeg ed relasyon to ed Dios. “Nadngel ko so nipaakar ed sika lapu ed panamegley na pakadngel na layag; balet natan say matak nanengneng to ka,” so pinekderan nen Job. (Job 42:5) Si Satanas so apaneknekan a matila lapud agto abuyak so integridad nen Job. Kayari na piganlasus a taon, siansian tinukoy nen Jehova so lingkor ton si Job bilang alimbawa na inkatunong. (Ezequiel 14:14) Say rekord nipaakar ed impanmatoor to tan impansungdo to so mamapakiwas ed totoo na Dios anggad natan.

19. Akin a nibaga yon makagunggona so panagsungdo?

¹⁹ Sanen sinulat nen Santiago iray Kristiano nen inmunan siglo nipaakar ed panagsungdo, tinukoy to so liket a resulta na panagsungdo. Tan inusar to so alimbawa nen Job pian panonotan ira nipaakar ed mapalabon impanumang nen Jehova ed saray matoor a lingkor to. (Santiago 5:11) Oniay nabasa tayo ed Job 42:12: “Dia ed ontan si Jehova benendisyonan to so kaunoran a kasampotan nen Job a lalo nen say gapo to.” Doble so insalat na Dios ed abalang nen Job, tan andukey tan maliket so impanbilay to. (Job 42:16, 17) Ontan met, antokaman ya ot-ot, irap, odino sakit na liknaan a susungdoan tayo ed sayan kasampotan na sistema na bengabengatla, saraya so napunas tan nalingwanan la ed balon mundo na Dios. (Isaias 65:17; Apocalipsis 21:4) Nadngelan tayo so impantepel nen Job, tan diad tulong nen Jehova et determinado tayon aligen so alimbawa nen Job. Oniay insipan na Biblia: “Mapalar so too a mantepel na panalsali, ta no asali la, awaten to so balanget na bilay ya insipan na Katawan ed saray mangaro ed sikato.”—Santiago 1:12.

Panon Yon Ebatan?

• Panon tayon napaliket so puso nen Jehova?

• Akin ya agtayo nepeg ya isipen a saray problema tayo et pakapatnagan lay agpanliket na Dios ed sikatayo?

• Antoran bengatla so akatulong ed si Job pian makapansungdo?

• Panon tayon naalig si Elihu ed pamabiskeg ed saray kapanisiaan tayo?

[Tepetepet Parad Panagaral]

[Litrato ed pahina 28]

Ipapatnag na maong a managsimbawa so empatya, respeto, tan inkaabig

[Saray litrato ed pahina 29]

Si Elsa tan Harald Abt