Saray Mauyamo so Manawir ed Dalin

“Iisipen ko a napasimbalo tan ompawil ed dati so palsa. . . . Aliwan diad magano lan arapen, noagta diad mabaybayag nin panaon manlapud natan, sano wala la so balon tawen tan balon dalin.”—Jean-Mari Pelt, Pranses ya environmental specialist.

LAPUD dakel so nagogonigon ed saray nagagawa ed kaliberliber tan sosyedad diad dalin, pirpirawat da lan nanengneng so planeta tayo a magmaliw a sakey a paraiso. Ingen, sayan pampipirawat et aliwa labat a kugip a ginmapo ed sayan koma-21 a siglo. Abayag lan panaon ya insipan na Biblia so kipawil na Paraiso diad dalin. Saray imbalikas nen Jesus a “saray mauyamo . . . tawiren da so dalin” tan “nagawa komon ed tapew na dalin so linawam a singa pakagagawa to ed tawen,” so kabiangan ed saray kabkabisado a teksto ed Kasulatan. (Mateo 5:5; 6:10, Maung a Balita) Balet, dakel natan so agmanisia nipaakar ed mangaraldalin a paraiso a panayaman na saray mauyamo. Ipapasen na maslak a mankuan a Kristiano ya abalang la so Paraiso.

Impaliwawa na sinimban paway na Pranses a magasin a La Vie no akin ya agla papanisiaan na Iglesia Katolika so sakey a paraiso, balanglan diad dalin odino ed tawen: “Kayarin nagmaliw a manunan kabiangan na doktrina na Katoliko ed loob na manga 1900 a taon, [say ideyan] paraiso so inekal la diad saray dasal tan panagdalepdep, tan diad saray sermon ed Simba, saray kurson teolohiya, tan saray klase ed katekismo.” Say salitan “paraiso” et asakbongan na “misteryo tan inkawetwet.” Walaray managkalar a gagagalaen dan ag-ibangat itan lapud satan so “mangipapasabi na amayamay ya ideya nipaakar ed liket diad dalin.”

Unong ed si Frédéric Lenoir, sakey a sosyolohista a nanaral a maong nipaakar ed relihyon, saray ideya nipaakar ed sakey a paraiso et magmamaliw lan “apasakey a panangilitrato ed kanonotan.” Mipadpara, ipapasen nen Jean Delumeau, sakey a historyador tan autor na pigaran libro nipaakar ed satan a tema, a saray sipan na Biblia so kaslakan a simboliko. Oniay insulat to: “Nipaakar ed tepet ya ‘Anto so amta tayo ni natan nipaakar ed Paraiso?,’ oniay ebat na Makristianon doktrina: Lapu ed inkioli na say Manangilaban, nasabi panaon et mankakaiba itayon makaeksperiensya ed liket.”

Matukoy ni kasi anggad natan so mensahe nipaakar ed mangaraldalin a paraiso? Anton talaga so nagawa ed dalin diad arapen? Kasin agtayo naamtaan so nagawa ed arapen, odino malinlinew tayon natalosan itan? Saratan a tepet so naebatan ed onsublay ya artikulo.

 [Picture Credit Line ed pahina 2]

APIS: Emma Lee/​Life File/​Getty Images