Tepetepet na Saray Manbabasa

Kayari na unor a subok diad sampot na Milenyo, wala ni kasi so posibilidad a makapankasalanan tan ompatey so totoo?

Naebatan itan diad tulong na duaran teksto ed Apocalipsis: “Say Patey tan say Hades nibantak ira ed dayat ya apoy. Saya sikato so ipapatey a komadua, a salanti dayat ya apoy.” (Apocalipsis 20:14) “Punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.”—Apocalipsis 21:4.

Imanoen pa so panaon a nipapabitar dia. Say kibasileng na ‘patey tan Hades’ diad dayat na apoy so nagawa kayarin naukom iray akaliktar ed Armagedon, apaolin inaatey, tan siopaman a nianak kayari na Armagedon unong ed “saray bengatla a wala a nisulat ed saray libro,” odino saray detalyadon kakaukolanen nen Jehova ed katooan legan na sanlibon taon. (Apocalipsis 20:12, 13) Inkurit nen apostol Juan so sananey nin pasingawey, a naromog ed Apocalipsis kapitulo 21, a nagawa legan na Milenyon Uley nen Kristo Jesus. Balet, say sigpot a pakasumpal na satan a pasingawey so nagawa diad sampot na sanlibon-taon ya Agew na Panangukom. Diad saman et miayam la si Jehova ed katooan diad naspot a pantalos ya anggapo laray manamegley lapud say Panarian et ipalima la nen Jesus ed Ama to. Diad espiritual a paraan et si Jehova so miayam ed “totoo to” diad permanente tan direktan paraan. Nagawa so sigpot lan ‘pakaandi na ipapatey’ sano magmaliw lan ayadyari so katooan diad sigpot lan kiyaplika na balor na dondon bagat nen Kristo.—Apocalipsis 21:3, 4.

Kanian, say ipapatey a tutukoyen na saray tekston inaon ed tagey et say Adamikon ipapatey, ya ekalen la na dondon nen Kristo. (Roma 5:12-21) Sano naandi la so ipapatey ya atawir na katooan manlapud inmunan too, saray totoo so magmaliw lan singa si Adan sanen sikatoy apalsa. Si Adan et ayadyari, balet ag-itan mankabaliksan ya anggapo lay posibilidad a sikato so ompatey. Imbaga nen Jehova ed si Adan ya agto mangan ed ‘kiew na pakaamtaan na maong tan mauges’ tan inkuan to: “Dia ed agew a pangan mo ed satan, ompatey ka.” (Genesis 2:17) Satan so ipapatey a resulta na ginagalan kasalanan. Kayari na unor a subok diad sampot na Sanlibon Taon ya Uley, saray totoo et siansia nin bulos a makapandesisyon. (Apocalipsis 20:7-10) Sarag da nin siansia a pilien so labay da no kasin itultuloy dan panlingkoran si Jehova odino andi. Agnibaga ya anggapo la so toon mangibeneg ed Dios, a singa ginawa nen Adan.

Anto so nagawa ed sakey a too a mandesidin manrebelde kayari na unor a subok sano naandi lay ipapatey odino Hades? Diad satan a panaon et anggapo lay Adamikon ipapatey. Tan anggapo met lay Hades, say kaslakan a lubok na katooan a walaay ilalon napaoli. Anggaman ontan, nayarian nen Jehova a deralen so siopaman a manrebelde, ya iyan to ed piguratibon dayat na apoy, tan anggapo lan balot so ilalo ton napaoli. Satan ya ipapatey so mipadpara ed ipapatey a sinagmak nen Adan tan si Eva, aliwan say ipapatey ya atawir na totoo manlapud si Adan.

Balet, anggapo so rason pian ilaloan tayo ni a nagawa so ontan. Saramay makalabas ed unor a subok so midumaan ed si Adan diad sakey ya importantin pantalos. Sikara so sigpot lan asubok. Makapanmatalek itayo ed nagnap a resulta na unor a subok lapud amta nen Jehova no panon ton usisaen so totoo diad nagnap a paraan. Makapanseguro itayo a diad unor a subok et natawtaw so siopaman a mangusar ed kawayangan ton mandesisyon diad lingon paraan. Sirin, anggaman walay posibilidad a manrebelde ed Dios iramay makalabas ed subok tan naderal ira, agtayo la nailaloan a nagawa ni itan.

[Litrato ed pahina 31]

Kayari na unor a subok, diad anton pantalos a say katooan et mipadpara ed si Adan?