“Lapu ed Sakey ya Ugaw a Mantaon na Siamera”

KADA ontoktok iray Tasi nen Jehova ed puerta nen Wiesława, a manaayam ed mamaabalaten a Polandiya, sikato so mapagalang a misasalamat ed sikara balet ta agto ra pitotongtongan. Sakey ya agew et akakar ed abung to so siam-taon a si Samuel a kaibay nanay to. Diad saman a bekta et denesidi nen Wiesława a dengelen so mensahe tan inawat to so magasin a nipaakar ed paraison dalin.

Lapud asingger la’d saman so Memoryal na impatey nen Jesu-Kristo, labay ya imbitaan nen Samuel si Wiesława ed sayan espisyal ya okasyon. Kanian kaibay ina to, say ugaw so binmisita lamet ed si Wiesława, ya awit to so inimprintan imbitasyon. Diad impakanengneng ton say ugaw et akakawes na desente, nampatanir ya agano si Wiesława pian manpales na mas matukoy. Kapawil to et tinalineng to si Samuel, inawat to so imbitasyon, insan to intepet: “Kasin onla ak a bukor odino kaibak so masiken ko?” Insan to inyarum: “Anggano agmila so masiken ko, onla ak. Gawaen ko itan lapud sika, Samuel.” Alay liket nen Samuel ta tinoor nen Wiesława so insipan to.

Legan na paliwawa ed Memoryal, si Samuel so yinmurong ed abay nen Wiesława tan impanengneng to ed sikato iray kasulatan a sisingbaten. Nandinayewan iya nen Wiesława. Nanggayagaan to so Memoryal tan misalsalamat lapud nisalaysay ed simplin paraan iray araralem a punto. Alikna to met so ampetang a panangabrasa tan say kaabigan ya impatnag na kongregasyon. Nanlapula’d saman, lalon inmaralem so interes nen Wiesława ed espiritual a bengabengatla tan maparanay met lan akilimog ed saray Tasi nen Jehova. Diad agano ni et oniay inkuanto: “Nababaingan ak ta dati et agak tinmalineng ed sikayo sanen linma kayo ed abung ko. Tan aksobien kon tinmalineng ak labat ed mensahe yo lapu ed sakey ya ugaw a mantaon na siamera, lapud si Samuel.”

Singa si Samuel ed Polandiya, dakel niran kalangweran a Tasi nen Jehova so mandadayew ed Dios diad salita tan ed maabig a kondukta ra. No sakey kan kalangweran, natulongan mo met so masimoon a totoon mangapresya ed maabig iran espiritual a pamaakaran.