‘Nipakabat Komon ed Dios Iray Kerew Yo’
‘Nipakabat Komon ed Dios Iray Kerew Yo’
“Dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo.”—FILIPOS 4:6.
1. Apribilehyoan itayon mitongtong ed siopa, tan akin a makapadinayew itan a tuloy?
NO bilang ta kerewen yo so pormal a pitongtong ed sakey a manuley ed bansa yo, anton ebat so naawat yo? Nayarin makaawat kayo na marespeton ebat manlapud opisina to, balet seguradon agkayo naabuloyan a mitongtong a personal ed sikato. Ingen, miduma so kipapasen ed sankatalonggaringan a Manuley ed amin, si Jehova a Dios, say Soberano ed uniberso. Sikatayo so makapitongtong ed sikato diad inerman a pasen tan diad antokaman a panaon a kaliktan tayo. Saray naabobonan a pikakasi so lawas onsasabi ed sikato. (Uliran 15:29) Talagan alay abig itan! Agta say apresasyon ed saya so nepeg a mamakiwas ed sikatayo a manpikasin naynay ed Samay manepeg a tawagen a ‘Dumerengel na pikakasi’?—Salmo 65:2.
2. Anto so nakaukolan pian dengelen na Dios iray pikakasi?
2 Balet, nayarin itepet na sakey, ‘Antoran pikakasi so dedengelen na Dios?’ Insalaysay na Biblia so sakey a nakaukolan a gawaen pian naabobonan iray pikakasi tayo: “No anggapo so pananisia agnayarin paliketen: ta say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.” (Hebreos 11:6) On, unong a nisalaysay la ed akadkaunan artikulo, say manunan nakaukolan diad iyasingger ed Dios et say pananisia. Mabulos ya ondengel so Dios ed saray pikakasi na saramay onasingger ed sikato, balet nepeg ya onasingger ira ed sikato tekep na pananisia tan maptek iran gawa a walay inkasimoon tan suston awawey na puso.
3. (a) Unong a nipabitar ed saray pikakasi na saray matoor a lingkor nensaman, antoray nayarin ibalikas tayo ed saray pikakasi tayo? (b) Antoran nengneng na pikakasi so nayarin salambiten tayo?
3 Oniay impaseseg nen apostol Pablo ed saray Kristiano nen panaon to: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo.” (Filipos 4:6, 7) Lugan na Biblia so dakel iran alimbawa nipaakar ed saramay nampikasi ed Dios lapud saray kapagaan da. Kabiangan ed saratan si Ana, Elias, Ezekias, tan Daniel. (1 Samuel 2:1-10; 1 Arari 18:36, 37; 2 Arari 19:15-19; Daniel 9:3-21) Nepeg tayon aligen so alimbawa ra. Imanoen met ed saray salita nen Pablo so nanduruman nengneng na saray pikakasi tayo. Sinalambit to so pisasalamat, salanti, say pikakasi a mangibabalikas na apresasyon ed gagawaen na Dios parad sikatayo. Satan so atekepan na panangidayew. Say pikekerew so manutukoy ed mapaabeba, masimoon ya iyey-ey. Tan nayarian tayon ibalikas ed espisipikon paraan iray kerew tayo. (Lucas 11:2, 3) Panliketan na mangatatawen ya Ama tayo so iyaasingger tayo ed sikato ed dinanman ed sarayan paraan.
4. Anggaman amta la nen Jehova iray pankaukolan tayo, akin ya onkerew itayo nin siansia ed sikato?
4 Nayarin oniay itepet na arum, ‘Agta amta la nen Jehova so amin a pankaukolan tayo?’ On, amta to. (Mateo 6:8, 32) Sirin, akin a labay to nin onasingger itayo ed sikato panamegley na saray kerew? Konsideraen pa iyan alimbawa: Walay akankayarian na tindaan a mangiiter na regalo ed arum ed saray kustomer to. Balet, pian naawat itan a regalo, saray kustomer so nepeg ya onasingger ed akankayarian tan kerewen da itan. Saramay agmalabay ya onasingger tan onkerew so mangipapatnag ed agda pangaapresya ed regalo. Mipadpara, say agpangibalikas ed saray kerekerew tayo panamegley na pikakasi so pakapatnagan na kakulangay apresasyon ed itatarya nen Jehova. Oniay imbaga nen Jesus: “Kerew kayo, et awaten yo.” (Juan 16:24) Diad onian paraan et nipatnag tayo so panagmatalek ed Dios.
Panon so Nepeg ya Iyasingger Tayo ed Dios?
5. Akin a nakaukolan tayo so manpikasi diad ngaran nen Jesus?
5 Ag-indatak nen Jehova so dakerakel a mapeget a totontonen no panon so pampikasi. Anggaman kuan, nakaukolan tayon aralen so suston paraan na iyasingger ed Dios, unong a nisalaysay diad Biblia. Singa bilang, imbangat nen Jesus iray patumbok to: “No onkerew kayo na bengatla ed Ama, sikato so iter to ed sikayo ed ngaran ko.” (Juan 16:23) Sirin, sikatayo so nakaukolan a manpikasi ed ngaran nen Jesus, a bidbiren si Jesus bilang say alenleneg a paralanan pian ninatnat ed amin a katooan iray bendisyon na Dios.
6. Sano manpipikasi, anto so nepeg a posisyon tayo?
6 Anto so nepeg a posisyon tayo sano manpikasi itayo? Diad Biblia, anggapo so posisyon ya espesipikon sinalambit pian narengel iray pikakasi tayo. (1 Arari 8:22; Nehemias 8:6; Marcos 11:25; Lucas 22:41) Say importante et say pampikasi ed Dios tekep na inkasimoon tan suston awawey na puso.—Joel 2:12, 13.
7. (a) Anto so kabaliksan na “amen”? (b) Panon so suston kausar na satan diad saray pikakasi?
7 Komusta met so pangibalikas ed salitan “amen”? Impabitar na Kasulatan a saya so manepeg ya ibalikas diad sampot na saray pikakasi tayo, nagkalalo la sano manpipikasi itayo ed publiko. (Salmo 72:19; 89:52) Say Hebreon salita ya a·menʹ so walaan na manunan kabaliksan a “segurado.” Nisalaysay diad Cyclopedia nen McClintock tan Strong a say kabaliksan na pangibagay “Amen” diad sampot na saray pikakasi et “pian pekderan iray salitan nibaga, tan kerewen so pakasumpal na saratan.” No sampotan sirin na masimoon ya “Amen,” say manpipikasi so mangipapabitar ed masimoon iran liknaan to ed walan imbaga to. Sano say sakey a Kristiano a mangidadaulo na pikakasi diad kongregasyon so mansampot ed sayan balikas, saramay onderengel so nayarin mangibalikas met na “Amen” diad kapusoan da odino narengel na arum pian nipatnag so impapuson piabobon da ed nadngelan da.—1 Corinto 14:16.
8. Panon a nayarin mipara so arum a pikakasi tayo ed saray pikakasi nen Jacob odino si Abraham, tan anto so ipapatnag na saya nipaakar ed sikatayo?
8 Walaray panaon ya aabuloyan itayo na Dios ya ipatnag so kaaralem na interes tayo ed saray bengatlan ipipikasi tayo. Nayarin nakaukolan tayo so magmaliw a singa si Jacob nensaman, a sanlabin akipuligesgesan ed sakey ya anghel ta pian nagamoran to so bendisyon. (Genesis 32:24-26) Odino diad arum a kipapasen et nayarin nakaukolan itayon magmaliw a singa si Abraham, ya aminpigan akikasi ed si Jehova nipaakar ed si Lot tan ed arum niran matunong a totoo a nayarin walad Sodoma. (Genesis 18:22-33) Nayarin ipikasi tayo met ed si Jehova so nipaakar ed saray papablien tayo, ya onkerew tayo ed sikato unong ed inkahustisya, maaron-kaabigan, tan panangasi to.
Anto so Nayarin Kerewen Tayo?
9. Anto so nepeg a manuna iran nodnonoten tayo sano manpipikasi itayo?
9 Tandaan so imbaga nen Pablo: “Dia ed ganagana . . . nipakabat komon ed Dios so saray kerew yo.” (Filipos 4:6) Sirin, saray personal a pikakasi tayo so nayarin mangilaktip ed amin lawarin aspekto na bilay. Balet, nepeg a say manunan salambiten tayo ed saray pikakasi tayo et say intereses nen Jehova. Maabig ya alimbawa so impatnag nen Daniel nipaakar ed saya. Sanen sasagmaken na Israel so dusa lapud saray kasalanan da, akikasi si Daniel ed si Jehova ya ipatnag To so panangasi, a kuan to: “Agmo ilaron, lapu ed dili a kakanaan mo, O Dios ko, lapu ed . . . ngaran mo.” (Daniel 9:15-19) Napatnagan met kasi ed saray pikakasi tayo a say manunan nononoten tayo et say kapasantos na ngaran nen Jehova tan say pakasumpal na linawa to?
10. Panon tayon naseguro a matukoy ya ipikasi iray personal a pamaakaran?
10 Anggaman kuan, matukoy met so pangikerew na saray personal a bengatla. Alimbawa, singa say salmista, nayari tayon ikerew so mas aralem a pakatalos ed espiritual. Oniay impikasi to: “Ikdan mo ak na pakatalos, et unoren ko so ganggan mo; on, sikato so sumpalen ko ed sankasimoonan a pusok.” (Salmo 119:33, 34; Colosas 1:9, 10) Si Jesus so “angibagat na pikakasi tan pikekerew . . . ed saman so makapanyarin mangilaban ed sikato ed ipapatey.” (Hebreos 5:7) Diad impanggawa to ed satan, impatnag ton matukoy so ikerew na biskeg sano nipapaarap so sakey diad kapeligroan odino subsubok. Sanen inter to ed saray babangatan to so pangaligan a pikakasi, inlaktip nen Jesus iray personal a pampapagaan, a singa say kaperdona na saray kasalanan tan pakawalaan na inagew-agew a tagano.
11. Panon a makatulong ed sikatayo so pikakasi pian ag-itayo napelag ed tukso?
11 Diad satan a pangaligan a pikakasi, onian kerew so inlaktip nen Jesus: “Agmo kami yabuloy ed tukso, ilaban mo kami ingen ed mauges.” (Mateo 6:9-13) Oniay insimbawa to ed saginonor: “Manpuyat tan manpikasi kayo, pian agkayo onloob ed katutukso.” (Mateo 26:41) Say pikakasi so importantin tuloy sano nipapaarap itayo ed saray tukso. Nayarin natukso itayon mangibaliwala ed saray prinsipyo na Biblia diad trabaho odino diad eskuelaan. Nayarin imbitaan itayo na saray aliwan Tasi a miulop ed sikara ed kuestionable iran aktibidad. Nayarin kerewen da ed sikatayo so panggaway sumlang ed maptek iran prinsipyo. Diad ontan iran panaon, maabig a tumboken tayo so simbawa nen Jesus a manpikasi—sakbay a nidunget ed tukso tan sano nipapaarap la ed tukso—a patulongan itayo ed Dios ya ag-itayo napelag ed tukso.
12. Antoray sengegan na kapagaan a nayarin mamakiwas ed sikatayon manpikasi, tan anto so nailaloan tayo ed si Jehova?
12 Nanduruman pakadesdesan tan kapagaan so onsasabi ed bilay na saray lingkor na Dios natan. Say sakit tan emosyonal a pakakadetdetan so manunan pakakagonigonan na karaklan. Saray marawal a kipapasen ed kaliberliber tayo so pansesengegan na makapagonigon a bilay. Lapud saray kairapan ed ekonomya, mairap so mananap na napambilay. Agaylan makapaligliwan naamtaan a dedengelen nen Jehova iray lingkor to a mangipipikasi ed sarayan bengatla ed sikato! Oniay imbaga na Salmo 102:17 nipaakar ed si Jehova: “Sikato pablien to so pikakasi’ naukolan, tan agto binalaw so pikakasi ra.”
13. (a) Antoran personal a pamaakaran so matukoy a tema na pikakasi? (b) Isalaysay so sakey ya alimbawa na ontan a pikakasi.
13 Diad tua, antokaman a pamaakaran a mangaapekta ed serbisyo tayo ed si Jehova odino say relasyon tayo ed sikato so matukoy a tema na pikakasi tayo. (1 Juan 5:14) No walaray desisyon a gawaen yo nipaakar ed panangasawa odino trabaho odino nipaakar ed pamalaknab yo ed ministeryo yo, ibalikas iratan ed Dios, a kerewen so panangigiya to. Alimbawa, sakey a malangwer a bii diad Pilipinas so malabay a mibiang ed sigpot-panaon a ministeryo. Balet, anggapo so trabaho ton pansuporta to ed dili to. Oniay inkuan to: “Sakey a Sabado, espisipikon impikasik ed si Jehova so nipaakar ed panagpayunir. Diad saman met ya agew, sanen nampulong ak, angiyopresi ak na libro ed sakey a tinedyer. Agnailaloan, oniay imbaga na saman a tinedyer a bii: ‘Nepeg ya onla ka ed eskuelaan mi no Lunes na kabuasan.’ Tinepetan ko no akin. Insalaysay to a walay bakantin trabaho diman a nakaukolan lan okupaan a tampol no posible. Linma ak, tan naawat ak a tampol. Maples iman ya agawa.” Ontan met iray eksperiensya na dakel a Tasi ed interon mundo. Kanian agmasuyat ya ipikasi ed Dios iray impapuson kerew yo!
Panon To No Nankasalanan Itayo?
14, 15. (a) Akin ya agnepeg a masuyat so sakey a too a manpikasi anggaman sikato so nankasalanan? (b) Nilikud ed saray personal a pikakasi na sakey, anto ni so makatulong ed sikato pian onabig manlapud impankasalanan to?
14 Panon a makatulong so pikakasi no say sakey et nankasalanan? Agla manpipikasi so arum a nankasalanan lapud nababaingan ira. Balet, aliwa itan a makabat a kurang. Pian niyilustra: Amta na saray piloto na eroplano a no abalang ira et nayarian dan kontaken so air traffic controller pian onkerew na tulong. Balet, panon to no masuyat ya onkontak so abalang a piloto lapud sikatoy nababaingan ed inkabalang to? Satan so mansumpal ed desyang! Mipadpara, say too a nankasalanan tan nababaingan a manpikasi ed Dios so lalon managmak na desyang. Say sakey ya indibidual so agnepeg a naamper a manpikasi ed si Jehova lapud ta nababaingan ed impankasalanan to. Diad tua, iimbitaan na Dios iramay akapankasalanan a manpikasi ira ed sikato. Pinaseseg nen propeta Isaias iray nankasalanan ed panaon to ya ontawag ira ed si Jehova, ‘ta sikato so mamerdona ed daakan a paraan.’ (Isaias 55:6, 7) Siempre, nakaukolan a ‘palemeken so lupa nen Jehova’ diad pampaabeba nin unona na sakey, a tundaan to so makasalanan a kurang, tan masimoon a magbabawi.—Salmo 119:58; Daniel 9:13.
15 No walay agawan kasalanan, say pikakasi so importante lapud sakey nin rason. Oniay imbalikas nen babangatan a Santiago nipaakar ed sakey a mankaukolan na espiritual a tulong: “Patawag to so saray mamasiken na [kongregasyon]; tan sikato so ipikasi ra komon, . . . tan say Katawan bangonen to; tan no nankasalanan napaandi’ra ed sikato.” (Santiago 5:14, 15) On, nepeg ya ipatua na indibidual so kasalanan to ed si Jehova panamegley na pikakasi, balet nayarian to met so patulongan ed saray mamatatken a sikatoy ipikasi ra. Satan so makatulong ed sikato pian onabig ed espiritual.
Saray Ebat ed Pikakasi
16, 17. (a) Panon ya eebatan nen Jehova iray pikakasi? (b) Antoran eksperiensya so mangiyilustra ed maapit a pansiglaotan na pikakasi tan panagpulong?
16 Panon a naebatan iray pikakasi? Arum so nayarin naebatan a tampol tan diad mapatnag a paraan. (2 Arari 20:1-6) Say arum et nayarin mamalabas ni panaon, tan saray ebat et mairap a natebek. Unong a nipabitar ed ilustrasyon nen Jesus nipaakar ed balo a pawil lan pawil ed samay ukom, nayarin nakaukolan so maminpigan iyaasingger ed Dios panamegley na pikakasi. (Lucas 18:1-8) Balet, napaseguroan itayo a sano manpikasi itayo unong ed linawa na Dios, agbalot ibaga ed sikatayo nen Jehova ya: “Agmo ak gonigonen” odino didisturboen.—Lucas 11:5-9.
17 Dakel ya eksperiensya na totoo nen Jehova so pakapatnagan a naebatan iray pikakasi ra. Saya so mabetbet a nagagawa diad mapublikon ministeryo tayo. Alimbawa, duaran Kristianon agagin bibii diad Pilipinas so nambunog na literatura na Biblia diad nisulinek a pasen na bansa. Sanen inikdan da na tract so sakey a bii, sikato so akanangis. Inkuan ton: “Kalabian et nampikasi ak ed Dios a mangibaki na sakey a mangibangat ed siak na Biblia, tan nibagak a saya so ebat ed pikakasik.” Kayarin tuloy na satan, say bii so ginmapon inmatendi ed saray pantitipon diad Kingdom Hall. Diad sananey nin lugar ed Abalaten-bukig ya Asia, mannerbiyos so sakey a Kristiano agin laki diad pampulong ed sakey a guardiadon bilding a residensyal. Balet, sikato so nampikasi ed si Jehova, nampakpel, tan linmoob ed bilding. Sikato so tinmoktok ed puerta na sakey ya apartment, tan pinmaway so sakey a malangwer a bii. Sanen impaliwawa na agin laki so rason na imbisita to, akanangis so bii. Imbaga to ya abayag to lan aanapen iray Tasi nen Jehova tan impikasi to a naromog to ira. Sikato so maliket a tinulongan na agin laki a makapitalosan ed lokal a kongregasyon na saray Tasi nen Jehova.
18. (a) Sano naebatan iray pikakasi tayo, panon so nepeg ya ikiwas tayo? (b) Anto so nipaseguro ed sikatayo sano manpikasi itayo ed amin a pankanawnawa?
18 Say pikakasi et talagan alay abig a probisyon. Si Jehova so akaparaan ya ondengel tan onkiwas. (Isaias 30:18, 19) Ingen, nakaukolan a magmaliw itayon maimano no panon ya eebatan nen Jehova iray pikakasi tayo. Nayarin ag-itan lawas nagagawa ed paraan ya iilaloan tayo. Siansia, sano natebek tayo so panangigiya to, agtayon balot nepeg a lingwanan so misalamat tan mangidayew ed sikato. (1 Tesalonica 5:18) Niarum ni, lawas tandaan so bilin nen apostol Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo.” On, anamoten so amin a pankanawnawan mitongtong ed Dios. Diad ontan a paraan, mantultuloy yon naeksperiensya so katuaan na imbaga nen apostol Pablo nipaakar ed saramay naebatan so pikakasi ra: “Say deen na Dios, a talonaan ton amin a pakatalos, bantayan to so kapusoan yo tan saray nonot yo.”—Filipos 4:6, 7.
Kasin Naebatan Yo?
• Antoran nengneng na pikakasi so nibalikas tayo?
• Panon itayon nepeg a manpikasi?
• Antoran tema so nayarin ilaktip tayo ed saray pikakasi tayo?
• Anto so nagawaan na pikakasi sano nankasalanan so sakey?
[Tepetepet Parad Panagaral]
[Saray litrato ed pahina 29]
Say masimoon a pikakasi so ontulong ed sikatayo pian ag-itayo napelag ed saray tukso
[Saray litrato ed pahina 31]
Diad panamegley na pikakasi, nibalikas tayo ed Dios so pisasalamat, saray kapagaan, tan kerekerew tayo