No Panon so Iyasingger ed ‘Dumerengel na Pikakasi’

“O sika a dengelen mo so pikakasi, amin a laman ondago ed sika.”—SALMO 65:2.

1. Anto so pidumaan na totoo ed arum niran pinalsa diad dalin, tan anton posibilidad so itatarya na saya?

 DIAD amin a nilibon mabilay a pinalsa, saray totoo lambengat so walaan na kapasidad a mandayew ed Manamalsa. Saray totoo lambengat so sinononot ed espiritual a pankaukolan da tan nalilikna ra so pampilalek a peneken itan. Saya so mangitarya ed sikatayo na alay abig a posibilidad ed pakawalaan na personal a relasyon ed mangatatawen ya Ama tayo.

2. Anto so ambelat ya epekto na kasalanan diad relasyon na too ed Manamalsa to?

² Pinalsa na Dios so too tekep na abilidad a mitalosan ed Manamalsa to. Si Adan tan Eva so apalsa ya andiay-kasalanan. Sirin, mawayang iran makaasingger ed Dios a singa sakey ya ugaw ya onasingger ed ama to. Balet, naandi ra itan a baleg a pribilehyo lapud kasalanan. Si Adan tan Eva so tinmunganga ed Dios tan naandi so maapit a relasyon da ed sikato. (Genesis 3:8-13, 17-24) Kabaliksan kasi na satan a saray ag-ayadyarin ilalak nen Adan et agla makapitongtong ed Dios? Andi, siansia nin aabuloyan ira nen Jehova ya onasingger ed sikato daput no nakapet da so pigaran kakaukolanen. Anto iratan a kakaukolanen?

Saray Kakaukolanen Pian Makaasingger ed Dios

3. Panon so nepeg ya iyasingger na makasalanan iran totoo dia ed Dios, tan anton alimbawa so mangiyilustra ed saya?

³ Say agawa ed duaran ilalak nen Adan so makatulong ed sikatayo pian naamtaan so kakaukolanen na Dios ed ag-ayadyarin too a manpipirawat ya onasingger ed Sikato. Nanggunaetan nen Cain tan si Abel so onasingger ed Dios diad impangiyapay day bagat ed sikato. Inawat na Dios so inyapay nen Abel balet ta agto inawat so apay nen Cain. (Genesis 4:3-5) Anto so pandumaan da? Oniay indalatdat na Hebreos 11:4: “Lapu ed pananisia si Abel angisaklang ed Dios na bagat a marakdakep nen si Cain, et lapu ed inkaagamil to niiter ed sikato so tasi a sikato so matunong.” Malinew sirin a say pananisia et kakaukolanen pian makaasingger ed Dios. Nipabitar met so sakey nin kakaukolanen diad saray salita nen Jehova ed si Cain: “No manggawa ka na maong, agka ta nitandoro?” On, naawat komon so inyasingger nen Cain ed Dios no sikato so nanggaway maong. Balet, impulisay nen Cain so simbawa na Dios, pinatey to si Abel, tan sikatoy nagmaliw a teyengteyeng. (Genesis 4:7-12) Kanian diad akadkauna la et nidanet so kaimportantian na iyasingger ed Dios tekep na pananisia tan maong iran gawa.

4. Anto so nepeg tayon bidbiren nipaakar ed iyaasingger ed Dios?

⁴ Importante so pamidbir ed dilin makasalanan a tendensia tayo no labay tayoy makaasingger ed Dios. Amin a totoo et makasalanan, tan say kasalanan so babeng ed iyaasingger ed Dios. Oniay insulat nen propeta Jeremias nipaakar ed Israel: “Sikatayo linmukso [odino nankasalanan] . . . Sinakbongan mo so inkasika ed sakey a lurem, pian anggapo so makalabas a pikakasi.” (Tagleey 3:42, 44) Anggaman ontan, diad interon awaran na too et impatnag na Dios so inkamabulos ton ondengel ed saray pikakasi na saramay onasingger ed sikato tekep na pananisia tan tekep na suston awawey na puso, ya uunoren da iray ganggan to. (Salmo 119:145) Siopa so arum ed sarayan indibidual, tan anto so naaralan tayo ed saray pikakasi ra?

5, 6. Anto so naaralan tayo ed inyasingger nen Abraham ed Dios?

⁵ Sakey ed saratan et si Abraham. Inawat na  Dios so inyasingger nen Abraham, lapud sikato so tinawag na Dios bilang “kaarok.” (Isaias 41:8) Anto so naaralan tayo ed inyasingger nen Abraham ed Dios? Sayan matoor a patriarka so nantepet ed si Jehova nipaakar ed sakey a tawir, a kuan to: “Anto ta kasi so iter mo ed siak naani, anta siak et manaakar ak ya anggapo so ana’ko?” (Genesis 15:2, 3; 17:18) Diad sananey ya inkagawa, imbalikas to so panagpaga to no siopa so nilaban sanen ipaakseb la na Dios so panangukom to ed saray marelmeng diad Sodoma tan Gomorra. (Genesis 18:23-33) Impikasi met nen Abraham so arum. (Genesis 20:7, 17) Tan, singa ed kipapasen nen Abel, walaray apay a sagpaminsan a ginawa nen Abraham sanen sikatoy inmasingger ed Dios.—Genesis 22:9-14.

⁶ Diad amin na sarayan inkagawa, mabulos ya akitongtong si Abraham ed si Jehova. Balet, say kawayangan ton mansalita so atekepan na mapaabeban panmoria ed kipapasen to diad arap na Manamalsa to. Imanoen pa iray marespeton salita to, a nabasa ed Genesis 18:27: “Nia natan, kinabengatan ko so misalita ed Katawan, siak a dabok tan dapol labat.” Agaylan abig ya awawey ya aligen!

7. Antoran pamaakaran so impikasi na saray patriarka ed si Jehova?

⁷ Nampikasi iray patriarka nipaakar ed nanduruman bengatla, tan sikara so paborablin dinengel nen Jehova. Imbalikas nen Jacob so sakey a pikakasi diad nengneng na sakey a sipan. Kayari ton kinerew so tulong na Dios, oniay masimoon ya impikasi to: “Dia ed saray amin ya inter mo naani ed siak pangitdan ko ra ed sika na kakaplo.” (Genesis 28:20-22) Diad saginonor, sanen sikatoy miabet la ed agi to, kinerew nen Jacob so pananalimbeng nen Jehova, a kuanto: “Pikasik ed sika ya, iliktar mo ak ed lima nen agik, iliktar mo ak ed lima nen Esau: ta sikato so tatakotan ko.” (Genesis 32:9-12) Inmasingger so patriarkan Job ed si Jehova parad pamilya to, tan inyapayan to ira na saray bagat. Sanen nankasalanan so taloran kakaiba nen Job diad panagsalita ra, sikara so impikasi nen Job, tan “si Jehova inako to si Job.” (Job 1:5; 42:7-9) Sarayan salaysay so makatulong ed sikatayo pian nibiig iray pamaakaran a nayarin ipikasi tayo ed si Jehova. Namoria tayo met a si Jehova so akaparaan ya ondengel ed saray pikakasi na saramay onaasingger ed sikato diad suston paraan.

Diad Silong na Ganggan a Sipanan

8. Diad silong na Ganggan a sipanan, panon ya impikasi ed si Jehova iray pamaakaran a mangilalanor ed saray totoo?

⁸ Kayari na impangiliktar nen Jehova ed nasyon na Israel manlapud Ehipto, inter to ed sikara so Ganggan a sipanan. Indatak na Ganggan so uksoyan nipaakar ed iyaasingger ed Dios diad panamegley na aturo iran saserdote. Arum a Levita so intalaga bilang saserdote parad totoo. Sanen linmesa iray importantin pamaakaran na nasyon,  say sakey a manangilaman na totoo—no maminsan et ari odino propeta—so angipikasi ed saratan a pamaakaran diad Dios. (1 Samuel 8:21, 22; 14:36-41; Jeremias 42:1-3) Alimbawa, sanen indedika so templo, si Arin Solomon so inmasingger ed si Jehova panamegley na masimoon a pikakasi. Bilang resulta, impatnag nen Jehova so panangabobon to ed pikakasi nen Solomon, a pinano To na gloria so templo To tan oniay inkuan To: “Saray layag ko [et magmaliw a] sidedengel ira ed pikakasi a nagawa dia ed sayan pasen.”—2 Awaran 6:12–7:3, 15.

9. Anto so kinaukolan parad suston iyaasingger ed si Jehova diad santuaryo?

⁹ Diad Ganggan a niiter ed Israel, inlaktip nen Jehova so sakey a kakaukolanen parad naabobonan ya iyaasingger ed sikato diad santuaryo. Anto itan? Diad kada kabuasan tan kada labi, say atagey a saserdote so kinaukolan a manpool na ambalingit ya insenso diad arapan nen Jehova, nilikud ni ed panangiyapay ed saray bagat ya ayayep. Diad saginonor, saray katambayan a saserdote so angisaklang met ed sayan serbisyo, nilikud ed Agew na Pananakbong. No agmangisaklang iray saserdote na ontan a marespeton panamagalang, agpanliketan nen Jehova so panlilingkor da.—Exodo 30:7, 8; 2 Awaran 13:11.

10, 11. Anto so ebidensya tayo a dedengelen nen Jehova iray pikakasi na saray indibidual?

¹⁰ Diad Israel nensaman, kasin say iyaasingger ed Dios et nagawaan labat diad panamegley na saray aturon manangilaman? Andi, ipapabitar na Kasulatan a panliketan nen Jehova so pangawat ed saray personal a pikakasi na saray indibidual. Diad pikakasi nen Solomon nipaakar ed dedikasyon ed templo, oniay inyey-ey to ed si Jehova: “Anggan anto a pikakasi tan pankerew so gawaen na siopaman a too, no say amin a baley mo ya Israel, . . . [et] yunat da so lima ra ya arap ed saya ya abung, diad ontan ondengel ka komon manlapud ed tawen.” (2 Awaran 6:29, 30) Ibabaga ed sikatayo na salaysay nen Lucas a sanen si Zacarias, ya ama nen Juan a Managbautismo, so angiyapay na insenso diad santuaryo, dakel ya aliwan saserdoten mandadayew ed si Jehova so ‘walad paway a manpipikasi.’ Mapatnag, kustombre la na totoo nensaman so mandaragup diad paway na santuaryo pian manpikasi ira legan ya iyaapay so insenso ed si Jehova diad binalitokan ya altar.—Lucas 1:8-10.

¹¹ Sirin, sanen inasinggeran si Jehova diad suston paraan, sikato so maliket a dinmengel ed saray kerew na saramay angirepresenta ed interon nasyon tan saramay indibidual a nananap ed sikato. Natan et anggapo itayo la ed silong na Ganggan a sipanan. Anggaman kuan, makaaral itayo na pigaran importantin leksion nipaakar ed pikakasi unong ed saray paraan na inyasingger na saray Israelita nensaman diad Dios.

Diad Silong na Makristianon Uksoyan

12. Anton uksoyan so inletneg parad saray Kristiano pian makaasingger ira ed si Jehova?

¹² Manbibilay itayo la natan ed silong na Makristianon uksoyan. Anggapo la so literal a templo a pangirepresentaan na saray saserdote ed amin a totoo na Dios odino pangiyarapan tayo ed inkasikatayo sano manpikasi itayo ed Dios. Anggaman kuan, si Jehova so walaan nin siansia na uksoyan pian makaasingger itayo ed sikato. Anto itan? Nen 29 C.E., sanen alanaan si Kristo tan sikato so aturon Atagey a Saserdote, ginmapo  so uksoyan parad espiritual a templo. * Sayan espiritual a templo so balon uksoyan nipaakar ed iyaasingger ed si Jehova diad panagdayew a base ed mananakbong a bagat nen Jesu-Kristo.—Hebreos 9:11, 12.

13. Nipaakar ed pikakasi, anto so sakey a pampadparaan na templo ed Jerusalem tan say espiritual a templo?

¹³ Dakel ya aspekto na templo diad Jerusalem so matukoy a manideskribe ed nanduruma iran aspekto na espiritual a templo, a mangilaktip ed saramay misiglaotan ed pikakasi. (Hebreos 9:1-10) Alimbawa, anto so inrepresenta na insenso ya iyaapay, ed kabuasan tan labi, diad altar na insenso ed Masanton silir na templo? Unong ed libro na Apocalipsis, say ‘insenso et saray pikakasi na saray sasanto.’ (Apocalipsis 5:8; 8:3, 4) Si David so apuyanan a mangisulat: “Pasabien mo so pikakasik ed arap mo a singa insenso.” (Salmo 141:2) Sirin, diad Makristianon uksoyan, say ambalbalingit ya insenso so matukoy a mangirerepresenta ed saray naabobonan a pikakasi tan panangidayew ed si Jehova.—1 Tesalonica 3:10.

14, 15. Anto so nibaga nipaakar ed iyaasingger ed si Jehova na (a) saray alanaan a Kristiano? (b) say “arum a karnero”?

¹⁴ Siopa so nayarin onasingger ed Dios diad sayan espiritual a templo? Diad samay literal a templo, apribilehyoan iray saserdote tan Levita a manlingkor diad loob na saban, balet saray saserdote lambengat so makaloob ed Masanton pasen. Panggagayagaan na saray alanaan a Kristianon walaan na mangatatawen ya ilalo so nikaduman espiritual a kipapasen ya inlitrato na loob a saban tan say Masanton pasen, a nanggawan posible ed sikara a mangisaklang na saray pikakasi tan panangidayew ed Dios.

¹⁵ Komusta met iramay walaan na mangaraldalin ya ilalo, say “arum a karnero”? (Juan 10:16) Impabitar nen propeta Isaias a saray totoo na dakel a nasyon so ondago ed panagdayew ed si Jehova diad “saray kaunoran ya agew.” (Isaias 2:2, 3) Insulat to met a “saray sankaili” so miulop a mandayew ed si Jehova. Pian nipatnag na Dios so inkamabulos ton mangawat ed sikara diad iyaasingger da ed sikato, oniay imbaga to: “Gawaen ko ra naani a malikeliket ed abung ko a panagpikasian.” (Isaias 56:6, 7) Say Apocalipsis 7:9-15 so angiter na kaaruman iran detalye, a manideskribe ed “baleg ya ulop” a nanlapud “balang nasyon” tan nandaragup ed panagdayew tan pikakasi ed Dios diad “agew tan labi” legan ya akaalagey ira ed paway a saban na espiritual a templo. Agaylan makapaligliwan isipen ya amin a lingkor na Dios natan et mawayang lan makaasingger ed Dios tekep na sigpot a panagmatalek a dedengelen to ira!

Antoran Pikakasi so Dedengelen?

16. Anto so naaralan tayo nipaakar ed pikakasi na saray akadkaunan Kristiano?

¹⁶ Saray akadkaunan Kristiano so mapikasin totoo. Antoray impikasi ra? Inkerew na saray Kristianon mamatatken so panangigiya ed pamili ra na saray lalakin pabtangan na saray responsabilidad diad organisasyon. (Gawa 1:24, 25; 6:5, 6) Impikasi nen Epafras iray kapanisiaan to. (Colosas 4:12) Saray membro na kongregasyon diad Jerusalem so angipikasi ed si Pedro sanen sikatoy walad prisoan. (Gawa 12:5) Saray akadkaunan Kristiano so kinmerew ed Dios na biskeg  pian makpel dan arapen so isusumpa, a kuan da: “Katawan, nengneng mo so saray gagaem da; tan yabuloy mo ed saray aripen mo a salitaen da a makmakpel so salitam.” (Gawa 4:23-30) Pinaseseg nen babangatan a Santiago iray Kristiano a manpikasi ira ed Dios pian nawalaan ira na kakabatan sano nasusubok ira. (Santiago 1:5) Ilalaktip yo kasi iratan diad saray kerew yo ed si Jehova?

17. Dedengelen nen Jehova iray pikakasi na siopa?

¹⁷ Agdedengelen na Dios so amin a pikakasi. Panon itayo sirin a makapanpikasi tekep na panamaseguro a naabobonan iray pikakasi tayo? Saray matoor a totoo a dinengel na Dios nensaman et inmasingger ed sikato tekep na inkasimoon tan suston awawey na puso. Impatnag da so pananisia tan tinekepan da met itan na maabig iran gawa. Napaseguroan itayo a dengelen nen Jehova iramay onasingger ed sikato diad ontan met a paraan natan.

18. Pian narengel iray pikakasi ra, anton kakaukolanen so nepeg a kapeten na saray Kristiano?

¹⁸ Wala ni so kaaruman a kakaukolanen. Oniay impangisalaysay nen apostol Pablo: “Diad panamegley to et sikatayo . . . so makaasingger ed Ama lapud saksakey ya espiritu.” Siopa so tutukoyen nen Pablo sanen insulat ton, “diad panamegley to”? Si Jesu-Kristo. (Efeso 2:13, 18, NW) On, mawayang itayon makaasingger ed Ama diad panamegley lambengat nen Jesus.—Juan 14:6; 15:16; 16:23, 24.

19. (a) Kapigan nagmaliw a makapadimla ed si Jehova iray insenson iyaapay diad Israel? (b) Panon tayon naseguro a saray pikakasi tayo et singa masamyong ya insenso ed si Jehova?

¹⁹ Unong ed asalambit la, say insenso ya inyapay na saray Israelitan saserdote so angirepresenta ed saray naabobonan a pikakasi na saray matoor a lingkor na Dios. Balet, no maminsan et ag-aawaten nen Jehova iray insenso ya inyapay na saray Israelita. Agawa itan sanen saray Israelita so mamopool na insenso diad templo balet ta ondadakmomo met ira ed saray talintao. (Ezequiel 8:10, 11) Mipadpara natan, saray pikakasi na saramay mankuan a manlilingkor ed si Jehova balet ta manggagawa iray bengatlan sumlang ed saray ganggan to so magmaliw a makapadimla ed sikato. (Uliran 15:8) Pansiansiaen tayo sirin a malinis so amin ya aspekto na bilay tayo ta pian saray pikakasi tayo et magmaliw a singa masamyong ya insenso ed Dios. Panliketan nen Jehova iray pikakasi na saramay ontutumbok ed matunong iran basbas to. (Juan 9:31) Balet, wala niray tepet. Panon so nepeg tayon pampikasi? Anto so nayarin ipikasi tayo? Tan panon ya ebatan na Dios iray pikakasi tayo? Saraya tan say arum niran tepet so konsideraen ed ontumbok ya artikulo.

[Paimano ed leksab]

Kasin Nipaliwawa Yo?

• Panon a makaasingger ed Dios iray ag-ayadyarin totoo diad naabobonan a paraan?

• Diad saray pikakasi tayo, panon tayon naalig iray patriarka?

• Anto so naaralan tayo ed saray pikakasi na saray akadkaunan Kristiano?

• Kapigan magmaliw a singa masamyong ya insenso iray pikakasi tayo ed Dios?

[Tepetepet Parad Panagaral]

[Litrato ed pahina 23]

Akin ya inawat na Dios so apay nen Abel balet ta agto inawat so apay nen Cain?

[Litrato ed pahina 24]

‘Siak et dabok tan dapol labat’

[Litrato ed pahina 25]

‘Iter ko ed sika so kakaplo’

[Litrato ed pahina 26]

Kasin saray pikakasi yo et singa masamyong ya insenso ed si Jehova?