Panagdayew a Makagunggona ed Sika

“MAONG ed siak so ondere ed abay na Dios,” so inyabawag na salmistan si Asap. Aminsan et sinmebang ed nonot to so pangalig ed saramay mangipuepuera ed Dios ta pian nagegemtan to so mainawan panagbilay. Balet ta amoria nen Asap iray gunggona na iyapit ed Dios tan diad saginonor et inkuan to a makagunggona so onapit ed sikato. (Salmo 73:2, 3, 12, 28) Kasin makagunggona ed sika natan so tuan panagdayew? Panon?

Say pandayew ed tuan Dios so pakagamoran mo na mablin tuloy a bengatla nen say diad pambilay ya akasentro labat ed dili. Lapu ed paraan na impamalsa ed sikatayo na “say Dios na aro,” saramay manggegemtan labat na dilin pankaabigan da so agbalot makalikna na liket. (2 Corinto 13:11) Imbangat nen Jesus so manunan katuaan nipaakar ed inkagawa na too sanen inkuan to: “Lalo a mapalar so mangiter nen say mangawat.” (Gawa 20:35) Satan so rason no akin a panliketan tayon gawaen iray bengatlan parad kakaaro tan pamilya tayo. Balet say sankabalgan a liket so nalikna diad panggawa ed saray bengatlan parad Dios. Sikato so mas makanepegan na panangaro tayo nen say siopaman ni. Napapaneknekan na minilyon a totoo ed amin a kipapasen na panagbilay a say pandayew ed Dios unong ed saray kakaukolanen to so peteg a makapenek.—1 Juan 5:3.

Nawalaan Ka na Gagala ed Bilay

Makagunggona met ed sika so tuan panagdayew lapud mangiiter itan ed sika na gagala ed bilay. Naiimanom ta no panon kabetbet a nisiglaot so liket diad pakaliknan walay nagagawaan mon makagunggona? Maslak a totoo et walaan na kalat ed bilay, balanglan misiglaotan itan ed pamilya, kakaaro, negosyo, odino panliliket da. Balet, lapud saray agpakaseguroan ed bilay, saratan a bengatla so mabetbet ya agmamapaliket ed sikara. (Eclesiastes 9:11) Ingen, say tuan panagdayew so ontulong ed sikan naromog so atagtagey a gagala, a lawas makapenek anggano makapadismaya so arum iran aspekto na bilay.

Lalanoren na tuan panagdayew so pangamta ed si Jehova tan say matoor a panlingkor ed sikato. Saramay mangaagamil na ontan so napapaapit a maong ed Dios. (Eclesiastes 12:13; Juan 4:23; Santiago 4:8) Nayarin mairap mon isipen a nakabat mon maong so Dios, a sikatoy magmaliw a kaarom. Balet no nodnonoten mo so salaysay nipaakar ed saray impideneng to ed totoo tan no imanoen mo iray pinalsa to, talagan natebek mo iray aspekto na personalidad to. (Roma 1:20) Nilikud ed satan, diad pambasam ed Salita na Dios, natalosan mo no akin a wadia itayo, no akin ya aabuloyan na Dios so kairapan, no panon ton panampoten itan tan, say sankaabigan ed amin, no panon kan nawalaan na importantin betang ed gagala na Dios. (Isaias 43:10; 1 Corinto 3:9) Say ontan a pakatalos so mangiter ed sika na sakey nin rason pian manbilay!

Natulongan Kan Magmaliw a Maong a Too

Makagunggona ed sika so tuan panagdayew lapud tulongan ka na satan a magmaliw a maong a too. Legan mon aagamilen so tuan panagdayew, nabayuboan mo so personalidad a manresulta ed mas maliket a pisisiglaotan ed arum. Naaralan mo ed Dios tan ed Anak to no panon so ikiwas a matua, pansalita na maong, tan pambilay a responsable. (Efeso 4:20–5:5) Sano naaarom la so Dios lapud sikato lay kabkabat mo, napakiwas kan mangalig ed sikato. Oniay ibabaga na Biblia: “Aligen yo sirin so Dios, singa anak to kayon inararo, tan mankurang kayo ed aro.”—Efeso 5:1, 2.

Agta makapaliket so pakapilimog ed saray totoon mangaalig ed panangaro na Dios? On, lapud  ag-itayo manbukbukor a mandadayew ed tuan Dios. Napilimogan yo so arum a totoo a mangaaro ed maptek tan maong. Siempre, nayarin panduaruwaan mo so ideya ya organisadon relihyon. Balet, unong ya atalosan tayo la diad akadkaunan artikulo, say problema ed maslak a relihyon et aliwan lapud organisado ira noagta ag-ira naoorganisa ed dugan paraan tan ed dugan gagala. Dakel ya organisadon relihyon so uusaren parad agmakristiano iran gagala. Saray totoo nen Jehova so inorganisa ton mismo parad alay abig a gagala. Oniay ibabaga na Biblia: “Say Dios aliwan Dios na kolkol, noag kareenan.” (1 Corinto 14:33) Singa met ed minilyon nin totoo, napaneknekan mo a say pilimog ed organisadon tuloy ya ulopan na saray Kristiano et walaan na maabig ya epekto ed panmoriam ed arapen.

Nawalaan Ka na Ilalo ed Arapen

Ipapabitar na Masanton Kasulatan ya oorganisaen na Dios iray tuan managdayew ta pian makaliktar ira ed pangangga na peles a sistema na bengabengatla tan tawiren da so balon dalin a “panaayaman na katunongan.” (2 Pedro 3:13; Apocalipsis 7:9-17) Kanian say panagdayew a makagunggona ed sika et mangitatarya na ilalo, a satan so makanakana ed panliket. Saray arum so mangibabase na ilalo ra diad malet ya inkiletneg na saray gobierno, pakawalaan na marakep a negosyo, odino paniilalo ed mabunigas a laman tan makapenek a panretiro. Balet no wala man bilang ed saratan a bengatla, pigpigara so mangitatarya na malet a basiyan parad panilalo ed maliket ya arapen. Diad biek a dapag, oniay insulat nen apostol Pablo: “Wala kamin manilalo ed Dios a mabilay.”—1 Timoteo 4:10.

No manusisa ka a maong, naromog mo iray tuan managdayew. Diad sayan mundo a walay inkaapag-apag, say aro tan pankakasakey na saray Tasi nen Jehova so malinew a mangibibiig ed sikara. Manlalapu ira ed amin lawarin bansa tan kipapasen na panagbilay; ingen ta nankakasakey ira lapud manaaroan ira tan aaroen da si Jehova. (Juan 13:35) Iimbitaan da ka ya amtaen mon mismo no anto so naeeksperiensya ra. Oniay insulat nen Asap: “Maong ed siak so ondere ed abay na Dios.”—Salmo 73:28.

[Litrato ed pahina 7]

Nayarian moy magmaliw a kaaro na Dios