Relihyon—Anto so Maabig a Nagagawaan na Satan?

“NAYARIAN koy magmaliw a maong a too anggano aliwa ak a relihyoso!” Ontan so kaslakan a liknaan na dakel a totoo. Dakel a totoon matua, makasi, tan responsable so ag-interesado ed relihyon. Alimbawa, anggaman ibabaga na maslak a taga-Sagur a Europa a manisia ira ed Dios, dagdaiset ed sikara so maparanay a mimimisa. * Anggan diad Latin Amerika, manga 15 ya anggad 20 a porsiento labat na saray Katoliko so regular a mimimisa.

Nayarin moriaen mo, a singa met ed dakel nin totoo, ya agmakatulong so relihyon ed magmaong a pambilay. Balet, maseguron kabat mo met a diad apalabas iran dekada, diad panaon na saray lakim tan baim, et mas relihyoson maong so maslak a totoo nen say natan. Panon a dinmakel so naandian la na interes ed relihyon? Nayari kasin magmaliw a maong so sakey a too anggano aliwan relihyoso? Wala ta so relihyon a makagunggona ed sika?

No Akin a Dakel so Agla Interesado ed Relihyon

Diad loob na saray siglo, panisiaan na maslak a totoon mankuan a Kristiano a kakaukolanen na Dios so katutulok. Mimimisa ira pian nagamoran da so pabor na Dios, balanglan diad panamegley na saray seremonya ya idadaulo na pari odino diad panamegley na panagkalar na ministro. Siempre, dakel so mikabat ed pansimpisimpitan na relihyon. Kabkabat so betang na relihyon ed pambabakal, ontan met ed imoral a kondukta na arum a klerigo. Balet moriaen na maslak a totoo a maabig a mismo so relihyon. Labalabay na arum so misteryoson kipapasen, say tradisyon, tan say musika; tan arum ni ingen so apakiwas lapud tatakotan da so magnayon a kaderal ed impierno, a sakey ya aliwan Makasulatan a bangat. Diad saginonor et anguman so panmoria na dakel a totoo ed relihyon lapud pigaran agawgawa.

Kinmayat so teorya na ebolusyon. Arum so anisia a nibanbana labat so inggapo na bilay—aliwan nanlapud Dios. Maslak a relihyon so agmakapangitatarya na malinew ya ebidensya a say Dios so Subol na bilay. (Salmo 36:9) Sakey ni, legan ya onaaligwas so teknolohiya, iisipen na totoo a say siensia so makaresolbe ed antokaman a problema lapud saray makatantandan nagagawaan ed medisina, transportasyon, tan komunikasyon. Iisipen da met a saray social scientist tan sikolohista so makapangitatarya na mas maabig a giya nen saray relihyon. Agnipapatnag a mismo na saray relihyon a say pambilay unong ed ganggan na Dios so sankaabigan a dalan na bilay.—Santiago 1:25.

Imbes, dakel a relihyon so anguman ed mensahe ra. Agla ibabangat na saray pari tan ministro a kakaukolanen na Dios so katutulok. Dakel la so mangibabangat a kada too so nepeg a mandesidi parad inkasikato no anto so duga tan aliwa. Pian magmaliw a popular so pigaran lider na relihyon, ibabaga ra ya awaten ka na Dios antokaman so paraan na pambibilay mo. Ipapanonot ed sikatayo na satan a bangat imay nipasakbay la ed Biblia: “Onsabi so panaon ya agda nitepel so maabig a bangat; noag ingen dia ed kiwala na gatel ed  laman da mantipon ira ed saray managbangat ed sikara; unong ed saray dilin kaalakan na laman da.”—2 Timoteo 4:3.

Imbes a manangguyor ed totoo, satan a bangat so mamapaarawi la ingen ed sikara. Agpankelawan no akin ya oniay uumamengen da: ‘No panduaruwaan na saray iglesia so pakayari na Dios a mamalsa tan ed kakabatan To a manggawa na saray totontonen, anto so gunggona ed pimimisak? Akin a nepeg ko nin ibangat so relihyon ed ananak ko?’ Saray indibidual a manggugunaet labat a manbilay a masimpit so mangipapasen ya agla makana so relihyon. Agla ra mimimisa, tan aliwa lan importante ed sikara so relihyon. Akin kasi et nagmaliw lan andi-kakanaan so bengatlan nepeg komon a makagunggona? Say Biblia so mangitatarya na makatunongan a rason.

Uusaren so Relihyon Parad Mauges Iran Gagala

Pinasakbayan nen apostol Pablo iray inmunan Kristiano a walaray mangusar ed Inkakristiano parad mauges iran gagala. Oniay inkuan to: “Onloob naani ed pegley yo so saray masiban lobo, ya agda perdonaen so kasimpukokan. Et dia ed sikayo met lanlamang wala ra so onalagey naani a totoon mansalita na saray bengatlan mabanday, pian tangguyoren da so saray binangatan ya ontumbok ed sikara.” (Gawa 20:29, 30) Say sakey a nansalita na ‘bengabengatlan mabanday’ odino pikewet et say Romanon Katoliko a teologo a si Augustine. Binangatan nen Jesus iray patumbok to a kombinsien da so arum diad pankatunongan manlapud Kasulatan. Balet, pinikewet nen Augustine iray salita nen Jesus a nikurit diad Lucas 14:23 a, “Sikara so pasooten mon onloob,” ya inkuan ton aliwan makapuy so pamuersa ed totoo pian kombertien ira. (Mateo 28:19, 20; Gawa 28:23, 24) Inusar nen Augustine so relihyon pian kontrolen so totoo.

Si Satanas, a sakey a rebelden anghel, so walad benegan na lingon panguusar ed relihyon tan say iyuuges na satan. Sinagyat to iray relihyoson totoo nen inmunan siglo pian impluensyaan da na mauges iray Kristianon kongregasyon. Oniay imbaga na Biblia nipaakar ed sikara: “Saratan a totoo pakalala ran apostoles, matitilan komikimey, omparungtal iran singa apostoles nen Kristo. Tan aliwan makapakelaw; ta si Satanas ni magmaliw a singa anghel na liwawa. Aliwa sirin a baleg a bengatla no saray ministros to met ompanengneng ira a singa ministros na katunongan.”—2 Corinto 11:13-15.

Anggad natan et uusaren ni nen Satanas so relihyon a mankuankuanan a Kristiano, maptek ed moral, tan lapuan na liwawa ta pian sagyaten so totoo a manbilay unong ed saray estandarte to imbes a diad saray estandarte na Dios. (Lucas 4:5-7) Nayarin naiimano yo a dakel a klerigo natan so manguusar ed relihyon ta pian itandoroy inkasikara panamegley na saray atagey a titulo tan pian makala ray kuarta manlapud saray membro da. Uusaren met na saray gobierno so relihyon pian tangguyoren iray mibabaley ya iyapay day inkasikara ed bakal.

Uusaren na Diablo so relihyon diad mas malaknab a paraan nen say amta na maslak a totoo. Nayarin isipen yo a pigpigara labat so relihyoson panatiko ya uusaren nen Satanas parad gagala to. Balet unong ed Biblia, samay sakey a ‘manngaran na Diablo tan Satanas so mantitila ed lapag na sankamundoan.’ Inkuan ni na Biblia: “Say sankamundoan mandukdukol ed kaugsan.” (Apocalipsis  12:9; 1 Juan 5:19) Panon a momoriaen na Dios imay relihyon ya uusaren na papangulo a malabay labat a manangguyor ed totoo ya ontumbok ed sikara?

‘Antoy Kakanaan na Saratan ed Siak?’

No nabibigla ka nipaakar ed kondukta na arum ya iglesia na Kakristianoan, mas agnaliliketan so Makapanyarin-amin a Dios ed sikara. Ibabaga na Kakristianoan a wala so sipanan ed baetan da tan say Dios; unong ya ontan met so inkuan na kadaanan ya Israel. Sikara so parehon agnanmatoor. Kanian, no panon a kinondena nen Jehova so Israel nensaman, ontan met so Kakristianoan natan. Oniay inkuan nen Jehova: “Agda inunor iray salitak tan impulisay day bangat ko. Antoy kakanaan na insenson iyaakar da’d siak anggaman manlalapu ra’d dalin na Saba? . . . Agak manliket ed saray isasaklang da.” (Jeremias 6:19, 20, Maung a Balita) Ag-inawat na Dios iray panangidayew a ginawa na saray mansimpisimpitan. Agto nanliketan iray ritual tan pikakasi ra. Oniay inkuan to ed Israel: “Saray tinuro yo a liket say kamarerwak kagula to ra; sikara so gonigon ed siak; masagpot ak a manawit ed sikara. Et sano unaten yo so saray lima yo, yamot ko so saray matak a manlapu ed sikayo; on, sano manggawa kayo na dakel a pikakasi, agak ondengel.”—Isaias 1:14, 15.

Kasin naliliketan si Jehova ed saray piesta ya ipapasen na saray relihyon bilang Makristiano balet ta datin mamapagalang ed palson dirios? Kasin tatalinengen to iray pikakasi na saray klerigo a manederal ed bangabangat nen Kristo? Kasin aawaten na Dios so dinanman a relihyon a mangipupulisay ed ganggan to? Makaseguro ka a sikatoy onkiwas sumpad saray ritual na relihyon natan a singa met ed inkiwas to sumpad saray bagbagat na Israel nensaman, a nipaakar ed saratan et inkuan to: ‘Antoy kakanaan na saratan ed siak?’

Anggaman kuan, si Jehova so interesadon tuloy ed pandadayew na masimoon iran totoo dia ed katuaan. Napapaliket so Dios sano ibabalikas na saray indibidual so apresasyon da ed amin a nagagamoran da manlapud sikato. (Malaquias 3:16, 17) No ontan, nayarian mo ta so magmaliw a maong a too anggan agka mandadayew ed Dios? Say sakey a too ya anggapoy gagawaen to parad maaron atateng to so aliwan matua ed pangipapasen toy inkasikato a maong a too, agta ontan? Kasin magmaliw a maong so sakey a too ya anggapoy gagawaen to parad Dios? Manepeg labat a sikatayoy nawalaan na aktibon interes ed tuan Dios, say mismon lapuan na bilay. Diad onsublay ya artikulo, nanengneng tayo no panon a say tuan panagdayew et aglambengat mamapagalang ed Dios noagta makagunggona met ed sikatayo.

[Paimano ed leksab]

[Litrato ed pahina 4]

Kasin napapaneknekan na saray relihyon a say Dios so amalsa ed amin a bengatla?

[Litrato ed pahina 4, 5]

Nayari kasin mibiang dia so sakey a manangilaman na Dios?

[Litrato ed pahina 5]

Panon a momoriaen na Dios so onian klase na piesta?

[Credit Line]

AP Photo/Georgy Abdaladze