Sano Ombeneg ed si Jehova so Sakey ya Inad-aro

SI MARK tan si Louise et Tasi nen Jehova. * Tekep na aro tan panangasikaso, imbangat da ed ananak da so Kasulatan, unong ed simbawa na Biblia a gawaen na Kristianon atateng. (Uliran 22:6; 2 Timoteo 3:15) Makapaermen balet ta aliwan amin ya ananak da so nantultuloy a nanlingkor ed si Jehova sanen binmaleg iratan. “Paneermenan kon maong so inkasipa na saratan ya ananak ko,” so inkuan nen Louise. “Panon kon nipatnag ed kada agew ya agnasasakitan so liknaan ko? Sano istoryaen na arum so nipaakar ed ananak da, ansakit so pagew ko tan popokpokan ko so luak.”

On, sano say sakey et ombeneg ed si Jehova tan ed dalan na bilay a nidatak ed Kasulatan, nagogonigon a maong iray matoor a kapamilyaan. “Inad-arok so atsik,” so inkuan nen Irene. “Gawaen kon amin pian sikatoy makapawil ed si Jehova!” Oniay inkuan nen Maria, a say agi ton laki et binmeneg ed si Jehova lapud imoral a kondukta: “Mairap iya parad siak lapud diad amin lawarin pamaakaran et sikato so alay abig ya agi ed siak. Sikato so naiiliwan ko nagkalalo la no walay angkabaleg iran pandaragup na pamilya mi.”

Akin ya Agaylay Irap?

Akin a makapagonigon a maong ed saray Kristianon kapamilyaan so pakabalang ed espiritual na sakey ya anak odino arum ya inad-aro? Lapud amta ra ya isisipan na Kasulatan so andi-anggaan a bilay diad paraison dalin parad saramay manmatoor ed si Jehova. (Salmo 37:29; 2 Pedro 3:13; Apocalipsis 21:3-5) Pirawat dan panggayagaan iratan a bendisyon a kaiba iray kaasawaan, ananak, atateng, agagi ra ed laman, tan saray apo ra. Agaylan makapaot-ot ed sikara no naisip da ya ag-iratan napanggayagaan na saray inad-aro ra a tinmunda lan manlingkor ed si Jehova! Anggan diad bilay da ed kaplesan, amta na saray Kristiano a pakagunggonaan da iray ganggan tan prinsipyo nen Jehova. Saray Kristiano sirin so nagonigon a maong sano nanggawa na makapuy so inad-aro ra a mansumpal ed makapaermen a bengatla.—Isaias 48:17, 18; Galacia 6:7, 8.

 Nayarin agnatalosan na arum ya agnin balot akaeksperiensya na ontan ya inkabalang so ansakit ya epekto na satan. Apektado so amin lawarin aspekto na bilay da. “Lalon makapabelat na liknaan so iyurong legan na saray Makristianon pantitipon tan nanengneng so atateng a mieelekan tan mitotongtong ed ananak da,” so inkuan nen Louise. “Diad antokaman a maliket ya ebento et naeermenan ak lapud anggapo iray inad-arok.” Nanonotan na sakey a Kristianon matatken so apat taon ya insian na sioman ton bii. Oniay inkuan to: “Mabetbet et magmamaliw a makapaermen la ingen iray ‘makapaliket a panaon.’ No regaloan ko so akulaw ko odino sikatoy ipasyar ko ed marakep a pasen no sampot-simba, sikato so makaakis no nanonotan to so anak to ya agmi kaiban manliliket.”

Alabas kasi so reaksion na sarayan Kristiano? Andi met. Diad tua et nipapatnag da iray kalidad nen Jehova, ya unong ed indengan to et apalsa so too. (Genesis 1:26, 27) Anto so kabaliksan na satan? Bueno, anto so liknaan nen Jehova sanen nanrebelde ed sikato so totoo ton Israel? Unong ed Salmo 78:38-41, naamtaan tayo a si Jehova so asakitan. Ingen, sikato so maanos ya amasakbay tan nandisiplina ed sikara, ya aminpiga to iran pinerdona sanen impatnag da so pagbabawi. Mapatnag, alikna nen Jehova so personal a pisisiglaotan ed saray pinalsa to, ‘say gawa na saray lima to,’ tan agto ira inkaindan a tampol. (Job 14:15; Jonas 4:10, 11) Insipor to ed saray totoo so kapasidad a nawalaan na mipadparan matoor a pisisiglaotan, pian lalon maapit so relasyon ed baetan na mankakapamilyaan. Kanian, agmakapasurprisa  no akin a paneermenan na saray totoo so pakabalang ed espiritual na sakey ya inad-aron kapamilya ra.

On, say pakabalang ed espiritual na sakey ya inad-aro so kabiangan ed sankairapan iran subok ya onsabi ed saray tuan managdayew. (Gawa 14:22) Imbaga nen Jesus a say pangawat ed mensahe to so pansengegan na pakaapag-apag ed loob na arum a pamilya. (Mateo 10:34-38) Say makasengeg et aliwan say mismon mensahe na Biblia so sengegan na pakaapag-apag na pamilya. Noagta, saray agmananisia odino agmatoor a kapamilyaan so sengegan na inkaapag-apag lapud panangipulisay, panangitalirak, odino isusumpa da ni ingen ed dalan na Inkakristiano. Balet, makapisalamat itayon maong ed si Jehova lapud agto ikaindan iramay matoor ed sikato, a tulongan to ira pian natalonaan da iray subok ed sikara. No sikayo so maneermen natan lapud inkabalang ed espiritual na sakey ya inad-aro yo, antoran prinsipyo na Biblia so makatulong pian natalonaan yo so ermen tan nalikna yo so liket tan inkapnek?

No Panon so Panalona

Pabiskegen odino ‘ipaalagey yo so inkasikayo . . . , mansiansia kayo ed panangaro na Dios.’ (Judas 20, 21) Depende ed kipapasen yo, nayarin anggapo lay nagawaan yo ed sayan panaon pian natulongan so sakey a kapamilyaan a tinmunda lan manlingkor ed si Jehova. Anggaman kuan, nayarian yo tan nepeg yon pabiskegen so inkasikayo ontan met iramay manmamatoor nin kapamilyaan yo. Oniay inkuan nen Veronica, a binmeneg ed katuaan so duara ed taloran anak ton lalaki: “Sikami nen masiken ko so apanonotan a no mansiansia kamin mabiskeg ed espiritual, wala kami ed sankaabigan a kipapasen pian abrasaen lamet iray ananak mi sano ompawil ira. Iner la kasi so nila na samay managdarak ya anak no say ama to et anggapo ed kipapasen a mangawat lamet ed sikato?”

Pian napansiansia yon mabiskeg so espiritualidad yo, magmaliw kayon okupado ed saray maespiritual a kimey. Laktipen na satan so pamasiansia yo ed sakey ya eskedyul na aralem a panagaral na Biblia tan say iyatendi ed saray Makristianon pantitipon. Lawas kayon akaparaan ya ontulong ed arum diad kongregasyon anggad iyabuloy na saray kipapasen yo. Tua, diad primero et nayarin mairap iratan a gawaen. Oniay nanonotan nen Veronica: “Say tampol a gagawaen ko nensaman et isian koy inkasiak a singa sakey ya asugatan ya ayep. Balet imporsigi na masiken ko so pamasiansia mi na maong a rotina ed espiritual. Sineguro to a makapiaral kami. Sano onatendi kami ed kombension, nakaukolan ko so manpakpel pian makakar tan onarap ed totoo. Ingen, sayan programa so lalon amaapit ed sikami ed si Jehova. Samay anak mi a nansiansian matoor so lalon apabiskeg ed satan a kombension.”

Si Maria, ya asalambit ed gapo, so akamoria a nagkalalon makatulong so pansiansian okupado ed lawak na ministeryo tan diad kaplesan et sikato so ontutulong ed apatiran totoo a manaral na Biblia. Ontan met, oniay imbaga nen Laura: “Anggaman inagew-agew ak nin siansia ya onaakis, pisalamatan ko si Jehova ta anggaman agak tinmalona ed impamabaleg ko ed ananak ko a singa agawaan na arum ya atateng, walaan ak na alay abig a mensahe na Biblia, a makatulong ed saray pamilya diad sarayan kaunoran ya agew.” Si Ken tan Eleanor, a tinmaynan iray wala la’d edad ya ananak da manlapud kongregasyon, so angiyarunsa ed saray kipapasen da ya  onalis ed lugar a babaleg so pankaukolan parad saray manangipalapag na Panarian tan linmoob ira ed sigpot-panaon a ministeryo. Saya so akatulong ed sikara pian mansiansian positibo so panmoria ra tan napaliisan da so kigalet ed kaermenan.

Agkayo naaandian na ilalo. Say aro et ‘manilalo ed amin a bengatla.’ (1 Corinto 13:7) Si Ken, ya asalambit ed tagey, so angikuan: “Sanen tinaynan na ananak mi so dalan na katuaan, inisip ko a singa la ra inatey. Balet sanen inatey so agik a bii, anguman so panmoriak. Maliket ak ta say ananak ko et aliwan literal ya inatey tan si Jehova so nantultuloy nin manginanatnat na pankanawnawa pian makapawil ira ed sikato.” On, impatnag na eksperiensya a say dakel a tinmaynan ed katuaan so pinmawil ed saginonor.—Lucas 15:11-24.

Agyo tetetelen so dili yo. Saray ateng so walaan na tendensian mannonot ed apalabas tan magbabawi ira lapud duma so paraan na impangasikaso ra ed saray situasyon. Balet, say manunan punto na Ezequiel 18:20 et say nankasalanan so ipasen nen Jehova a walaan na eebatan ed lingon desisyon to, aliwan say atateng to. Makapainteres ta anggaman dakel so imbaga na libro na Uliran nipaakar ed obligasyon na atateng diad suston panamabaleg ed ananak, masulok a mamipat ed karakel so simbawa parad ananak a talinengen tan unoren da so atateng da. On, saray ananak so walaan na responsabilidad ya onkiwas unong ed nibase ed Biblia a panangipasal na ag-ayadyarin atateng da. Nayarin gagawaen yoy anggaay nayarian yo natan pian ipasal iray ananak yo. Balet, anggaman isipen yo a walaray impakalingoan yo tan saratan so talagan lingo yo, agmankabaliksan a saratan la so sengegan na inkasipa na inad-aro yo manlapud katuaan. Antokaman so kipapasen, anggapo so nagunggona no naynay yon tetelen so dili yo. Panmadmaran yo iray impakalingoan yo, a determinadon agla uliten iratan, tan ipikasi ed si Jehova so panamerdona to. (Salmo 103:8-14; Isaias 55:7) Insan onnengneng ed arapen, aliwan diad apalabas.

Mananos ed arum. Nayarin nairapan so arum no panon da kayon pasesegen odino ligliwaen, nagkalalo la no agda ni naeksperiensya so kipapasen yo. Niarum ni, mandurumaan so totoo no anto so ipapasen dan makapaseseg tan makapaligliwa. Kanian no walay makapansalita na makapadismaya ed sika, iyaplika so simbawa nen apostol Pablo a naromog ed Colosas 3:13: “Mantetepelan so sakey tan sakey, tan manpeperdonaan so balang sakey, no say siopaman a too wala so pangidalman to ed siopaman.”

Respetoen so uksoyan nen Jehova parad panagdisiplina. No adisiplina ed kongregasyon so kapamilyaan yo, tandaan a satan so kabiangan ed uksoyan nen Jehova tan mas pankaabiganan itan na amin, pati say nankasalanan. (Hebreos 12:11) Kanian, resistian so antokaman a tendensia a kritikoen iray mamatatken ya angasikaso ed satan odino saray desisyon a ginawa ra. Tandaan, say sankaabigan a resulta et nagamoran no gawaen iray bengatla unong ed paraan nen Jehova, bangta say isumpa ed saray uksoyan nen Jehova so manresulta lambengat ed lalon pakagonigon.

Kayari na inkiliktar na Israel manlapud Ehipto, si Moises so naynay ya onaakto bilang ukom. (Exodo 18:13-16) Lapud say desisyon a pabor ed sakey ya indibidual so nayarin sumpa ed sananey, mainomay a naisip no akin a walaray adismaya ed saray desisyon nen Moises. Lapud inanap da so lingo ed saray ginawa nen Moises a desisyon, nayarin satan so angitonton ed aminpigan impanrebelde ra ed panangidaulo to. Balet, inusar nen Jehova si Moises pian idaulo so totoo To, tan aliwan si Moises so dinusa To noagta  saray nanrebelde tan saray pamilya ra a sinmuporta ed sikara. (Numeros 16:31-35) Makaaral itayo ed saya diad panrespeto tan pikoopera ed saray desisyon na saramay walaan na teokratikon autoridad natan.

Nipaakar ed saya, nanonotan nen Delores a sikatoy nairapan a mamasiansia na asimbang a panmoria sanen adisiplina ed kongregasyon so anak ton bii. Inkuan to: “Say akatulong ed siak et say impambasa lan impambasa na saray artikulon nipaakar ed inkamakatunongan na saray uksoyan nen Jehova. Walay imbiig kon kuadernok a pangisusulatan ko ed saray punto manlapud saray paliwawa tan artikulo a makatulong ed siak a makapansungdo tan mantultuloy ed panaglingkor.” Saya so mangitonton ed sakey nin importantin paraan na panalona.

Ibalikas yo so liknaan yo. Nayarin makatulong so pitongtong ed sakey odino duaran makatalos a kakaaro a panmamatalekan yo. No gawaen yo itan, pilien iray kakaaro a makatulong ed sikayo pian napansiansia yo so positibon awawey. Maseguron sankaepektiboan so pangibesngaw odino ‘pangipaway yo ed puso yo’ diad pikakasi ed si Jehova. * (Salmo 62:7, 8) Akin? Lapud natatalosan to so kaaralem na liknaan yo. Alimbawa, nayarin isipen yo ya agmakatunongan so pakaeksperiensya ed ontan a gonigon ed emosyon. Tutal, agyo imbeneg si Jehova. Ibesngaw yo so liknaan yo ed si Jehova, tan patulongan kayo ed sikato a makamoria ed kipapasen diad agtanton ansakit a paraan.—Salmo 37:5.

Diad ilabas na panaon, nayarin mas mainomay yo lan nakontrol so liknaan yo. Kaleganan ni, ag-onsusuko ed saray sagpot yon paliketen so mangatatawen ya Ama yo, tan agbalot iisipen a saratan et andiay kakanaan. (Galacia 6:9) Tandaan, no ibeneg tayo si Jehova, wala nin siansia iray problema tayo. Diad biek a dapag, no mansiansia itayon matoor ed sikato, tulongan to itayo ed saray subok ya aarapen tayo. Napaseguroan kayo sirin ya amta nen Jehova so laknab na kipapasen yo tan itultuloy to kayon ikdan na nakaukolan yon biskeg diad dugan panaon.—2 Corinto 4:7; Filipos 4:13; Hebreos 4:16.

[Saray paimano ed leksab]

[Kahon ed pahina 19]

No Panon Kayon Makatalona

◆ Pabiskegen odino ‘ipaalagey yoy inkasikayo, mansiansia kayo ed panangaro na Dios.’—Judas 20, 21.

◆ Agkayo naaandian na ilalo.—1 Corinto 13:7.

◆ Agyo tetetelen so dili yo.—Ezequiel 18:20.

◆ Mananos ed arum.—Colosas 3:13.

◆ Respetoen so uksoyan nen Jehova parad panagdisiplina.—Hebreos 12:11.

◆ Ibalikas yo so liknaan yo.—Salmo 62:7, 8.

[Kahon/Litrato ed pahina 21]

Kasin Tinmunda Kan Manlingkor ed si Jehova?

No ontan, antokaman so rason et napepeligro so relasyon mo ed si Jehova tan say ilalom ed arapen. Nayarin getmam so ompawil ed si Jehova. Kasin pampoporsigian mo la itan natan? Odino ipapaleen mo ni itan anggad onsabi so “dugan panaon”? Tandaan, maples a manasingger so Armagedon. Niarum ni, say bilay ed sayan sistema et antikey tan andiay pakaseguroan. Agmo amta ingen no mabilay ka ni nabuas. (Salmo 102:3; Santiago 4:13, 14) Oniay imbaga na sakey a too ya adiskobrin walaan na makapatey a sakit: “Siak so adapoan na sayan sakit legan a manlilingkor ak ed sigpot-panaon, ya anggapo iray makapabaing ya isesekretok. Tan makapaligliwa itan a liknaan natan.” Balet isipen pa no anto so liknaan to sano sikato so adapoan na sakit tan inkuan ton, “Walan siansia so panaon ya ompawil ak ed si Jehova!” No tinmunda kan manlingkor ed si Jehova, natan la so sankaabigan a panaon pian ompawil.

[Saray litrato ed pahina 18]

Say pagmaliw ya okupado ed espiritual iran aktibidad so makatulong pian napansiansia yo so dugan panmoria