Saray Pabitar ed Komaliman Libro na Salmos
Say Salita nen Jehova et Mabilay
Saray Pabitar ed Komaliman Libro na Salmos
NAYARIN oniay ikuan na mayaman: “Saray lalaki ya anak mi singa ra komon tanaman a binmaleg ira ed legan na kalangweran da, tan saray bibii ya anak mi singa ra komon saray batobato ed suyok, a pinasileng ya inyalig ed sakey a palasyo; Sano saray kamkamalir mi napano ra . . . tan saray karkarnero makapan-anak ira na nilibo.” Niarum ni, nayarin oniay ikelyaw na mayayaman: “Mainawa so katooan, a wala ed sakey ya ontan a kipapasen!” Balet diad pidumaan, oniay inkuan na salmista: “Mainawa [“maliket,” NW] so totoo a say Dios da et si Jehova.” (Salmo 144:12-15) Panon a magmaliw ya ontan? Si Jehova et maliket a Dios, tan say liket so naeeksperiensya na saramay mandadayew ed sikato. (1 Timoteo 1:11) Nipabitar iyan katuaan diad kaunoran a seksion na saray kantan impuyan na Dios, a manugyop ed Salmos 107 anggad 150.
Ipapabitar met na Komaliman Libro na Salmos iray matalonggaring a kalidades nen Jehova laktip lay maaron-kaabigan to, inkamatua to, tan kamaongan to. No lalon natebek tayo so personalidad na Dios, lalon napakiwas itayo a mangaro tan ontakot ed sikato. Bilang resulta, saya so mamaliket ed sikatayo. Agaylan makanakanan mensahe so naromog tayo ed Komaliman Libro na Salmos!—Hebreos 4:12.
MALIKET LAPUD MAARON-KAABIGAN NEN JEHOVA
“O komon no saray totoo et idayew da si Jehova lapu ed abig na linawa to, tan lapu ed makapakelkelaw ira a gawa to ed saray anak na totoo,” so inkanta na saray adakep a Judio ya ompapawil manlapud impakakautibo ed Babilonia. (Salmo 107:8, 15, 21, 31) Bilang panangidayew ed Dios, oniay inkanta nen David: “Say katuaan mo makasabi angga ed saray lurelurem.” (Salmo 108:4) Diad tinmumbok a sonata, oniay impikasi to: “Tulongan mo ak, O Jehova a Dios ko; ilaban mo ak unong na panangasim.” (Salmo 109:18, 19, 26) Say Salmo 110 et mapropetikon kanta nipaakar ed panuley na Mesias. “Say katatakot ed Jehova sikato so sengeg na kakabatan,” so inkuan na Salmo 111:10. Unong ed tinmumbok a salmo, “mapalar so too ya antakot to si Jehova.”—Salmo 112:1.
Say Salmo 113 ya anggad 118 so tinawag a Hallel a Salmos, lapud aminpigan inusar na saratan so balikas a “Hallelujah,” odino “Idayew si Jah!” Unong ed Mishnah—sakey a sulat nen komatlon siglo ya angikurit ed asasakbay ya insalitan tradisyon—saratan so kinanta legan na Paskua tan diad taloran tinaon a piesta na saray Judio. Say Salmo 119, a sankarukeyan a salmo tan kapitulo na Biblia, so mangipapabitar ed niparungtal a salita, odino mensahe, nen Jehova.
Makasulatan Iran Tepet a Naebatan:
109:23—Anto so labay ya ibaga nen David sanen inkuan ton: “Iman ak la a singa anino no onkiling”? Si David et maanlong a mansasalita a liknaen ton asingger la so ipatey to.—Salmo 102:11.
110:1, 2—Anto so ginawa na “Katawan [nen David],” a si Jesu-Kristo legan ya akayurong ed nikawanan na Dios? Kayari na inkioli to, si Jesus so tinmokotok ed tawen tan nanalagar diad nikawanan na Dios anggad 1914 pian onggapon manuley bilang Ari. Legan na satan a panaon, inuleyan nen Jesus iray alanaan a papatumbok to, ya inwanwan to ira ed kimey a panagpulong tan panaggawa na babangatan tan imparaan to met ira a manuley a kaiba to diad Panarian to.—Mateo 24:14; 28:18-20; Lucas 22:28-30.
110:4—Anto so ‘malet ya insipan nen Jehova ya agto pagbabawian’? Saya imay impisipanan nen Jehova ed si Jesu-Kristo pian manlingkor bilang Ari tan Atagey a Saserdote.—Lucas 22:29.
113:3—Diad anton paraan a nepeg ya idayew so ngaran nen Jehova “manlapu ed itayagtag na banwa ya angga ed iselek to”? Saya so aglabat mangilalanor ed inagew-agew a pangidayew ed Dios na sakey a grupo na totoo. Manlapud itayagtag na banwa diad bukig ya angga ed iselek na satan diad sagur, saray sinag na banwa so manliliwawa ed interon globo tayo. Mipadpara, si Jehova so nepeg a nidayew ed interon dalin. Ag-itan nagawaan no anggapo so organisadon pansagpot. Bilang Tasi nen Jehova, walaan itayo na mabmablin pribilehyo a mangidayew ed Dios tan maseseg a mibiang ed kimey a panangiyabawag ed Panarian.
116:15—Panon ‘kamabli ed mata nen Jehova so ipapatey na saray sasanto’ odino matoor ed sikato? Saray mandadayew ed si Jehova so mabmablin tuloy ed sikato ya ipapasen to so ipapatey da bilang sakey ya ulop, odino grupo, a masyadon mabli pian abuloyan. No paulyan nen Jehova a nagawa itan, ompatnag a singano mas mabiskeg iray kabusol to nen say sikato. Niarum ni, anggapo so natilak diad dalin a mangigapo na balon mundo.
119:71—Anto ta so maong ed panagmak na irap? Say kairapan so makapangibangat ed sikatayo pian sigpot a manmatalek ed si Jehova, manpikasi ed sikato a masimsimoon, tan lalon manseet ed panagaral ed Biblia tan pangiyaplika ed ibabaga na satan. Niarum ni, say ikiwas tayo ed kairapan so mangiparungtal ed kalilingoan tayo bilang too a nayari nin ipetek. Agtayo pansakitan na linawa so kairapan no abuloyan tayo itan a mamino ed sikatayo.
119:96—Anto so kabaliksan na “kasumpalan na amin ya inkayadyari”? Say tutukoyen na salmista et say inkayadyari unong ed punto de bista na too. Nayarin sankanonot to a limitado so pakatalos na too nipaakar ed inkayadyari. Diad pidumaan, say ganggan na Dios so andian na ontan a limitasyon. Onaplika so panangiwanwan na satan ed amin ya aspekto na bilay. Oniay nabasa ed Maung a Balita: “Naaralan ko ya aliwan ayadyari ya ami’y bengatla; balet ayadyari so ganggan mo.”
119:164—Anto so makabkabaliksan nipaakar ed pangidayew ed Dios a ‘maminpito ed sanagew’? Say bilang a pitora et mabetbet a mankabaliksan na inkanagnap. Kanian, idadanet na salmista a si Jehova so makanepegan na amin a dayew.
Saray Leksion Parad Sikatayo:
107:27-31, MB. Say kakabatan na mundo et ‘magmaliw ya anggapoy kabaliksan’ sano onsabi Armagedon. (Apocalipsis 16:14, 16) Anggapoy siopaman a niliktar na satan manlapud kaderal. Saramay maniilalo lambengat ed si Jehova parad kilalaban so nabilay pian ‘mangidayew ed sikato lapu ed abig na linawa to.’
109:30, 31; 110:5. Say kawanan a lima na sundalo a mamebemben ed kampilan et kaslakan ya agnasasalimbengan na kinlong, a bebembenan na kawigi. Diad piguratibon paraan, si Jehova so walad “nikawanan” na saray lingkor to, pian milaban parad sikara. Kanian sikara so sasalimbengan tan tutulongan to, a sakey ya alay abig a rason pian ‘misalamat tayo ed sikato na abalbaleg’!
113:4-9. Si Jehova so atagtagey a tuloy a kaukolan to ni manpaabeba pian ‘onnengneng ed tawen.’ Ingen, sikato so maabagey ed saray mapaabeba, ed saray mairap-bilay, tan ed bii a lepes. Mapaabeba so Soberanon Katawan a Jehova tan kaliktan to a magmaliw met ya ontan iray mandadayew ed sikato.—Santiago 4:6.
114:3-7. Say pakaaral ed makapakelkelaw iran gawa nen Jehova a ginawa to ed biang na totoo to diad Ambalangan Dayat, diad Ilog Jordan, tan diad Palandey Sinai so nepeg a mangapektan maong ed sikatayo. Saray totoo, ya irerepresenta na “dalin,” so nepeg ya ontakot, odino “onggiwgiw,” dia ed arap na Katawan.
119:97-101. Say igamor na kakabatan, pakatebek, tan pakatalos manlapud Salita na Dios so manalimbeng ed sikatayo sumpad pakaderal ed espiritual.
119:105. Say Salita na Dios et sakey a silewan ya onkana ed salisali tayo diad pantalos a makatulong itan ed sikatayo pian napidenengan iray peles a problema tayo. Satan met so piguratibon manliliwawa ed basbas tayo, lapud niparungtal la ditan so gagala na Dios ed arapen.
MALIKET ANGGAMAN ED SARAY KAIRAPAN
Panon tayon naarap iray makapasubok a situasyon tan natalonaan iray kairapan? Say Salmo 120 anggad 134 so malinew a mangeebat ed sayan tepet. Natalonaan tayo so kairapan tan mansiansia itayon maliket no patulongan itayo ed si Jehova. Sarayan salmo a tatawagen na Kanta ed Katatatdang, so maseguron kinanta legan ya ontatatdang iray Israelita ed Jerusalem pian selebraan iray tinaon a piesta.
Say Salmo 135 tan 136 so manideskribe ed si Jehova bilang Managgawa na antokaman a makapaliket ed sikato, a midumaan a tuloy ed saray andian na pakayarin talintao. Tinibukel so koma-136 a Salmo parad alawatan a panagkansion, a say unor a parte na kada bersikulo et kakansionen bilang katumbokan na unona. Isasalaysay na sinmublay a salmo so makapaermen a kipapasen na saray Judio ed Babilonia a nampirawat a mangidayew ed si Jehova diad Sion. Say Salmo 138 anggad 145 so tinibukel nen David. Kaliktan to a ‘pisalamatan si Jehova ed sankabukel [odino interon] puso to.’ Akin? “Ta makapataktakot tan makapakelkelaw so inkagawa na inkasiak,” so inkuan to. (Salmo 138:1; 139:14) Diad tinmumbok a limaran salmo, impikasi nen David a sikato komon so niyagel sumpad mauges a totoo, baaten ed inkatunong, niliktar manlapud saray manamasegsegang, tan niwanwan ed kurang to. Impabitar to so inkaliket na saray totoo na Dios. (Salmo 144:15) Kayarin nirepaso nen David so inkatalonggaring tan kamaongan na Dios, oniay inyabawag to: “Say sangik salitaen to so galang nen Jehova; tan amin a laman galangen day masanton ngaran to ed lawas lan lawas.”—Salmo 145:21.
Makasulatan Iran Tepet a Naebatan:
122:3—Panon a say Jerusalem et sakey a syudad a ‘ginawa a putel’? Singa ed kaslakan a gagawaen ed saray syudad ed kadaanan a panaon, saray kaabungan ed Jerusalem so impaalagey a nanaabay. Say syudad et aseksek kanian mainomay ya idepensa. Niarum ni, lapud nanaabay iray mismon kaabungan, nailaloan na saray manaayam ed syudad a nagamoran da so tulong tan proteksion manlapud sakey tan sakey. Ipapatnag na saya a walay espiritual a pankakasakey na 12 tribu na Israel sanen nantitipon ira parad panagdayew.
123:2—Anto so punto na ilustrasyon nipaakar ed matamata na lalaki ya aripen? Saray lalaki tan bibii ya ariripen so mangiimano ed lima na amo ra diad duaran rason: pian naamtaan da no anto so labay ton pagawa ed sikara tan pian nagamoran da so proteksion tan saray nakaukolan da ed bilay. Mipadpara, manilalo itayo ed si Jehova ta pian natebek tayo so linawa to tan nagamoran tayo so panangabobon to.
131:1-3—Panon a si David so ‘nankalakal tan pinareen to so kamarerwa to a singa sakey ya ugaw a pinakso nen ina to’? Unong a naaralan na pinakson ugaw so natambayo tan napenek ed lakap na ina to, naaralan met nen David a ligliwaen tan padeenen so kamarerwa to a “singa sakey ya ugaw a pinakso nen ina to.” Panon? Diad agto impagmaliw a mapaatagey tan diad agto impanggegemtan na saray bengatlan balbaleg parad sikato. Agpinirawat nen David so inkaprominente, imbes, lawas a binidbir to iray limitasyon to tan impatnag to so kapaabebaan. Maabig no sikatoy aligen tayo, nagkalautla sano manadampot itayo na saray pribilehyo ed kongregasyon.
Saray Leksion Parad Sikatayo:
120:1, 2, 6, 7. Saray makaderal tan makapasakit a panagsalita so mangitarok na pirmin segsegang ed arum. Say pangontrol ed dila tayo et sakey a paraan pian nipatnag tayo a “pirawat [tayo] so kareenan.”
120:3, 4. No mantetepel itayo ed sakey a walaan na “manamalingo a dila,” naligliwa itayo ed pakaamtan si Jehova so mangipetek ed saray pamaakaran diad aturon panaon to. Saray managpauges so deralen na sakey a “mabiskeg.” Seguradon idapo ed sikara nen Jehova so ambelat a panangukom to ya isisimbolo na “saray ngalangalab na [kiew ya] enebro.”
127:1, 2. Diad amin a gagawaen tayo, nepeg a sikatayo so paiwanwan ed si Jehova.
133:1-3. Say pankakasakey na totoo nen Jehova so makaligliwa, makapaliket, tan makaparepresko. Agtayo nepeg a buyaken itan diad naynay a pananap na lingo, pikolkol, odino panreklamo.
137:1, 5, 6. Saray adakep a mandadayew ed si Jehova so mamapablin tuloy ed Sion, a satan so angirepresenta ed organisasyon na Dios. Komusta itayo? Kasin matoor itayon mamapabli ed organisasyon ya uusaren nen Jehova natan?
138:2. ‘Papabalegen nen Jehova so salita to ya alabas nen say amin a ngaran to’ diad pantalos a say kasumpalan na amin ya insipan to unong ed ngaran to so alabas ni nen say antokaman a nayarin iilaloan tayo. Peteg ya alay abig iray bengatla a manatalaran ed sikatayo tayo diad arapen.
139:1-6, 15, 16. Amta nen Jehova iray kimkimey tayo, saray kanonotan tayo, tan saray salita tayo anggan agtayo ni nibalikas iratan. Kabkabat to itayo la anggan sanen napoporma itayo ni labat ed panag-anakan na ina tayo, sakbay a natuop so kada parte na laman tayo. Say pikakabat na Dios ed sikatayo bilang indibidual et “makapakelaw a tuloy” ya ag-iratan natukor. Agaylan makaligliwan naamtaan ya aglambengat iimanoen nen Jehova so mairap a situasyon a nayarin kidungetan tayo noagta tatalosan to met so epekto na satan ed sikatayo!
139:7-12. Anggapo so pasen a nayarian tayon laen ya agnasabi nen Jehova pian mamabiskeg ed sikatayo.
139:17, 18. Kasin makapaliket ed sikatayo so pikakabat nipaakar ed si Jehova? (Uliran 2:10) No ontan, walaan itayo na agmanganggan lapuan na gayaga. Saray kanonotan nen Jehova et “dakdakel ira ed bilang nen saray buer.” Lawas a dakel ni so naaralan tayo nipaakar ed sikato.
139:23, 24. Nepeg ya abuloyan tayo si Jehova a mangusisa ed akindalem ya inkatoo tayo parad ‘bagel a kagagawa’—salanti, saray agmanepeg a kanonotan, pilpilalek, tan inklinasyon—tan patulongan itayo a mangiwaklit ed saratan.
143:4-7. Panon tayon nasungdoan so pirmin kairapan? Ibabaga ed sikatayo na salmista so manunan makatulong: Dalepdepen so kimey nen Jehova, nodnonoten tayo lawas iray gagawaen to, tan manpikasi a tulongan to itayo.
“Idayew Yo si Jehova!”
Amin ya inmunan apatiran seksion na saray salmo so anampot panamegley na balikas na panangidayew ed si Jehova. (Salmo 41:13; 72:19, 20; 89:52; 106:48) Ontan met so impanampot na kaunoran a seksion. Oniay ibabaga na Salmo 150:6: “Amin a bengatla a wala so panlinlinawa to idayew to si Jehova. Idayew yo si Jehova!” Petepeteg ya ontan so nagawa ed balon mundo na Dios.
Legan tayon tatalaranan itan a makapaliket a panaon, walaan itayo na dakel a rason pian igloria so tuan Dios tan idayew so ngaran to. Sano isipen tayo so liket a naeeksperiensya tayo lapud kabat tayo si Jehova tan walaan itayo na maapit a relasyon ed sikato, agta napakiwas itayon mangidayew ed sikato tekep na puson napno na pisasalamat?
[Litrato ed pahina 15]
Saray alay abig iran gawa nen Jehova so makapadinayew
[Litrato ed pahina 16]
Saray kanonotan nen Jehova et “dakdakel ira ed bilang nen saray buer”