“O Agayla so Panangarok ed Ganggan Mo!”

Say Salmo 119 et sakey a kanta a manideskribe ed liknaan na samay anibukel ed satan nipaakar ed apuyanan a mensahe, odino salita, na Dios. Oniay inkanta na salmista: “Say salitam insinop ko ed utel na pusok.” “Mantaliwa ak a dili ed saray panangitontonan mo.” “Say kamarerwak ombetag nipaakar ed pantintindek to ya angga ed saray panagis-isip mo ed saray amin a panaon.” “Saray panamintuaan mo sikara so kalikliket ko.” “Nantintindekan ko so bilibilin mo.” “Mantaliwa ak a dili ed saray ganggan mo, a sikara so inadarok.” “Manumameng ak ed saray panangitontonan mo.” “O Agayla so panangarok ed ganggan mo! Sikato so dalepdep ko ed amin ya agew.”—Salmo 119:11, 16, 20, 24, 40, 47, 48, 97.

Agaylan impapuso a panamabli na salmista ed niparungtal a salita na Dios! Kasin ontan met so liknaan mo nipaakar ed mensahe na Salita na Dios, say Biblia? Kasin labay mon bayuboan so ontan a panamabli ed satan? No ontan, nakaukolan mo nin iyugali so regular a pambasa ed Biblia, no nayari et inagew-agew. Inkuan nen Jesu-Kristo: “Aliwa a say tinapay labat so napambilay na too noag say amin a salitan ombesngaw ed sangi’ Dios.” (Mateo 4:4) Komadua, nepeg mon dalepdepen so babasaen mo. Say panmorekdek ed katuaan nipaakar ed Dios, saray kalidad to, say linawa to, tan say gagala to so mamaaralem na panamablim ed Biblia. (Salmo 143:5) Tan sankaimportantian et nepeg mon iyaplika so maabig a simbawa na satan diad inagew-agew a panagbilay mo.—Lucas 11:28; Juan 13:17.

Panon kan nagunggonaan no bayuboan mo so panamabli ed ibabaga na Biblia? “Mapalar so saray mangunor na panamintuan [na Dios],” kuan na Salmo 119:2. Saray panonot a naromog ed Biblia so ontulong ed sika pian natalonaan mo iray problema ed bilay. (Salmo 1:1-3) Nagamoran mo so kakabatan, aralem a pakatalos, tan pakatebek, a ‘mamuger ed salisalim ya onarawi ed saray mauges a dalan.’ (Salmo 119:98-101) No naamtaan mo so katuaan nipaakar ed Dios tan ed gagala to parad dalin, magmaliw a lalon makabaliksan so bilay mo tan magmaliw a masnag so ilalom ed arapen.—Isaias 45:18; Juan 17:3; Apocalipsis 21:3, 4.

Interesadon tuloy iray Tasi nen Jehova ya ontulong ed arum pian lalon naamtaan da so nipaakar ed Biblia tan pian nabayuboan da so panamabli ed mensahe na satan. Masimoon kamin mangiimbita ed sika a mangawat ed onggendan ya iyoopresi mi.